عه‌بادى ناڤێ پێشمه‌رگه‌ى دبه‌يانناما خوه‌دا زێده‌كر
ئه‌ڤرۆنيوز، ئه‌ياد به‌روارى
سه‌رۆك وه‌زيرێن عيراقێ، حه‌يده‌ر عه‌بادى، ناڤێ پێشمه‌رگه‌ى ل سه‌ر به‌يانناما خوه ل دۆر ب دووماهى هاتنا شه‌رێ داعشێ ل عيراقێ زيده‌كر، پشتى كو دوهى شه‌مبيێ 9/12/2017 بێ كو ناڤێ پێشمه‌رگه‌ى بينيت، پيرۆزباهيا ب دووماهى هاتنا شه‌رێ داعشێ ل عيراقێ كر.
عه‌بادى دبه‌يانناما خوه‌دا ل دۆر ب دووماهى هاتنا شه‌رێ داعشێ ل عيراقێ، ناڤێ هه‌موو هێزێن عيراقى ئينابوو، وه‌كو له‌شكرێ عيراقێ، پۆليسين فيدرالى، ده‌زگه‌هێن ئه‌منى، حه‌شدا شه‌عبى، هێزێن دژه تيرۆر وهێزێن ئه‌سمانى. به‌لێ ناڤێ پێشمه‌رگه‌ى نه‌ئينابوو.
ئه‌ڤ ره‌فتاره عه‌بادى، ببو جهێ نه‌رازيبوونا هه‌رێما كوردستانێ، وه‌زاره‌تا پێشمه‌رگه‌ى به‌ياننامه‌ك ل دۆر پشت گوه هاڤێتنا پێشمه‌رگه‌ى دپه‌يڤا عه‌بادى دا به‌لاڤكربوو، فراكسيۆنێن كوردستانى ژى ل جڤاتا نوونه‌رێن عيراقێ به‌ياننامه‌ك ل دۆر وێ ره‌فتارێ ده‌ركربوو وبريار دابوو ژى به‌رهه‌ڤى رێ وره‌سمێن له‌شكرى نه‌بن يێن ئه‌ڤرۆ ل به‌غدا هاتينه گێران ب هه‌لكه‌فتا ب دووماهى هاتنا داعشێ ل عيراقێ.
دبه‌رپه‌رێ حه‌يده‌ر عه‌بادى دا ل سه‌ر تورا فه‌يسبووكى، ناڤێ پێشمه‌رگه‌ى دبه‌يانناما سه‌ركه‌فتنێ ل سه‌ر داعشێ يێ هاتيه زێده‌كرن، ديسا دبه‌رپه‌رێ نڤيسينگه‌ها راگه‌هاندنێ يا سه‌رۆك وه‌زيران ل سه‌ر تورا فه‌يسبووكى، ناڤێ پێشمه‌رگه‌ى دبه‌يانناما سه‌ركه‌فتنێ ل سه‌ر داعشێ يێ هاتيه زێده‌كرن.
