نێچیرڤان بارزانی: نابيت لێبۆرين بۆ وان كه‌سان هه‌بيت يێن ب تاوانا شه‌ره‌فێ هاتينه سزادان
ئەڤرۆ نیوز، نەوزاد ھلۆری:
سەرۆکێ حکومەتا ھەرێما کوردستانێ د کونفرانسێ ” پێکڤە بەر ب کوردستانەکا بێ توندوتیژی” کو ل ھەولێر ب رێڤەچوو بو ، دیارکر کو پێدڤی یە د لێبورینا گشتی دا لێیورین بو وان کەسان نەھێتەکرن کو د تاوانا دژی شەرەفێ دا ھاتیە سزادان و ئاماژە ب وێ یەکێ ژی کر کو ل ھەرێما کوردستانێ گەلەک قانون بو بەرنگاربوون دژی توندوتیژیا دژی ئافرەتان ھاتینە دەرکرن.
ئەڤرۆ سپێدێ نێچیرڤان بارزان سەرۆکێ حکومەتا ھەرێما کوردستانێ دچارچوڤێ کونفرانسا سالانەیا ھەوا نا توندوتیژی دژی ئافرەتان دیارکر کو ل پارێزگەھا کەرکوک و دەردورێن وێ دوڤچوون لسەر بنپێکرنێن حەشد شەعبی ب تایبەتی بەرامبەر ئافرەتان دھێتەکرن و گۆت: ( بزاڤێن حکومەتا ھەرێما کوردستانێ بو رزگارکرنا کچ و ژنێن کوردێن ئێزدی د بەردەوامن ، و پێدڤی یە پەرلەمانتارێن کوردستانێ ژی داخوازا سڤککرنا سزای بو وان کەسان د لێبورینا گشتی دا نەکەن کو ھاتینە سزادان ب سزایێ شەرەفێ ، و ب چوو رەنگان ژی رێک ب وێ یەکێ نەھێتەدان کو کچ دژیێ 9 سالیێ دا شوو بکەن و پێدڤی یە رێگری ل وێ یەکێ ژی بھێتەکرن کو ئەڤ یەک نەبیتە قانون ل ھەرێما کوردستانێ ، و گەلێ کوردستانێ ھەردەم گەلەکێ ئاشتیخواز بویە و ژوو جاران نەڤیایە توندوتیژیێ بکەت ب تایبەتی بەرامبەر ئافرەتان).
زێدەتر گۆت: ( ئەم سوزێ ددەین کو ھەولێن ھوشیارکرنا وەلاتیان و دوڤچوون لسەر کەیسێن توندوتیژیێ دژی ئافرەتان زێدەتر بکەین ، و وەکو چەوا د 10 سالێن بوری دا حکومەتێ کارێن رژد بو ڤێ یەکێ کرینە و دێ بەردەوام ژی بیت ، داخوازێ جڤاکێ نیڤدەولەتی دکەین کو ھەڤکاریا مە بکەن د وارێ بەرنگاربوون د توندوتیژیا دژی ئافرەتان دا).
کونفرانسا ئەڤرۆ کو ژلایێ جڤاتا بلند یا خانمان ل ھەولێر ب رێڤەچوبو و چەندین چالاکڤان و کەسانێن بسپور تێدا بەرھەڤ ببون ، نێچیرڤان بارزانی دیارکر ژی کو ل ھەرێما کوردستانێ چەندین قانون بو رێگرتن ل توندوتیژیا دژی ئافرەتان ھاتینە دەرکرن و گۆت ژی: (پێدڤی یە کچێن کوردستانێ ژی زێدەتر خوە پێ بگەھینن ، و ئەم داخوازێ ل عیراقێ ژی دکەین کو رێکێ ل شوو دانا کچان د ژیێ 9 سالیێ دا بگریت و نابیت کچ وەکو پەرتال بھێتە بکارئینان و ژیانا وان رەش بکەن بەلکو کچان پیدڤی ب سووز و ڤیانا دایک و بابایە و پێدڤی یە بھێنە پەروەردەکرن و گرنگی ب شیانێن وان بھێتەدان )
