ل ده‌ڤه‌را دێره‌لۆكێ ژ 500 دونه‌مێن زه‌ڤيێن برنجي ب تنێ 50 دونه‌م هاتينه چاندن
چه‌مێن »هاريكا و بياوێ و گه‌له‌كا و خرابينێ و شێرانكي« و چه‌ندين چه‌مێن ديتر يێن سنورێ ناحيا دێره‌لۆك ب چه‌مێن دهێنه هژمارتن، سه‌ره‌راي وێ يه‌كێ كو دشيان دايه پتر ژ 500 دونه‌مێن عه‌ردي برنج ل ڤان چه‌مان بهێته كرن، لێ بتنێ 50 دونه‌م هاتينه چاندن، وه‌لاتێ ڤێ چه‌ندێ بۆ خه‌مساريا حكومه‌تێ دزڤرينن و حكومه‌ت ژي دبێژيت جوتيار يێ تێره و پێدڤي ب برنجي نينه.
سه‌لاح حاجي ئێكه ژ جوتيارێن ده‌ڤه‌رێ بۆ ئه‌ڤرۆ خوياكر كو ئه‌گه‌رێ سه‌ره‌كي بۆ نه چاندنا برنجي ل ده‌ڤه‌رێ باشبوونا ره‌وشا ئابووري يا وه‌لاتيانه كو نها وه‌كي به‌ري چه‌ند سالان نينه و خه‌لكي پێويستي ب برنجي نينه چونكي مه‌هانه برنجێ وانا دهێت له‌وران ئێدي خه‌لك برنجي ناكه‌ت.
و هه‌روه‌سا ناڤبري گۆت: »هه‌تا سالا 2003 ێ ژي ل چه‌مێ هاريكا چ زه‌ڤي نه‌دمان كو برنج لێ نه دهاته كرن و گه‌له‌ك جاران ژي زه‌ڤيێن برنجي ب ده‌ست خه‌لكي نه دكه‌ڤتن برنجي لێ بكه‌ن، لێ نه وسايه و خودانێن چه‌مي هيڤيا ژ خه‌لكي دكه‌ن به‌س خه‌لك برنجي ل چه‌مێن وان بچينن، لێ خه‌لك برنجي نا كه‌ن ژبه‌ر كو نها خه‌لك يێ تيره«
زێره‌ڤان عه‌بدوللا دڤي واري دا گوت : »راسته خه‌لك نه‌يێ برسي يه و نها برنج بۆ خه‌لكي دهێت، لێ دگه‌ل ڤێ يه‌كێ ژي پێويسته برنج هه‌ر بهێته كرن ل ڤان چه‌مان، چونكي چ ئاسته‌نگێن ئاڤێ ل ڤي چه‌مي نينن و هه‌ڤده‌م برنجێ كوردي كو ل ڤان چه‌مان دهێته كرن نها ل بازاري ژ هه‌موو ره‌نگێن برنجي ب بهاتره و خوشتره و ديار كر، ژي كو گه‌له‌ك يا گرنگه ئيرو برنج بهێته كرن و ئاشكرا ژي كر كو پێويسته حكومه‌ت ژي پتر گرنگيێ ب ڤي كه‌رتي بده‌ت و جۆتياري پالده‌ت بۆ كريارێن چاندنێ و توڤ و كه‌لوپه‌لێن چاندنێ بۆ جۆتياري دابين بكه‌ت، بۆ هندێ كو كارێ چاندنا برنجي ل ڤێ ده‌ڤه‌رێ نه هێته راوه‌ستاندن.
ل سه‌ر ڤێ يه‌كێ عسمه‌ت ئيراهيم به‌رپرسێ هۆبا چاندنا دێره‌لۆكێ بۆ ئه‌ڤرۆ ديار كر، ئه‌و وه‌ك هۆبا چاندنێ ل دێره‌لۆكێ ب گه‌له‌ك ره‌نگان ڤه هاريكاريا جۆتياري دكه‌ن وه‌ك دابين كرنا ده‌رمانێ ئادێ و كيمايێ و گه‌له‌ك تشتێن ديتر، لێ ئه‌ڤ ساله ژ به‌ر ره‌وشا ئابووري يا هه‌رێمێ و نه‌هاتنا بودجه‌يێ هه‌رێمێ وه‌ك پێدڤي ئه‌ڤ هاريكاريه نه‌گه‌هشتيه ده‌ڤه‌را وانا ديسا ناڤبري ئه‌و يه‌ك ژي خويار كر كو جۆتيار وه‌ك به‌رێ نها گرنگيێ ب چاندنا برنجي ناده‌ت و ب تايبه‌تي ژي پشتي ره‌وشا خه‌لكي ب گشتي به‌رڤ باشيێ چوي و گوت: »ژ سه‌رجه‌مێ 500 دونه‌مێن عه‌ردێ چاندنا برنجي ب تنێ 50 دونه‌مان برنج لێ دهێته كرن، سه‌ره‌راي باشبونا ره‌وشا ئابوري يا خه‌لكي نها ئاريشا كێميا ئاميرێن كاركرنێ ژي هه‌يه ل ده‌ڤه‌رێ وه‌ك نه‌بوونا ماكينه‌يێن گێرانێ« و ديار كر، كو ئه‌و ماكينه‌يێن به‌ري نها ل ده‌ڤه‌رێ هه‌ين گه‌له‌ك هاريكار بوون بۆ جۆتياري و جۆتيار ژي دشيا مفايه‌كێ باش ژێ وه‌گريت. ئاشكراكر كو ئه‌و ماكينه ژئاليێ رێكخراوا فاوا ڤه بۆ جۆتياري دهاتنه دابين كرن و نها نه‌ماينه و هه‌تا ئه‌وێن ژئاليێ جۆتياران ڤه ژي هاتينه كرين نها ناهێنه ده‌ڤه‌رێ كو ئه‌ڤه ژي ئێك ژ ئه‌گه‌رێن نه چاندنا برنجيه ل ڤێ ده‌ڤه‌ري.
