گونگرسێ ئه‌مريكى:گرۆپه‌كا حه‌شدا شه‌عبى تيرۆرسته وپێدڤيه بهێته هه‌لوه‌شاندن
ئه‌ڤرۆنيۆز:
كۆنگرسێ ئه‌مريكى، ميليشيا (بزاڤا نوجه‌با) يا ب سه‌ر حه‌شدا شه‌عبى ڤه ب گرۆپه‌كا تيرۆرستى هژمارت وراگه‌هاند پێگڤيه ل سه‌ر سه‌رۆكێ ئه‌مريكى دده‌مێ 90 رۆژان دا وێ گرۆپێ وبه‌رپرسێن وێ قه‌ده‌غه بكه‌ت.
مالپه‌رێ فه‌رميێ كونگرسێ ئه‌مريكى راپۆرته‌ك ل دۆر قانوونا كونگرسێ ئه‌مريكى بۆ قه‌ده‌غه‌كرنا كرێكرتيێن ئيرانێ ل ده‌ڤه‌رێ بۆ سالا 2017 به‌لاڤكر، ب مه‌ره‌ما په‌سه‌ندكرنا وێژى، ره‌شنڤيسا وێ قانوونێ راده‌ستى كونگرسێ وجڤاتا پيرێن ئه‌مريكا كر.
دراپۆرتێ دا هاتيه، كونگرس ب رێيا ڤه‌كۆلين وپشكنينێن خوه دسه‌رلمينيت كو مه‌شقكرن وبودجه وپرچه‌ككرنا بزاڤا نوجه‌با ژلايێ فه‌يله‌قا قودس وله‌شكرێ پاسدارێن ئيرانێ ڤه دهێنه دابينكرن، هه‌ڤده‌م حزبوللا لوبنانى ژى ئه‌ركێ راوێژكرن ومه‌شقكرنا بزاڤا ناڤبرى ب ستوويێ خوه‌ڤه گرتيه.
مالپه‌رێ كونگرسێ ئه‌مريكى دياركريه ژى كو ب مه‌ره‌ما به‌رگريێ ژرژێما به‌شار ئه‌سه‌د ل سووريێ، بزاڤا نوجه‌با چه‌كدارێن خوه بۆ سووريێ هنارتينه ودۆرپێچكرنا باژێرێ حه‌له‌ب ئێك ژئه‌ركێن وێ وان بوو.
خوياكر ژى، ئه‌كره‌م كه‌عبى ئه‌ميندارێ گشتيێ بزاڤا نوجه‌با، يێ تۆمه‌تباره ب تێكدانا سه‌قامگيريێ ل عيراقێ، ديسا يێ تۆمه‌تباره ب توپبارانكرنا ده‌ڤه‌را كه‌سك ل به‌غدا ل سالا 2008 وئه‌و وچه‌كدارێن خوه ب فه‌رمانێن رێبه‌رێ بلند يێ ئيرانێ (عه‌لى خامه‌نه‌ئى) دلڤيت.
كونگرسێ ئه‌مريكى د وێ راپۆرتێ دا، پشته‌ڤانيا تمام ل ئيسرائيلێ دووپاتكر ودياركر ژى كو په‌يڤدارێ فه‌رميێ بزاڤا نوجه‌با ل سالا 2017، پێكئينانا ليوايا نوجه‌با راگه‌هاند وخوياكر كو ئارمانج ژپێكئينانا وێ ليوايێ ئازادكرنا جۆلانا سووريێ يه ژ ئيسرائيلێ، هه‌روه‌سا گۆتيه كو بزاڤا نوجه‌با رۆله‌كێ گرنگ ددابينكرنا رێيا گه‌هاندنا ئيرانێ ب لوبنانێ ڤه و گه‌هاندنا هاريكاريێن له‌شكرى بۆ حزبوللا يا لوبنانى دگێريت.
