کاوین جیهاد تەحلاڤی

هەبوونا دەنگ و ڕەنگێن وەکی گرۆپێ Kurdvox د ناڤ بزاڤا هونەری و کلتوری یا کوردیدا، جهێ شانازیێ و ئۆمێدەکا مۆکۆمە بۆ پاشەرۆژێ، گەنج نە تنێ پاشەرۆژا چێدەکەن، بەلکو ئەوان هێز و شیانێن هەین کو د دەمەکێ کێم دا پەیامەکا بسەنگ بگەهیننە دڵێ جەماوەری، و سەرکەفتنا گرۆپەکی د ماوەیەکێ کورتدا، نیشانا هندێیە کو: تێگەهشتنەکا گەلەک باش هەیە بۆ حەز و خاستێن جڤاکی و ب تایبەت گۆهدارێن مۆزیک و سترانا کوردی و کوالێتی و ڕەسەناتی د کارێن وان دا هەیە کو شیایە سەرنجا حەزژێکەرێن هونەری ڕابکێشیت.
ئەرکێ مەزن یێ دکەفیتە سەر ملێ ڤان گرۆپان، زندی ڕاگرتنا زمان و کلتورێ کوردییە ب شێوازەکێ کو ل گەل سەردەمێ نوو بگونجیت، داکو بشێن ببنە پرەک د ناڤبەرا ڕابردوو و پاشەرۆژێ دا.
«پشتبەستن لسەر گەنجێن خودان شیان و داهێنەر، مسۆگەرترین ڕێکا پاراستنا ناسنامە و هونەرێ مەیە.»
دەمێ گرۆپەک د دەمەکێ کێم دا جهێ خوە د دڵێ خەڵکی دا دکەت، پەیامەکێ ددەتە هەمی گەنجێن دی یێن خودان بەهرە کو: «ئەگەر کارەکێ ب دڵ و باوەری بهێتە کرن، جڤاک دێ پێشوازیێ لێ کەت.» ئەڤە ب خۆ بزاڤ و تێکۆشانێ د ناڤ تەخا گەنجان دا زێدە دکەت.
پێکئینانا گرۆپەکی ژ چەندین مۆزیکژەن و سترانبێژێن گەنج نیشانا چاندەکا بلند یا کارێ تیمی (Teamwork) ددەت، ئەڤە دەرگەهی ل پێش گەنجێن دی یێن دهۆکێ و دەڤەرێ ڤەدکەت کو باوەریێ ب شیانێن خۆ بئینن و بزانن کو ب ئێکگرتنێ دشێن کارێن گەلەک مەزنتر و پڕۆفیشناڵتر ئەنجام بدەن.
نامەیەک بۆ گەنجێن Kurdvox
«هوین نە تنێ مۆزیکێ دژەنن، هوین مێژوو و رەسەنەتیا دەڤەرا خۆ ب زمانێ سەردەم دپارێزن، دهۆکا ڕەنگین پێدڤی ب ڤی دەنگی و ڤێ وزەیێ بوو، بەردەوام بن لسەر لێدانا ژەنینێن ڕەسەناتیا بەهدینان، چونکی پاشەرۆژا هونەرێ مە د دەستێن هەوە یێن ئەمین دایە.»

کاوین جیهاد تەحلاڤی

دەما ئەزمان لال دبن ژ گۆتنا دیمەنێ عەشق و دابڕانێ، ستران دبنە تاکە ناسنامە بۆ پاراستنا روحا وەلاتی، غەریبیێ برینەکا وسا ل سەر دلێ وی کێشا کو هەر دێڕەکا سترانێن وی، ببوو هەوارەک بۆ باوەشا دایکێ و بێرییا ئاخێ.
دەما مرۆڤ ٢٨ سالان د ناڤ جاددەیێن سارد یێن غەریبیێ دا دپەیڤیت، و هەر ژ سالا ١٩٩٨ێ وەرە ئاخ دبیتە خەونەکا دۆیر و دەست پێ نەگەهشتی، ستران نابیتە کەیفخۆشی، بەلکو دبیتە تاکە سەنگەر بۆ پاراستنا روحێ. (هۆزان دینۆ)، ئەو دەنگێ کو مێژوویا ئازار و حەسرەتا کۆچبەریا کوردی د ناڤ قورگێ خۆ دا هەلگرتی، پشتی غەریبیەکا بێ رەحم، بۆ جارا ئێکێ پێنگاڤێن خۆ دهاڤێژیتە ناڤ حەوشا دایکێ و عەشقا مه‌زن یا وەلاتی.
ئەڤ زڤڕینە، قێژییا برینەکا کەڤنە کو ب سالان ب عەشقا کوردستانێ دهاتە دەرمانکرن. دینۆ د غەریبیێ دا کلتور و هونەرێ کوردی نەک کرە گریان، بەلکو کرە ناسنامە و داسنا پیرۆزیا هێما و رەسەنایەتیێ. ل ژێر سرمایا بیانیستانێ، وی ئاگرێ حەزژێکرنا ئاخێ وا گەش دکر کو کلتورێ مە یێ سترانبێژیێ مرواریێن وی یێن رەسەن ون نەبن. هونەر ل دەف وی، چەکێ مانێ بوو، بوو پرەک د ناڤبەرا روحا وی و چیا مه‌زن یێن کوردستانێ دا.
غەریبیێ کارتێکرنەکا وسا ل سەر عەشقا وی یا بۆ هونەری کری کو هەر پێلەەکا دەنگێ وی، دەربرینێ ژ کۆچبەریەکا بێ دوماهی و بێرییا بێ سنوور یا بۆ بهێنا خاکێ دکەت. هاتنا وی یا ئەڤڕۆ، نیشانا سەرکەفتنا هونەرێ رەسەنە ب سەر تاریکی و دۆیراتیا کۆچبەریێ دا. دۆیرکەفتنا پتر ژ چارەکا چەرخی، نەشیا کلتورێ وی کەم بکەت، بەلکو پتر پیرۆز کر و نیشانی مە دا کو کلتور و هونەر بنەمایێن راگرتنا ناسنامەیا وەلاتی نە د دلێ غەریبان دا.

کاوین جیهاد تەحلاڤی

د دەمەکی دا کو جیهان بەر ب ئێکدووچوون و بەرزەبوونا تایبەتمەندیێن کلتۆری دچیت، باژارێ زاخۆ یێ دێرین جارەکا دی دبیته‌ پایتەختێ پاراستنا ناسنامە و کلتۆرێ کوردی. ب ڕەنگینی و دەلالیا خوە، زاخۆ خۆ بۆ سازکرنا «چارەمین فیستەڤالا شەلۆشەپك و جلوبەرگێن کوردی، حازر دکەت. ئەڤ فەستیڤالە نەک بتنێ هەلکەفتەکا کلتۆری یە، بەلکو خوینەکا نوو یە د دەمارێن دیرۆک و ڕەسەناتیا مە دا، و پەیامەکا زندی یە کو مللەتێ کورد خودان کلتۆرەکێ بێوێنە و دەولەمەندە.
کۆمبوونا هەر چوار پارچێن کوردستانێ د بن چەترەکێ دا
مەزنترین و بالکێشترین خال د ڤێ فیستەڤالێ دا، کۆمکرنا جلوبەرگێن ڕەسەن یێن زەلام و ژنێن هەر چوار پارچێن کوردستانێ یە. ئەڤ کلتۆرە دبیته‌ پرەکا ب هێز یا کو سنوورێن دەستکرد دهەلوەشینیت و نیشان ددەت کا چەوان ئەڤ مللەتە ب ئێك ناسنامە و ئێك جۆگرافیا کلتۆری هاتیە گرێدان. ژ شال و شەپکێن زاخۆ و بەهدینان، هەتا فستانێن ڕەنگاوڕەنگ یێن موکریان و سنە، و جلیێن دێرین یێن سەر هێڵا بۆتان و دەرسیمێ، هەمی دێ د ئێك دەم دا تابلۆیەكا زندی و تژی شانازی کێشن.
ژ پۆشیێ هەتا لەوەندیێ: چیرۆکا دەستێن زێڕین
ئەڤ فیستەڤالە بتنێ نیشادانا جلان نینە، بەلکو پێشانگەها مێژووا دەستڕەنگینی و هونەرێ کوردی یە. د ڤان دوو ڕۆژان دا، دێ گرنگیەکا مەزن دەرکەڤیت بۆ:
هونەرێ ڕستوچنینێ: کو کا چەوان ب خوین و عارەقا کابانی و هوستایێن کورد دبنە بەرهەمەکێ جیهانی.
شال و شیتک و جەمەدانی: ئەڤێن کو بتنێ پارچێن قوماشی نینن، بەلکو ڕەمزێن خۆڕاگری، مەردینی و پێشمەرگایەتیێ نە.
فیستان، لەوەندی و پۆشی: کو دیمەنێ تەژی نازکی و ڕێزگرتنا ئافرەتا کورد د کلتۆری دا نیشان ددەن.
پەیاما فەستیڤالێ: مورکەکا دیرۆکی یا نەمرە
چارەمین فەستیڤالا شەلۆشەپك و جلوبەرگێن کوردی ل زاخۆ، بەرسڤەکا بهێزە بۆ وێ چەندێ کو کلتۆرێ مە نایێتە بەرزەکرن و دزین، ئەڤە دەربرینە ژ هەبوونا مە، مۆرکەکا دیرۆکی یە د برۆسکا ناسنامەیا نەتەوا مە دا. ئەركێ مە هەمیانە، ژ گەنجان هەتا پسپۆڕ و کلتۆر دۆستان، پشتەڤانیا ڤان کاران بکەین دا کو ئەڤ میراتە یێ پاراستی بیت بۆ نەڤیێن داهاتی.
بژیت زاخۆیا دەلال کو دەرگەهێ کلتۆر و ڕەسەناتیێ یە، و پیرۆز بیت ئەڤ جەژنا کلتۆری یا مەزن ل گشت گەلێ کورد.

کاوین جیهاد تەحلاڤی

د دلێ هێلا ناڤین یا یانەیا دهۆکێ دا، یاریزانەک هەیە کو بتنێ تەپاپێی یاریێ ناکەت، بەلکو دگەل هەر پاس و لێدانەکێ، لێدانا دلێ پشتەڤانان لسەر پەلوکێن یاریگەهێ ئاڕاستە دکەت، ئەوژی هارون ئەحمەدە، ئەڤڕۆ ناڤێ ڤی ستێرێ گەنج بوویە مژارا گەرم یا جاددەیا وەرزشی ل کوردستان، ئیراقێ و دەرڤەـ چونکی دۆخێ وی یێ گرێبەستێ و مان یان چوونا وی ل یانەیێ هێشتا ب تەمامی یێ ئێکلا نەبووی.
دەنگۆیێن دەرڤە و ترسا جەماوەری
ڕاستییەك هەیە کو ناهێتە ڤەشارتن هێژایی و داهێنانێن هارون د هێڵا ناڤین دا، چاڤێن چەندین یانەیێن دی یێن خولا ستێرێن ئیراقێ و دەرڤە ڕاکێشاینە و دڤێت ڤی گەوهەرێ دهۆکی ببەنە ڕێزێن خۆ.
ئەڤ دەنگۆیە بووینە ئەگەرێ دلگرانیێ ل دەف پشتەڤانێن ئەلهویێن چیا، پشتەڤانێن دهۆکێ، ژ زەلام، ژن و زارۆکان ژی عەشقەکا مەزن بۆ هارۆنی هەیە؛ چونکی ئەو وەکۆ کوڕێ ڕاستەقینە یێ یانەیێ دبینن کو پارێزگاریێ ل ناسنامە و مێژوویا شانازیا باژاری بکەت.
پەیاما جەماوەری بۆ وی ڕوونە “هارون، جهێ تە ل ڤێرەیە، لبەرامبەر کێلیا شەدا و فرعینی یە و ل سەر چیمەنتۆیێ یاریگەها دهۆکێ”
بۆ پاراستن و ڕازیکرنا ڤی جەماوەرێ دڵسۆز و ئاڤاکرنا کەلهەکا ب هێز بۆ وەرزێ نوو (٢٠٢٦ – ٢٠٢٧)، پێدڤییە کارگێریا گەنج یا یانەیا دهۆک ب هەمان روحا جاران بدلسۆزانە سەرەدەریێ دگەل دۆسەیا هارۆن ئەحمەد بکەت، کارگێڕیێ بەری نوکە ب شیانێن خۆ یێن مەزن سەلماندیە کو جهێ ڕازەمەندی و باوەریا پشتەڤانانە، ئەڤڕۆ ژی دەمێ هندێ هاتیە کو ڤێ باوەریێ زندی بکەنەڤە بو ڕاگرتنا دلێ جەماوەری، هارون د ڕێزێن یانێ دا، دێ بیتە مەزنترین دیاری و پەیام ژ لایێ کارگێڕیێ ڤە بۆ پشتەڤانان، کو نیشان ددەت خەم و خواستێن جادا وەرزشی دهێنە گۆهلێبوون.
مێژوو ل ڤێرە دهێتە نڤیسین
جاددەیا وەرزشی هیڤیێ دخوازیت کو هارۆن دلسۆزییا خۆ بۆ درێسێ شین و زەر دووبارە بکەتەڤە و پتریا پشتەڤانان چاڤەڕێیە کو ئەو نە بتنێ یاریزانەک بیت، بەلکو دیسا ببیتە ئەندازیار و سەرکردێ، ئەلهۆیێن چیا د گۆڕەپانێن وەرزێ بهێت دا.