ئه‌ڤرۆ، كاوین جیهاد ته‌حلاڤی:
هونه‌رمه‌ند ئه‌رشه‌د زاخۆیی خودانێ ٣٨ ئه‌لبۆم ٦٧٨ سترانایه و ئه‌لبۆما خوه یا ئێكێ ل سالا ١٩٨٧ێ به‌لاڤكریه، پشتی چه‌ندین سالان بێده‌نگ بووی، ئه‌و ئه‌گه‌رێ وێ چه‌ندێ ئاشكرا دكه‌ت. ئه‌رشه‌د زاخۆیی دبێژیت: پشتی ئه‌و توشی روودانه‌كا هاتنوچوونێ بووی و چه‌ند نشته‌رگه‌ری كرین، وێ روودانێ گه‌له‌ك كارتێكرن ل سه‌ر ژیانا من یا تایبه‌ت و هونه‌ری كربوو و ژ به‌ر هندێ نه‌دشیام چو كاران ژ هونه‌ری زێده‌تر بكه‌م و د وێ قووناغێ ژی دا ده‌مێ یێ نه‌خوش وه‌كو په‌یڤ و ئاواز من كار ل سه‌ر دكر.
ده‌رباره‌یی وێ چه‌ندێ چو كاره‌كێ نوو ل به‌ر ده‌ستێ وی هه‌یه، ئه‌و دیاردكه‌ت، كو ئه‌و كار ل سه‌ر هندێ دكه‌ت كو ٢٠ سترانێن خوه یێن كه‌ڤن نوو بكه‌ته ڤه، زێده‌باری وێ چه‌ندێ كو به‌رهه‌مه‌كێ نوو ژی د ده‌ستێ وی دایه كو ژ ١٠ تراكان پێك دهێت، لێ ئه‌و سترانێن كه‌ڤن یێن كو ژ ٢٠ سترانێن كه‌ڤن دێ بیته دو ئه‌لبۆم ب ناڤێ، بیرهاتن ئێك و بیرهاتن دو ژ به‌ر كو گه‌نجێ ڤی سه‌ر ده‌می گه‌له‌ك داخوازا وان سترانێن كه‌ڤن دكه‌ن.
ده‌رباره‌یی وێ چه‌ندێ ژی كو گه‌له‌ك سترانبێژێن نوو سترانێن وی یێن كه‌ڤن گۆتینه و پێ ناڤدار بووینه، ئه‌رشه‌د دبێژیت، هه‌ر ئێكێ سترانا من گۆتبیت و درست هاتبیته گۆتن ژ ئالیێ په‌یڤ و ئاوازێ ڤه ده‌ست خوشیێ ل وان دكه‌م، لێ گرنگ ئه‌وه هه‌ر سترانبێژ و هونه‌رمه‌نده‌كێ سترانێن من و هه‌ر هونه‌رمه‌نده‌كی بێژیت، پێدڤیه به‌ری هنگێ خودانێ سترانێ ئاگه‌هدار بكه‌ت یان مافێ چ هونه‌رمه‌ندان نه‌خوت.
ئه‌رشه‌دی ئه‌و ژی ئاشكرا كر كو ژ بلی كارێن هونه‌ری ئه‌و چو كاره‌كێ دی ناكه‌ت، و نوكه ب تنێ ل باژێرێ زاخۆ وی سه‌نته‌ره‌ك هه‌یه ب ناڤێ ده‌زگه‌هێ ئه‌رشه‌د زاخۆیی كو بوویه جهێ هه‌می هونه‌رمه‌ند و ره‌وشه‌نبیر و رۆژنامه‌ڤانێن كوردستانێ، دگه‌ل وێ چه‌ندێ ژی وی سه‌نته‌ره‌ك هه‌یه بۆ فێركرنا كارێ مۆزیكێ.
نيشاندان