نێچيرڤان بارزانى: ب پشت راستى ڤه ئه‌ڤ ساله دێ ريفراندۆمێ ئه‌نجام ده‌ين
ئه‌ڤرۆ نيوز:
نێچيرڤان بارزانى راگه‌هاند كو دێ د ئه‌ڤ ساله دا ريفراندۆم بۆ سه‌ربه‌خۆيا كوردستانێ هێته ئه‌نجام دان. خۆيا كر ژى كو هه‌كه ئه‌مريكا بڤێت بنگه‌هه‌كێ له‌شكرى ل هه‌رێمێ بدانيت دێ پێشوازيێ لێ كه‌ن.
د چاڤپێكه‌فتنه‌كێ دا ل گه‌ل مالپه‌رێ فيليى يێ ئه‌مريكى نێچيرڤان بارزانى سه‌رۆكێ حوكمه‌تا هه‌رێما كوردستانێ ده‌رباره‌ى ئه‌نجامدانا ريفراندۆمێ بۆ سه‌ربه‌خۆيا كوردستانێ د بێژيت: “ب پشت راستى ڤه ئه‌ڤ ساله دێ ريفراندۆمێ ئه‌نجام ده‌ين”.
بارزانى ئاماژه بۆ وێ چه‌ندێ ژى كر كو ئه‌نجامدانا ريفراندۆمێ ب وێ رامانێ ناهێت كو دێ د جهـ دا سه‌ربه‌خۆييێ راگه‌هينين، به‌لكو وێ نيشان دده‌ت كو دێ بۆ كۆمه‌لگه‌ها نێڤده‌وله‌تى ئاشكه‌را كه‌ت كا وه‌لاتيان چ دڤێت.
سه‌رۆكێ حوكه‌مه‌تا هه‌رێما كوردستانێ به‌حس ل وێ چه‌ندێ ژى دكه‌ت كو ئه‌و نه‌شێن ڤه‌گه‌رنه سه‌رده‌مێن كه‌ڤن و وه‌سان دبينن “عيراقا پشتى مووسل هه‌مان عيراقا به‌رى مووسل نابيت”.
ده‌رباره‌ى هه‌لويستێ توركيا بۆ ئه‌نجامدانا ريفراندۆمێ و سه‌ربه‌خۆيا كوردستانێ نێچيرڤان بارزانى دبێژيت: “ب ره‌نگه‌كێ فه‌رمى مه ئه‌و بابه‌ت ل گه‌ل توركيا به‌حس نه‌كريه، به‌لێ د ئاماده‌نه گوهداريا مه بكه‌ن”.
د پشكه‌كا دى يا چاڤپێكه‌فتنێ دا ده‌رباره‌ى هه‌لويستێ ئه‌مريكا، بارزانى ئاماژه بۆ وێ چه‌ندێ دكه‌ت كو هه‌كه ئه‌مريكا عيراقه‌كا ئێكگرتى دڤێت، “د ژيوارى دا چو عيراقێن ئێكگرتى نه‌ماينه”، ديسا دبێژيت: “هه‌كه ئه‌وان دڤێت ئاراميا ده‌ڤه‌رێ راگرن، دڤێت مامه‌له‌كا جه‌وهه‌رى ل گه‌ل كوردستانێ بكه‌ن”.
ده‌رباره‌يى دانانا بنگه‌هه‌كێ له‌شكرى يێ ئه‌مريكى ل ناڤ هه‌رێما كوردستانێ، سه‌رۆكێ حوكمه‌تێ دبێژيت: “هه‌كه ئه‌مريكا پێدڤى هه‌بوونا بنگه‌هه‌كێ له‌شكرى ل هه‌رێما كوردستانێ كر، سه‌ركردێن مه دێ پێشوازيێ لێ كه‌ن”.
