ئه‌ڤرۆ:

ده‌مێ دو هه‌قتیانه‌ شانده‌كێ لژنا كاروبارێن شه‌هیدان و جینۆساید و زیندانیێن سیاسی ل په‌رله‌مانێ كوردستانێ، سه‌ره‌دانا چه‌ند وه‌لاتێن ئۆروپی دكه‌ت، سه‌رۆكێ شاندی ژی دبێژیت، ل گه‌ل په‌رله‌مانتارێن وه‌لاتێن زلهێزێن جیهانێ كار دكه‌ین بۆ دانه‌نیاسینا جینۆسایدكرنا كوردان ل سه‌ر ئاستێ وه‌لاتێن جیهانێ.

ژیان تاهر زێوه‌ی، سه‌رۆكا شاندێ په‌رله‌مانێ كوردستانێ گۆت” ل ده‌ستپێكێ مه‌ سه‌ره‌دانا وه‌لاتێ فه‌ره‌نسا كر بۆ وێ چه‌ندێ هۆكارێ ره‌تكرنا وێ پرۆژه‌ قانوونا ل دۆر جینۆسایدێ هاتیه‌ ره‌تكرن بزانین و كار بۆ بكه‌ین، هه‌روه‌سا مه‌ سه‌ره‌دانا وه‌لاتێ به‌لجیكا كر و ل وێرێ ژی مه‌ كۆمبوون ل گه‌ل چار په‌رله‌مانتارێن ئورۆپی كر و مه‌ داخواز ژێ كر سه‌ره‌دانا هه‌رێما كوردستانێ بكه‌ن بۆ وێ ئێكێ تاوانان ب چاڤێن خوه‌ ببینن و به‌لگه‌یان ژی پێكشكێشی وان بكه‌ین، پاشی مه‌ سه‌ره‌دانا په‌رله‌مانێ به‌لجیكا كر و دیدار ل گه‌ل په‌رله‌مانتارێن به‌لجیكی كرن و ل وێرێ ژی مه‌ به‌حس ل وێ چه‌ندێ كر كو پێكڤه‌ پرۆژه‌كی به‌رهه‌ڤ بكه‌ین ل دۆر جینۆسایدكرنا كوردان، نوكه‌ ژی ل ئه‌لمانیاینه‌ كو دێ چه‌ندین كۆمبوونان ل وێرێ ژی كه‌ین.

ژیان تاهر كو جێگرا سه‌رۆكێ لژنا كاروبارێن شه‌هیدان و جینۆساید و زیندانیێن سیاسی ل په‌رله‌مانێ كوردستانێ ل دۆر ئارمانجا سه‌ره‌دانا شاندێ په‌رله‌مانێ كوردستانێ گۆت” ئارمانجا سه‌ره‌دانا شاندی دانه‌نیاسینا جینۆسایدێ یه‌ ل سنوورێ هه‌رێما كوردستانێ ببه‌ینه‌ ده‌رڤه‌ و ئه‌و ئێش و ئازارێن گه‌لێ مه‌ تووشبوویێ ژ جینۆساید و ئه‌نفال و كیمیاباران و وێرانكرنا گوندان ل سه‌ر ده‌ستێ رژێما به‌عس یا ژناڤچوی ب به‌لگه‌ و دیكیۆمێنت بگه‌هینینه‌ وه‌لاتێن جیهانێ ب تایبه‌ت وه‌لاتێن زلهێز بۆ وێ چه‌ندێ ئه‌وژی ب جینۆسایدێ فه‌رمی بده‌نه‌ نیاسین.

ژیانێ گۆت ژی” د به‌رنامێ مه‌دایه‌ ل داهاتی سه‌ره‌دانا وه‌لاتێن دی ژی بكه‌ین بۆ هه‌مان مه‌به‌ست و كار دكه‌ین بۆ وێ چه‌ندێ په‌یوه‌ندیێن مه‌ ل گه‌ل په‌رله‌مانتارێن وه‌لاتێن زلهێز ب هێز بكه‌ین”.

ل دووماهیێ گۆت” دو په‌رتۆك كو ب زمانێ ئینگلیزی ل دۆر جینۆسایدێ هاتینه‌ نڤیسین و به‌لگێن پێدڤی تێدا یێن هه‌ین و مه‌ پێشكێشی په‌رله‌مانتارێن وان وه‌لاتان كرن و مه‌ داخواز ژێ كریه‌ سه‌ره‌دانا كوردستانێ بكه‌ن تاكو ئێش و ئازارێن گه‌لێ كورد ب چاڤێن خوه‌ ببینن”.

سه‌رۆك مه‌سعود بارزانی په‌یوه‌ندیه‌كا ته‌له‌فۆنی ل گه‌ل موقته‌دا سه‌در رێبه‌رێ ره‌وتێ سه‌دری ئه‌نجامدا و تێدا سه‌ره‌رای پیرۆزباهی ل به‌یانناما فراكسیۆنا زۆرینه‌ (رزگاریا نیشتمانی)، به‌حس ل پرسا به‌ربژارێن سه‌رۆكایه‌تیا كۆمارێ و سه‌رۆكایه‌تیا جڤاتا وه‌زیران هاته‌ كرن.

هه‌روه‌سا سه‌رۆك بارزانی و شێخ خه‌میس خه‌نجه‌ر سه‌رۆكێ هه‌ڤپه‌یمانیا (سیاده‌) یاسوننی د په‌یوه‌ندیه‌كا ته‌له‌فۆنی دووماهی پێشهاتێن دناڤ پرۆسا سیاسی یا ئیراقێ به‌حسكر.

سه‌رۆك بارزانی ده‌ستخوه‌شی ل پێكئینانا هه‌ڤپه‌یمانیا رزگاریا نیشتمانی كر و ئه‌و پێشهاته‌ ب گاڤه‌كا گرنگ هه‌ژمارت و هیڤی خواست ئه‌و گاڤه‌ ببیته‌ ئه‌گه‌رێ بده‌ستڤه‌ئینانا داخوازیێن وه‌لاتیان و هه‌روه‌سا سه‌قامگیریێ و ڤه‌ژاندنێ بۆ هه‌موو ئالیه‌كی په‌یدا بكه‌ت.

ئه‌ڤرۆ:

چاڤدێرێن سیاسی ل باكورێ كوردستانێ دیار دكه‌ن كو خه‌لكێ كورد ل باكورێ كوردستانێ ب تایبه‌تی ژی ل نه‌ورۆزا ئامه‌دێ په‌یامه‌كا گرنگ دانه‌ هێزێن سیاسی و ب تایبه‌تی ژی دڤێت هه‌ده‌په‌ خواندنه‌كا راست بۆ په‌یاما كوردان بكه‌ت چونكو په‌یاما كوردان ل نه‌ورۆزا ئامه‌دێ‌ په‌یامه‌كا نه‌ته‌وه‌یی بوو.

محه‌مه‌د حسێن تایسون نڤیسه‌ر و ڤه‌كۆله‌رێ باكورێ كوردستانێ راگه‌هاند كو په‌یاما كوردان ل یا نه‌ورۆزا ئامه‌دێ گه‌له‌ك ئاشكرا بوو، كوردان ب ره‌نگه‌كێ ئاشكرا دیار كرن كو پێدڤیه‌ هه‌موو هێزێن كوردی ل سه‌ر بنه‌مایێ به‌رژه‌وه‌ندیێن نه‌ته‌وه‌یی پێكڤه‌ كار بكه‌ن، چونكو نه‌ورۆز و هه‌موو بیره‌وه‌ریێن نه‌ته‌وه‌یی ده‌لیڤه‌كا گرنگه‌ بۆ هندێ دا كو پارتێن سیاسی ژی باش بزانن وه‌لاتیێن كورد چ دخوازن و گۆت: (په‌یاما كوردان ل نه‌ورۆا ئامه‌دێ گه‌له‌ك ئاشكرا و گرنگ بوو، بلندكرنا وێنێن رێبه‌رێن بزاڤا نه‌ته‌وه‌یی یا كوردی ژی نیشا دده‌ت كو كورد ل دژی هندێ نه‌ ده‌نگێ وان بۆ براتیا گه‌لان و كۆمارا دیموكراتی یا توركیا بیت، كورد داخوازا مافێن خوه‌ یێن نه‌ته‌وه‌یی دكه‌ن، ژ به‌ر هندێ ژی گرنگه‌ هه‌ده‌په‌ كو گه‌له‌ك كورد ده‌نگێن خوه‌ دده‌نه‌ وێ خواندنه‌كا راست و دروست بۆ په‌یاما كوردان یا ل نه‌ورۆزا ئامه‌دێ بكه‌ت و گۆه بده‌ته‌ ده‌نگ و داخوازیێن گه‌لێ كورد).

ناڤهاتی ئه‌و یه‌ك ژی دیار كر كو دڤێت هه‌موو پارت و هێزێن سیاسی ل باكورێ كوردستانێ باش بزانن كو ئێدی كوردان دڤێت ل سه‌ر بنه‌مایێ به‌رژه‌وه‌ندیێن نه‌ته‌وه‌یی هێزێن سیاسی ژی كار بكه‌ن، چونكو سیاسه‌تا چه‌ند سالێن بۆری یا هه‌ده‌پێ د خزمه‌تا به‌رژه‌وه‌ندیێن نه‌ته‌وه‌یی یا كوردان ل توركیا دا نه‌بوویه‌، نابیت هێزه‌كا وه‌كو هه‌ده‌پێ ب ده‌نگێ وه‌لاتیێن كورد بچیته‌ په‌رله‌مانی و ل وێرێ هه‌موو كار و خه‌باتا وێ بۆ براتیا گه‌لان و تشتێن دی بیت، چونكو كوردان جاره‌كا دی ل نه‌ورۆزا ئامه‌دێ دیار كرن كو ئه‌و ل دژی وێ سیاسه‌تێ نه‌ و دڤێت سیاسه‌تا كوردی ل باكورێ كوردستانێ ده‌نگ و ره‌نگێ نه‌ته‌وه‌یی ب خوه‌ ڤه‌ ببینیت و گۆت: (بێگومان هه‌كه‌ هه‌ده‌په‌ و هه‌موو ئالیێن دی یێن كوردستانی خواندنه‌كا راست و دروست بۆ په‌یاما وه‌لاتیان یا ل نه‌ورۆزا ئامه‌دێ بكه‌ن ئه‌و یه‌ك دێ بیته‌ ئه‌گه‌رێ ده‌ستپێكرنا قۆناغه‌كا نوو و گرنگ ل توركیا و باكورێ كوردستانێ، چونكو ئاشكرایه‌ خه‌لك داخوازا مافێن خوه‌ یێن نه‌ته‌وه‌یی دكه‌ن و دڤێت هه‌موو كار و خه‌باتا ئالیێن سیاسی ب تایبه‌تی ژی یا هه‌ده‌پێ بۆ هندێ بیت، هه‌كه‌ ئه‌و یه‌ك نه‌هێته‌ كرن ره‌نگه‌ د هه‌لبژارتنێن بهێت دا پێگه‌هێ هه‌ده‌پێ گه‌له‌ك لاوازتر ژی ببیت، چونكو په‌یاما نه‌ورۆزێ گه‌له‌ك ئاشكرا بوو).

چاڤدێرێن سیاسی ل توركیا و باكورێ كوردستانێ دیار دكه‌ن كو نه‌ورۆزا ڤێجارێ یا ئامه‌دێ گه‌له‌ك ژ یێن سالێن بۆری جوداتر بوو و ب تایبه‌تی ژی گه‌نجێن نه‌ته‌وه‌یی داخوازا هندێ دكه‌ن كو هه‌موو كار و چالاكیێن ل باكورێ كوردستانێ ئێدی د چارچۆڤێ بده‌ستڤه‌ئینانا مافێن نه‌ته‌وه‌یی یێن گه‌لێ كوردستانێ دا بیت، ئه‌و یه‌ك ژی گه‌له‌ك گرنگه‌، چونكو ئێدی كوردان ژی دڤێت ل توركیا بگه‌هنه‌ مافێن خوه‌ و ژ به‌ر هندێ ژی گرنگه‌ هه‌م هه‌ده‌په‌ و هه‌م ژی هه‌موو هێزێن سیاسی یێن كورد كو به‌حسێ مافێن كوردان دكه‌ن ل سه‌ر بنه‌مایێ به‌رژه‌وه‌ندیێن نه‌ته‌وه‌یی یێن گه‌لێ كوردستانێ كار بكه‌ن، هه‌كه‌ هه‌ده‌په‌ وه‌كو سالێن بۆری دیسان گرنگیێ بده‌ته‌ چه‌پێن تورك و بابه‌تێ مافێن نه‌ته‌وه‌یی یێن گه‌لێ كوردستانێ نه‌كه‌ته‌ بنه‌مایێ ستراتیژیا خه‌باتا خوه‌ دێ ده‌نگێن وێ ژی گه‌له‌ك كێمتر لێ هێن.