ئه‌ڤرۆ:

ئه‌ندامه‌كا هه‌وا هه‌لبژارتنا به‌ربژارێ پارتی دیموكراتی كوردستان بۆ پۆستێ سه‌رۆك كۆماری ل به‌غدا راگه‌هاند، ئه‌سته‌مه‌ هه‌ڤپه‌یمانیا (چارچۆڤێ هه‌ماهه‌نگیێ) بشێت حوكمه‌تا نوو یا ئیراقێ پێك بینیت، ژ ئه‌گه‌رێ وێ چه‌ندێ ژی دبیت هه‌لبژارتنێن پێشوه‌خت بهێنه‌ ئه‌نجامدان.

مه‌یاده‌ نه‌جار، ئه‌نداما خۆلا چارێ یا جڤاتا نوونه‌رێن ئیراقێ ژ فراكسیۆنا پارتی و ئه‌نداما هه‌وا هه‌لبژارتنا به‌ربژارێ پارتی بۆ پۆستێ سه‌رۆك كۆمارێ ئیراقێ گۆت” ئه‌سته‌مه‌ (چارچۆڤێ هه‌ماهه‌نگیێ) بشێت بۆ كۆمبوونا جڤاتا نوونه‌رێن ئیراقێ بۆ هه‌لبژارتنا سه‌رۆك كۆماری 220 په‌رله‌مانتاران كۆم بكه‌ت و پاشی سه‌رۆكێ وه‌زیران ده‌ستنیشان بكه‌ت. هه‌تاكو هه‌كه‌ بشێن ژی، بێ هه‌ڤپه‌یمانیا (رزگاركرنا نیشتمانی) حوكمه‌تێ پێك نائینیت”.

مه‌یادێ دیاركر ژی” هه‌ڤپه‌یمانیا (چارچۆڤێ هه‌ماهه‌نگیێ) نه‌شێت وێ هه‌ژمارا په‌رله‌مانتاران كۆم بكه‌ت، چونكه‌ هه‌ژمارا په‌رله‌مانتارێن هه‌ڤپه‌یمانیا (رزگاركرنا نیشتمانی) گه‌له‌ك ژ هه‌ژمارا وان زێده‌تره‌ و هه‌ژماره‌كا په‌رله‌مانتارێن سه‌ربخوه‌ ژی دگه‌لدانه‌” ئاماژه‌كر ژی”  ئه‌وێن دگه‌ل هه‌ڤپه‌یمانیا (رزگاركرنا نیشتمانی) ناچنه‌ پال هه‌ڤپه‌یمانیا (چارچۆڤێ هه‌ماهه‌نگیێ)”.

ب دیتنا وێ په‌رله‌مانتارا خۆلا بۆری یا جڤاتا نوونه‌رێن ئیراقێ” چارچۆڤێ هه‌ماهه‌نگیێ نه‌كو نه‌شێت 220 په‌رله‌مانتاران كۆم بكه‌ت، به‌لكو نه‌شێت نیڤا هه‌ژمارا په‌رله‌مانتاران ژی كۆم بكه‌ت هه‌تا هه‌كه‌ هه‌موو په‌رله‌مانتارێن سه‌ربخوه‌ ژی بچنه‌ ئالیێ وان”.

دیاركر ژی” پشتی ژناڤچوونا رژێما سه‌دامی هه‌تا نوكه‌ دیموكراسیه‌ته‌كا به‌رهه‌ست نه‌هاتیه‌ دیتن، ئه‌و دیموكراسیه‌تا به‌حس لێ دهێته‌ كرن، دیموكراسیه‌ته‌كا زاره‌كی بو، ئه‌و دیموكراسیه‌ت نینه‌ كو تنێ پشكه‌كا وه‌لاتی حوكمه‌تێ پێك بینیت، نابیت تاكه‌ بریارده‌رێ وه‌لاتی هه‌ر شیعه‌ بیت، دناڤ جڤاتا نوونه‌ران دا زێده‌تر ژ نیڤا په‌رله‌مانتاران هه‌ر ئه‌وبن و د حوكمه‌تێ ژی ئه‌و ئه‌و”.

ل رۆژێن 26 و 30 ئادارا 2022، جڤاتا نوونه‌رێن ئیراقێ نه‌شیا سه‌رۆك كۆمارێ نوو هه‌لبژێریت د نڤ 41 به‌ربژاران دا، ژ ئه‌گه‌رێ بایكۆتكرنا روونشتنا جڤاتێ ژ ئالیێ هه‌ڤپه‌یمانیا (چارچۆڤێ هه‌ماهه‌نگیێ) و چه‌ند فراكسیۆنێن دی كو زێده‌تر ژ سێكا هه‌ژمارا ئه‌ندامێن جڤاتا نوونه‌ران پێك دئینن.

ل رۆژا پێنجشه‌مبی 31 ئادارا 2022، موقته‌دا سه‌در، رێبه‌رێ ره‌وتێ سه‌دری د تویته‌كێ دا ده‌مێ 40 رۆژان وه‌كو ده‌لیڤه‌ دایه‌ هه‌ڤپه‌یمانیا (چارچۆڤێ هه‌ماهه‌نگیێ) بۆ پێكئینانا حوكمه‌تا نوو بێی پشكداریا ره‌وتێ سه‌دری.

مه‌یاده‌ نه‌جار دووپاتیێ ل وێ چه‌ندێ دكه‌ت كو” پێدڤیه‌ كورد، شیعه‌ و سوننه‌ د پێكئینانا حوكمه‌تێ و دیاركرنا سه‌رۆكێ وه‌زیران دا پشكدار بن و ل جڤاتا وه‌زیران دا هه‌رسێ خودان بریار بن”.

ناڤبری د وێ باوه‌ریێ دا نینه‌ پارتی و پشكه‌ك ژ سوننه‌ و شیعێن دناڤ هه‌ڤپه‌یمانیا (رزگاركرنا نیشتمانی) هه‌ڤپه‌مانیێ ل گه‌ل چارچۆڤێ هه‌ماهه‌نگیێ دا پێكبینن، ژبه‌ركو پارتی و سوننه‌یان دیاركریه‌ كو دێ ل گه‌ل ره‌وتێ سه‌دری دا بن.

گۆت ژی” ئیراق به‌ر ب تۆنێله‌كا تاری دچیت، چونكه‌ حزبێن ئیراقی تنێ ل دووڤ به‌رژه‌وه‌ندیێن خوه‌ دچن، هه‌كه‌ چارچۆڤێ هه‌ماهه‌نگیێ  نه‌شێت د 40 رۆژان دا حوكمه‌تێ پێك بینیت، دبیت به‌ر ب هه‌لبژارتنه‌كا پێشوه‌خت بچین ژبه‌ركو چارچۆڤێ هه‌ماهه‌نگیێ نه‌شێت حوكمه‌تێ پێك بینیت، هه‌ڤده‌م قه‌بوول ناكه‌ت ژی هه‌ڤپه‌یمانیا (رزگاركرنا نیشتمانی) ببیته‌ دژبه‌ر، چونكه‌ ئه‌و باوه‌ری ب خوه‌ نینه‌ كو بشێت حوكمه‌ته‌كا ب هێز پێك بینیت كو خزمه‌تا وه‌لاتی بكه‌ت”.

ب دیتنا مه‌یادێ” هه‌كه‌ هه‌لبژارتنێن پێشوه‌خت یێن جڤاتا نوونه‌رێن ئیراقێ بهێنه‌ ئه‌نجامدان، دێ هه‌ژماره‌كا مه‌زن یا خه‌لكی پشكداریێ كه‌ن و دێ هه‌ژمارا كورسیێن سه‌ربخوه‌یان ژی زێده‌تر بیت”.

هه‌ولێر، قائید میرۆ

هێشتا لیژنا ڤه‌كۆلینێ ل هێرشا لسه‌ر هه‌ولێرێ ئه‌نجامێن دووماهیێ دیار نه‌كرینه‌ و شرۆڤه‌كاره‌كێ سیاسی ژی دبێژیت، به‌غدا یا لاوازه‌ هه‌مبه‌ر ڤان جوره‌ هێرشێن ئیرانێ و پێدڤیه‌ كار بهێته‌كرن بۆ ئاشكراكرنا ئه‌نجامێن دووماهیێ یێن هێرشا لسه‌ر هه‌ولێرێ هه‌روه‌سا ئاماژه‌كر، حوكمه‌تێن ئیراقێ ئیراده‌كا بهێز یا نیشتیمانی نه‌بوویه‌ ل هه‌مبه‌ر ده‌ستێوه‌ردانێن ده‌ره‌كی.

تارق سارمه‌می، شرۆڤه‌كارێ سیاسی بۆ رۆژناما ئه‌ڤرۆ دیاركر” روودانا هێرشا لسه‌ر هه‌ولێرێ یا دوور نینه‌ ژ ڤان روودانێن ل رووسیا و ئۆكرانیا هه‌ین، چونكه‌ هه‌كه‌ دده‌مێ نوكه‌دا ژی كاریگه‌ریێن ڤی شه‌ڕی لسه‌ر هه‌رێما كوردستانێ و ده‌ڤه‌رێ نه‌بن، دێ ل پاشه‌رۆژێ ئه‌و كاریگه‌ری ده‌ركه‌ڤن، نوكه‌ جیهان لسه‌ر هه‌ردوو به‌ره‌یێن رووسیا و ئه‌مریكا به‌لاڤبوویه‌، هه‌ر ئێك ژوان كار بۆ زێده‌كرنا هه‌ژموونا خوه‌ دكه‌ت و دخوازن ل جهێ ئێك ژوان لاوازبیت یان دشێت گڤاشتنان بكه‌ت، روودانا هێرشا لسه‌ر هه‌ولێرێ تێكدانا ئارامی و به‌زاندنا سه‌روه‌ریا ئاخا ئیراقێ و هه‌رێما كوردستانێ بوویه‌، ئه‌ركێ جڤاتا نوونه‌رێن ئیراقێ و ئالیێن  په‌یوه‌ندیدار ڤه‌كۆلینێن دروست لدۆر هێرشا لسه‌ر هه‌ولێرێ بكه‌ن، ئه‌ز باوه‌رم ئه‌گه‌رێ سه‌ره‌كیێ ده‌ستێوه‌ردانێن توركیا و ئیرانێ بۆ لاوازیا به‌غدا ڤه‌دگه‌ڕیت، مخابن هه‌موو حوكمه‌تێن ئیراقێ لاوازبووینه‌، ئالیێن ئیراقێ ژی كه‌فتینه‌ بن كاریگه‌ریا وه‌لاتێن ده‌ڤه‌رێ، ئه‌ڤه‌ژی ئه‌گه‌ره‌كێ سه‌ره‌كیه‌ بۆ وێ چه‌ندێ ئیراق خودان بڕیاره‌كا بهێز نه‌بیت، وه‌لاتێن جیران به‌هانه‌یێن جودا هه‌نه‌ بۆ هێرشكرنێ ل سه‌ر هه‌رێما كوردستانێ، فڕۆكه‌یێن توركیا هه‌ر وه‌لاتیێن مه‌ دكه‌نه‌ قوربانی، تۆپبارانێن ئیرانێ هه‌ر وه‌لاتیێن هه‌رێمێ دبنه‌ قوربانی ئه‌ڤه‌ هه‌موو بۆ هه‌لویستێ لاوازێ ئیراقێ ڤه‌دگه‌ڕیت، له‌وڕا پێدڤیه‌ حوكمه‌تا داهاتی یا ئیراقێ ئیراده‌یه‌كا نیشتیمانیا بهێز هه‌بیت”.

تارق سارمه‌می ئاماژه‌كر” پێدڤیه‌ بهێته‌ ئێكلاكرن كو ئایا راسته‌ ئیراق بویه‌ مه‌یدانا ده‌زگه‌هێن هه‌والگه‌ریێن وه‌لاتێن جیهانێ یان ژی هه‌ر پڕۆپاگنده‌نه‌، هه‌روه‌سا سنوره‌ك بۆ هێرشێن توركیا و ئیرانێ بهێته‌ دانان و جاره‌كادی نه‌بنه‌ ئه‌گه‌رێ تێكدانا ئارامیا هه‌رێما كوردستانێ، نابیت هه‌رێما كوردستانێ ژی پشكه‌ك ژ هه‌ڤڕكیێن دناڤبه‌را رووسیا و ئه‌مریكا دابیت، چونكه‌ نابیت هه‌رێما كوردستانێ ببیته‌ پشكه‌ك ژ ڤی شه‌ڕێ نوكه‌ ل ئۆكرانیا هه‌ی، ژئالیه‌كێ دی ڤه‌ هه‌رێما كوردستانێ نه‌بیته‌ ژێده‌رێ مه‌ترسیێ بۆ سه‌ر وه‌لاتێن جیران، ژبه‌ركو چه‌ندین كیلۆمه‌تر سنور مه‌ هه‌نه‌ دگه‌ل ئیرانێ و توركیا و چه‌ندین به‌رژه‌وه‌ندیێن هه‌ڤپشك هه‌نه‌ دناڤبه‌را هه‌رێما كوردستانێ و وه‌لاتێن جیران، ناهێته‌ ڤه‌شارتن شه‌ڕێ نوكه‌ ل جیهانێ شه‌ڕێ وزێ یه‌ و هه‌رێما كوردستانێ نه‌شێت ب تنێ كار بكه‌ت د بیاڤێ وزه‌ی دا و هه‌ر گاڤه‌كا پاڤێژیت دێ بیته‌ پشكه‌ك ژ هه‌ڤڕكیا نوكه‌ هه‌ی، به‌لێ دگه‌ل ئیراقێ ب هه‌ماهه‌نگی هه‌رێم دشێت گاڤێن دروست پاڤێژیت، به‌رژه‌وه‌ندیا هه‌رێما كوردستانێ و پاراستنا خه‌لكێ وێ دڤێت سه‌ر هه‌موو تشته‌كی بیت”.