حه‌بێ و له‌بێ
هه‌ر وه‌كو بیاڤێ ته‌كنۆلۆجى یێ دبیته ده‌ستهه‌لاتا ئێكێ و مایێ خوه د هه‌مى بیاڤێن ژیانا مه دا كریه، ژ سیاسه‌تێ بگره و حه‌تا دگه‌هیته سترانێن فلكلۆرى و شه‌ڤه‌رۆكا و كه‌لوپه‌لێن نوو و زارۆیێن ساڤا، چاوا به‌رى دو سێ رۆژان پۆستێ ئیمێله‌كى به‌لانسا هه‌ردو به‌ربژارێن ئه‌مریكى لێكگوهارتن سه‌رك و بنك كرن، ئیمێلێ هیلارى كلنتونێ و هه‌ڤركێ وێ یێ گه‌ور ترامپ، یان مژارا تویته‌رێ ئۆباماى بۆ وى سه‌رۆكى یه یێ دێ پشتى وى هێت بوویه مانشێتێ مه‌دیایێن ڤێ جیهانێ.
ئه‌ڤجا ڤى ده‌رگه‌هێ نوو و سه‌رده‌م یێ ته‌كنولۆجى گه‌له‌ك ده‌رگه‌هێن كه‌ڤن بۆ مه ڤه‌كرینه، ئه‌ز نه‌چار كرم كو حه‌بێ و له‌بێ سترانا به‌ره‌بابێ مه، كو په‌سته‌كا فلكلۆرێ كوردى یا كه‌ڤنه ڤان رۆژان ل سه‌ر مۆبایل و لاپه‌رێن ئه‌لكترۆنى هاتیه ئه‌بدێتكرن، ب وێ نه‌غمه‌یا (رست) یا خۆش، ب ده‌نگه‌كێ زاخۆیێ یێ تێوه‌رداى ب ئاڤا خابوورى، ڤێ په‌ستێ به‌ره‌بابه‌ك ژ خه‌و راكر دلێن دخه‌و هشیار كرن، ئه‌ز هند مژارێ مه‌زن ناكه‌م و (موباله‌غێ) تێدا ناكه‌م، به‌لێ ئه‌ڤێ بیرهاتنێ هه‌لویسته‌كێ ده‌روونى ل ده‌ف ته‌خه‌كێ لڤاند و زڤرانده گه‌نجاتیێ، ب راستى وه‌كو دبێژن ئه‌ڤه خوارنا گیانى یه، باشترین چاره‌سه‌رى یه، به‌ره‌بابه‌كێ ئارام یێ دبێژیت به‌ره‌بابێ زێرین بێهنا خوه پێ هه‌ل دكێشیت وه‌كو په‌نجه‌ره‌كێ، میمۆریێ سالێن بۆرى دئینیته بیرامه (نیڤ پیره‌مێران)، دیرۆكه‌كا سه‌خى و بێ كه‌رب و كین یا خۆش ل ناڤ په‌یڤێن خوه رادكه‌ت، چونكی دوور بوو ژ ژیانا ته‌كنۆلۆجى یا ب له‌ز دووره ژ تویته‌رى و ئه‌نسترگرام و یاهۆ و ئه‌مازۆن و گۆگل و یۆیتۆب و ویكیپیدیا ئه‌سپین و.. هتد. وه‌ختێ دبێژیت شه‌كر و شه‌بێ مه‌زنتر نه‌بێ، سینگ مه‌ركه‌بێ بۆ من و وه بێ.. یه‌كى مه و یه‌كى خودا.. چارێ مه و چار عه‌شق و یار، پێنجى مه و فه‌رزا خودێ، وێ پێكڤه‌گرێدانا ئۆلى و یا ئازادیا جڤاكى ده‌ته نیشادان، بلا ب ئێدیه‌مێ علمانیه‌تێ بیت، كا مرۆڤێ كورد چه‌ندێ ب ته‌قوا بوو، ل ره‌خه‌كى ژى عه‌شق و ڤیان ل ئاستێ په‌رێسكرنا پیرۆزێن ئاینى بوو، هه‌ر وه‌كو داستانێن مه‌م و زین و خه‌جۆ و سیابه‌ند و هه‌تا دووماهیێ، ئه‌ڤ مه‌ژی هشكاتیا ئسۆلى دوور دئێخیت ژ ناخێ تاكێ كورد، یا ئه‌ز پێشنیاز دكه‌م، ئه‌م بۆچى مفایى ژ سه‌ربۆرا حه‌بێ و له‌بێ وه‌رناگرین و تشتێن كه‌ڤنار بێخینه د خزمه‌تا ده‌روونێ خوه دا، به‌لكو خودێ یه ڤان ئێش و مێشان جه‌لته و نه‌خۆشیان چه‌نده‌كێ ژ خه‌لكێ مه دوور بێخیت و نووچه‌یێن نه‌خۆش ژ بیرا مه ببه‌ت، وه‌كو ل گوندان و ژیانا به‌رێ مێشكێ ته‌نا بوو، له‌ورا ئێش دكێم بوون، ئه‌ڤه سه‌ربۆرا به‌ره‌بابێ مه بوو، ئه‌م گه‌نج كرینه، بۆچى به‌ره‌بابێ ل پێش مه ژى ئه‌م ناگه‌نجتر لێ بكه‌ین، به‌لكو ئه‌و نه‌زانن مه‌ساجان و ئه‌نترنێتى ڤه‌كه‌ن، ما دێ چێ بیت هه‌ما ده‌ستان داهێلین و هزرێن نه‌خۆش بكه‌ین، بلا ئه‌م ب خوه بینه نۆشدارێن خوه. به‌رنامه‌كێ جوان بهێته دارێتن بۆ ڤه‌كرنا سایت و لاپه‌رێن تایبه‌ت ب تشتێن گه‌له‌رى و دابونه‌ریتێن كه‌ڤنار و ده‌وامێ تێدا بكه‌ین هه‌ر به‌ره‌بابه‌ك بچیته د ژیێ خوه دا و بۆ پاشڤه بزڤرین، چونكو ئه‌م نه‌شیاین چو پێشكه‌فتنان بكه‌ین مه گه‌له‌ك خوه جه‌رباند، یێ بكه‌ت بلا بكه‌ت، هه‌ر چاوا بیت دێ باشتر بیت ژ وێ ئێكێ كو هزار مه پاش بكه‌ڤیت، به‌لكو پتر هزرا پێش بكه‌ڤیت، واته هاندانا بیردانكێ بۆ باشتر هزركرنه‌كا ئه‌كتیڤ، ئێك ببیته شێواز و یا دى بكه‌ینه ئارمانج، هینگى دێ مه تایبه‌تمه‌ندیا خوه هه‌بیت، بۆ نموونه به‌رى بچى وۆرك شۆپه‌كێ یان سمیناره‌كا كارا بگێرى، تو گوهێ خوه بده‌یه حه‌بێ و له‌بێ و ب وێ سه‌رگه‌رمیێ بچى به‌حسێ بابه‌ته‌كێ ئه‌كادیمیك و زانستى بكه‌ی، یان هه‌كه پێشمه‌رگه بیت بچیته هێرشه‌كێ، یان هه‌كه قوتابى بیت بچیته تاقیكرنێ.
