یان چنهیه یان ژى پیرۆزه، تهخا نیڤهكێ ژى یا بهرزهیه!
دهمێ مرۆڤ یێ بچووك، گهلهك جاران كهسهك دا چیته د هزرا مرۆڤى دا، ته وهسا هزر دكر یێ باشه یان بهرۆڤاژى، شكل و سالۆخێن وى مرۆڤى د مهژیێ مرۆڤى دا دمان، بهلێ گهلهك ژ وان مرۆڤان مه ژ نێزیك نهدنیاسین، دبیت دهمى و سێرهیێن (موقف) وى مرۆڤ رۆژهكێ ژ رۆژان رهنگێ وى یێ راست نیشا مرۆڤى دابا.
ههروهكى خودانێن مهنتق و فهلسهفێ دبێژن: مرۆڤ سێرهیه، ههر وهختێ مرۆڤى چ تشت نهكرن، وى دهمى د هزرا فهلسهفى دا ئهو نینه، دبیت ژى ئهم د خهیالا خوه دا هندهك تشتان چێكهین، بێ كو ئهم راستیا وان بزانین، بهلێ دهمێ مرۆڤ بهر ب قووناغا ئاقلیڤه دچیت، ههمى تشتا وهكى خوه دبینیت، نه تشتهكى كێم دكهت، نهژى د باشى و چاكیا وى دا دفیرینیت (مبالغه)، نوكه ئهم وهكى جڤاكێ كوردى یێ د قووناغا سفركرن و سهدكرنێ دا ئانكو مه ب چاڤێ نیڤ ب نیڤ نه سهحكریه چ تشتا، دو تویخن گهلهك ژێكدویر و بژالهنه، ئهو ژى:
1. تهخا پیرۆزكرنێ ئانكو ئهوا مرۆڤا 100% ب باشى و چاكى و بێ كێماسى دبینیت، پتریا ڤێ تهخێ ئهو مرۆڤن ئهوێن لایێ شاش و خرابێ مرۆڤا نهبینن، نهدووره ژى خوه ب سهرڤه ببهن و نهڤێت وى لایێ وى بینن، دهمێ ئێك بهحسێ شاشیهكا وان ژى بكهت، د رازى نینن یان ژى باوهرناكهن، بهلێ نزانن كو ئهو ژى مرۆڤه و ههمى تشت یێن ههین، نهخاسمه غهریزێن وى یێن زكماكى كو دێ وى ههڤرووشى شاشى و بێ قانوونیان كهن.
2. تهخا سفركرنێ ئانكو چنهكرنێ 00% ئهڤ تهخه ژى د ناڤ جڤاكێ مه دێ مشه دهێته دیتن، دبیت ئهوا ئهو هزردكهت چ ڤ پێش چاڤێن وى نهكهڤیت یان ژى كهربوكین و زكرهشیا وى وێ راستیا لێ ڤهشێریت، نهدووره لایێ جڤاكى و ئهشیرهت و بنهمال ژى رۆلێ خوه د دیاركرن و بژارهكرنا وان مرۆڤان دا بینیت.
ب دیتنا من یا پێدڤى ئهوه تهخا نیڤهكێ پهیدا ببیت، ههر چ نهبیت دا رهش و سپیان ژێك دیاركهت، خهبات و شۆلێ مرۆڤان ب ههردو چاڤا ببینیت، وهختێ چاكیهك دهێته كرن، بێژیت بهلێ ئهڤا ههنێ هاته كرن، وهختێ ژى شاشیهك بهێته كرن وێ ژى بهرچاڤى جڤاكى بكهت، وى وهختى ههمى تشت دێ د دراست بن، ههر ئێك ژى دێ سهنگا خوه و شۆلێ خوه بینیت، ههكه نه دێ ههر د ڤێ گێژهڤانكێ دا بین ئهوا چهند ساله ئهم تێدا دژین، ئهڤه بۆ ههر مرۆڤهكى دێ تشتهكێ بنهجهـ و راست بیت، دێ وهكى وى دزیكهرى بیت ئهوێ فكتور هیگۆ بهحسێ وى دكهت، دهمێ ب ئاقل دكهڤیت و دزیان دهێلیت و قهشه دبێژتێ: تنێ دیناتى یا ژ ته كێمه!.
