ئه‌ڤرۆ، هه‌رهین محه‌مه‌د:

هونه‌رمه‌ندێ‌ مۆزیكژه‌ن و خودانێ‌ ستودیۆیا ده‌نگ و ره‌نگ عیماد عه‌لی د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ دیار كر كو نوكه‌ ئه‌و مژوولی ئه‌لبۆمه‌كا ده‌ه تراكی یه‌ كو هه‌موو مۆزیكه‌، به‌لێ‌ هه‌تا نوكه‌ ناڤێ‌ وێ‌ نه‌ هاتیه‌ دانان و نوكه‌ دقووناغا ئه‌ره‌نجورێ‌ دایه‌ و ژڤانه‌ ل هه‌یڤا ئادارێ‌ بهێته‌ به‌لاڤكرن و هه‌روه‌سا مژوولی چه‌ندین كارێن دی یه‌  بۆ هنده‌ك هونه‌رمه‌ندێن گه‌نج ل دهۆكی َو ده‌رڤه‌ی وه‌لاتی .

ناڤبری زێده‌تر گۆت: بۆ مرۆڤی گه‌له‌ك خوه‌شه‌ مرۆڤ كارێ‌ بۆ هنده‌ك هونه‌رمه‌ندێن ده‌نگ و خوه‌ش و خودان شیان بكه‌ت و خودان بینه‌ر و گوهدار بیت داكو مرۆڤ بشێت داهێنانان دكارێ‌ وی دا بكه‌ت، به‌لێ‌ ژبه‌ركو مه‌ ستودیو هه‌یه‌ كار بۆ هه‌ر هونه‌رمه‌نده‌ك و سترانبێژه‌كی خودان شیان دكه‌ین بێ‌ جوداهی، به‌لێ‌ نوكه‌ هه‌ڤركیا كاری یه‌ و دڤێت مرۆڤ كارێ‌ خوه‌ ب كوالێتیه‌كا باش و دابه‌شكرنه‌كا جوان دیاربكه‌ت و دشێم بێژم نابیت مرۆڤ كار بۆ هه‌موو كه‌سان بكه‌ت بتنێ‌ خودان شیان تێنه‌بن، چونكو هه‌كه‌ مرۆڤی بۆ كه‌سێن باش و نه‌ل ئاست ژی كر ب ڤی ره‌نگی كارێ‌ مرۆڤی دێ‌ به‌رزه‌ بیت و به‌ری نوكه‌ مه‌ بۆ هه‌موو سترانبێژان كار دكر، به‌لێ‌ نوكه‌ نه‌، دڤێت رۆژ بۆ رۆژێ‌ مرۆڤ كارێ‌ خوه‌ دیاركه‌ت و د هه‌ركاره‌كی دا هه‌ڤركی هه‌یه‌ ب تایبه‌تی كارێ‌ هونه‌ری مه‌یدانه‌كا گه‌له‌ك هه‌ستیاره‌ و گه‌له‌ك هه‌ڤركی چێدبن و گه‌له‌ك ستودیۆ یێن ڤه‌بووین و گه‌له‌ك تشته‌كێ‌ باشه‌ ستودیۆ ڤه‌بن داكو كارێن لاواز و باش ژێك بهێنه‌ جوداكرن و دبینم هه‌موو تشت نه‌ سوشیاله‌ و راسته‌ دبیت ب رێیا سۆشیالێ‌ كه‌سه‌ك خوه‌ به‌رنیاس بكه‌ت، به‌لێ‌ یا گرنگ ئه‌وه‌ ده‌مێ‌ مرۆڤ كار بكه‌ت مرۆڤ خزمه‌ته‌كێ‌ بكه‌ت پاشی كارێ‌ خوه‌ به‌لاڤ بكه‌ی و ب مخابنی ڤه‌ نوكه‌ هه‌موو كارێ‌ هونه‌ری بوویه‌ بازرگانی و كه‌س گرنگیێ‌ ب جوری و روحیه‌تێ‌ و باوه‌ریی ناده‌ت دكاری دا و نوكه‌ ستران یا دهێته‌ تۆماركرن بۆ چه‌ند رۆژایه‌ نوكه‌ دا چه‌ند ستودیۆ هاتینه‌ ڤه‌كرن و كارێ‌ وان نه‌یێ‌ باشه‌ و ئامیره‌ نه‌ د باشن، یان ئه‌و كه‌سێن ل سه‌ر وان ئامیران كاردكه‌ن باش كاری نوزانن، به‌لێ‌ ئه‌ڤه‌ بۆ وان نه‌یا گرنگه‌ و هه‌ر كه‌سه‌ك نوكه‌ بخوه‌ دشێت كومپیوته‌ره‌كی بكرت و بیته‌ بابه‌ته‌كێ‌ بازرگانی و چه‌ند فلسه‌كا وه‌ربگرت و گه‌نجێن نوكه‌ ژی دڤێن سترانا بێژن و خوه‌ پاڤێنه‌ دمه‌یدانا سترانێ‌ دا و چو ژ بابه‌تێ‌ توماركرنێ‌ و ئاره‌نجورێ‌ نزانن ب مخابنی ڤه‌ ئه‌ڤ بابه‌ته‌ ب رۆنی بازرگانیه‌.

عیمادی گۆت ژی : هه‌كه‌ ئه‌ز ب شه‌ڤێ‌ هه‌تا سپێدێ‌ ره‌خنێ‌ ل رێڤه‌به‌ریا ره‌وشه‌نبیری و و هونه‌ری و سه‌ندیكا هونه‌رمه‌ندان و تیڤێن مه‌ بگرم دبیت گه‌له‌ك كێم بیت و ره‌خنه‌ تێَراناكه‌ت و نوزانم ئه‌ڤ نه‌گرنگی دانه‌ كه‌تیه‌ دمه‌یدانا هونه‌ری دا ئه‌گه‌ر كی یه‌ حوكمه‌ته‌، یان كه‌س، یان خه‌لكه‌ كار دسوشیال مدیایێ‌ و تیڤیان دا دهێنه‌ به‌لاڤكرن كارێن بێ‌ بهانه‌ و نه‌ هونه‌ره‌ و مرۆڤ دزانیت ئه‌ڤه‌ بازرگانیه‌ ب هونه‌ری و گه‌له‌ك په‌یچ ده‌ركه‌فتینه‌ هه‌لسه‌نگاندنا هونه‌رمه‌ندان دكه‌ن ل سه‌ر بنیاتێ‌ هه‌ڤالینیێ‌  و په‌یوه‌ندیا و دیاردكه‌ن ئه‌ڤه‌ باشترین سترانبێژ، یان كلیپا ئه‌ڤ ساله‌یه‌ و ئه‌رێ‌ كا رێڤه‌به‌ریا ره‌و شه‌نبیری و هونه‌ری كا سه‌ندیكا هونه‌رمه‌ندان ڤان په‌یجان ب راوه‌ستینت و سنووره‌كی بۆ ب دانن و ما یا دروسته‌ ئه‌و ب حه‌زا خوه‌ ب هه‌لبژێرن ئه‌ڤ هوزانڤان، یان ئاوازدانه‌ر یا مۆزیكژه‌ن و سترانبێژو شێوه‌كار و شانوڤان یێ‌ ئێكێ‌ یه‌ ئه‌ڤ ساله‌ سه‌د حه‌یف و مخابن و هندی ئه‌ز ره‌خنێ‌ ب گرم ئه‌ز چ رولی نابینم بۆ ڤان لایه‌نا.

ئه‌ڤرۆ:

سترانبێژا كورد (نه‌ورۆزا ئه‌یاز) خه‌لكا باكوورێ‌ كوردستانێ‌ یه‌ و نوكه‌ ل پارێزگه‌ها دهۆكێ‌ دژیت و سترانان ب شێوه‌یێ‌ (پۆپ) دبێژیت د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ دیار كر كو مالباتا وێ‌ هه‌موو هونه‌رمه‌ند و مۆزیكژه‌ن و نڤیسكار و میدیاكارن و سێ برا ئارانجۆرێن مۆزیكێ نه‌ و گرۆپه‌كێ مۆزیكی یێ چالاك ل توركیا و ئورۆپا یێ هه‌یی، ژ به‌ر ڤێ‌ چه‌ندێ‌ حه‌زا كارێ‌ هونه‌ری هه‌ر ژ ژیێ‌ زارۆكینیێ‌ وێ‌ ژی ده‌ت ب كارێ‌ هونه‌ری كریه‌ و هه‌تا نوكه‌ ل سه‌ر هه‌مان كار یا به‌رده‌وامه‌.

ناڤهاتیێ‌ ل ۆر به‌رهه‌مێن خوه‌ دیار كر كو به‌رهه‌مێ وێ یێ‌ ئێكێ‌ كه‌فتبوو د پلا ئێكێ دا ل سایتێ ئه‌نترناشنال یێ فه‌رمی یێ توركیا كو سایتێ هه‌می مۆزیكا جیهانیه‌ و نوكه‌ ژی دیكیومێنت د به‌رهه‌ڤن و گۆت: “من ستایلێ‌ خوه‌ یێ‌ تایبه‌ت بۆ گۆتنا سترانان هه‌یه‌، ل ڤان نێزیكان دێ‌ به‌رهه‌مه‌كێ‌ نوو ژی به‌لاڤ كه‌م كو به‌ری نوكه‌ من چه‌ندین سترانێن خوه‌ كلیپ كرینه‌ و هنده‌كێن دی ژی د رێزێ دانه‌”.

نه‌ورۆزێ‌ خویا كر كو وه‌ك میدیا ژی ئه‌وێ‌ پرۆگرامێن تیڤی یێ هه‌نه‌ و پێشكێش كرینه‌، و كارێ ئاماده‌كرنا پرۆژێن ته‌له‌ڤزۆنی ژی دكه‌ت وه‌ك هزر و پرۆژه‌ و وه‌ك ده‌رهێنه‌ری و جێبه‌جێكرن و یا به‌رده‌وامه‌ و گۆت: مۆزیكا من مۆزیكه‌كا نووژه‌نه‌ كو ب جۆرێ “پۆپ” چێدكم، ئه‌م دشێن بێژین “پۆپا كوردی” یه‌، ل ده‌ف من هه‌می زمان د دروستن بۆ ستران گۆتنێ، مۆزیك گه‌ردۆنی یه‌ و زمانێ مۆزیكێ نینه‌، لێ زمانێ ملله‌تان هه‌یه‌ و هه‌ر ملله‌ته‌ك ب زمانێ خوه‌ یێ‌ ساخه‌، ئه‌ز كوردم و زمانێ هونه‌رێ‌ من یێ‌ سه‌ره‌كی ب كوردی یه‌، ئانكو وه‌كو به‌رهه‌م گه‌هشتنا هونه‌رێ‌ من بۆ مرۆڤان ب ئاوایه‌كێ‌ سه‌رده‌مانه‌ ب كوردی و هه‌ر سترانه‌كا من حه‌ز ل سه‌ر هه‌بیت ب هه‌ر زمانه‌كێ‌ هه‌بیت ئه‌ز دبێژم گه‌له‌ك كه‌س دبێژنه‌ من تو بۆچی ب توركی سترانان نابێژی ده‌نگێ ته‌ گه‌له‌ك بۆ توركی خوه‌شه‌، به‌لێ‌ ئه‌ز ڤێ هزرێ گه‌له‌ك بێ ڕامان دبینم، كوردی زمانه‌كێ‌ گه‌له‌ك خوه‌شه‌ و به‌رفره‌هتره‌ ژ توركی، ژ هه‌میان گرنگتر ژی زمانێ هه‌ستێن مه‌یه‌، ئه‌م د گه‌ل دایكێن خوه‌ ب كوردی دئاخڤین و ب كوردی دژین”.

ئه‌ڤرۆ، هه‌رهین:

سترانبێژێ‌ گه‌نج رزگار سه‌باح د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ دیاركركو نوكه‌ ئه‌و مژوولی چێكرنا كلیپه‌كێ‌ یه‌ بناڤێ‌ (ته‌كرمه‌ دیل به‌ردام دنێ‌) ژ په‌یڤ و ئاوازێن سترانبێژ (سدقی بناڤی) یه‌ و ل ستودیۆیا (تون مۆزیك) هاتیه‌ تۆماركرن و ژ ده‌رهێنانا (حسێن)ی یه‌ و ژڤانه‌ ل ده‌مه‌كێ‌ نێزیك بهێته‌ به‌لاڤكرن.

رزگاری گۆت ژی: تیڤیێن مه‌ و سه‌ندیكا هونه‌رمه‌ندان ژی جوداهیێ‌ دناڤبه‌را هونه‌رمه‌ندان دا دكه‌ن و  بتنێ‌ بخوه‌ هنده‌ك هونه‌رمه‌ند گرتینه‌ وان ل به‌رنامه‌ و ئاهه‌نگان پشكدار دكه‌ن  و تیڤیێن مه‌ ژی بتنێ‌ سترانێن وان به‌لاڤ دكه‌ن، ئه‌ڤه‌ دده‌مه‌كی دایه‌ بتنێ‌ سترانا ل روونشتنان دبێژم، به‌لێ‌ ل ده‌واتان نابێژم و راسته‌ ستران گۆتن ل ده‌واتان راهێنانه‌، لێ‌ هه‌كه‌ به‌رده‌وام بیت دێ‌ كارتێكرنێ‌ ل ده‌نگێ‌ وان كه‌ت و ژ زارۆكینیا خوه‌ هه‌تا نوكه‌ من گوهداریا ده‌نگێ‌ ئه‌یاز و ئه‌رده‌وانی كریه‌ و داخبارێ‌ ده‌نگێ‌ وانم، لێ‌ زارڤه‌كرنا وان ناكه‌م و هه‌ر كه‌سه‌كێ‌ ل ده‌ستپێكێ‌ ده‌ست ب ستران گۆتنێ‌ بكه‌ت دێ‌ هه‌ر سترانێن هونه‌رمه‌نده‌كێ‌ نه‌مر بێژیت و گه‌له‌ك گرنگ دبینم سترانێن هونه‌رمه‌ندێن نه‌مر بهێنه‌ نووكرن و گۆتن، به‌لێ‌ نه‌هێنه‌ گوهۆڕین وه‌كو خوه‌ بهێته‌ گۆتن.

ئه‌ڤرۆ، شاهۆ فه‌رید:

سترانبێژ (رێڤینگ مالتایی) د دیداره‌كێ‌ بۆ رۆژناما ئه‌ڤرۆَ دیار كر كو وی هه‌ر ده‌ستپێكا خوه‌ یا كارێ‌ هونه‌ری گوهداریا سترانێن هونه‌رمه‌ندێ‌ خودێ‌ ژێ‌ ڕازی (سه‌عید گاباری) كریه‌ و خوه‌ ب قوتابیێ‌ وی ددانیت، ژ به‌ر كو هه‌كه‌ هونه‌رمه‌ندێ‌ ناڤهاتی پشته‌ڤانیا وی نه‌كربا ئه‌و نه‌دبوو سترانبێژ و گۆت: “حه‌ز ژێكه‌رێن ده‌نگێ‌ من به‌رده‌وام داخوازا گۆتنا سترانێن فلكلۆری ژ من دكه‌ن ژ به‌ر ڤێ‌ چه‌ندێ‌ ژی نوكه‌ من چه‌ندین سترانێن فلكلۆری به‌رهه‌ڤكرینه‌ بۆ وێ‌ چه‌ندێ‌ ب شێوه‌یێ‌ تراك تۆمار بكه‌م و پێشكێشی جه‌ماوه‌رێ‌ خوه‌ بكه‌م”.

ناڤهاتی ئاماژه‌ دا وێ‌ چه‌ندێ‌ كو مه‌زاختیێن مه‌زن بۆ چێكرنا ئه‌لبۆم و كلیپان دڤێن و مخابن نوكه‌ ده‌زگه‌هێن راگه‌هاندنێ‌ ژی وه‌كو به‌رێ‌ پشه‌ڤانیا هونه‌رمه‌ندان ناكه‌ن، ژ به‌ر ڤێ‌ چه‌ندێ‌ نوكه‌ به‌هرا پتریا سترانبێژان به‌رهه‌مێن خوه‌ د ناڤ سۆشیال میدیایێ‌ دا به‌لاڤ دكه‌ن.