دو گۆرێن دی یێن ب کۆم ل شنگال ھاتنە دیتن

ئه‌ڤرۆ نيوز:

قائیمقامێ قەزا شنگال دیار کر ل دەڤەرا شنگال دو گۆرێن دی یێن ب کۆم ھاتنە دیتن و د ھەر گۆرەکی دا نەە ھەتان 10 وەلاتیێن ھاتینە گولەبارانکرن تێدانە و گۆت “ھەتا نھا ھژمارا گۆرێن ب کۆم ل شنگالێ گەھشتیە 29 گۆران”.

مەحما خەلیل، قائیمقامێ قەزا شنگال دیار کر ل سەنتەرێ قەزا شنگال دو گۆرێن دی یێن ب کۆم ھاتینە دیتن و ھەموو وەلاتیێن سڤیل د ناڤ ڤان ھەر دو گۆران دا ژلایێ رێکخراوا تیرۆرستێ داعشێ ڤە ھاتینە گولەبارانکرن بن ئاخکرن و گۆت “ئەم پَیشبینیێ دکەین ھەتا ھەموو دەڤەرێن سەر ب شنگالێ ڤە رزگاردبن و مووسل  ژێ رزگار دبیت پتر ژ 40 گۆرێن ب کۆم بھێنە دیتن، کو ھەتا نھا 29 گۆر ھاتینە دیتن و چ ژ وان گۆرێن ب کۆم نەھاتینە ڤەکرن، ئەڤجا ئەم داخوازی دکەین لیژنێن تایبەتمەند بۆ ڤەکرنا ڤان گۆرێن ب کۆم بھێنە دروستکرن و وەکو دکیۆمێنت بۆ جینوساید ناساندنێ بھێنە پاراستن”.

قائیمقامێ قەزا شنگال گۆت “ل دووڤ پێشبینیان پتر ژ 1300 وەلاتیێن سڤیل یێن ل دەڤەرێن جودا جودا ل قەزا شنگالێ د ناڤ گۆرێن ب کۆم دا ھاتینە شەھیدکرن و ڤەشارتن”.

مەحما خەلیل خویا ژی کر کو حکوومەتا عیراقێ ھەڤکار نینە بۆ ڤەکرنا گۆرێن ب کۆم و ھەتا نوکە چ بۆدجە ژی بۆ بۆ ڤەکرنا گۆرێن ب کۆم نەھاتیە تەرخانکرن و گۆت “مەترسی ھەیە سال دووڤ سالێ زیان بگەھتە گۆرێن ب کۆم، چونکی ئەڤە چەند زڤستان بسەردا ھاتی ھێشتا نەھاتینە ڤەکرن و ئەم داخوازێ دکەین کار بھێتە کرن بۆ ڤەکرنا گۆرێن ب کۆم و ل گۆرستانا تایبەت بھێنە ڤەشارتن”.

کۆمێنتا تە