هه‌ر تشتێ گرێداى ويدات حسێن ل سه‌ر زارێ بابێ وى
ئه‌ڤرۆ نيوز، ئەمیر ئەترووشی:
کۆشتنا رۆژنامەڤان وەدات دھۆک ب شێوەیەکێ درندانە، نە روودانا ئێکێ یە ل پارێزگەھا دھۆکێ رووددەت، بەلکو کۆشتنا کچا ساڤا (مینا) گەلەک یا ژ ڤێ روودانێ دوور نەبوویە. بابێ رۆژنامەڤان وەدات د دیدارەکێ دا بۆ باس ئاشکرا کر، وەدات ب شێوەیەکێ دراندنە و ھۆڤانە ھاتیە کۆشتن و پێدڤیە ب زووترین دەم بکۆژێن وی بھێنە دەستەسەرکرن و دادگەھکرن و گۆتیشی: مەکتەبا سەرۆک بارزانی پەیوەندی ب من کریە و گۆتیە سەرۆک ب ڤێ روودانێ خەمگینە و دێ ھەموو ھەولا دەت بۆ دەستەسەرکرنا بکۆژێن وی.
حسێن مەلا عەلی دوسکی بابێ رۆژنامەڤان وەدات د دیدارەکێ دا بۆ ئه‌ڤرۆ دیارکر، ل رۆژا شەمبی رێککەفتی 13/8 دەنگویێ برینداربوونا کۆرێ من گەھشتە مە و پشتی ئەم گەھشتینە نەخۆشخانێ یێ تمام بووی و ب شێوەیەکێ ھۆڤانە و درندانە ھاتیە کۆشتن و گۆتیشی: ل دانێ سپێدێ وەدات ژ ئالیێ دو ترۆمبێلان ڤە ھاتیە رەڤاندن و پشتی ھینگی بریندار و کۆشتی ھاتیە دەستەسەرکرن.
ناڤبری ئاماژە دا وێ چەندێ کو وان چ گۆمان ل سەر چ کەسان نینن و چ گۆمان ل سەر چ پارتێن سیاسی ژی نینە و ئەم ژ کەسێ د تۆرە نینین و ئەم نەشێین گۆمانا خۆ ل سەر کەسێ بکەین، چونکو گۆمان یا دروست نینە ھەتا بەلگە ئاشکرا نەبن ئەم نەشێین گومانێ ل سەر کەسێ بکەین و گۆتیشی: سکرتێرێ سەرۆک بارزانی ب شێوەیەکێ ئێکسەر پەیوەندی ب من کر و دیارکر کو سەرۆک یێ خەمگینە و گەلەک یێ ل سەر ڤێ مەسەلێ راوەستیای و ل دەمەکێ نێزیک دێ ئەنجامێن وێ روودانێ ئاشکرا کەین و مە باوەریەکا مەزن ب سەرۆک بارزانی ھەیە کو ل دەمەکێ نێزیک ڤێ روودانێ ئاشکرا بکەت.
سەرداد حسێن برایێ وەدات دھۆکی کو رۆژا روودانێ ل گەل وی بوو، بۆ ئه‌ڤرۆ دیارکر، ئەم ل دەڤەرا کورا سەر ب ناحیا زاویتەڤە د ئاکنجی نە، ل رۆژا روودانێ ل دەمژمێر 8 سپێدێ من وەدات ژ خەو ھشیارکر و گۆتێ رابە من و ھەڤژینا من بگەھینە دھۆکێ و تو ژی ھەرە سەر کارێ خۆ، چوندو وەدات ھۆلا محەمەد عارف جزیری سەر ب رێڤەبەریا گشتیا رەوشەنبیری و ھونەری ڤە فەرمانبەر بوو، ل دەمژمێر 9:10 ئەم گەھشتینە دھۆکێ و من ھەڤژینا خۆ دانا مالا دایکا وێ، پشتی ھینگی ئەم بەرەڤ مالتایێ ڤە چووین دا من بگەھینیتە سەر کاری کو من ل سەر خانیەکی کاردکر و ئەلیکوبان بۆ ددانا.
سەرداد زێدەتر گۆت: پشتی ئەز دانایم و بۆ ماوێ ئێک دەقیقە ژ من بۆری، ئەز چوو بۆ مە دخانی ڤە، قەرەبالغەک ل وێڤەتر پەیدابوو، ئەز چوومە جھێ روودانێ من دیت ترۆمبێلا وەداتی یا ل وێری و وەدات تێدا نینە، من پرسیار کر گۆتن دو ترۆمبێل ھاتن ل دور ترۆمبێلا وی زڤرین و دەبانجە کرنە د سەرێ شۆفێری را و شۆفێر کرە د ترۆمبێلەکا دی دا و کۆلاڤەکا رەش کرنە سەری و بەرەڤ رێیا دھۆک سێمێل رەڤاندن. ل دووڤ گۆتنێن دیدەڤانەکێ نێزیک جھێ روودانێ ئاشکرا کریە کو وی پرسیار ژ وان کر کا دێ بۆچی وی رەڤینن، گۆتن ڤی شۆفێری ترۆمبێل ل زارۆکەکی دایە و کۆشتیە و ئەم پۆلیسین دێ وی دەستەسەرکەین.
سەرداد حسێن برایێ وەدات دھۆکی ئاماژە دا وێ چەندێ کو پۆلیس ل جھێ روودانێ ھەبوون و ئەو ژی ل گەل پۆلیسان چوویە بنگەھی بۆ دانا پێزانینان، بەلێ چو دیار نەبوو، ل دەمژمێر 11 سپێدی پەیوەندیەک بۆ وان ھات و گۆتە وان نەخۆشێ ھەوە یێ ل نەخۆشخانا تەنگاڤیان، پشتی ھینگی ئەم ئێکسەر چووینە نەخۆشخانێ مە دیت وەدات ب تنێ کەلەخە و ب شێوەیەکێ درندانە و ھۆڤانە ھاتیە کۆشتن.
دەربارەی کۆشتنا وی گۆت: وەدات ب درندانە ھاتیە کۆشتن، ب دەستی و ئاسنی ھاتیە قوتان و لێدان و سەرۆچاڤ بۆ نەھێلاینە و ھەتا رەنگە لەشێ وی ژی کارەب کربیت، چونکو رەخێن پێت وی د شوینن.
عەبدولرەحمان حسێن، برایێ بچووک یێ وەداتی و کەسەکێ نێزیک وی تایبەت بۆ باس دیارکر “ئەز پێشمەرگێ ژینگەھێ مە، برایێ من شەھیدێ قەلەمی یە و ئەم شانازیێ ب شەھیدبوونا وی دکەین، وەدات چوو ئەز ژی رۆژنامەڤانم و 100 وەداتێن دی دێ ل شوونا وی دەرکەڤن و وەداتی دەرگەە ڤەکر، خیانەت و غەدرەکا مەزن یا ل وەداتی ھاتیە کرن و پیس یێ ھاتیە ئەشکەنجەدان و پێدڤیە خوونا وی ب ئاڤێ دا نەچیت و ب زووترین دەم بکۆژێن وی بھێنە دەستەسەرکرن.
سەردار ئەو یەک ژی نەڤەشارت کو وەدات پەیامنێری رۆژ نیۆز بوو و کارێ خۆ یێ رۆژنامەڤانی ب شێوەیەکێ سادە و ئاسانی دکر و چ شاشی د کارێ خۆ دا نەدکرن، وەدات نەیێ خێزاندار بوو و ژیێ وی 28 سال بوون و ھەتا پۆلا 12 ئامادەیی خواندیە.