بوچى ل ده‌ما گریێ ژن ده‌ڤێ خوه دگریت و زه‌لام چاڤێن خوه؟
ئه‌ڤرۆ نیوز ، نه‌وزاد هلۆرى:
ده‌ما كو ژن و زه‌لام دكه‌نه گرى ، ژن ده‌ڤێ خوه دگریت و زه‌لام ژى چاڤێن خوه ، شاره‌زایه‌كێ جڤاكى دده‌تن دیاركرن كو ژێده‌رێ سه‌ره‌كیێ گونه‌هـ و شكستنا ژنێ ده‌ڤه و یێ زه‌لامى چاڤ ، و ب گرنگ ژى دبینیت كو زه‌لام چاڤ و ژن ژى ده‌ڤێ خوه ژ ره‌فتار و كریارێن نه‌رێنى بگرن و هوشیاریێ لسه‌ر بكه‌ن ب تایبه‌تى هه‌ڤژین به‌رامبه‌ر هه‌ڤدوو.
یاسین محه‌مه‌د وه‌كو شاره‌زایه‌كێ جڤاكى ل ده‌ڤه‌را بارزان دیاركر كو گه‌له‌ك خواندن و بوچوون لسه‌ر گریا ژن و زه‌لامان هه‌نه و بو ئه‌ڤرۆ نیوز گۆت: ( گرنگترین شرۆڤه‌كرن ژ بو گریا ژن و زه‌لامان ئه‌وه كو زور جاران ژن ژ بو ئاسایكرنا په‌یوه‌ندیێن خوه ل گه‌ل به‌رامبه‌رێ خوه ب تایبه‌تى ل گه‌ل زه‌لامان ئه‌وه كو گریێ وه‌كو جوره‌كێ چه‌كى بكاردئینیت ، و ژلایه‌كێ دنڤه ژن گه‌له‌ك نازك و دلسووزه و نكاریت به‌رگریا نه‌خوشى و وان ئاسته‌نگان بكه‌ت كو ده‌ردورێن وێ دژى وێ بكاردئینن یان ژى دكه‌ن ، و هنده‌ك جاران ژى وه‌كو رێگریكرن ژ وان نه‌خوشى و سته‌مێن بو سه‌ر وێ دهێنه‌كرن نه‌چاره كو په‌نایێ بو گریێ ببه‌ت و بكه‌تن گرى ، و ژلایه‌كێ دنڤه زه‌لام زێده‌تر ژ ژنان دلره‌قترن و كێمتر دكه‌ن گرى ، به‌لێ ده‌ما كو دكه‌ن گرى جوره راستگویه‌ك د گریا وان دا هه‌یه ژ به‌ركو هه‌رده‌ما زه‌لامى گره گرى یان تشته‌كێ گرنگ ژ ده‌ست دایه )
زێده‌تر گۆت: ( د زمانێ جه‌سته‌یى دا هوسا دهێته خویاكرن كو پرانیا ژنان ده‌ما كو دكه‌ن گرى ده‌ستێ خوه ددانن سه‌ر ده‌ڤێ خوه ، و دبه‌رامبه‌ر دا زه‌لام چاڤێن خوه دگرن ، هه‌لبه‌ت زور رامان و خواندن بو ڤێ یه‌كێ هه‌نه ، به‌لێ یا كو ژ هه‌مووان گرنگتر ئه‌وه كو ژێده‌رێ سه‌ره‌كیێ هه‌بوونا هه‌موو گونه‌ه و نه‌خوشیێن ژنێ ده‌ڤه ئانكو زمانه ، و دیاره ژى كو ب هه‌ر ئه‌گه‌را هه‌بیت ژن پتر ب ده‌ڤ و زمانێ خوه دكارن به‌رامبه‌ر ده‌روبه‌رێن خوه ب راوه‌ستن ، ئه‌ڤه نیشا مه دده‌ت كو پێدڤى یه ژن ئێدى زێده‌تر هوشیاریێ لسه‌ر ده‌ڤێ خوه بكه‌ت و زمانێ خوه ب پارێزیت داكو بهێته پاراستن و ل ده‌ف ده‌ردورا خوه هه‌ر ب مه‌زن و ب ره‌وشت بلند و نازك بهێته راگرتن ،د به‌رامبه‌ر دا ده‌ما كو زه‌لام چاڤێن خوه دگریت ئه‌وه كو ژێده‌رێ سه‌ره‌كیێ گونه‌ه و نه‌خوشێن زه‌لامان ژى چاڤه و ئه‌گه‌ر زه‌لام ژى چاڤێن خوه ل خیانه‌ت و بێ ره‌وشتیێ و هه‌موو ئه‌وان تشتان ئه‌ڤێن كو دبیته سه‌ده‌م دناڤبه‌را وى و ده‌وروبه‌رێن وى ب تایبه‌تى هه‌ڤژینا وى نه‌خوش بیت بگریت دێ جاره‌ك دن بیته سه‌ده‌م په‌یوه‌ندى ئاسایى بن ، و ژلایه‌كێ دنڤه هنده‌ك جاران ده‌ما كو ژن ل ده‌ما گریێ ده‌ڤى َخوه دگریت رامانه كو ئه‌وێ دڤێت نازكى و جوانیا خوه بپارێزیت ، و زه‌لامى ژى دڤێت كو خوه راگرى و جه‌ساره‌تیا خوه بپارێزیت )
ل بارا چه‌وانیا مفایێن راگرتنا ده‌ڤ و چاڤان ل ره‌فتارێن شاش ، ناڤبرى گۆت: ( بێگومان ژن و زه‌لام پێكڤه ده‌ما ده‌ڤ و چاڤێن خوه ل ره‌فتارێن نه‌جوان و نه‌شارستانى بگریت ، دێ بیته ژێده‌رێ سه‌ره‌كى بو به‌خته‌وه‌رى و ره‌وشت بلندیا ژن و زه‌لامان ب تایبه‌تى یا هه‌ڤژینان)