مووچەخۆرێن کورد ل ئورۆپا و جیھانێ؟
ئەز دبێژم ھەتا ڤێرە و بەسە، ھەکە مەکوردان بڤێت ژ ئەڤرۆ وێڤە نە درەوا ل خوە و نە ل یێن دەوروبەر و دۆست و ھەڤال و ھەتا دوژمنێن خوە ژی بکەین؟ ئەڤرۆ کەدەم ھات ئەم زڤرینەکێ ل سیستەم و کارێ خوە یێ وەلاتپارێزیێ بکەین و ئەڤ سیستەمە ب سەرناکەڤیت، ئەگەر ھەڤوەلاتی بەری حوکمەت و دەستھەلاتداریێ دەستپێنەکەت؟ ل کوردستانێ دڤێت لایەنێن سیاسی و سەرکردە و ھەڤوەلاتی ئەڤرۆ پیچەکی ژ بورجێن خوە یێن عاجی بھێنە خوارێ و دانپێدانێ ب ھندێ بکەن کو ئەو ھەمی پێکڤە ئەگەر بوون کو کوردستان گەھشتیە ڤێ قووناغا سەخت، یاکو ئەم گەھاندینە وێ، چەندێ حوکمەتا بەغدا و سەرۆک وەزیرێن وێ ئەوێ بەری نەبیتە سەرۆک وەزیر ب پیڤازەکێ ژی نەدچوو وێ بکەن یا دلی وان حەز دکەت!! دڤێت کوردستان ب حزب و سەرکردە و حوکمەت و ھەڤوەلاتی ڤەدانپێدانێ ب ھندێ بکەن کو ئەو و سەرەدەریێن وان و نەفس مەزنی و فەخفە و دفنبلندیا وان ھەمیان پێکڤە کوردستان گەھاندە ڤێ شکەستنێ؟ بلا درەوا ل ئێکودو نەکەین. چونکی ھندی ئەم درەوا ل ئێک بکەین، ئەم چ جاران ناگەھینەراستیێ!. راستیا ئەڤرۆ ژی ئەوەکو چ نەمایەل شوونا ھەرێما کوردستانێ ھێدی ھێدی پەیڤا باکۆرێ عیراقێ (شیمال العراق) یا دزڤریت و شیعەیێن حوکمداریێ ل عیراقا ئەڤرۆ دکەن، نوکە کورد و ھەرێما کوردستانێ یا کریە ئارمانجا خوە یا ئێکێ داکو ھەر چ ماف و دەستھەلاتداری و ژێدەرێن پارەی ھەنە ھەمیان ژێ وەربگرن ب شێوەیێن کەرکووک بر!! ئەم کورد ھەمی شکەستنێن خوە دکەینە ئەگەرێ خەلکەکێ دی؟ ژ مێژە وەرە ئەم ڤێ چەندێ دکەین، لێ ب دیتنا من یا کەسایەتی دبینم کو دەم ھات ئەم کورد ژی پیچەکی ل خوە بزڤرین و دانپێدانێ ب شاشیێن خوە بکەین. یا راستی ئەم ژی نە مەلایکەت بووین، مە ژی تێرا خوە خەلەتی کرن و کارەساتا مەزن ئەوە کو ئەم ھێشتا و پشتی ڤان ھەمی شکەستنان یێ خوە وەسا بۆ خەلکی و جیھانێ ددەینە نیاسین کو زولما ل مە ھاتیەکرن!! نەخێر..کەسێ زولم و زۆرداری ل مە نەکریە، بەلکو مە یا ل خوە کری؟ وەرن دا ئەڤرۆ حەق و حسابان ل گەل ئێکودو بکەین و کا کینە مووچەخۆرێن کوردستانێ؟ مووچەخۆرێن کوردستانێ نە ھەمی موستەحەق و ھەژی دانا مووچەکی ھەیڤانە نە بچیتە سەر حسابا وان ب تایبەت ئەو مووچەخۆرێن ژ دەرڤەی ھەرێما کوردستانێ دژین(ل ئەورۆپا و ئەمریکا و کەنەدا و ئوسترالیا)، چونکی ڤان کەسان چ کار بکەن ل وان کێشوەر و وەلاتان ھەیڤانە حوکمەت و سۆشیال و دەزگەھێن خێرخوازیێن وان پارەی د ەنێ چ شۆل بکەت یان یێ پالدای بیت ل مالا خوە. ھەکە ھات و حوکمەت و دەستھەلاتداریێن وان وەلات و کێشوەران پێ بحەسیێن کو ئەو کوردێن ل واران دژین مووچەکی ھەیڤانە ژ کوردستانێ وەردگرن، دێ وی مووچەی ژ وان کەسان بڕن و دوور نینە و ل دووڤ قانوونێن وان وەلاتان بھێتە دادگەھکرن، چونکی داھاتیەکێ خوە یێ ژێ ڤەشارتی و نەگۆتیێ کو من مووچەکێ خانەنشینی (تقاعد) یێ ل کوردستانێ ھەی و ھەیڤانە ئەو مووچە دچیتە سەر حسابا من ل بانقێن کوردستانێ و من وەکیلەکێ ل کوردستانێ بۆ خوە دانایی بچیت وی مووچەی ھەیڤانە وەرگریت!! دێ کا وەرە حوکمەتا ھەرێما کوردستانێ، یانژی وەکو نوکە عەرەب دبێژنێ (باکۆرێ عیراقێ) ڤان کەسان سافی بکە و بێژێ ئەم دنەچارین ل گەل حوکمەتا وی وەلاتی بئاخڤین، یێ تو لێ دژی و بێژینێ کو ئەڤ کەسە ئەڤە چەند سالەکن یێ مووچەی ژ مە ژی وەردگریت، ئەرێ قانوونێن ھەوە بۆ ڤان تشتان چ دبێژیت؟ ھۆسا دێ حوکمەتا ھەرێمێ مووچەخۆرێن ئەورۆپا و ئەمریکا و کەنەدا و ئوسترالیا و وەلاتێن دی یێن جیھانێ ژ کوریی گریت و دێ پارەکی زەبەلاح ب قانوونێ زڤریتە بانقێن وێ و شوونا بدەتە کابرایەکی ل ئەمریکا و ھۆلەندا و ئەلمانیا و سۆیسرا و بریتانیا دژیت و وی بۆ خوە مووچەکی ھەیڤانە یێ ھەی و حوکمەت کریا خانیێ وی و خەرجیێن زارۆیێن وی ھەیڤانە ددەتێ و د سەر ھندێرا بەری دەمەکی چوویە کوردستانێ ژ بەر ھندێ دا ناڤێ خوە ل بایۆمەتریێ تۆمار بکەت و مووچێ وی یێ ھەیڤانە یێ ژ کوردستانێ بۆ دچیت و ئەوێ پالدای ل ئەورۆپا ژێ نەچیت؟ ب راستی ئەز ژی عەبادی بام، دا بێژم ئەز مووچێ ڤی کەسی نا مەزێخم و کا چاوا کوردان بەرژەوەندیا ھەڤوەلاتیێن خوە دڤێت، دڤێت بزانین عەبادی ژی خوە ھەکە بەرژەوەندیا عیراقیان نەڤێت، لێ دڤێت خوە دیار بکەت کو یێ بەرژەوەندیێن وان دپارێزیت؟ ئەڤجا حوکمەت و پارتی و ئێکەتی و گۆڕان ڤان مووچان ببڕن و چاڤێ خوە بدەنە خەلکێ ل کوردستانێ دژیت.
