تورکیا دێ ھەشت پەرلەمانتارێ ھەدەپێ دادگەھی کەت
ئەڤرۆ نیوز:
ل گۆر راپۆرتەکا رۆژناما حوریەت یا تورکیا دوھی دادگەھا بلندا تورکیا ب تومەتا پەیوەندی و پرۆپگاندا بۆ پەکەکێ بریار دا کو ھەشت پەرلەمانتارێن پارتیا دیموکراتیک یا گەلان ھەدەپێ ببنە پێشبەری دادگەھێ کو ناڤێ ئۆسمان بایدەمیر سەرۆکێ باژێرڤانیا بەرێ یێ ئامەدێ و ئەندامێ نھا یێ پەرلەمانێ تورکیا ژی ھەیە.
پشتی راگەھاندنا بریارا دادگەھا بلندا تورکیا ئۆسمان بایدەمیر بۆ دەزگەھێن راگەھاندنێ دیار کر کو بریارا ب زۆرێ برنا بۆ دادگەھێ د ڤێ قۆناغا ھەستیار دا دێ رەوشا نھا یا تورکیا و باکورێ کوردستانێ ئالۆزتر کەت، چونکو دادگەھکرنا نوونەرێن خەلکێ دھێتە رامانا دادگەھکرنا ئیرادا ب ملیۆنان خەلکێ کورد و ئەو یەک ب چو رەنگەکێ ناھێتە قەبوول کرن و بەری نھا ژی پارتیا مە دیار کربوو کو ئەو ب چو رەنگەکێ ناچنە دادگەھێ و ھەکە وان ب زۆرێ ببەن ژی دێ رەوش خرابتر بیت و ژ بەر ھندێ ژی ئەم ھیڤیدارین کو دادگەە پێداچوونێ د بریارا خوە دا بکەت.
ل ئالیێ دی یاسین ئاکتای ئێک ژ سەرکردێن ئاکپارتیێ ژی راگەھاند کو یێن پشتەڤانیێ ل تیرۆرێ بکەن و رەوشا ناڤخوەیی یا تورکیا ئالۆز بکەن دڤێت بھێنە دادگەھکرن و دڤێت ھەموو کەس ل تورکیا رێزێ ل بریارێن دادگەھێ بگرن، ژ بەر ھندێ ژی ئەم ھیڤیدارین کو پەرلەمانتارێن ھەدەپێ رێزێ ل بریارا دادگەھا بلند بگرن و مافێ وان ھەیە کو ل گۆر قانوونێ بەرەڤانیێ ل خوە بکەن.