ئه‌ڤرۆ، دلڤین ره‌شید:

ده‌رهێنه‌رێ‌ كورد (سه‌رهات نه‌ریمان خه‌مۆ) بۆ رۆژناما ئه‌ڤرۆ دیار كر كو ئه‌و خه‌لكێ كومه‌لگه‌ها شاریا یه‌ و نوكه‌ قوتابیێ زانكۆیی یه‌ و ده‌رهێنه‌ر و سیناریۆ و وێنه‌گریا كورته‌ فلمه‌كی كریه‌ بناڤێ‌ (خه‌ونێن ڤالا) و گۆت: “مه‌ره‌ما من ژ ڤی كورته‌ فلمی ئه‌وه‌ نامه‌كێ بۆ جهێن په‌یوه‌ندیدار دیار كه‌م كو ئه‌ڤ ئاریشێن د ناڤ  ته‌خا گه‌نجێن مه‌ دا هه‌ین بهێنه‌ چاره‌سه‌ركرن”.

ناڤهاتی ئاماژه‌ دا وێ‌ چه‌ندێ‌ كو وان گه‌له‌ك ده‌رگه‌ه قوتان بۆ وێ‌ چه‌ندێ‌ پشته‌ڤانیێ‌ ل ڤی كورته‌ فلمی بكه‌ن، به‌لێ‌ مخابن یا بێ‌ مفا بوو، ژ به‌ر ڤێ‌ چه‌ندێ‌ ئه‌و نه‌چاربوون ل دووڤ شیانێن خوه‌ ڤی كورته‌ فلمی چێكه‌ن و گۆت: “بۆ ده‌مێ‌ ساله‌كێ‌ مه‌ كار د چێكرنا ڤی فلمی دا كر هه‌تا ب دووماهی هاتی، هه‌روه‌سا هزرا چێكرنا ڤی كورته‌ فلمی ژ هندێ هات كو مه‌ گه‌نجێن خۆدان شیان هه‌نه‌ و كه‌س پشته‌ڤانیا وان ناكه‌ت، له‌ورا خه‌ونێن وان ڤالا دمینن، ناڤه‌رۆكا فلمی به‌حسێ‌ ژیانا قوتابیه‌كی د ژیێ‌ بیست سالیێ‌ دا دكه‌ت كو خه‌ونا وی ئه‌وه‌ ببیته‌ فوتوگرافه‌ره‌كێ‌ زیره‌ك وه‌كو بابێ خوه‌، چونكی بابێ وی بێشمه‌رگه‌ و فوتوگرافه‌ر بوو، به‌لێ نه‌شێت خه‌ونا خوه‌ بجه بینت ژ به‌رنه‌بوونا پشته‌ڤانیێ‌”.

ل دووماهیێ‌ ناڤهاتی گۆت: دخوازم زێده‌تر پشته‌ڤانیا گه‌نجان بهێته‌ كرن ب تایبه‌ت ژی ته‌خا هونه‌رمه‌ندان، چونكی د ناڤ جفاكێ مه‌دا وه‌كو پێدڤی پشته‌ڤانی ل ڤێ‌ ته‌خێ‌ ناهێته‌كرن و گرنگی ب شیانێن وان ناهێته‌دان، ئه‌ڤه‌ دده‌مه‌كی دایه‌ كو ل ده‌مێن داهاتی من نێزیكی سێ كورته‌ فلمان و فلمه‌كی درێژ ل سه‌ر جینوسایدا ئێزدیان هه‌نه‌ و نوكه‌ ئه‌م یێ‌ كار تێدا دكه‌ین .

دهۆك، زنار تۆڤی

موسه‌ده‌ق تۆڤی، نڤیسه‌رێ‌ پرتووكا (دیرۆكا په‌روه‌ردێ‌ و فێركرنێ‌ ل پارێزگه‌ها دهۆكێ‌) بۆ رۆژناما ئه‌ڤرۆ دیاركر كو ئه‌ڤ پرتووكه‌ ژ سێ‌ به‌رگان پێك دهێت، هه‌موو دبنه‌ هزار و 670 به‌رپه‌ر، هه‌ر به‌رگه‌كێ‌ ژ وان چه‌ندین تایبه‌تمه‌ندیێن خوه‌ هه‌نه‌، به‌رگێ‌ ئێكێ‌ هه‌شت پشكان ب خوه‌ڤه‌ دگریت و تێدا به‌حسێ‌ چه‌ندین مژارێن گرنگ یێن په‌روه‌ردێ‌ ل پارێزگه‌ها دهۆكێ‌ هاتینه‌ كرن، به‌رگێ‌ دویێ‌ ڤه‌كۆلینه‌كا تایبه‌ته‌ ل سه‌ر خواندنا كوردی، ل گه‌ل 50 قۆتابخانێن هه‌ره‌ كه‌ڤنار ل پارێزگه‌ها دهۆكێ‌، كو ئه‌و قۆتابخانێن به‌ری هه‌موویان هاتینه‌ ڤه‌كرن، به‌رگێ‌ سییێ‌ یێ‌ تایبه‌ته‌ ب قۆتابخانێن ناڤنجی و دواناڤنجی و دیسان پشكه‌ك هاتییه‌ ته‌رخانكرن بۆ مامۆستایێن پێشه‌نگ ل سه‌رانسه‌ری پارێزگه‌ها دهۆكێ‌، د هه‌ر پشكه‌كێ‌ دا كۆمه‌كا به‌لگه‌نامان ل گه‌ل دا هاتینه‌ دانان، د هه‌مان ده‌مدا ب سه‌دان به‌لگه‌نامێن فه‌رمی د هه‌رسێ‌ به‌رگان دا هاتینه‌ به‌لاڤ كرن.

هه‌روه‌سا گۆت: ب ره‌نگه‌كێ‌ گشتی من به‌حسێ‌ هه‌موو قووناغێن خواندنێ‌ و ئه‌و ئاریشێن كه‌فتینه‌ پێشیا پرۆسا خواندنێ‌ ل چه‌رخێ‌ بیستێ‌ به‌حس كرینه‌، ئه‌ڤه‌ ئێكه‌مین پرتووكه‌ ل سه‌ر ئاستێ‌ هه‌رێما كوردستانێ‌ ل سه‌ر دیرۆكا په‌روه‌رده‌ و فێركرنێ‌ ل پارێزگه‌ها دهۆكێ‌ ب ره‌نگه‌كێ‌ به‌رفره‌ه دهێته‌ چێكرن، پشتی نه‌مانا گۆڤارا دهۆك، من هزر ل هندێ‌ كر، كو ئه‌ز پرتووكه‌كێ‌ ل سه‌ر دیرۆكا په‌روه‌رده‌ و فێركرنێ‌ ل پارێزگه‌ها دهۆكێ‌ چێكه‌م، پرتووك ب دووماهی هاتیه‌ و ل نێزیك دێ‌ هێته‌ به‌لاڤ كرن.

دهۆك، شاكر ئه‌تروشی:

مه‌تین دۆسكی، خودانێ‌ چایخانا شه‌هیدان ل دهۆكێ‌، د دیداره‌كێ‌ دا بۆ رۆژناما ئه‌ڤرۆ دیاركر كو ئه‌ڤه‌ ده‌مه‌كه‌ ئه‌و كاری ژبۆ ڤه‌كرنا مۆزه‌خانه‌كا مه‌زن دكه‌ت داكو وێنێن هه‌موو شه‌هیدێن ده‌ڤه‌را به‌هدینان لێ‌ نشیابده‌ت، ل گه‌ل هنده‌ك كه‌لوپه‌لێن وان، وه‌كو جلك و چه‌ك و …… هتد، لێ‌ هێشتا هه‌تا نوكه‌ چو چارچێن عه‌ردی ب ده‌ست نه‌كه‌فتینه‌ و دخوازیت پارێزگه‌رێ‌ دهۆكێ‌ ئاسانكاریان بۆ بكه‌ت و پارچه‌كا عه‌ردی بۆ مۆزه‌خانێ‌ بده‌نێ‌.

زێده‌تر گۆت: ئه‌ڤ جهێ‌ ئه‌م نوكه‌ لێ‌ گه‌له‌كێ‌ به‌رته‌نگه‌ و جهێ‌ هه‌لاویستنا وێنێن هه‌موو شه‌هیدان ناكه‌ت و نوكه‌ ب ده‌هان وێنه‌ و جلك و چه‌ك وگه‌له‌ك پێدڤی یێن دی یێن له‌شكری كو یێن وان پێشمه‌رگانه‌ خوه‌ گۆری ئاخا كوردستانێ‌ كرین و شه‌هید بووین ل عه‌ردی و دناڤ كارتۆنان دا ماینه‌ و جه نینه‌ ب هه‌لاویسین، له‌ورا ئه‌ز داخوازێ‌ دكه‌م هه‌موو پێكڤه‌ كاریكه‌ن دا مۆزه‌خانه‌كێ‌ بۆ شه‌هیدێن خوه‌ ڤه‌كه‌ین، چنكو ئه‌ڤه‌ مابیته‌ مۆلكێ‌ من بتنێ‌ به‌لكو دێ‌ بیته‌ مۆلكێ‌ هه‌موو خه‌لكێ‌ دهۆكێ‌ و ده‌ڤه‌را به‌هدینان بگشتی چنكو ده‌مێ‌ شاندێن بیانی دهێن دێ‌ شێن سه‌ره‌دانا وێ‌ مۆزه‌خانێ‌ كه‌ن، هه‌روه‌سا زارۆ و گه‌نجێن ژ نوو پێ‌ دگه‌هن ده‌مێ‌ سه‌ره‌دانا وێ‌ مۆزه‌خانێ‌ دكه‌ن دێ‌ ژنوو ب دروستی زانن ئه‌ڤ ئازادیا ئه‌م هه‌موو پێكڤه‌ تێدا به‌رهه‌مێ‌ خوینا وان شه‌هیدانه‌.

چایخانا ناڤهاتی ل گه‌ل ده‌ستپێكرنا شه‌ڕێ‌ داعش هاتینه‌ ڤه‌كرن، وێنێن هه‌موو پێشمه‌رگێن ل شه‌ڕێ‌ داعش شه‌هیدین بووین كو نێزیكی (750) وێنانه‌، ل گه‌ل هژماره‌كا كه‌لوپه‌لێن له‌شكری یێن وان شه‌هیدان ل گه‌ل وێنێن هژماره‌كا ئه‌نفالبوویان  هاتینه‌ نیشادان، رۆژانه‌ خه‌لكێ‌ زۆر ب تایبه‌ت ژی كه‌سوكارێن شه‌هیدان سه‌ره‌دانا وی جهی دكه‌ن و ب دیتنا وێنێن خۆشتڤیێن خوه‌ شاد دبن، پرانیا داموده‌زگه‌هێن حزبی و ئیداری و له‌شكری سوپاسی و باوه‌رنامێن رێزلێنانێ‌ پێشكێشی خودانێ‌ وێ‌ كرینه‌، هه‌روه‌سا ل سه‌ر ئاستێن بلند پێشوازی ل خواندنێ‌ وێ‌ هاتیه‌ كرن و ژلایێ‌ وانڤه‌ هاتینه‌ خه‌لاتكرن، ژوانا سه‌رۆكاتیا په‌رله‌مانێ‌ كوردستانێ‌ و سه‌رۆكێ‌ حكومه‌تێ‌ ڤه‌، بۆ زانین بۆ په‌یداكرنا وێنێن شه‌هیدان كاك (زێره‌ڤان عه‌بدوللا كۆچه‌ر) و بۆ وێنێن ئه‌نفالیۆیان ژی (حه‌جی سه‌لام زێوه‌یی گه‌له‌ك هاریكاریا مه‌ كرینه‌.

دهۆك، هه‌رهین محه‌مه‌د:

محه‌مه‌د ئدریس عه‌زیز، سه‌رتراشه‌كێ‌ باژێرێ‌ دهۆكێ‌ یه‌، د دیداره‌كێ‌ دا بۆ رۆژناما ئه‌ڤرۆ گۆت: به‌ری چه‌ند سالان من هزركر كو وێنه‌یان ب مه‌كینێ‌ ل سه‌ر پرچێ‌ چێكه‌م  و ل ده‌ستپێكێ‌ من خوه‌ ل سه‌رێن برازا و خارزایێن خوه‌ خۆه‌ فێركر و من هێما ب مه‌كینێ‌ چێدكرن، پاشێ‌ وێنه‌یێن مرۆڤان ل سه‌ر لاپه‌ری من ڤه‌ گۆهاستنه‌ سه‌رپرچێ‌ و ده‌مێ‌ كورۆنایێ‌ دا ئه‌ز رابووم ب میێن پرچێ‌ ل سه‌ر ئه‌ردی من وێنه‌ چێكرن و ده‌ستپێكێ‌ من وێنه‌ چێدكرن و من ڤیدیۆ نه‌دكرن هه‌تا كو باش فێربوویم ژنوو من ڤیدیۆكرن,

محه‌مه‌دی گۆت: ئه‌ز ده‌رچوویێ‌ په‌یمانگه‌ها وه‌رزشی مه‌، به‌لێ‌ ژبه‌ركو سه‌رتراشم و ب حه‌زا خوه‌ من ئه‌ڤ كاره‌كریه‌ و پتریا وان وێنه‌یێن سه‌ر پرچێ‌ چێدكه‌م لۆگونه‌ و فلم كارتۆن و كه‌سانێن به‌رنیاسن و هونه‌رمه‌ندانه‌ و ئه‌و كه‌سێن دڤێن ڤان وینه‌یان ل سه‌ر پرچا وان چێكه‌م  كه‌سێن به‌رنیاس و زارۆ سنێله‌نه‌ و هنده‌ك وێنه‌ هه‌بووینه‌ هه‌تا ده‌مژمێره‌كێ‌، هنده‌كان ژی پتر من ل سه‌ر كاركریه‌.