عه‌بدولخالق سولتان
كرین و فرۆتنێ په‌یوه‌ندی ب نڤیسینێ ڤه هه‌یه؟، ئه‌رێ راسته نڤیسینێ ژی وه‌كی هه‌ر كاره‌كێ دی بازاركرن تێدایه؟ یان نڤیسین كریاره‌كا سه‌ربخۆیه بۆ پێشخستنا مرۆڤی ده‌ركه‌تیه؟ ئێكلاكرنا ئه‌ڤێ هاوكێشێ گرنگیه‌كا مه‌زن یا د پروسێسا نڤیسینێ دا هه‌ی.
دبیت ئه‌ڤ پرسه یا كه‌ڤن بیت، و گه‌له‌ك ژ نڤیسه‌ر و كۆمه‌لناس و ده‌روونزانان باس و ڤه‌كۆلین لسه‌ر ئه‌ڤی بابه‌تی كربن، به‌لێ ژبه‌ركو بابه‌ته‌كێ گه‌وهه‌ریه و گرێدای خۆدێ نڤیسینێ و نڤیسه‌ریه، له‌ورا دڤێت هه‌ر نڤیسه‌ره‌ك هه‌ر ل ده‌سپێكێ ئه‌ڤی بابه‌تی د مێشكێ خۆ دا ئێكلاكه‌ت، دا ناسنامه‌یا خۆ ژده‌ست نه‌ده‌ت و به‌رزه نه‌بیت.
د مێژوویێ دا هه‌لبه‌ستڤان و نڤیسه‌ر بووینه دو جوین، هندك دبینن نڤیسین ئالاڤه‌كێ گوهۆڕینێ یه، و دڤێت بكه‌ڤیته د خزمه‌تا مرۆڤایه‌تی دا، ئه‌ڤه دبینن دڤێت نڤیسین یا ئارمانجكری بیت و ب هزره‌كا تایبه‌ت یا باركری بیت، هه‌ر چ ژانرێ نڤیسینێ بیت، هه‌لبه‌ست یان كورته چیڕۆك یان رۆمان یان گۆتار بیت، ئه‌ڤ رێره‌وه شیا تا راده‌یەكێ مه‌زن سه‌ركه‌فتنێ بینیت، گه‌له‌ك پشته‌ڤان بۆ په‌یدابوون، ژبه‌ركو جه‌ماوه‌ركێ زۆر ل دۆر كۆمبوو، بۆ نموونه چیڕۆكا (دایك) یا مه‌كسیم گۆركی، ئه‌وا د ماوه‌یه‌كێ كورت دا بوویه ئێك ژ شاكارێن هزرا کۆمۆنیستی (شیوعی) ل روسیا نه‌خاسمه به‌ری شور‌شا به‌لشه‌فی.
به‌لێ یێن به‌رانبه‌ر دبێژن نه حنێره مرۆڤ ببیته نڤیسه‌ره‌كێ ناڤدار و ب هزاران دانه ژبه‌رهه‌مێ وی بهێنه فرۆتن، به‌لكو ئه‌ڤه حنێرێ د ئالیێ جوانكاری یێ به‌رهه‌می دا دبینن، دویر ژ پرۆپاكنده‌یێن بۆ دهێنه كرن، ئانكو ئارمانجا نڤیسه‌ری نه ئه‌وه به‌رهه‌مه‌كێ جه‌ماوه‌ری بنڤیسیت، به‌لكو دڤێت به‌رهه‌مه‌كێ ره‌سن و پر مرۆڤایه‌تی بنڤیسیت، دویر ژ هه‌ر ژێبونه‌كێ، ئه‌ڤ ئالییە دبێژیت: تا نڤیسین ببیته به‌رهه‌مه‌كێ هه‌روهه‌ر زیندی، دڤێت دویڤه‌لانكێ چ هزر و كۆمه‌لان نه‌بیت.
د قۆناغێن جودا دا نڤیسه‌ر رویبروی ئه‌ڤێ دووریانێ دبینیت، نه‌خاسمه ده‌مێ هه‌ست دكه‌ت به‌رهه‌مێن وی چ كارتێكرنێ ناكه‌ن، یان چ كارڤه‌دانا خۆ لسه‌ر جڤاكی تێدا دژیت نینه، دبیت ئه‌ڤ چه‌نده جۆره بێزاریه‌كێ ل ده‌ڤ نڤیسه‌ری په‌یداكه‌ت، و هنده‌ك جاران باوه‌ریا وی بنڤیسینێ ژی وه‌كو ئامرازه‌كێ كاریگه‌ر لاواز كه‌ت، نه‌خاسمه ئه‌گه‌ر نڤیسه‌ری خۆ لبه‌رانبه‌ر ئه‌ڤێ خالا وه‌رچه‌رخان ئێكلا نه‌كر بیت.
هه‌ر چه‌وا بیت كریارا نڤیسینێ دێ هه‌ر ئێته ئه‌نجامدان، چ د خزمه‌تا هزره‌كێ دا بیت یان بۆ خۆدێ نڤیسینێ و مرۆڤاتیێ ته‌رخانكربیت، لێ یا گه‌له‌ك گرنگ ئه‌وه نڤیسه‌ر بزانیت نڤیسینێن وی دكه‌ڤنه ل ژێر كیژان ئاراسته‌ی.
نيشاندان