پێدڤیه بزاڤا گۆران چ بكهت؟
قۆناغا نها پێدڤی دكهت قۆناغا نوندنا نهرمی یێ بیت، قۆناغا لێكگرێدانا ڕا و نهرینێن هوور و بچووكه، حزبا حهكیم و سیاسیێ حهكیم ئهوه یێ قۆناغێن نازك و چارهنڤیسساز و یێن كو وهرچهرچانهكێ چێدكهن، بهرژهوهندیێن خوه یێن حزبی و نهرینێن خوه یێن بچووك بهێلن و ژێ دهربازبن بۆ مهزنی یێ، مهزنیا بهرژهوهندی و بهرێخوهدانێ، ههر ل رێیا ڤێ دهربازبوونێ ژی چارهسهریا سیاسی وهك بدهستڤهئینانهكا لۆژیكی دێ بیته فریادرهسا وێ قۆناغێ و د ئهنجامدا دێ گههینه قۆناغهكا باشتر و رۆهنتر كو ژ ههژی ههڤوهلاتیان دا بیت و تهڤ ئالی تێدا پشكدار بن و ههست ب بوونا خوه بكهن.
پارتی دیمۆكراتی كوردستان دیرۆكهكا كویر و ب سهربۆر ههیه و د ههر قۆناغهكێ دا و ب تایبهت د قۆناغێن چارهنڤیسساز دا، دیتن و دیتنگههێن خوه یێن حزبی هێلاینه و بزاڤ كریه ل رێیا نواندنا نهرمیێ و راگرتنا بالانسا سیاسی ببیته كۆمكهر، كۆمكهر ب وێ رامان و تێگههشتنا كو كوردستان ئارمانجه و پارتی ئامراز.
نها قۆناغ قۆناغا ریفراندۆمێ یه بۆ سهربهخوهیا كوردستانێ واته قۆناغ نه تنێ نه قۆناغهكا حزبی یه بهلكو نه قۆناغهكا سیاسیه ژی، لێ درست قۆناغهكا نیشتمانیه و پیدڤی یه ههوو لا حزب و رهوشهنبیر و میدیاكار و ههڤوهلاتی ژی ب دیتنهكا نیشتمانی دوور ژ ههستیاریا سیاسی و حزبی سهرهدهریێ ل گهل بكهن و ئهنجامێن وێ ب قازانجا نیشتمان و سهربهخوهیا نهتهوهكا زولمدیتیان بێ دهولهت بهرههم بینن،
ئاشكرایه ههڤبهندیا نێڤبهرا پارتی و بزاڤا گۆران ئالۆز و تیكئالاندی و ب ئاریشه یه، پارتی وهك سالوخهتهكا خوه یا دیرۆكی و پیخهمهت دهربازبوون بۆ قۆناغهكا دی و رۆهنتر و ب دیاركری ژی بۆ سهرخستنا ریفراندۆمێ، بێ مهرج یێ هاتیه پێش و نهرمی نواندیه و تهڤایا دهری و دهرگهه بۆ بزاڤا گۆرا ئێخستیه سهرپشت و ڤالانه، پرسیار ئهوه باشه جڤاتا گۆران دێ چ كهت؟ ئهڤ پرسیاره (ل ههمبهر نهرمی نواندنا پارتی بزاڤا گۆڕان دێ چ كهت؟) دگهل دا ژی بهرسڤا وێ، پرسیار و بهرسڤهكا دیرۆكی، ئهخلاقی، نیشتمانیه و پێدڤیه ئهم ههمی ب پارتێن دی ژی ڤه ب پرسیار و بهرسڤێن خوه بزانین و د ڤێ ناڤبهرێ دا چو حزب و لایهن و كهس ئاڤێ نهكهته ئاشێ فیتنێۆ هاریكار بن و ب خێر بپهیڤن، بریار وهسایه د ڤان نێزیكان دا پارتی دیمۆكراتی كوردستان و بزاڤا گۆران كۆم ببن، بریاره ژی ب رژدى بپهیڤن و دووماهی ب ڤان گرفت و ئالۆزیا بینن، ئهز دبینم كی پتر نهرمیێ بكهت پترین حكمهتا سیاسی ل جهم وی یه، هیڤیدارین ئاقلمهندێن بزاڤا گۆران تایبهت ئهوێن ل شاخ خهباتێن مهزن كرینه و سهربۆر ههنه، ب لۆژیك و نهرمیا سیاسی سهرهدهریێ ل گهل ڤێ قۆناغا چارهنڤیسساز (قۆناغا ریفراندۆما سهربهخوهیا كوردستانێ بكهن) كو وهك ل دهستپێكێ مه گۆت قۆناغا نواندنا نهرمی یێ و ل ههڤ گرێدانا ڕایهلێن ڤهقهتاندیه !!..
