ئیران لایەنێن سیاسی یێن سلێمانی یێ وەک گڤاشتنەک ل سەر بارزانی ب کار دئینیت
ئەڤرۆ نیوز:
دەربارەی سەرەدانا سەرۆکێ ھەرێمێ بۆ بەغدا و ھەروەسا وان داخۆیانیێن ئیرانێ سەبارەت سلێمانی یێ و پاراستنا بارەگایێن پارتی داین، چاڤدێرەکێ سیاسی بۆ رۆژناما ئەڤرۆ دبێژیت: ڤێ جارێ ژی ئیرانێ ل سلێمانیێ دیارکر کو ھیچ پەیوەندیەکا فەرمی ب پارتی نەکریە، بتنێ پەیوەندیەکا کەسینی یا ب وان ھاتیە کرن،لێ ئەڤە جارا ئێکێ نینە ئەو وە دکەن، لەورا دەمێ ناڤەندا بریارا ئێکەتیێ بەیانناما خوە بەلاڤکری، وی دەمی ژی دھاتە گۆتن،کو ئیرانێ شاندەکێ ڤرێکری، داکو ھەردو لایەنا بگەھینیتە ئێک، لێ چو ب دەست وی شاندی ڤە نە ھات، لەورا سلێمانیێ راگەھاند، کو بتنێ سەرەدانەکا تایبەت بوو.
عەبدولسەلام بەرواری ئەو چاڤدێرێ سیاسی یە زێدەتر دبێژیت: ئیرانێ شێوازەکێ ئاشکرا یێ ھەی، ئەوژی دەمێ پەیامەکێ دگەھینن، مەرەما وان یا بەرۆڤاژیە، دەمێ ئەو دبێژن: ئەم دێ بارەگایێن پارتی پارێزین، مەرەما وان ئەوە کو ھەکە وانا بڤێت ئەو دشێن ئەو بارەگا نە نەھێنە پاراستن، ھەروەسا دەمێ ژ مە پرسیار دکەن، ئەرێ وە ھای ژ ھندێ ھەیە،کو پەکەکە خەریکە سلێمانیێ بێخیتە بن دەستێ خوە؟، مەرەما وان ئەوە کو مە ب ھندێ ب ترسینن و بێژن: ئەم دشێین ب رێیا پەکەکێ ل سلێمانیێ ئاریشا بۆ ھەوە چێکەین، دیسا دەمێ دبێژنە مە ئەم دشێین ھاریکاریا وە بکەین ل شەرێ دژی داعشێ،ل ڤێرێ ژی مەرەما وان ئەوە،کو بێژنە مە ئەم دشێین ب رێیا داعشێ ئاریشا بۆ ھەوە دروست بکەین.
بەرواری زێدەتر گۆت: ئیرانێ دڤێت دەستەک و رۆلەک ھەبیت،ل ھەر کریار و بابەتەکێ دا و مفای ژ ھندێ وەردگریت،کو سەرکردێن سلێمانی یێ ( گۆران و ئێکەتی و ئێکگرتوو و کۆمەل) د ئامادەنە خوە بێخنە ژێر رکێبا وان، ژ پێخەمەت ھندێ دا ئاستەنگا بێخنە رێیا سەرۆک بارزانی، ژبەر ھندێ ب ساناھی یە ئیرانێ ئەو دەستھەلات و کاریگەری ل سلێمانی یێ ھەبیت، ھەروەسا ئیران باش سەرۆک بارزانی و پارتی د نیاسیت و دزانیت،کو ب ساناھی نینە بارزانی بۆ خاترا وان دەست ژ ھەلویستێ خوە بەردەت،ژبەر ھندێ وەک فشار ل سەر بارزانی، ئیران پارت و لایەنێن سلێمانی یێ ب کار دئینیت، نە خاسمە ئەو لایەن ب خوە د ئامادەنە خوە بدەنە دەستێ ھەر کەسەکێ،کو دژایەتیا سەرۆک بارزانی بکەت،ئەڤجا چو بەغدا بیت، یان ژی تەھران.
سەبارەت سەرەدانا سەرۆکێ ھەرێمێ بۆ بەغدا ناڤھاتی دبێژیت:ژ مێژە سەرۆک بارزانی یێ گەھشتییە وێ باوەریێ،کو ئێدی چ ئەنجام ژ دانوستاندنا ل گەل بەغدا ناھێنە چاڤەرێکرن، لێ ژبەر ھندێ کو ئەمریکا و ھەڤالێن ئورۆپی ژێ دلنیا بکەت،بارزانی ئامادەیە ھەموو پێنگاڤان ب ھاڤێژیت،داکو بۆ وان دیار بکەت،کو بەغدا یا ئامادە نینە بھێتە پێش،لەورا چوونا سەرۆکێ ھەرێمێ بۆ بەغدا بۆ ھندێ یە،داکو دیار ببیت بۆ ھەڤالێن مە کو بەغدا ئەگەرێ ئاریشا یە نەکو ھەولێر،ھەروەسا دوور نینە ئەڤ سەرەدانە ل سەر داخوازا ئەمریکا و دەولەتێن ھەڤالێن ئورۆپی بیت،ھەروەسا عەبدولسەلام بەرواری دیارکر:سەرۆک بارزانی ڤێ جارێ ب ئاشکرا و راستەوخۆ دێ بابەتێ سەربەخۆیێ و دەولەتێ ل گەل بەغدا بەحس کەت،ھەروەسا بابەتێ پاشەرۆژا مووسلێ پشتی رزگارکرنێ ژی دێ ھێتە بەحس کرن،لەوما دوور نینە بەغدا پیچەک بھێتە پێش،ئەو ژی ژ بەر فشارا ئەمریکا،دێ ھندەک سۆزا ب دەتە مە،وەک پێش مەرجەک بۆ پشکداریا پێشمەرگەی ل شەرێ رزگارکرنا مووسلێ و گۆت ژی:لێ من باوەری نینە بگەھنە چارەسەریەکا موکوم و بەردەوام،ژبەرکو نە ئەو ئنیەت و نە ئەو باوەری ل دەڤ سیاسەتمەدارێن عەرەبێن عێراقی ھەیە.