بەهزاد بەهرام
ئەڤرۆ جیهان ب شێوەیەكێ گشتی گەهشتی یە ئاستەكێ هەرە بلند و پێشكەفتی ژلایێ وەرزشێ ڤە، هەروەسان گرنگییەكا ئێكجار زۆر ب وەرزشێ دهێتە دان ب تایبەتی یارییا فوتبۆلێ، حەز و ڤیانا هەر تاكەكی بەرانبەر وەرزشێ دگەهیتە گۆپیتكێ، هەر ژبەر ڤێ چەندێ وەرزش فرەرەهەندە و گەلەك رەهەندان بخوەڤە دگریت میناكێ(تەندروستی، ئابۆری، خێرخازی، مرۆڤایەتی، كۆمەلایەتی و جڤاكی، نەتەوی و نیشتیمانپەروەری و هتد)ئەڤە ژلایەكی ڤە، ژلایەكێ دووڤە د جیهانگیریا نۆكە دا هەر جۆرە یارییەكا وەرزشی دهێتە كرن ژبلی پەیاما وەرزشی چەندین پەیامێن نهێنی یان ژی باشترە ببێژین چەندین پەیامێن مرۆڤایەتی و مرۆڤبوونێ ل پشت پەیاما وەرزشی هەنە، چونكی گەهاندنا پەیامێن مەرامدار ب رێكا ورزشێ كاریگەریەكا باش و ئەرێنی هەیە و جیهان د دەمەكێ كێم دا هەست پێ دكەت، هەروەكی گەلەك جاران داهاتێ یارییەكێ هاتیە تەرخانكرن بۆ مرۆڤێن نەخوشیێن دومدرێژ هەی، یانژی پەیوەندیێن ئابوری و ڕامیاری ب رێكا وەرزشێ خورت و چالاك بوونە، ب ڤێ چەندێ دشێن پەسەند بكەین كو وەرزش گرنگترین و باشترین ئامرازێ گەهاندنا پەیامێن مەبەستدارە، لەورا ئەو یاریا د ناڤبەرا هەردو یانەیێن فوتبۆلێ یا مانجێستەر سیتی و گەلاتا سەرایی ل یاریگەها مانجێستەر سیتی، سێ گەنجێن كوردپەروەر خۆ ب ئالایێ كوردستانێ و جلۆبەرگێن كوردی خەملاندبوون، ب شیوەیەكێ رێكخستی شیان خۆ ب گەهینن د ناڤا یاریگەهێ دا و د ناڤ یاریكەران دا ماراسونەكێ ئەنجامبدەن و بۆ دەمەكێ كورت یاریێ راوەستینن، ئالایێ كوردستانێ بلند بكەن، هەبوون و پەیاما كورد و كوردستانیان بۆ هەمی جیهانێ و رایا گشتی بدەنە دیاركرن و بەرچاڤ كرن كۆ مللەتێ كورد ب درێژاهیا دیرۆكێ مللەتەكێ ئاشتیخاز و ئازادیخازە هەروەسان حەز ژ ئارامی و مرۆڤایەتی و مرۆڤبوونێ دكەت.