وه‌لات د ڤێ قووناغا چاكسازیێ دا، د خرۆشه‌كا پری بزاڤ دایه‌، هه‌ر وه‌كو چاكسازی (بیره‌وه‌ریه‌كه‌) دێ هێت و بۆریت؟! هه‌می ئه‌ڤین به‌رگومان پشته‌ڤانێن چاكسازیێ نه‌، وه‌ك بێژی ئه‌و نه‌ ئارمانج و مه‌ره‌من ژ هه‌ر پرۆژه‌كێ چاكسازیێ؟! چاكسازی بێ بهایه‌ هه‌كه‌ (پاكسازی) د گه‌ل دا نه‌بیت، دێ ڤالا بیت ژ مه‌ره‌ما خوه‌، هه‌كه‌ به‌رگومان و تاوانبار و گه‌نده‌ل و دزیكه‌ر هه‌لپه‌رستێن كوردستانێ نه‌هینه‌ لادان و دادگه‌ه كرن و شوونوارێن وان بهێنه‌ پاقژ كرن، لاوازێن قانووێن هه‌یین ئه‌وێن گه‌نده‌لان درست دكه‌ن نه‌ هێنه‌ چاره‌سه‌ركرن، چاكسازی بێ مفایه‌. كورد وه‌ك جڤاك هه‌تا رادیه‌كا باش ئه‌م ژ هنده‌ك دابونه‌ریتێن خوه‌ بخوه‌ ب گومانین كو فاكته‌رێن به‌ربه‌لاڤكرنا هنده‌ك ره‌فتارێن گه‌نده‌لیێ نه‌. هێشتا ل ده‌ف مه‌ (به‌رتیل.. به‌خشیه‌) ده‌وله‌مه‌ندبوونا ب له‌ز شاره‌زایی و لێهاتنه‌؟! پرسیار ل سه‌ر سامانێ كه‌سێ نینه‌، ئه‌ڤجا چ به‌رپرس بیت یان وه‌لاتی بیت یان بازرگان بیت. دبێژن چاكسازی وه‌ك (پاقژكرنا ده‌ره‌جانه‌. . ژ سه‌ری ده‌ست پێ دكه‌ت)؟! ئه‌م ل كیڤه‌نه‌ ل گۆر قانوونێ بۆ ئه‌نجامدانا چاكسازیێ؟ قانوونێن مه‌ هاریكارن؟! ژ ئالیه‌ك دی ڤه‌ پارتی ل ناڤخوه‌ بریارا چاكسازیێ دایه‌، نزانم ل گۆر چ ئالاڤه‌كی پارتی دێ د ناڤ خوه‌ دا چاكسازیێ كه‌ت؟، هه‌كه‌ (دادگه‌هه‌كا حزبی) هه‌بیت ل گۆر باوه‌رێن پارتیبوونێ دادگه‌ها كه‌سان بیهَته‌ كرن و پرسیارا سه‌ره‌كێ ئه‌و بیت (ته‌ ئه‌ڤه‌ ژ كیڤه‌ ئینایه‌؟) دێ ئه‌نجامه‌كێ دلخۆشكه‌ر بۆ جه‌ماوه‌رێ پارتی هه‌بیت، ژ خوه‌ هه‌كه‌ هه‌ر به‌ر گومان د بالا ده‌ست بن د ڤێ پرۆسێ دا. بێگومان پرۆژه‌ دێ مری ژ دایك بیت، بێگومانه‌ ژی ئه‌و كه‌س و ئالی د مشنه‌ یێن دڤێن ئه‌ڤ پرۆژه‌ سه‌ر نه‌گریت، ب كورتی و كولانكی دبێژین هه‌كه‌ (حه‌فك ستیرا) نه‌گریت و ژ (پشت ستیرا) نه‌گریت. باشتر بێده‌نگ بین وه‌لات بێ كیماسیه‌؟! چاكسازی شۆلێ رۆژه‌كێ یان لیژنه‌كێ نینه‌، پرۆسه‌یه‌كا ئالۆزا دژواره‌، هیڤیدارم پرۆژێ سه‌رۆك بارزانی ب ئه‌نجامێ(پرۆستووریكا) (گۆرباتشۆفی) نه‌جیت، ل شوونا چاككرنی هه‌سێ ب ئافرینیت؟ ئه‌ڤ وه‌لاته‌ د قووناغا خوه‌ بنیاتدانێ یه‌، ئابوورا مه‌ نازك و لاوازه‌، تاكێ كوردستانێ ژ هێز كه‌تیه‌ ژ به‌رهه‌مهینانێ كه‌تیه‌، كوردستانێ ل هه‌می واران دا هه‌می پارتێن كوردستانێ چاڤ ل ئه‌نجامێ ڤێ پرۆسا پارتیه‌ دێ چه‌ند سه‌ركه‌فتی بیت و دێ بۆ حوكمه‌تێ ژی بارسڤكرن بیت بێگومان.

هیڤیدارم گوهارتنێن قایمه‌قاما نه‌ چاكسازی بیت. چنكو ئه‌گه‌ر ئه‌و پشكه‌ك ژ چاكسازیێ بیت، بێگومان ئاماژه‌كا خرابه‌ بوَ سه‌ر جه‌م پروَژێ چاكسازیێ. دگه‌ل ئه‌و په‌رێ رێزێ بوَ هه‌موو قایمقامێن به‌رێز لێ هنده‌ك ژ وانا پتری (10)سالانه‌ قایمقام و (عالی المقام) و ئه‌گه‌ر چه‌ند شاره‌زا و بسپوَر ژی بن، بێگومان باشتره‌ ده‌رفه‌ت بوَ كادرێن گه‌نج و تازه‌ پێگه‌هشتی خوه‌شتر بیت و ڤان ره‌نگه‌ پوَستا پربكه‌ن. ده‌ڤه‌را مه‌ ده‌ڤه‌ره‌كا (پارتیه‌) و پارتی تێدا بالا ده‌سته‌ و باوه‌رناكه‌م پارتی سته‌ور بیت و هند كه‌س و كادرێن ژێ هاتی نه‌بن. هه‌تا كو پێگوهوَڕكانێ ب قایمه‌قاما بهێته‌كرن. ده‌رفه‌ت و ده‌لیڤه‌ دان ب ته‌خا گه‌نجێن نوكه‌ و زه‌نگین و ده‌وله‌مه‌ند ب زانستێ ئیدارێ و ب ئاگه‌ه ژ پرسێن سه‌رده‌می و سیاسه‌تا نافخوه‌ و ده‌رڤه‌ و گرنگتر ئاگه‌هداری سیاسه‌ت و فه‌لسه‌فا پارتی بن ل وارێ ئیدارێ دا، گه‌له‌ك باشتره‌ (قایمه‌قامێ) بازنه‌كا گرتی بیت، بتنێ هنده‌ك تێدا هاتن و چوونێ بكه‌ن؟! بوَ پارتی باشتره‌ ل سه‌ر شه‌نگستێ ده‌ست پاكی و شاره‌زایێ هه‌ر (4) سالا هه‌موو پوَستێن گرنك ده‌ستكاریێ تێدا بكه‌تن و رێكێ ل به‌ر قوَرغكرنا هنده‌ك پوَستا بگریت. ئه‌ڤ پوَسته‌ روویێ پارتیێ نه‌ به‌رامبه‌ری جه‌ماوه‌ری، ئانكو پوَستێن سیاسی نه‌. بوَ پارتی دبێژم ئه‌گه‌ر ئه‌ڤ به‌رێزه‌، قایمقامه‌ سه‌كه‌فتی و پاك و ب كێر هاتینه‌، بكه‌نه‌ (وه‌زیر) بكه‌نه‌ (بالیوَز) بكه‌نه‌ (مدیر عام)، ئه‌گه‌ر ژ خوه‌ سه‌ركه‌فتی نینن وه‌ك پرانیا وان سه‌ركه‌فتی نه‌بووینه‌، باشتره‌ ب ماقیلی بهێنه‌ لادان و ئه‌وان فرسه‌تا خوه‌ وه‌رگرت و كورسیك (تاپوَ) نینه‌. پارتی ژماره‌كا زوَرا كادرێن جودا جودا ئاڤاكرنیه‌ و ئیدارا پارتی ل ڤێ ده‌ڤه‌رێ پێدڤی ب پێداچوونه‌كا باشتر هه‌یه‌ نه‌مازه‌ ئه‌م ل قوَناغا جاكسازیێ دانین. پێدڤی بوو پارتی ستافه‌كێ ئیداریێ مكۆم و ررێك و پێك دگه‌ل (پارێزگارێ نوو) ئێخستبا كاری. ژ قایمه‌قام و مدیر عام و مدیر ناحیه‌ و هه‌موو گه‌هێن ده‌سته‌لاتا ئیدارا دهوكێ كو ئیدارا پارتیه‌، سه‌ركه‌فتنێ بوَ هه‌موو قایمه‌قامێن به‌رێز دخازم و بوَ خاترا ملله‌تی ژی هیڤیدارم سه‌ر كه‌فتی بن، لێ ما قایمه‌قامه‌ك نه‌ بوو بێژیت (من به‌سه‌) ده‌رفه‌تێ بده‌نه‌ كادره‌ك سیاسی و ئیداریێ دی؟!

ماقیلیه‌كا مه‌زن بوو، بوَ پارتی سه‌رۆك بارزانی د ناڤ په‌یاما خوه‌ دا ده‌ست دانایه‌ سه‌ر هنده‌ك پرسێن هه‌ستیار ل وارێ چاكسازیێ دا. پارتی ئه‌ڤ سازیا هنده‌ مه‌زن و كه‌ڤنار و خوَدان (هه‌یكه‌له‌ك) زه‌به‌لاح بێگومان تێرا خوه‌ گه‌ندل و كه‌سانێن هه‌لپه‌رست هه‌نه‌؟! هه‌ر چه‌ند دره‌نگ بیت ژی لێ نه‌خرابه‌ پارتی ب (سه‌ر به‌رزی و بێ له‌رزین) كه‌زاخا خوه‌ بكه‌تن. ده‌مێ هندێ هاتیه‌ پارتێن پاك و دلسوَز كو پرانیا پارتیانن، ژ هنده‌ك گه‌ندل و هه‌لپه‌رستا بهێنه‌ پارقژ كرن. ده‌مێ هندێ یه‌ ئێدی پارتێن پاقژ زێده‌تر باجا هنده‌ك گه‌نده‌ل و كه‌سێن خراب پارتی بوَ مه‌ره‌مێن خوه‌ ب كارئینای نه‌ده‌ن. ده‌مێ هندێ یه‌ كادرێن سیاسێن پارتی و ئیدارێن پارتی ژ بازرگانا بهێنه‌ جودا كرن. یان سیاسه‌تێ بكه‌ن یان تجاره‌تێ بكه‌ن، پارتی ل هه‌موو مێژوویا خوه‌ دا پارتیا فه‌قیر و ژار و ته‌خا به‌لنگازا بوویه‌. ئه‌نجامێن ده‌نگدانێ بوَ پارتی دیارن. پارتی چه‌ند ده‌نگا ل ده‌ڤه‌رێن (شه‌عبی) دئینیت و چه‌ند ده‌گا ل (گوند و كوَمه‌لگه‌هێن مودێرن و ستی. .. هتد) دئینیت، پشتی 70 سالا ژ خه‌باتێ پارتی پێدڤی ب پێدا چوونه‌كا ل سه‌ر خوه‌ و هێمن و ئاراما چاكسازیێ یه‌، پارتی پێدڤی ب لێ پرسینێ یه‌ ل ژماره‌كا كادرێن خوه‌ یێن سیاسی و سه‌ربازی و ئیداری كا ژیده‌رێ ده‌وله‌مه‌ندبوونا(فاحش) یه‌؟! جه‌نابێ بارزانی ده‌رگه‌هه‌ك ل سه‌ر جه‌هنه‌مێ ڤه‌كر بوَ هنده‌كا. ده‌مێ هندێ یه‌ پارتی پارتی بوونا خوه‌ بوَ سه‌روكێ خوه‌ ب سه‌لمینن كو (مالێ وان و پارتی نه‌لێكڤه‌كریه‌)؟! ئه‌ڤ چاكسازیا جه‌نابێ بارزانی راگه‌هاندی بوَ هه‌موو كوردستانێ سوپرایز بوو؟! لێ بوَ پارتی ڤه‌ژه‌نه‌كا دی یا پری هیڤیه‌ ل پاشه‌روَژه‌كا نوو بوَ ڤێ حزبا مه‌زن. ده‌مه‌كه‌ هنده‌ك كه‌س ل سه‌ر حسێبا خه‌بات و قوَربانێن پارتی بووینه‌(فلان و علان) و نه‌دووره‌ ژی (فه‌زلێ پارتی ئینكار) ژی بكه‌ن. لێ ئه‌ڤ كه‌س و ئالی ل گوَر یاسا و ب به‌لگه‌ دڤیا سنوره‌ك بوَ بهێته‌ دانان. جه‌ماوه‌رێ پارتی ناخازیت (ره‌ش و سپی) ته‌ڤلی ئێك ببن ناخوازیت بێ یاسا (ته‌شهیر) ب كه‌سه‌كێ بێته‌ كرن، لێ هه‌موو جه‌ماوه‌رێ پارتی دگه‌ل جاكسازیه‌كا بنه‌ره‌تیه‌ بوَ پارتی، د ڤێ قوَناغێ دا ئه‌گه‌ر پروَژێ سه‌روَك بارزانی سه‌ربگریت مسوگه‌ر پارتی دێ وانه‌كا دی ل كوردایه‌تیێ ل فه‌رهنگا سیاسیا كوردستانێ زێده‌ كه‌ت، بێگومان كارێن مه‌زن ژ حزبه‌كا مه‌زنا وه‌ك پارتی دهێنه‌ چاڤه‌رێ كرن. پارتی هه‌موو نه‌ گه‌نده‌لن. لێ بیگومان پارتیێن گه‌نده‌ل ژی هه‌نه‌. پارتی دێ تاكه‌ حزب بیت د ڤێ قوَناغێ دا بخوه‌ دا بچیت و وه‌ك حزبه‌ك شه‌فاف و زه‌لال كارێ سیاسه‌تێ بكه‌ت.

پرانیا سیاسه‌تمه‌دارێن بارزانی ژ نیزیك ڤه‌ ناسدكه‌ن وه‌سا په‌سنا بارزانی دكه‌ن كو كه‌سه‌ك راستگوَ بێ(مناوره‌) یه‌ د سیاسه‌تێ دا ئانكو ئه‌وا دڤێت ئه‌نجام بده‌تن ئاشكرا دبێژیت و ب هه‌موو شیان ڤه‌ كار بوَ دكه‌تن. بارزانی ژ مێژه‌یه‌ وه‌ك ئارمانج كوردستانه‌كا سه‌ر به‌خوَ و لبیرالیا سیاسیا كوردستانێ ئازراندی. بارزانی كو د هه‌مان ده‌م دا سه‌روَكێ پاررتی یه‌ ژی كو د دووماهیك كونگرێ خوه‌ دا پرسا چاره‌نفێسێ كوردستانێ وه‌ك ئه‌ركێ خوه‌ زانیه‌، سه‌رئه‌نجام گه‌لێ كوردستانێ ل به‌ر تاقیكرنه‌كا دژوارا سیاسی دایه‌. ژانێن ژدایك بوونا ده‌وله‌ته‌كا نوو ل سه‌ركاڤلێ(سایكس – پیكو) بووینه‌ راستیه‌كا حاشا هه‌لنه‌گر، ئه‌ڤ ده‌ڤه‌ره‌ پشتی (100)سالا پێدڤی ب پالوَسه‌كا دی یا سیاسیه‌؛ ئه‌ڤجار ب خوه‌شی یان ژ ئه‌نجامێ شه‌ره‌ك دی یێ دژوار. بارزانی ل ناڤه‌راستا سالێن (نوتا) ب وێ رامانێ بوَ روَژنامه‌كا عه‌ره‌بی دیار كربوو: (ئه‌گه‌ر رێكه‌فتنه‌ك هه‌بیت كورد ئازاد نه‌بن. كه‌س بلا خه‌ونێ ب ئارامیا خوه‌ ڤه‌ نه‌بینن) ئانكو ئه‌ڤ روَژهه‌لاتا ناڤین یان دێ بوَ هه‌موو نه‌ته‌وه‌ وگه‌لێن وێ ئارام و ئازاد بیت یان مومكن نینه‌ كورد هه‌تاهه‌تا بن ده‌ست بن، هیچ سیاسیه‌كێ كوردی ل هیج ئالیه‌كێ نینه‌ بشێت نه‌ته‌وه‌یه‌كێ رازی كه‌تن هه‌تا هه‌تا بن ده‌ست بیت، یان بهانا و پرسێن لاوه‌كێ په‌یدا بكه‌تن. ئه‌وا راست بیت ئه‌مریكا بوَ كه‌سێ ده‌وله‌تێ جێناكه‌ت، لێ ئه‌مریكا ب زانین ده‌رفه‌تا هه‌بوونا ده‌له‌تێ بۆ گه‌له‌ك مله‌تا ره‌خساندیه‌، (ته‌یمورا روَژهه‌لات، كوَسوَڤوَ، باشورێ سودانێ.. .. هتد) ئه‌ڤجار وه‌ك دیار گه‌ر گه‌را گه‌لێ كوردستانێ یه‌، كوردستانێ بهایێ پتر ژ ده‌وله‌ته‌كێ باج دایه‌. وه‌ك دیار سه‌رخوه‌بوونێ ژی باجا خوه‌ هه‌یه‌، لێ ل ڤی كه‌توراێ نوكه‌ دا تشتێ هه‌ره‌ مه‌زن نه‌یارێن كوردستانێ بكه‌ن ره‌نگه‌ ئابلوَقه‌كا ئابووری شه‌ری بكه‌ن بوَ مدهه‌كێ. ژبلی ڤێ د دنیایا نوكه‌ دا ده‌رفه‌تا شه‌ره‌ك سه‌رتاسه‌ری دژی كوردستانێ قبوول ناكه‌ت نه‌مازه‌ راگه‌هاندنا پشتی راپرسیێ بیت. خه‌لك قیمه‌ت و بهایی دده‌ته‌ رایا مله‌تی. باروه‌ رناكه‌ن مه‌ره‌ما بارزانی ترساندن و گه‌فه‌كا سیاسی بیت بوَ هنده‌كا به‌لكو بریار و ئارمانجه‌كا سیاسیا زوَر كه‌توارانه‌یه‌ ل ڤێ قوَناخێ دا، كوردستانه‌كا سه‌ربه‌خوَ ده‌رمانه‌كێ بینجینه‌یه‌ بوَ پرسا كوردی ل عێراقێ و پرسا كوردی ل پارجێن دی ژی ده‌رفه‌ته‌كا نوو ل هه‌بوونا ئه‌ندامه‌كێ نوو ل (نه‌ته‌وه‌ێن ئێكگرتی) وه‌ك پالپشته‌ك ل دوَزا كوردی پارچێن دی. گه‌لێ كوردستانێ به‌رهه‌ڤه‌ بوَ سه‌رخوه‌بوونێ؟ بنگه‌ها ئابووریا مه‌ موكمه‌ بوَ سه‌رخوه‌بوونێ. ب ێگومان كێماسی هه‌نه‌ لێ بهانا هندێ نینه‌ ده‌ست ژ راپرسیێ به‌رده‌ین بوَ سه‌رخوه‌بوونێ

گومان تێدا نینه‌ هنده‌ك (غروور) یا سیاسی پشكه‌ك ژ پارتی ڤه‌گرتیه‌؟!ره‌نگه‌ بۆ بۆ پارتی ئه‌ڤ چه‌نده‌ ره‌وا نه‌بیت، لێ (ركمانا) سیاسیا هنده‌ك ئالیێن دی پارتی وه‌ك (مه‌غروور) نیشا دده‌تن، پارتی پتر هه‌ست ب به‌رپرسیاریا خوه‌ بكه‌ت ل ڤی وه‌لاتی نه‌ك ره‌نگه‌كێ (بێ منه‌تی) ب هنده‌ك ئۆرگانێن پارتی ڤه‌ دیاربن؟ راسته‌ پارتی حزبا مه‌زنا كوردستانێ یه‌ و راسته‌ ژی خودانا پشكه‌كا هه‌ره‌ زۆرا سه‌روه‌رێن ڤی وه‌لاتیه‌، راسته‌ ژی پارتی (میراتگرا) ژماره‌كا زۆرا شۆره‌ش و سه‌رهلدانایه‌، لێ ئه‌ڤه‌ هه‌می نوكه‌ و ل ڤی ده‌مێ پر قه‌یرانی دا دهانا چو ئالیه‌كێ نائێن ب تایبه‌ت (پارتی)، دبیت(38) كورسی قه‌بارێ درستێ پارتی نه‌بن، لێ ئه‌و چه‌نده‌ به‌سه‌ پارتی هه‌ست ب هندێ بكه‌ت ئه‌و پرانیا به‌رپرسیاریێ دهه‌لگریت، كێماسیا پارتی ل ڤێ قه‌یرانێ یا سیاسی پارتی پرۆژه‌كێ زه‌لال نه‌بوویه‌ و نه‌ ئێخسته‌ مه‌یدانێ و وه‌ك پێدڤی كار ل سه‌ر پرۆژێ خوه‌ نه‌كریه‌، پرانیا هه‌لۆیستێن پارتی (ره‌نگڤه‌دان) بووینه‌ د ڤی قه‌یرانێ دا، پرۆژه‌ ب وێ رامانێ هنده‌ك ژ داخوازێن ركابه‌رێن خوه‌ یێن سیاسی تێدا به‌رجه‌سته‌ بكی، پارتی هه‌می قورسایه‌تیا خوه‌ هێلایه‌ ب كه‌سایه‌تیاسه‌رۆك بارزانی ڤه‌، د ده‌مه‌كێ سه‌رۆك بارزانی سه‌رۆكێ هه‌می ئالیانه‌ و سویند خواریه‌ كو ب ئێك چاڤ سه‌یرێ هه‌می ئالیا بكه‌ت ب پارتی ژی ڤه‌ و بارزانی ل ڤی ئه‌ركی دا سه‌ركه‌فتی بوویه‌، لێ زۆر جاران هه‌لۆیستێ هنده‌ك كادرێن پارتی یان ئۆرگانه‌كێ پارتی رك و رك سه‌رۆك بارزانی راستی (ئیحراجا) سیاسی دكه‌ن؟!پارتی وه‌ك ئه‌ركێ دیرۆكی خوه‌ دڤیا ناڤه‌ندا بیرا سیاسیا كوردی بیت، پارتی دڤیا پرۆژێ خوه‌ هند زه‌لال و موكم دارشتبا هه‌می ئالیێن سیاسی ل دۆر پرۆژێ پارتی گه‌نگه‌شێ بكه‌ن. ئه‌وا كورد ژ پارتی دخوازن یان ژێ چاڤه‌رێ دكه‌ن باوه‌رناكه‌م ژ چو ئالیه‌كێ دی بهێته‌ خواستن و چاڤه‌رێ كرن. مه‌ پارتی ناسنه‌كریه‌ حزبا (ره‌نگڤه‌دانێ ـ رد الفعل) بیت پارتی سه‌نگ و ناڤه‌ندا نه‌ته‌وه‌یا كوردستانێ یه‌ ل هه‌ر جارا پارچا پارتی قورسایه‌تیا خوه‌ هه‌یه‌. ئه‌و تشێ بالكێش نه‌یارێن پارتی ل سه‌ر كار دكه‌ن ئه‌وه‌ پارتی وه‌ك (مه‌غروور) و (بێ منه‌ت) دیار دكه‌ن، ئه‌ڤه‌ ژ هنده‌ك شه‌پرزه‌یا پارتی یه‌. راسته‌ پارتی ب هه‌می قورسایه‌تیا خوه‌ڤه‌ خوه‌ ل مه‌یدانا شه‌رێ داعشێ دا دبینیت و ب كاروباررێن ده‌وله‌ت و حوكمه‌تێ ڤه‌. لێ مه‌یدانا سیاسی ل كوردستانێ پره‌ ژ دوژمنێن سیاسی بۆ پارتی و فه‌ره‌ پارتی مه‌یدانێ بۆ پرۆژێن خه‌لكێ چۆل نه‌كه‌ت.. .

پشكه‌كا زوَرا میدیا ده‌ڤه‌را سلمانیێ ب هنده‌ك سه‌ده‌مێن نه‌دیار گه‌له‌ك بانگا هندێ دكه‌ن كورد جاره‌كا دی به‌ره‌ف به‌غدا ڤه‌ بچن بوَ چاره‌سه‌ركرنا قه‌یرانێن خوه‌. وه‌ك بیژی به‌غدا سه‌رده‌مێ(هارون ره‌شیدی)یه‌. پری خه‌زینێن وێ زێرو مراری نه‌؟! ئه‌ف بانگكرنا بێ رامانا چوونا به‌غدا بێگومان یا ئاسای نینه‌. چوونا به‌غدا ئانكو بلند كرنا ئالایێ سپی به‌رامبه‌ری حوكمه‌ته‌كا فاشل و تایفی و پری كه‌رب و كین ده‌ر حه‌قێ خه‌لكێ كوردستانێ و سه‌ربوَرا وێ. راسته‌ ئاستێ ژیانێ سه‌خت و قوَرس بوویه‌. راسته‌ هێدی شه‌قامێ كوردی ب درویشم و هوزانا, تێرنابیت لێ بێگومان كورد هه‌تا وێ راستێ بێ هیڤی و بێ چاره‌ نه‌بویه‌ بوَ (نانی) قه‌ستا به‌غدا بكه‌تن. د ناڤ به‌را كوردا و به‌غدا دا كوَمه‌كا ئاریشان هه‌یه‌ و به‌غدا و لوَژیكێ حوكمڕانیێ ل به‌غدا هیج پروژه‌یه‌ك نینه‌ نه‌ك بوَ عێراقێ و نه‌ك ژبوَ كوردستانێ هه‌تا (بنێ گوهی) دگه‌نده‌لی و بێ په‌لێژانیێ دایه‌. ب چی لوَژیك د ڤێ قوناغێ دا ئه‌م (رهێن)خوه‌ راده‌ستی به‌غدا بكه‌ین؟! چ به‌رئاقلی و لوَژیك د هندێ دایه‌ به‌ره‌ف به‌غدا بچین؟! به‌غدا ئاماده‌ نینه‌ مافێن ده‌ستوری یێن كوردا مسوگه‌ر بكه‌تن, به‌غدا ب خوه‌ به‌رگومانه‌ كو ده‌ست ل قه‌یرانا ئابووریا كوردستانێ دا هه‌یه‌؟! سه‌ر باری بارێ ئابووریێ قوَرس و شه‌رێ تیروَرێ لێ هێشتا هند زاخ ل تاكێ كورد و ته‌خا سیاسیا وێ دا مایه‌ مه‌ بوَ مدهه‌ك دی ژی خوه‌ راگریێ ب هه‌لبژرێیت ژ هندێ كو بچیته‌ به‌غدا. به‌غدا هیج روَناهیێ و چاره‌یه‌ك ڤێ نینه‌ بوَ ئالۆزیێن خوه‌ هه‌تا كورد قه‌ستا به‌غدا بكه‌ن. ئه‌م راستی ئالۆزترین بارێ ئابووری بووینه‌ ژ پشتی سه‌رهلدانێ هه‌تا نوكه‌. كو وه‌سا ژ مه‌ دخازیت ل ڤێ قوَناغێ ب كێم ترین خوساره‌ت ده‌رباس بین و سه‌رخوَبوونه‌كا ئابووری هه‌تا ئه‌گه‌ر ب هه‌ژاری ژی بیت لڤێ قوَناغێ وه‌ك ده‌ستپێك ئاڤا بكه‌ین باشتره‌ ژ ته‌سلیم بوونێ بوَ به‌غدا. كو مسوَگه‌ر به‌غدا به‌ری شه‌رێ داعشێ نینه‌ و كاروانێ مه‌ بوَ سه‌رخوه‌بوونا سیاسی ب ئالۆزێن ئابووری نه‌هێته‌ راوستاندن. ئه‌م د ڤێ قوَناغا نازك دا پێدڤی ب خوَتكرنا گیانێ برایه‌تی و هاروكاری و پشته‌ڤانیه‌كا جڤاكی نه‌, هه‌تا سه‌ربلندانه‌ ژ ڤێ قه‌یرانێ قوَرتال ببین. یا ژ من ڤه‌ ئه‌ڤ قه‌یرانا ئابووری ژانا ژ دایك بوونا ده‌وله‌تێ یه‌. و خوه‌ راگرتنا مه‌ وه‌ك ملله‌ت مه‌زنترین وانه‌یه‌ بوَ نه‌حه‌زێن كوردا ب پێشیا هه‌میا به‌غدایا هه‌رفتی. چوونا به‌غدا ب كوردی و كورتی فنجانا ژه‌هرێ یه‌ كی ئاماده‌یه‌ ب ڤه‌خوَت؟!

ئه‌وا راست بیت، عه‌یبه‌ك مه‌زنه‌ مروَڤ ل وه‌لاته‌كێ(گاز و نه‌فتێ) و وه‌لاته‌ك پری رووبارێن ئاڤێ و وه‌لاته‌كێ هه‌موو ئه‌ردێ وی(بركانی) بكێرجاندنێ بهیت، وه‌لاته‌كێ پتر ژ (70%) خه‌لكێ گه‌نج و ده‌ستێ كاری و مرۆڤ ل ڤی وه‌لاتی فه‌قیر بیت. لێ د سه‌ر ڤێ جه‌ندێ هه‌مووێ دا، هه‌ر كه‌سێ پیجه‌كێ شاره‌زایێ(كوردوَلوَژیا) بیت و هه‌ر چنه‌ پیچه‌كێ گوهێ خوه‌ دابیته‌ ستران و لاڤژه‌ین فلوكلورێ كوردی دێ زانیت ده‌ردێ كوردا ژ كه‌ڤندا هه‌ژاری و نه‌داریه‌؟! هه‌ژاری (جێمكێ) تاكێ كورد بوویه‌؟! ژ ده‌ردێ نه‌بوونا ده‌وله‌تێ باوه‌رناكه‌م كوردا سه‌رده‌مه‌ك پری سه‌قامگیری یا ئابووری ده‌رباس كربیت؟! هه‌تا وێ رادێ كوردێن كه‌ڤن فه‌قیری ب عه‌یب نه‌زانیه‌؟! و گه‌له‌ك ژ (مه‌لایێن كوردا) دگوتن: “فه‌قیر ئه‌هلێ به‌حشتێنه‌”!! وه‌ك دیار ژ كه‌توارێ نوكه‌ ئه‌م و فه‌قیری دێ جاره‌كا دی بوَ مده‌هه‌كی و وه‌خته‌كی پێكڤه‌ بوورینین. پشتی فه‌قیری ل وه‌لاتی گه‌هشتی(3ونیف%)؟!ئه‌رێ قه‌ده‌را مه‌یه‌ ئه‌م و فه‌قیری ئێك و دوو (غه‌ریب)نه‌كه‌ین؟! یان ژبێ به‌رنامه‌یا مه‌یه‌ وه‌ك تاك و وه‌ك حوكمه‌ت؟! پاشی ب راستی ما ئه‌م فه‌قیرین؟! مه‌ وه‌لاته‌كێ ده‌وله‌مه‌ندێ هه‌ی؟َ! یان ئه‌م هه‌تا راده‌یه‌كێ ب تاك و حوكمه‌ت ڤه‌ ژ هش چووبین ڤان چه‌ند سالێن (پر پاره‌ییێ) مانه‌ ئه‌م بوین مه‌ مترا ئه‌ردی بری(1000)دوَلارا و پتر؟! مانه‌ ئه‌م بووین ب دووڤ ستایل و مودێلا كه‌فتین؟! و مه‌ قه‌نج بیرا هندێ نه‌ دكر گرنگ و گرنگتر هه‌یه‌ ل ژیانێ؟! باب و كالێن مه‌ ل ڤی وه‌لاتی ب سه‌ر به‌رزی و بێ بوَدجه‌ و مووچه‌ دژیان؟! ب هه‌ژاری به‌لێ ب ده‌رونه‌ك ئارم و دله‌ك ده‌وله‌مه‌ند؟! ئه‌رێ قه‌یرانا نوكه‌ ژبلی هه‌موو نه‌خوه‌شیا خوه‌ بوَ مه‌ وه‌ك بوَنده‌كێ ژی نینه‌؟! (گاز و غاز) بتنێ ملكێ مه‌ ڤان كه‌سا نینه‌ ئه‌وێن نوكه‌ دژین، به‌لكو ملكێ (جیلێن) پشتی مه‌یه‌ ژی؟! قه‌یرنا ئابووری كه‌تواره‌!! سه‌ده‌مێن وێ دزوَرن و ده‌رهاڤێژته‌یێن وێ ژی گه‌له‌كن. ژ هه‌ژاریێ ئاریشه‌ و ئالوَزیێن جڤاكی و بگره‌ كارێن خراب ژی په‌یدا دبن. و هنده‌ك دبێژن هه‌ژاری دایكا هه‌موو ئالوَزی و شه‌قیاتیا مروَڤایه‌؟! ئه‌ڤه‌ دوو سالێن پڕی (ته‌قه‌شف، شووتكگرێدان) مه‌ بوراندن و هێشتا ئه‌م یێ ل هیڤیا بهایێ په‌تروَلێ بلند ببیت؟! ئه‌م نه‌شیاینه‌ خوه‌ رازی كه‌ین كو ئه‌و روَژه‌ ب زه‌حمه‌ت بزڤڕنه‌ ڤه‌؟! ئه‌ڤه‌ ژیانه‌ و دڤێت ل گه‌ل رابهێن؟! هه‌ژاری و فه‌قیریێ پیڤه‌رێن خوه‌ هه‌نه‌. دبیت ئه‌م وه‌ك خه‌لكێ كوردستانێ نه‌ گه‌هشتینه‌ هندێ كو وه‌ك وه‌لاته‌كێ هه‌ژار بهێنه‌ نیاسین. چنكو هێشتا مه‌ هنده‌ك كارت هه‌نه‌ مه‌ وه‌ك پێدڤی ب كارنه‌ئیناینه‌ وه‌ك بكار ئینانا شیانا مروَڤێن خوه‌ ل وارێن پری به‌رهه‌م دا مینا چاندن و گیانداری و گه‌له‌ك پروَژێن دی یێن سڤك. لێ دبیت ئه‌م ژ خوه‌ بگرین و بێژین ئه‌م فه‌قیرین.. . مانێ كوردا یا گوتی: “ئه‌و ژی نه‌عه‌یبه‌”!!

هه‌یامه‌كه‌ باس باسێَ هنده‌ك پاكێجێن چاكسازیێ دهێته‌كرن. جوانه‌ حوكمه‌تا وه‌لاته‌كی پروَژه‌كێ چاكسازیێ هه‌بیت و كار بوَ بكه‌تن. لێ ل چ ژینگه‌ها سیاسی و چڤاكی دا چاكسازی هه‌م فه‌رن هه‌م ژی د به‌رهه‌م هێنه‌رن؟! ل وه‌لاتێ مه‌ (گه‌نده‌لی) به‌شه‌كه‌ ژ كولتوَرێ مه‌. میراتێ جڤاكیێ مه‌ (گه‌نده‌لیێ) دحه‌بینیت و زوَر پاساو و بهانه‌یان ژی ل بن ناڤێن جودا جودا دا په‌رده‌ پوَش دكه‌تن؟! ژماره‌كا زوَرا (گه‌نده‌لا) ل وه‌لاتێ مه‌(ماقیل و كه‌سێن ل پێشن) بوَ خوه‌ و (گه‌نده‌لیا)خوه‌ هارمونیكه‌ك جوان ئاڤا كریه‌. خرابتر ژ ڤێ ناسنامه‌كا سیاسی و یان ماركه‌كا (جیهانی) یان نیشانه‌كاَ (بازرگانی) ئافراندیه‌. چاكسازی ل وه‌لاتێ مه‌ دێ مین بتنێ پروَژه‌ و هنده‌ك پێنگاڤێن ساده‌؟ كه‌س دژی جاكسازیێ نیه‌ لێ ب مه‌رجه‌كی نه‌گه‌هیته‌ سنوورێ پاوانكریێ(حزبا و گروَپێن جڤاكی و.. .. هتد) ژ (حاشیا)ده‌سته‌لاتێ. دبیت حوكمه‌ت هنده‌ك پێنگاڤا د ڤی واری دا پاڤێژیت ل بن گڤاشتنا قه‌یرانا ئابووری دا. لێ مسوَگه‌ر باوه‌رناكه‌م چاكسازی یا بنه‌رتی و گشت گیر بیت ل وه‌لاتێ مه‌. نه‌ ژ نه‌زانینا مه‌یه‌ بوَ چاكسازیێ به‌لكه‌ ژ ترسا مه‌یه‌. ژ پروَژێ چاكسازیێ بخوه‌. دبیت ل ولاتێ مه‌(سازانه‌كا)سیاسی هه‌بیت بوَ ده‌ست برنێ ل هنده‌ك (سێكته‌رێن ) هه‌ستیار وه‌ك بوارێن (نه‌فت وگازا) و (ئه‌رد و خانیا) و (كوَمپانیێن مژادار)؟؟! هه‌ر پروَژه‌ك بوَ چاكسازیێ دڤیا ل ژینگه‌هه‌كا نوَرمالا سیاسی و حڤاكی دا بهێته‌ كرن. بوَ چاكسازیێ (پاكێجه‌كا) یاسایان هه‌بیت و ژ هه‌موویێ گرنگتر(ئیراده‌كا سیاسی) هه‌بیت. نه‌ك پروَژه‌كێ له‌زێ و ترسێ بیت ل بن گڤاشتنا هنده‌ك قه‌یرانا دابیت. حوكمه‌تا كوردستانێ مه‌زنترین ده‌ست كه‌فتنێن وێ ژ ڤان چاكسازیا ژ من ڤه‌ ئه‌وه‌ دانێ ب هندێ ده‌تن كو ئه‌ڤ وه‌لاته‌ پَیدڤی ب چاكسازیانه‌؟! ئه‌ڤه‌ ئاماژه‌كا باشه‌ و ره‌نگه‌ ده‌ستكه‌فت بیت ژی ل ڤێ قوَناغێ. كاره‌سات دا ئه‌و بیت حوكمه‌تێ ئینكارا هندێ بكربا كو هیج تشته‌ك ل ڤی وه‌لاتی پێدڤی ب چاكسازیێ نینه‌؟! ئه‌ڤا نوكه‌ دهێت گوتن ئه‌و ب خوه‌ باشه‌. چاكسازیێ ل (بیرا) مروَڤا دا دڤێت بیهَته‌كرن. دڤیا(مینبه‌رین مزگه‌فت و دێرا) و زانكوَ و خاندنا بنه‌ره‌ت بوَ چاكسازیێ بهێنه‌ سواركرن، هه‌تا(واسته‌كاری و به‌رتیل و به‌خشیش و شرینی و خاترانێ) ژ كولتوَرێ مه‌بن و جاكسازی ل كێم كرنا هنده‌ك موَچه‌ و ده‌رمالا نینه‌. به‌لكو ل بلندكرنا ئاستێ به‌رپرسیاره‌تیا جڤاكیه‌ ل ده‌ف ته‌خا ده‌سته‌لاتدار و كێم كرنا بوراێ گه‌ندل كاریێ یه‌ ل به‌ر سیبه‌را حزبا یان یاسای بهێته‌كرن.

ناكه‌ڤینه‌ په‌سنكرنا كه‌سایه‌تیه‌كا وه‌ك یا به‌رێز(مسعود بارزانی)كو بخوه‌ د ژیانا سیاسی دا فه‌رهه‌نگ و ماركه‌یه‌كا خوَمالیا سیاسه‌تكرنێ یه‌ ل درێژیا ژیێ خوه‌ دا. لێ ژبلی بارزانی هیچ سیاسیه‌كێ كوردی هندی بارزانی راستی ره‌خنێ و بوَهتانا نه‌هاتیه‌ ژ لایێ میدیا یا سیبه‌رڤه‌. هه‌رچی سیفه‌ته‌ك هه‌یه‌ ب بارزانی هاتیه‌ گوتن. هه‌تا راده‌یا (دكتاتوَریه‌تێ)لێ پرسیار ئه‌وه‌ بارزانی ب راستی دكتاتوَره‌ ؟! سیفه‌تێن دكتاتوَرا ل دورێن بارزانی هه‌نه‌؟! یان بارزانی ب خاندنا ناڤه‌ندێن سیاسێن دنیایی دا كه‌سه‌ك دیموَكراتخوازه‌ و هه‌موو ته‌مه‌نێ خوه‌ بوَ خزمه‌تا ملله‌تێ خوه‌ كریه‌ قوَربانی؟ چ بێ وه‌فایه‌كه‌ بارزانی راست هاتی ژ هنده‌ك لایه‌ن و كه‌ساڤه‌ بێ هیج بهانه‌ و سه‌ده‌مه‌كێ هیرشێ ب هه‌موو ره‌نگه‌ بكه‌نه‌ سه‌ر بارزانی بتنێ چنكو نه‌یاریه‌كا سیاسی و هه‌ڤڕكیه‌كا دیموَكراتی دگه‌ل بارزانی و حزبا بارزانی هه‌یه‌؟ ساله‌كه‌ و پتر بارزانی روَلێ(ماریشاله‌ك) سه‌ربازی دگێریت و دنیا هه‌موو رێزی ل وی گیانی دگریت، یێ د چه‌په‌رێن به‌هنگاریا درنده‌ترین گروَپ دا راوه‌ستای؟!چ بێ وه‌فایه‌كا كوردیه‌ هنده‌ك ده‌رهه‌قێ بارزانی دا دكه‌ن. زوَر جارا بارزانی و كورسیكا وی گه‌هشتینه‌ وێ رادێ كه‌س نه‌ (حه‌سیدیێ) پێ به‌ت و نه‌كه‌سێ دلێ خوه‌ بریه‌ وێ كورسیكێ؟! سه‌روَك بارزانی بو قورتال بوون ژڤێ قه‌یرانا سه‌روَكاتیێ هه‌موو رایا گشتی و حزبێن سیاسی ب (3) پێشنیارا ئاگه‌هدار كرن؟فه‌رموون لوَژیكێ سیاسیێ كوردستانێ به‌رسڤا بارزانی بده‌ن؟ بارزانی هه‌موو ئالی ب پارتی ڤه‌(بێ مننه‌ت )كرن؟! فه‌رموون كه‌سه‌كێ هه‌لبژێرن دا (گوَپالێ مارشیالیا شه‌رێ داعشێ) بده‌مێ؟! فه‌رموون كه‌سه‌كێ بدانن بلا ل سه‌رتاج و ته‌ختێن بارزانی ل به‌روَكێن شه‌ری (روونیت) بارزانی ب په‌یاما خوه‌. هه‌موو حزب و دوستێن خوه‌ و نه‌یارێن خوه‌ روو برووی راستیه‌كا ته‌حل كرن. یان هه‌لبژرتنا بكه‌ن وه‌ك دیموَركاتیه‌ت دخوازیت. یان سازانێ بكه‌ن كه‌سه‌كێ دیاركه‌ن. یانژی بێ ده‌نگ بن هه‌تا هه‌لبژراتنا؟! باوه‌رناكه‌م هیج سه‌ركردیه‌كێ سیاسی ل روَژهه‌لاتا ناڤین ب ڤان ئه‌گه‌ر روو برووی مله‌تێ خوه‌ بیت، ئه‌رێ ئه‌ڤه‌ په‌یامێن كه‌سه‌ك دكتاتوَرن. بارزانی ب خوه‌ بوَ خوه‌ پوَسته‌ك دیاركریه‌ ئه‌وژی پێشه‌رگایه‌تیه‌ باروه‌رناكه‌م سیاسیه‌ك هه‌بیت ڤێ گاڤێ بڤێت (پێشمه‌رگه‌بیت)؟! لێ ده‌مێ داهاتی دێ دیاركه‌تن كا ته‌خا سیاسی ل وه‌لاتێ مه‌ ل ئاستێ قوَناغا نوكه‌یه‌؟! یان دیسا نه‌ڤیانا كه‌سوَكی و سوار بینا ل (ده‌وارێن خه‌لكێ) هێشتا ل وه‌لاتێ مه‌ رێبازه‌كا كه‌ڤنارا نوویه‌؟ ده‌مێ سه‌رخوه‌بوونێ یه‌ یان ده‌مێ سه‌روَك راكرنێ یه‌؟!

هزار سالێن دی ببوورن فاشیزما توركی نه‌شێتن ژ سێگوشێ خوه‌(ته‌ك ئالا، ته‌ك زمان و ته‌ك وه‌لات) قوَرتال بیتن. ئه‌ڤه‌ راستیه‌كا نه‌گوَڕه‌، راسته‌ توركیا وه‌لاته‌ك دیموَكراتیه‌ لێ ل هه‌مبه‌ر گه‌لێ كوردستانێ و پرسا ئاخێ ل باكوورێ كوردستانێ هه‌ر جار توركیا جارانه‌ و خوَدان كولتوَره‌كێ سه‌ر كوَتكرنێ ژ میراتێ ئوسمانیان. لێ ل به‌رامبه‌ر فاشیزما توركیا (فاشیزمه‌كا كوردی) نه‌ ئه‌لترناتیف و چاره‌سه‌ریه‌. ئه‌وا نوكه‌ ل باكوورێ كوردستانێ روو دده‌تن كوَمكوژیه‌كا سوَر و سوَره‌. لێ ڤێ ره‌وشێ هنده‌ك فاكته‌ر هه‌نه‌،(په‌كه‌كێ)هیچ كاره‌كێ قه‌نج نه‌كریه‌ مه‌یدانا شه‌ری ببنه‌ باژێرا و وان باژێرا ئه‌وێن (هه‌ده‌په‌)تێدا ده‌سته‌لاتدار؟َ سیاسه‌تا (خه‌نده‌كا) و هنده‌ك ئیدیه‌مێن مژدار وه‌ك(خوه‌سه‌ریا دیموَكراتی) كو د هیچ فه‌رهنگه‌ك سیاسه‌ دا رامانا وێ زه‌لال نینه‌، ئه‌ڤه‌ ئاشكرا خیانه‌ته‌ ل پرسا كوردی ئه‌وا ل توركیا دبن گڤاشتنا خه‌باتا جه‌كداریا(په‌كه‌كێ)دا دبن گڤاشتنا ئه‌وروپا و مه‌رجێن (كوبنهاگن) و دبن گڤاشتنا هه‌رێما كوردستانێ ڤه‌ ل هنده‌ك وارا دا چوویه‌ پێش. و توركیا ژ نه‌چاری دان ب پرسا كوردی كری و هنده‌ك چاكسازی و مافێن ده‌ستپێكی بوَ كوردێن باكوور دیار كرین. بوَ توركیایه‌كا ئه‌نداما ناتوَ و خوَدان بیروَكراتیه‌ته‌كا(سه‌نترال) جهێ قبولكرنێ نینه‌ باژێرن باكوورێ كوردستانێ بكه‌ڤنه‌ د بن ده‌ستێ(چه‌كداران) دا نه‌مازه‌ هێشتا(په‌كه‌كه‌) د چاڤێن جیهانێ دا رێكخراوه‌كا (تیروَرسته‌). شه‌ركرن ل كولانێن باژێرا و هاندنا هه‌رزه‌كارا بوَ خوه‌پیشاندانێ و كوشتنا پوَلیسا و كوَلانا خه‌نده‌كا سایسه‌ته‌كا سه‌ر كه‌فتی و ستراتیژیه‌كا دروست نینه‌ و سه‌رئه‌نجام دێ دوزا كوردی و پروَژێ به‌رێز(عبدلله ئوَجالانی) خوسارت بیت. توركیا نه‌به‌رئاقله‌ د بن ڤان مه‌رج و شه‌رتا دا دبن شه‌رێ كوَلانا دا ته‌نازلێ بكه‌تن یان ملیمه‌كێ بوَ به‌رامبه‌ر نه‌رمیێ دیاركه‌تن و جیهان هه‌موو ژ ڤێ ره‌شه‌ كوژیا ل باكوورێ بێده‌نگه‌، چنكو كاره‌كێ ره‌وا نینه‌ شه‌ر بكه‌فیته‌ كوَلانا ل ده‌مه‌كێ ده‌رفه‌تێن ئاشتیێ هه‌نه‌ و هه‌موو دوستێن كوردا پشته‌ڤانێن پروَسا ئاشتیێ نه‌. (هه‌ده‌په‌) د ده‌ردێ(حه‌یلولوه‌لایێ)دایه‌. یان دڤیا پشته‌ڤانیا هه‌یبه‌تا ده‌وله‌تێ بكه‌تن بوَ ئارامكرنا باژێرا یان ژی پشته‌ڤانیا سیاسه‌تا شه‌رێ كوَلانا بكه‌تن كو ئه‌ڤه‌ و خه‌باتا په‌رلمانی ئێك ناگرن. ئه‌ڤا نوكه‌ ل باكوور دبیت فه‌ربوو ل سالێن 80 یان 90 هاتبنا كرن وه‌ختا سیاسه‌تا ئینكارێ هه‌ی نه‌كو نوكه‌ توركیا ب هه‌موو ئالی ڤه‌ دانێ ب (عبدلله ئۆجه‌لانی) دكه‌تن وه‌ك(محاور)و لایه‌نه‌كێ چاره‌سه‌ریا پرسا كوردیه‌. ئه‌ڤه‌ به‌رخوه‌دان نینه‌ هه‌ر چه‌نده‌ خولكێ وێ دده‌تن لێ شه‌رت و مه‌رجێن وێ نینن. به‌لكو خیانه‌ته‌ ل دوزێ و په‌یاما به‌رێز (ئوَجه‌لانی).. خزمه‌ته‌ بوَ فاشیزما توركی.