ل ئهڤى پایتهختى مه ئێك خازخازوك نهدیت !
ههتا سالێن ههشتیان ژى وهڵاتێ ئوردن ئێك ژئهوان وهڵاتێن دهڤهرێ یێن پاشڤهمایى و ههتا رادهیهكى مۆركا خێلهكى دهاته ههژمارتن ب تایبهت كو خودان ژێرخانهیهكا ئابوورى یا ههژار ژئالیێ پهترولێ ڤه كو ستوونا سهرهكى یا وهرارا ئابوورى و گهشهپێدانا جڤاكى دهێته ههژمارتن ل وهڵاتان , بتایبهت وهڵانێن دهڤهرێ …
ل بهارا ئهڤ ساله و بكارهكێ جڤاكى بهرێ مه كهفتى ئهڤى وهڵاتى و دهمێ چهند رۆژان ل ( عمان ) ا پایتهخت ماین ..
دئهڤان جۆره سهرهدانان یان گهشتان دا ههر كهس ل گۆرهى هندهك ئارهزوو یان پیشه و تایبهتمهندیا خۆ سهرهدهریێ دكهت .. و تشتێ بۆ من گرنگ (وهكو پتریا جاران) سێ مژارێن سهرهكى بون ( شونوار و جهێن دیرووكى , سیستهمێ جڤاكى و خزمهت و هاریكاریێن بۆ كهسێن خودان پێتڤیێن تایبهت (پهككهفتى ,دانعهمر,بێ سهمیان..) دهێن پێشكێش كرن, و ههلبهت بابهتێن ئهدهبى و رهوشهنبیرى …
وئێك ژئهڤان جهێن كهڤنار و شونوارێن مێژووى ل ناڤهندا پایتهختى ( مهدرهجا رومانى ) بۆ كو ههتا رادهیهك مهزن ئهو ستوون و ناوسك و تهقشك ماینه پاراستى ( و نههاتینه كۆلان و تێكدان ب مهرهما لێ گهڕانا خهزینهو زێرو ئهنتیكهیان ) !
دا ڤهگهڕین سهر مژارا سهرهكى كو مانشێتى بابهتى یه ( دیاردا خوازخازوكیێ و خزمهتێن جڤاكى بۆ خودان پێتڤیێن تایبهت ) ..
ل ئهڤى باژێرى سهرهرایى ئهوێ گێلهشۆكا مرۆڤان وجه و جاددهو شهقامێن پڕى هات و چو لێ تشتێ بالكێش ئهوبو كۆ ته كهسهك نهددیت دهستێ خۆ لبهر ته ڤهگرت و خوازخوازوكیێ بكهت یان ژنهكێ یان زهڵامهكى زارۆكهك (نهخۆش!)ب ڕاچێتا دختورى ڤه لبهر سینگێ خۆ دانابیت و داخوازا هاریكاریێ بكهت بۆ كڕینا دهرمانا و چارهسهریا نوژدارى ..!
دهما من پسیار ژچهندین كهسان كرى و ژ ئهوانا شوفێرێن تهكسیان ( كو پترى هاتن و چون ب تهكسیان بو ) ئهرێ بۆچى دیاردا خازخازوكیێ ل ئهڤى باژێرى بهر چاڤ ناكهڤیت ؟ بهر سڤا ههمویان
ههر ئێك بهرسڤ بۆ دگوتن ژبهركو ژئالیێ حكومهتێ ڤه رێك پێ ناهێته دان و ههر وهسا ب رهفتارهكا نهیاسایى دهێته ههژمارتن ژبهركو ل دوڤ سستهمێ جڤاكى ( سندوقا پشتهڤانیا جڤاكى ) ههر كهسێ خودان پێتڤیێن تایبهت یان شیانێن كارى نهبن (پهككهفتى , نهخۆش , دانعهمر , زارۆیێن بێ سهمیان , ژنێن بێ زهڵام …) ههیڤانه مۆچه ( هاریكاریێن ) خۆ ژ ئهڤێ سندوقێ وهردگرن ,ئهڤجا ههكهر كهسهكى ئهڤ مهرجێن هاریكاریێ ژێ بگرن دڤیا حكومهت هاریكاریێ بۆ بكهت ما بۆچى دێ خازخازوكیێ كهت !
نهبتنێ ئهڤ چهنده بهلكو ئێك ژئهوێن من ئهڤ پسیاره ژێ كرى ( كهسهك رهوشهنبیر بو) گوت ههتا ئهگهر كهسهك تۆشى نهخۆشیهك گران ژى ببیت و یێ ههژار و دهست كورت بیت و پێ چێ نهبیت پارێ چارهسهریێ بدهت وى دهمى ل داخواز كهت ( و لدوڤ پهسهند و راِپورتا نوژدارى ) دێ چارهسهرى یا بێ بهرامبهر بۆ هێته كرن ل دوف سیستهمێ دابین كرنا ساخلهمیێ ( الچمان الصحی ) .
ب راستى ئهڤێ دیتنێ رهوشا خزمهتێن مهیێن جڤاكى ل ههرێما
مه یا كوردستانێ ل بیرا مه ئینان كو سهرهرایى ئهوان خێرو بێرێن وهڵاتى چهند پاشكهفتى و دئاستهك نهشایستهدانه سهرهرایێ ههبونا چهندین ناڤێن زهبهلاح ( وهزارهت ,دهسته ,رێڤهبهرى…) كو ههر ههمو ژى هاتینه دانان ( بۆ خزمهتا ئهڤێ تهخا خودان پێتڤى !) ل دهمهكى دا كو ئهڤه دێ بیته دوو سال كهسێن دانعهمر (ب تایبهتت یێن نهخۆش) ئێك دینارا مۆچێ چاڤدێریا جڤاكى وهرنهگرتیه ههر وهسا یێن دى ژى وهك ژنێن بێ زهڵام ,زارویێن بێ سهمیان.. دگهل نهبوونا سیستهمهكێ بۆ پشتهڤانى كرنا كهسێن نهخۆش وكێم داهات كو گهلهك جاران ژنهچارى بهرێ هندهك ژئهوان ددهت خواستنێ ژ ئهڤى ویێ دى یان ژى ڤهكرنا دهرگههێ خازخازوكیێ لسهر حهسیبا حورمهت و كهرامهتا كهسى !
