په‌رله‌مانتاره‌كێ پارتى ب بوكسێ هێرش كره سه‌ر په‌رله‌مانتاره‌كێ سه‌ر ب مالكى ڤه
ئه‌ڤرۆ نيوز:
د روونشتنا ئه‌ڤرۆ يا جڤاتا نوونه‌رێن عيراقێ دا شه‌ر د ناڤبه‌را شاخه‌وان عه‌بدولا په‌رله‌مانتارێ كورد و هه‌يسه‌م جبۆرى، په‌رله‌مانتارێ هه‌ڤپه‌يمانيا ده‌وله‌تا قانوونێ يا سه‌ر ب نورى مالكى ڤه دروست بوو و ژ ئه‌گه‌رێ وێ چه‌ندێ ژى روونشتنا په‌رله‌مانى بۆ ده‌مژمێران هاته پاشخستن.
روونشتنا ئه‌ڤرۆ يا جڤاتا نوونه‌ران يا تايبه‌ت بوو ب ده‌نگدان ل سه‌ر پرۆژێ قانوونا ده‌سته‌يا ده‌رگه‌هێن سنورى و خواندن بۆ راستڤه‌كرنا قانوونا خانه‌نشينا ئێكگرتى، به‌لێ د روونشتنێ دا هه‌يسه‌م جبۆرى داخوازا ده‌نگدانێ بۆ وه‌رگرتنا باوه‌ريێ ژ هشيار زێبارى وه‌زيرێ دارايێ عيراقێ كر.
ب گۆتنا شاخه‌وان عه‌بدولا ئه‌ندامێ فراكسيۆنا پارتى ديموكراتى كوردستان ل په‌رله‌مانێ عيراقێ ژ ئه‌گه‌رێ وێ چه‌ندێ كو ده‌نگدان ل سه‌ر وه‌رگرتنا باوه‌ريێ ژ هشيار زێبارى د به‌رنامێ كارێ په‌رله‌مانى دا نه‌بوو، خسرۆ گۆڕان سه‌رۆكێ فراكسيۆنا پارتى ئه‌و داخوازيا جبۆرى ره‌تكر.
گۆتژى: “د به‌رامبه‌ر ڤێ ره‌تكرنێ دا، هه‌يسه‌م جبۆرى ئاخفتنێن كرێت هێرش كره سه‌ر خسرۆ گۆڕان، د به‌رامبه‌ر دا من ژى ب بۆكسێ هێرش كره سه‌ر”.
ژ ئه‌گه‌رێ دروستبوونا شه‌رى د ناڤبه‌را ڤان هه‌ردو په‌رله‌مانتاران دا روونشتنا په‌رله‌مانێ عيراقێ بۆ ماوێ دو ده‌مژمێران هاته پاشخستن.