بڕيارا وه‌رگرتنا پارێ گليشى ژ وه‌لاتيان ل هه‌ولێر هاته ره‌تكرن و ل دهۆكێ نه
ئه‌ڤرۆ نيوز:
جڤاتا پارێزگەھا ھەولێرێ بڕیاردا وەلاتیێن ھەولێرێ پێگیریێ ب دانا پارێ کریا گلێشی نەکەن، بەرامبەر رێڤەبەرێ گشتیێ باژێرڤانیێن پارێزگەھا دھۆک دیار دکەت کو پارێ وەرگرتنا گلێشی ژ مالان ل نێزیک دێ کەڤیتە دبیاڤێ بجھئینانێ دا، ئاشکراکر کو نوکە پارە ژ جھێن بازرگانی و دوکانا ل دھۆکێ دھێتە وەرگرتن.
عیماد رەفعەت، ئەندامێ جڤاتا پارێزگەھا ھەولێرێ بۆ رۆژناما ئەڤرۆ گۆت” د کۆمبوونا رۆژا سێشەمبی یا جڤاتا پارێزگەھا ھەولێرێ دا بڕیار ھاتەدان خەڵک و ئاکنجیێن ھەولێرێ پابەندی دانا پارێ کریا گلێشی نەبن و ئەف رێنمایی ھاتە ھەلوەشاندن ل سنورێ ھەولێرێ، چونکە ل پارێزگەھێن دی یێن ھەرێما کوردستانێ پارێ کریا گلێشی ناھێتە کۆمکرن و چەند ھەیڤەکە باژێڕڤانی کڕیا گلێشی ل وەلاتی و جھێن بازرگانی وەر دگریت، لەوڕا مەژی بڕیاردا ئیدی خەلکێ ھەولێرێ ژی پابەندی رێنمایا حکوومەتێ نەبیت بۆ دانا ئەڤێ کریێ و کریا بلندکرنا تابلۆیێن بازرگانیژی ل دووکان و جھێن بازرگانی نەھێتە وەرگرتن.
عیماد رەفعەت گۆتژی” دڤێ قەیرانێ دا خەلکی و دووکاندارا پارێ کیريێ ھەیە ھەتا کڕیا ھاڤێتنا گلێشی بدەن، گورەی دووڤچوونامە بۆکری جیاوازی دھێتەکرن و مە بەلگە ھەنە چو قانوون بۆ وەرگرتنا پارەی دەرنەچووینە و تیمێن باژێڕڤانی ب حەزا خوە پارەی کۆم دکەن، بۆ نموونە دبێژنە جھێن بازرگانی کریا ھەوە 25 ھزارە بەلێ 25 ھزار دینارا بدەن، لەوانە ل دووکانەکا دی کێمتر بھێتە وەرگرتن و لەوانەیە ژی پتر بھێتە وەرگرتن، ئەم دێ ئەڤێ بڕیارا خوە ب نڤیسار بۆ سەرۆکایەتیا جڤاتا وەزیران و پارێزگارێ ھەولێرێ بلندکەین و ئیدی بلا خەلک پارەی نەدەت یێ کریا گلێشی.
ھەڤدەم ئەندازیار ھەڤال ئەحمەد سەرۆکێ باژێرڤانێن پارێزگەھا دھۆکێ کو سەرپەرشتیا 47 باژێرڤانیان دکەن ل پارێزگەھێ ژبلی، باژێرڤانیێن دھۆک، زاخۆ، ئاکرێ، بۆ رۆژناما ئەڤرۆ گۆت: ھەتا نوکە پارێ گڵشی مە ژ مالان نە وەرگرتیە لێ ل دووڤ بریارا ئەنجوومەنێ وەزیران دێ ل نێزیک پارێ راکرنا گلێشی ژ مالان وەرگرین، بەرامبەر ئەم پارێ راکرنا گلێشی ژ دوکان و جھێن بازرگانی وەک ئوتێل و موتێلان وەرگرین و ئەڤە ل دووف چەندین پیڤەران کو ھاتینەدانان ل سەر بنیاتێ کا چەند سەلکێن گلێشی ھەنە یان ئوتێل چەند ستێرە.
ئەندازیار ھەڤال ئەو ژی دیارکر کو 47 باژێرڤانی سەر ب رێڤەبەریا باژێرڤانیێن دھۆکێ نە و بریارا وەرگرتنا پارێ گڵشی ھەموو قەزا و ناوچان ب خوە ڤەدگریت .
