رێڤه‌به‌رێ گشتيێ په‌روه‌ردا سلێمانيێ ده‌ست ژ كاركێشانا خوه راگه‌هاند
ئه‌ڤرۆ نيوز:
دلشاد عۆمه‌ر رێڤه‌به‌رێ گشتيێ په‌روه‌ردا سلێمانيێ راگه‌هاند كو ئه‌وى ده‌ست ژ كاركێشانا خوه ب نڤيسار پێشكێشى هه‌موو رێڤه‌به‌ريێن ناڤ ديوان و ده‌رڤه‌ى ديوانا وه‌زاره‌تا په‌روه‌ردێ كريه.
دلشاد عۆمه‌ر د نڤيسينه‌كێ دا كو بۆ رێڤه‌به‌ريا ناڤ ديوان و ده‌رڤه‌ى ديوانا وه‌زاره‌تا په‌روه‌ردێ كريه و ل په‌يجێ فه‌رمى يێ رێڤه‌به‌ريێ ل فه‌يسبۆكى به‌لاڤكريه دبێژيت: “ئه‌ز وه‌كو رێڤه‌به‌رێ گشتى يێ په‌روه‌ردا سلێمانيێ د پێناڤى باژێرێ سلێمانێ دا ده‌ست ژ پۆستێ خوه دئينم دا كو باژێرێ سلێمانيێ ب پايته‌ختێ ره‌وشه‌نبيريێ ب مينيت”.
دلشاد عۆمه‌ر ل سه‌ر پشكا گۆڕان به‌رى دو سالان ئه‌و پۆسته وه‌رگرت و د چه‌ند رۆژێن بۆرى دا روو ب روويێ ره‌خنه‌يا بوو ژ ئه‌گه‌رێ گشتاندنا بڕيارا وه‌زاره‌تا په‌وه‌ردێ يا تايبه‌ت ب وه‌رگرتنا نه‌هاتنێن ئه‌وان مامۆستايێن ل بايكوتێ د به‌ردوام، د نووترين بزاڤا وه‌زاره‌تێ دا بۆ شكاندنا بايكوتێ.
بڕيارا ده‌ست ژ كاركێشانا دلشاد عۆمه‌ر پشتى زێده‌تر ژ دو هه‌يڤێن بايكوتا مامۆستايێن نه‌رازى ل پارێزگه‌ها سلێمانيێ و هه‌له‌بچه و ئيدارا گه‌رميان و راپه‌رين دژى سيسته‌مێ پاشكه‌فتكرنا مووچه‌ى دهێت.
ژ لايێ خوه ڤه دوهى پشتيوان سادق وه‌زيرێ په‌روه‌ردێ راگه‌هاند كو “فشار و ترس” يا ل سه‌ر مامۆستايان هه‌ى دا كو ده‌رگه‌هێن قوتابخانان ڤه‌نه‌كه‌ن، ته‌كست ژى كر كو “قه‌ره‌بوويا خواندنا دو هه‌يڤێن بۆرى ناهێته كرن”.
ژ ئه‌گه‌رێ بايكوتێ نێزيكى 50 هزار مامۆستا ژ 2500 قوتابخانان و زێده‌تر ژ 700 هزار قوتابيان ژ خواندنێ هاتينه دابڕين و ئه‌ڤه د ده‌مه‌كى ايه كو ل ده‌سپێكا چريا ئێكێ يا ئه‌ڤ ساله وه‌زاره‌تا په‌روه‌ردێ ده‌واما فه‌رمى يا وه‌رزێ نوو يێ خواندنێ 2016-2017 راگه‌هانديه.