هه‌ولێر، قائید میرۆ
پرسا ئه‌نجامدانا هه‌لبژارتنێن په‌رله‌مانێ كوردستانێ هاته ئێكلاكرن و شیره‌تكاره‌كێ په‌رله‌مانێ كوردستانێ ژی رادگه‌هینیت، هنده‌ك ئالیێن سیاسی دگه‌ل ئه‌نجامدانا هه‌لبژارتنان د ئه‌ڤساله‌دا نینن و دبێژیت، هه‌كه ئیراده‌یه‌كا جدی هه‌بیت پێدڤیه هه‌لبژارتن دده‌مێ خوه‌دا بهێنه ئه‌نجامدان و فه‌رمانا سه‌رۆكێ هه‌رێما كوردستانێ ب ئه‌نجامدانا وان یا ده‌رچووی.
د. وه‌عدی مزیری، شیره‌تكارێ په‌رله‌مانێ كوردستانێ بۆ رۆژناما (ئه‌ڤرۆ) گۆت” رۆژ بۆ رۆژێ ده‌م یێ به‌ر ب كێمبوونێ دچیت بۆ پرسا ئه‌نجامدانا هه‌لبژارتنێن په‌رله‌مانێ كوردستانێ و ژئالیێ قانوونی ڤه دڤێت شه‌ش هه‌یڤان به‌ری ئه‌نجامدانا پڕۆسا هه‌لبژارتنان سه‌رۆكێ هه‌رێما كوردستانێ ژڤانێ هه‌لبژارتنان دیار بكه‌ت، ل حه‌فتیا بۆری سه‌رۆكێ هه‌رێما كوردستانێ فه‌رمانا هه‌رێمی بۆ ئه‌نجامدانا هه‌لبژارتنان ده‌ركریه و بڕیاره ل ئێكێ هه‌یڤا ئۆكتۆبه‌را ئه‌ڤساله هه‌لبژارتنێن په‌رله‌مانێ كوردستانێ بهێنه ئه‌نجامدان”.
گۆت ژی”مخابن پاشخستنا هه‌لبژارتنان ل هه‌رێما كوردستانێ بوویه نه‌ریته‌ك و عورفه‌ك هه‌رده‌م ب به‌هانه‌یێن جودا هه‌لبژارتن دهێنه پاشخستن و دده‌مێ قانوونی دا ناهێنه ئه‌نجامدان، به‌لێ سه‌رۆكێ هه‌رێما كوردستانێ دخوازیت هه‌ر چاوابیت هه‌لبژارتن د ئه‌ڤساله‌دا بهێنه ئه‌نجامدان ، راسته ئاسته‌نگ ل هه‌مبه‌ر ئه‌نجامدانا هه‌لبژارتنێن هه‌رێما كوردستانێ یێن هه‌ین، چونكه راسته ئالیێن سیاسی ب ئاشكرا دبێژن ئه‌م دگه‌ل ئه‌نجامدانا هه‌لبژارتناینه دده‌مێ قانوونی دا، به‌لێ ب شێوه‌یه‌كێ نهێنی بزاڤان دكه‌ن هه‌لبژارتن نه‌هێنه‌كرن، ژبه‌ر كو ره‌وشا وان یا باش نینه، ب تایبه‌تی پشتی هه‌لبژارتنێن جڤاتا نوونه‌رێن ئیراقێ جه‌ماوه‌رێ هنده‌ك ئالیێن سیاسی به‌ر ب كێمبوونێ چوویه و مه‌ترسی لسه‌ر وان هه‌یه وه‌ك پێدڤی نه‌شێن ده‌نگان بده‌ستڤه بینن، له‌وڕاژی هنده‌ك ئالیێن سیاسی دگه‌ل ئه‌نجامدانا هه‌لبژارتنان نینن، بێگومان ئه‌گه‌رێن دی ژی یێن هه‌ین بۆ نموونه ئاریشا د ناڤبه‌را ئالیێن سیاسی لدۆر پۆستێ سه‌رۆك كۆمارا ئیراقێ و پێك نه ئینانا حوكمه‌تا ئیراقێ كاریگه‌ری لسه‌ر هه‌لبژارتنێن هه‌رێما كوردستانێ هه‌یه، هه‌روه‌سا پرسا گۆهۆڕینا قانوونا هه‌لبژارتنان ل هه‌رێما كوردستانێ”.
شیره‌تكارێ په‌رله‌مانێ كوردستانێ ئاماژه‌كر” بڕیار بوو ل دوماهیا هه‌یڤا بۆری ئالیێن سیاسی خوه ئێكلا بكه‌ن به‌لێ نه‌گه‌هشتن چو ئه‌نجامان، لێ دیاره خوه ئێكلاكریه و ئالیێن سیاسی بڕیاردایه هه‌لبژارتن بهێنه ئه‌نجامدان، هه‌كه ئیراده‌یه‌كا بهێز هه‌بیت، بێگومان دێ هه‌لبژارتن ل ژڤانێ خوه یێ دیاركری دا هێنه ب رێڤه‌برن و دێ ب ئاسانی ئالیێن سیاسی گه‌هنه رێككه‌فتنێ لدۆر ئاریشه‌یێن هه‌ین، تنێ دێ ژلایێ په‌رله‌مانێ كوردستانێ ڤه كۆمسیۆنا سه‌ربخوه‌یا هه‌لبژارتن و راپرسیان هێته كاراكرن، ئه‌وژی تنێ پێدڤی ب دو هه‌تا سێ كۆمبوونێن په‌رله‌مانی هه‌یه و كۆمسیۆن دێ هێته كاراكرن، سه‌رۆكێ حوكمه‌تا هه‌رێما كوردستانێ ازیبوونا خوه بۆ مه‌زاختنا بودجێ هه‌لبژارتنان دیاركریه و ئاریشه لسه‌ر بودجێ هه‌لبژارتنان نه‌ماینه، به‌لێ وه‌كی هنده‌ك ئالیێن سیاسی دخوازن قانوونا هه‌لبژارتنان بهێته راستڤه‌كرن ئه‌ڤه كاره‌كێ ب زه‌حمه‌ته و ده‌م نه‌مایه بۆ راستڤه‌كرنا قانوونا هه‌لبژارتنان، ئه‌ز باوه‌رم پێدڤی ب راستڤه‌كرنا قانوونا هه‌لبژارتنان ناكه‌ت، چونكه دێ گیرۆبیت و ڤێڕا ناگه‌هن راستڤه‌كرنێ بكه‌ن”.
نيشاندان