حوکمەت دێ دووڤچوونا هه‌بوونا لەشفرۆشیێ کەت
ئەڤرۆ نیوز:
د چەند ڕاپۆرتێن مافێ مرۆڤی دا ل ناڤخۆ و دەرڤەی ھەرێمێ بەحسێ وێ چەندێ ھاتیەکرن، لەشفرۆشی یا د ناڤ چەند کەمپێن ئاواران دا ھەی و بازرگانیکرنا ب مرۆڤان زێدەبوویە، بۆ ڤێ مەرەمێ ژی حوکمەتا ھەرێما کوردستانێ لژنەکا دووڤچوونێ پێک ئینایە.
دکتۆر دیندار زێباری، سەرۆکێ لژنا دەرخستنا راستیان راگەھاند کو پشتی بەلاڤبوونا چەند ڕاپۆرتێن نێڤدەولەتی یێن مافێ مرۆڤی ل دۆر لەشفرۆشیێ و بازرگانیکرنا ب مرۆڤان بەرانبەر پارەیی ل گەل ئافرەت و کچێن ئاوارە یێن د کەمپێن حوکمەتا ھەرێما کوردستانێ ڤە ئاکنجی حوکمەتا ھەرێمێ دێ لژنەکا دووڤچوونێ پێک ئینایە داکو دیاربیت ئەڤ چەندە راستە یان بتنێ دەنگۆیە.
ناڤھاتی ئاماژە دا وێ چەندێ کو نوکە لژنە مژوولی کارێ خوە یە و دووڤچوونەکا ھووربۆ ڤی بابەتی ل ھەموو کەمپان دکەت، چونکی دڤێت ل ھەرێما کوردستانێ مافێ مرۆڤی یێ پاراستی بیت ب تایبەتی مافێ ئافرەتێ و بۆ دواڕۆژ گۆت: “ل دەمێ بۆری ژی حوکمەتا ھەرێمێ گەلەک کار ل سەر ڤێ چەندێ کریە و ئێک ژ کارێن وێ یێن سەرەکی بوویە”.
ل دووماھیێ ناڤبری دیار کر کو ئەو چو تشتان ئاشکرا ناکەن ھەتا کو کارێ لژنێ ب دووماھی دھێت دێ ھەموو ئەنجامان راگەھینن، ئایا بنەمایێن بازرگانیکرنا ب مرۆڤان و لەشفرۆشی ھەیە یان بتنێ حالەتەک ھەبوویە و کریە گشتگیری.