ئه‌ڤ ساله پاره دێ ژ قوتابيێن پشكێن ناڤخۆى هێنه وه‌رگرتن
ئەڤرۆ نيوز:
پەیڤدارێ وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ بۆ رۆژناما ئەڤرۆ ئاشکرا کر کو بۆ سالا نوو یا خواندێ 2016 – 2017 دێ 100 ھزار دینار ژ قوتابیێن پشکێن ناڤخۆ یێن ھەموو زانکۆیێن ھەرێمێ ھێنە وەرگرتن، ھاریکارێ سەرۆکێ زانکۆیا دھۆکێ بۆ کاروبارێن قوتابیان ژی گۆت: “ھەتا نوکە چو رێنما بۆ وەرگرتنا پارەیی نەگەھشتینە مە”.
عەباس ئەکرەم، پەیڤدارێ وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ ئاشکرا کر کو وان بەھرا پتریا زانکۆیێن ھەرێمێ ئاگەھدارکرینە ژ ئەگەرێ قەیرانا دارایی بۆ سالا نوو یا خواندنێ ئەو نەشێن پشکێن ناڤخۆ یێن قوتابیان ب رێڤەببەن ھەکە بۆدجا پێدڤی بۆ نەھێتە دابینکرن ژ بەر ڤێ چەندێ بڕیار ھاتەدان بۆ سالا نوو یا خواندنێ 2016 – 2017 دێ 100 ھزار دینار ژ قوتابیێن پشکێن ناڤخۆ یێن ھەموو زانکۆیێن ھەرێمێ ھێنە وەرگرتن داکو پشکێن ناڤخۆ یێن قوتابیان نەھێنە داخستن.
ھەژی گۆتنێ یە کو رۆژناما ئەڤرۆ ل دۆر ڤی بابەتی پەیوەندی ب د. مێھڤان عارف، ھاریکارێ سەرۆکێ زانکۆیا دھۆکێ بۆ کاروبارێن قوتابیان کر گۆتی ھەتا نوکە چو رێنما بۆ وەرگرتنا پاران ژ قوتابیێن پشکێن ناڤخۆ نەگەھشتینە مە و ھەر دەمێ رێنما ھاتن دێ قوتابیان ئاگەھدار کەین