ئه‌ڤرۆ:

بریاره‌ ئه‌ڤرۆ هه‌ر شه‌ش پارتیێن ئۆپۆزسیۆنا توركیا بۆ جارا دویێ كۆمبن و به‌حسێ چاوانیا پێكڤه‌كاركرنێ و سیسته‌مێ په‌رله‌مانی ل توركیا بكه‌ن، جێگرێ ئه‌ردۆغانی ژی دیار دكه‌ت كو شه‌ش پارتیێن ئۆپۆزسیۆنێ‌ تنێ‌ ل سه‌ر بنه‌مایێ‌ دژبه‌ریا ئاكپارتیێ‌ كار دكه‌ن و چو پرۆژه‌یێن وان نینن.

به‌رپرسه‌كێ پارتیا كۆماریا گه‌ل راگه‌هاند كو ئه‌ڤرۆ دێ هه‌ر شه‌ش پارتیێن ئۆپۆزسیۆنێ بۆ جارا دویێ كۆمبن و د كۆمبوونێ دا دێ به‌حسێ ڤه‌گه‌را بۆ سیسته‌مێ په‌رله‌مانی ل توركیا كه‌ن، چونكو سیسته‌مێ سه‌رۆكاتیێ ل توركیا بوویه‌ ژێده‌رێ گه‌له‌ك پرسێن نها و ژ به‌ر هندێ ژی دڤێت جاره‌كا دی توركیا ڤه‌گه‌ریته‌ ڤه‌ سیسته‌مێ په‌رله‌مانی، د كۆمبوونا به‌ری نها دا هه‌ر شه‌ش پارتیان بریار دابوون كو ل سه‌ر هنده‌ك خالان پێكڤه‌ كار بكه‌ن و د كۆمبوونا ئه‌ڤرۆكه‌ دا دێ به‌حسێ گه‌له‌ك تشتان هێته‌ كرن.

ئه‌و یه‌ك د ده‌مه‌كێ دایه‌ كو به‌ری چه‌ند رۆژان عه‌لی باباجان سه‌رۆكێ پارتیا DEVA راگه‌هاند كو توركیا تووشی قه‌یرانه‌كا گه‌له‌ك مه‌زن هاتیه‌، ئاكپارتیێ چو پرۆژه‌ بۆ چاره‌سه‌ریێ نینن و ژ به‌ر هندێ ژی وه‌كو پارتێن ئۆپۆزسیۆنێ وان چه‌ندین خال دیار كرینه‌ كو دێ د كۆمبوونا حه‌فتیا بهێت دا پێكڤه‌ به‌حسێ هندێ كه‌ن كا دێ چاوا شێن توركیا ژ قه‌یرانا نها قورتال بكه‌ن، چونكو پێدڤیا توركیا ب دیموكراسیێ و سیسته‌مێ په‌رله‌مانی هه‌یه‌، هه‌كه‌ هه‌ر شه‌ش پارتیێن ئۆپۆزسیۆنێ بشێن پێكڤه‌ ل سه‌ر هنده‌ك خالان رێكبكه‌ڤن دێ شێن د هه‌لبژارتنێن بهێت دا ئه‌ردۆغانی و پارتیا وی ژ ده‌ستهه‌لاتێ دوور كه‌ن، چونكو سیسته‌مێ سه‌رۆكاتیێ ب سه‌رێ خوه‌ گه‌له‌ك ئاریشه‌ بۆ توركیا دروست كرینه‌ و ژ به‌ر هندێ ژی دڤێت جاره‌كا دی سیسته‌مێ توركیا ببیته‌ په‌رله‌مانی دا رێ ل گه‌له‌ك گه‌نده‌لیان بهێته‌ گرتن.

عه‌لی باباجان ئه‌و یه‌ك ژی دیار كربوو كو هه‌كه‌ پارتێن ئۆپۆزسیۆنێ پێكڤه‌ پرۆژه‌كێ ب دلێ خه‌لكێ توركیا به‌رهه‌ڤ نه‌كه‌ن و پێكڤه‌ كار نه‌كه‌ن دێ توركیا تووشی گه‌له‌ك كاره‌ساتێن مه‌زن بیت، چونكو ئاكپارتی و ئه‌ردۆغان ب هه‌موو ره‌نگه‌كێ كار دكه‌ن دا ژیێ ده‌ستهه‌لاتا خوه‌ درێژ بكه‌ن و وان چو پرۆژه‌ بۆ چاره‌سه‌ركرنا پرسێن نها یێن توركیا نینن.

ل ئالیێ دی نۆمان قورتولمیش جێگرێ سه‌رۆكێ گشتی یێ ئاكپارتیێ ژی راگه‌هاند كو هه‌ر شه‌ش پارتیێن ئۆپۆزسیۆنێ تنێ ژ به‌ر هندێ گه‌هشتینه‌ ئێكتر دا دژبه‌ریا ئاكپارتیێ بكه‌ن، وان چو پرۆژه‌ بۆ چاره‌سه‌ركرنا پرسێن نها یێن توركیا نینن، هه‌ر كه‌س باش دزانیت كا د چه‌ندین سالێن بۆری دا وان كه‌سان چ كرینه‌ و هه‌ر تشت بۆ خه‌لكێ توركیا ئاشكرا بوویه‌، ئه‌م وه‌كو ئاكپارتی كار دكه‌ین دا كو بشێین جاره‌كا دی ب تنێ ببینه‌ ده‌ستهه‌لاتدار و مه‌ گه‌له‌ك پرۆژه‌ بۆ چاره‌سه‌ركرنا قه‌یرانێن نها ل توركیا هه‌نه‌ و گۆت: (نها ب گشتی جیهان تووشی قه‌یرانێ هاتیه‌ و شه‌رێ د ناڤبه‌را رۆسیا و ئۆكرانیایێ دا كارتێكرنا خوه‌ ل هه‌موو جیهانێ كریه‌، بێگومان وی شه‌ری كارتێكرنا خوه‌ ل توركیا ژی كریه‌، ڤێجا وان پارتیێن ئۆپۆزسیۆنێ ژی دخوازن نها هه‌ر تشتێ هه‌ی ل دژی مه‌ بكار بینن و وان ب خوه‌ چو پرۆژه‌یه‌ك بۆ چاره‌سه‌ركرنا پرسێن نها یێن توركیا نینن، بێگومان مه‌ به‌ری نها ژی دیار كریه‌ كو ل توركیا گه‌له‌ك پرس هه‌نه‌ و دڤێت بهێنه‌ چاره‌سه‌ركرن، لێ نابیت پارتیێن سیاسی هنده‌ك تشتان بۆ به‌رژه‌وه‌ندیێن خوه‌ و كۆمكرنا ده‌نگان بكه‌ن، چونكو بۆ خه‌لكی دیاره‌ كا د چه‌ند سالێن بۆری دا مه‌ چ كریه‌ و وان چ كریه‌، كارێ وان تنێ دژبه‌ریا ئاكپارتیێ بوویه‌).

ئه‌ڤرۆ:

وه‌زیرێ ده‌رڤه‌ یێ ئیرانێ راگه‌هاند كو وه‌لاتی وی به‌رهه‌ڤه‌ بابه‌تێ پرسا به‌رنامێ ئه‌تۆمی یێ ئیرانێ ل گه‌ل ئه‌مریكا ب رێیا دانوستاندنان چاره‌سه‌ر بكه‌ت و هه‌تا نها ژی هه‌ڤدیتنێن ل ڤییه‌نا ب ره‌نگه‌كێ باش برێڤه‌ دچن، لێ بۆ رێككه‌فتنێ دڤێت ئه‌مریكا سزایێن ل سه‌ر سوپایێ پاسداران و هنده‌ك كه‌سایه‌تیێن ئیرانی راكه‌ت و هه‌كه‌ ئه‌و یه‌ك نه‌هێته‌ كرن ئیران ژی چو رێككه‌فتنان ل گه‌ل ئه‌مریكا ئیمزا ناكه‌ت.

حسێن ئه‌میر عه‌بدوللاهیان ئه‌و یه‌ك ژی دیار كر كو د سه‌رده‌مێ ده‌ستهه‌لاتا ترامپی دا گه‌له‌ك سزایێن گران ل سه‌ر ئیرانێ هاتینه‌ سه‌پاندن كو ئێك ژ وان ژی سزادانا سوپایێ پاسداران بوویه‌، مه‌ ب ره‌نگه‌كێ فه‌رمی داخواز ژ ئه‌مریكا كریه‌ كو وان سزایان ل سه‌ر ئیرانێ راكه‌ت، هه‌تا نها به‌رپرسێن ئه‌مریكا ب فه‌رمی به‌رسڤا داخوازیێن مه‌ نه‌داینه‌ و هه‌كه‌ ئه‌مریكا به‌رهه‌ڤ نه‌بیت وان سزایان راكه‌ت ئه‌م ژی وه‌كو ئیران چو رێككه‌فتنان ل گه‌ل ئه‌مریكا ئیمزا ناكه‌ین.

چاڤدێرێن سیاسی ژی دیار دكه‌ن كو د ره‌وشا نها دا ئه‌مریكا نه‌شێت هه‌موو داخوازیێن ئیرانێ قه‌بوول بكه‌ت، چونكو به‌ری هه‌ر تشته‌كێ ئسرائیل ل دژی رێككه‌فتنا د ناڤبه‌را ئیرانێ و ئه‌مریكا دایه‌، خالا دی پڕانیا وه‌لاتێن عه‌ره‌بی ل دژی هندێ نه‌ كو ئه‌مریكا وان سزایێن كو به‌ری نها ل سه‌ر ئیرانێ سه‌پاندینه‌ راكه‌ت، چونكو ب راكرنا وان سزایان دێ جاره‌كا دی ئیران بهێز كه‌ڤیت و دشێت گه‌له‌ك ئاریشان بۆ وه‌لاتێن عه‌ره‌بی ل رۆژهه‌لاتا ناڤین دروست بكه‌ت.

ئه‌ڤرۆ:

وه‌زاره‌تا به‌رگریێ یا ئۆكرانیایێ راگه‌هاند كو وان شیاینه‌ هێزێن رۆسیا ٧٠ كیلومیتران ژ كێیڤ دوور بكه‌ن و نها شه‌ر ب دژواری به‌رده‌وامه‌ و رۆسیا نه‌شیایه‌ خوه‌ نێزیكی پایته‌ختی بكه‌ت و هه‌كه‌ وه‌لاتێن ئه‌ندامێن ناتۆ هاریكاریا مه‌ بكه‌ن دێ شێین رۆسیا تووشی شكه‌ستنه‌كا مه‌زن بكه‌ین دا نه‌چار بیت هه‌موو مه‌رجێن مه‌ قه‌بوول بكه‌ت و هێزێن خوه‌ ژ ئۆكرانیایێ ڤه‌كێشیت.

وه‌زاره‌تا به‌رگریێ یا ئۆكرانیایێ ئه‌و یه‌ك ژی دیار كریه‌ كو هێزێن وان ب هه‌موو ره‌نگه‌كێ به‌رسڤا ئێرشێن رۆسیا دده‌ن و د ماوه‌یێ دو رۆژێن ده‌ربازبوویی دا پتر ژ سێسه‌د سه‌ربازێن رۆسیا هاتینه‌ كوشتن و گه‌له‌ك فرۆكه‌ و ترۆمبێلێن سه‌ربازی یێن رۆسیا ژی هاتینه‌ ژناڤبرن و هێزێن رۆسیا نه‌شێن ب چو ره‌نگه‌كێ خوه‌ نێزیكی كێیڤ بكه‌ن.

ل ئالیێ دی دوهی رۆژناما واشنتۆن پۆست یا ئه‌مریكی ژی راگه‌هاند كو رۆسیا د شه‌رێ ل دژی ئۆكرانیایێ دا هه‌تا نها سه‌ركه‌فتی نه‌بوویه‌ و د گه‌له‌ك جهان دا تووشی شكه‌ستنێ ژی بوویه‌، چونكو هێزێن ئۆكرانیایێ شیاینه‌ ب چه‌كێن مودێرن به‌رسڤا ئێرشێن رۆسیا بده‌ن و گه‌له‌ك فرۆكه‌ و كۆپته‌رێن رۆسیا هاتینه‌ ژناڤبرن و مۆرالا له‌شكرێ رۆسیا ب ته‌مامی شكه‌ستیه‌ و له‌شكرێ رۆسیا هه‌ست ب هندێ كرینه‌ كو نه‌شێن د شه‌رێ ل دژی ئۆكرانیایێ دا سه‌ركه‌ڤن، ژ به‌ر هندێ ژی به‌لانسا شه‌ری نها ب ته‌مامی د به‌رژه‌وه‌ندیا ئۆكرانیایێ‌ دا هاتیه‌ گوهۆرین و ئه‌و یه‌ك دێ كارتێكرنا خوه‌ ل هه‌موو پیلانێن رۆسیا ل ئۆكرانیایێ كه‌ت.

ئه‌و یه‌ك د ده‌مه‌كێ دایه‌ كو به‌ری دو رۆژان وه‌زاره‌تا به‌رگریێ یا رۆسیا ژی راگه‌هاند كو شه‌رێ وان ل گه‌ل ئۆكرانیا وه‌كو وان به‌رنامه‌ بۆ دانایی برێڤه‌ دچیت و گه‌له‌ك ده‌ڤه‌رێن ستراتیژی هاتینه‌ كۆنترۆلكرن و ب ده‌هان كۆگه‌هێن چه‌ك و ته‌قه‌مه‌نیان ژی هاتینه‌ ژناڤبرن و تشتێن د ده‌زگه‌هێن راگه‌هاندنا ئۆرۆپا دا ل دۆر شه‌ری دهێنه‌ به‌لاڤكرن ژی راست نینن، چونكو رۆسیا شیایه‌ بگه‌هیته‌ ئارمانجا خوه‌ و هه‌تا ئۆكرانیا هه‌موو داخوازیێن رۆسیا ژی قه‌بوول نه‌كه‌ت دێ شه‌ر به‌رده‌وام بیت.