10 ملیار دینارێن ژ عيراقێ بۆ ڤێ مه‌ره‌مێ گه‌هشتنه دهۆك
ئه‌ڤرۆ نيوز:
رێڤەبەرێ کۆمپانیا گشتی یا دەخلودانی ل پارێزگەھا دھۆکێ دیارکر کو ل 20ی چریا ئێکێ 2017 کۆژمێ 10 ملیار دینارێن گەنمێ جوتیاران یێن سالا 2017 گەھشتنە پارێزگەھا دھۆکێ و ل دووڤ رێزبەندیا وان دێ ل رۆژا 22ی چریا دویێ2017 ل سەر جوتیاران ھێتە بەلاڤکرن.
نازم محەمەد، رێڤەبەرێ کۆمپانیا گشتیی یا دەخلودانی ل پارێزگەھا دھۆکێ و رێڤەبەرێ سایلویا فەیدیێ بۆ ئەڤرۆ دیارکر کو ھەر جوتیارەکێ سالا 2017ێ گەنمێ خوە دایە سایلویێن دھۆکێ دشێت پارێ خوە یێ گەنمی ل دووڤ رێزبەندی وەربگریت.
گۆتژی: “جوتیارێن شێخان یێن گەنمێ خوە داینە سایلویا شێخان دێ ل بەنکا شێخان پارێ خوە وەرگرن و جوتیارێن زاخۆ دێ ل بەنکا خابووری وەرگرن و جوتیارێن گەنمێ خوە دانایە سایلویا فایدیێ و بنگەھی روڤیا یێ وەرگرتنا گەنمی دێ ل بەنکا گارە پارێ خوە وەرگرن”.
رێڤەبەرێ سایلویا فەیدیێ ئاماژە دا وێ چەندێ ژی کو بەری نوکە حوکمەتا عیراقی بڕیار دابوو کۆژمێ 35 ملیار دینارێن گەنمێ جوتیارێن دھۆک ب مەزیخت ژ وی کۆژمێ پارەیی 25 ملیار دینار ھاتبوونە بەلاڤکرن، “ئەڤرۆکە ژی 10 ملیار دینار ژ وی پارەیی گەھشتن و دێ ل سەر جوتیارا ھێتە بەلاڤکرن.
نەڤەشارت ژی کو دێ کۆژمێ پتر ژ 18 ملیار دینارێن گەنمێ جوتیارێن دھۆک یێ سالا 2017 ل بەغدا مینیت، ئەڤ سالا جوتیارێن دھۆکێ ب کوژمێ پتر ژ 53 ملیار دیناران گەنم رادەستی سایلویان کربوون حوکمەتا عیراقی 35 ملیار ژی مەزاختن و ھێشتا پتر ژ 18 ملیار دینارێن جوتیارێن دھۆکێ ل بەغدا ماینە.
