ئێكه‌تيێ چار سه‌ركردێن خوه سزادان
ئه‌ڤرۆ نيوز:
لژنا بجهئينانا ديسپلينێن ئێكه‌تى نشتيمانى كوردستان كو كوسره‌ت ره‌سۆل سه‌رۆكاتيا وێ دكه‌ت و هێرۆ ئيبراهيم ئه‌حمه‌د ئه‌ندامه تێدا، چه‌ند به‌رپرسان ب ناما سه‌رزه‌نشت و ئاگه‌هداركرنێ سزا دده‌ت.
رۆژا شه‌مبى 8ى نيسانا 2017ێ هه‌ر ئێك ژ كوسره‌ت ره‌سۆل و هێزۆ ئيبراهيم ئه‌حمه‌د و مه‌لا به‌ختيار و حاكم قادر و عه‌دنان مفتى و عۆمه‌ر فه‌تاح و باڤل ته‌له‌بانى ده‌رباره‌ى كێشێن ناڤخۆ يێن ناڤ ئێكه‌تى نشتيمانى كوردستان كۆمبوون و تێدا بڕيار هاته دان چه‌ند به‌رپرسه‌كێن وێ حزبێ ل سه‌ر پابه‌ندنه‌بوون ب په‌يره‌وێ ناڤخۆ يێ ئێكه‌تيێ بهێنه سزادان.
به‌رپرسێم سزادايى يێن ئێكه‌تى نشتيمانى كوردستان ئه‌ڤه‌نه:
- عادل موراد، سه‌رۆكێ جڤاتا ناڤه‌ندى يا ئێكه‌تيێ.
- شاناز ئيبراهيم ئه‌حمه‌د، به‌رپرسا په‌يوه‌نديێن ده‌رڤه يا ئێكه‌تيێ.
- سيروان كوێخا نه‌جم، ئه‌ندامێ سه‌ركرداتيا ئێكه‌تيێ.
- لاهۆر تاله‌بانى، ئه‌ندامێ جڤاتا ناڤه‌ندى يا ئێكه‌تيێ و به‌رپرسێ ئاژانسا زانياريان ل هه‌رێما كوردستانێ.
سيروان كوێخا نه‌جم ئه‌ندامێ سه‌ركرداتيا ئێكه‌تيێ كو ئێكه ژ كه‌سێن سزادايى بۆ رووداو گۆت: “پشكه‌ك ژ مه‌كته‌با سياسى يا ئێكه‌تيێ بڕيار دايه نامێن سه‌رزه‌نشت و ئاگه‌هداركرنێ بۆ مه ب هنێرن، به‌لێ هه‌تا نوكه نه‌گه‌هشتينه ده‌ستێ مه، هه‌ر ده‌مێ گه‌هشتنه ده‌ستێ مه ئه‌وى ده‌مى دێ كۆم بين و مه ژى ئاخفتنا خوه هه‌بيت”.
سيروان كوێخا ته‌كست ل سه‌ر وێ چه‌ندێ كر كو سزادانێ په‌يوه‌نديا ب وێ چه‌ندێ ڤه هه‌يى كو يێ ل سه‌ر نه‌حه‌قيێن ناڤ ئێكه‌تيێ هاتينه ده‌نگ و گۆت: “دياره پشكه‌كا سزادانا مه په‌يوه‌ندى ب وێ چه‌ندێ ڤه هه‌يه كو مه داخوازا كۆمبوونا سه‌ركرداتيا ئێكه‌تيێ كريه و داخواز ژێ كريه كار ب بڕيارێن سه‌ركرداتيێ بهێته كرن، به‌لێ دياره هنده‌ك كه‌سان ئه‌و چه‌ند پێ نه‌خۆشه، ژ به‌ر هندێ بڕيارا سه‌رزه‌نشتكرنێ بۆ مه ده‌ركريه”.
