ئه‌ڤرۆ، به‌رپه‌رێ ساخله‌میێ:
رێڤه‌به‌رێ نه‌خۆشخانا تایبه‌تمه‌ند یا چاره‌سه‌ركرنا نه‌خۆشیێن كۆرۆنایێ دیاركركو نوكه 32 ته‌ختێن چاڤدێریا چڕ ل دهۆكێ هه‌نه و ل نه‌خۆشحانا لالاڤ ژی دێ ل نێزیك پشكا چاڤدێریا چڕ هێته ڤه‌كرن، هه‌روه‌سا ل دهۆكێ هه‌تا 47 ئامیرێن هه‌ناسه‌دانا ده‌ستكرد كه‌فتینه دكاری دا و ل سه‌ر ئاستێ هه‌موو عیراقێ بتنێ ل دهۆكێ ئه‌ڤ هژمارا مه‌زن یا ئامیرێن ده‌ستكرد كه‌ڤتینه دكاری دا بۆ خزمه‌تكرنا نه‌خۆشان.
د. هه‌كار مسته‌فا، رێڤه‌به‌رێ نه‌خۆشخانا تایبه‌تمه‌ند یا چاره‌سه‌ركرنا نه‌خۆشیێن كۆرۆنایێ دیاركركو ل پارێزگه‌ها دهۆكێ دو نه‌خۆشخانه‌یێن كۆرۆنایێ هه‌نه و نه‌خۆش تێدا دهێنه چاره‌سه‌ركرن، ئێك ژوان نه‌خۆشخانا ل دهۆكێ دایه پشكا چاڤدێریا چڕ هه‌یه و نه‌خۆش دناڤدا دهێنه چاره‌سه‌ركرن ل نه‌خۆشخانا لالاڤ ژی نه‌خۆش دناڤدا هێنه نڤاندن و هه‌ر ده‌مێ هژمارا نه‌خۆشان زۆر دبیت نه‌خۆش بۆ نه‌خۆشخانا لالاڤ دهێنه ره‌وانه‌كرن نوكه ل دهۆكێ ئامارێن تووشبوویێن كۆرۆنایێ گه‌له‌ك كێمبووینه.
ناڤهاتی ئه‌وژی خۆیا كركو نوكه ڤایرۆسێ ده‌لتا به‌ره‌ڤ كیمبوونێ چوویه، له‌وراژی تووشبووی كێمبووینه هه‌تا 25 نه‌خۆشان نوكه چاره‌سه‌رێ وه‌ردگرن ناڤ نه‌خۆشخانێ دا به‌رێ نوكه هنده‌ك رۆژان جه نه‌بوو نه‌خۆش دناڤ نه‌خۆشخانێ دا بهێنه وه‌رگرتن و گه‌له‌ك نه‌خۆش ل مال دهاتنه چاره‌سه‌ركرن، چونكو وی ده‌می هه‌ردو نه‌خۆشخانه‌یێن كۆرۆنایێ ل دهۆكێ پرببوون ژ تووشبوویان، به‌لێ نوكه ب رێژا 75% هژمارا نه‌خۆشان دناڤ نه‌خۆشخانێ دا كێمبوویه”.
د. هه‌كار مسته‌فا، ئاشكه‌را كركو:” نوكه نه‌خۆشێ پێدڤی ب ئوكسجینێ نه‌بیت ل نه‌خۆشخانێ ناهێته نڤاندن، هه‌كه ره‌وشا نه‌خۆشی خراب ببیت و پێدڤی ب ئامیرَی هه‌ناسه‌دانا ده‌ستكرببیت و ئوكسجینێ نه‌خۆشی كێم ببیت ئه‌و ل نه‌خۆشخانێ دهێته نڤاندن و گۆت: ئه‌و تووشبوویێن نوكه ل ناڤ نه‌خۆشخانێ دا ره‌وشا وان یا باش نینه، چونكو ئوكسجینێ وان كێمبوویه یانژی نه‌خۆشیێن دومدرێژ هه‌نه یانژی تووشی بێهنته‌كیێ دبیت له‌ورا ل نه‌خۆشخانێ دهێنه چاره‌سه‌ركرن.
خۆیا ژی كركو ئێك ژ ئه‌گه‌رێن گیان ژده‌ستدانا تووشبوویێن كۆرۆنایێ ل دهۆكێ ئه‌و بوویه نه‌خۆش زوو قه‌ستا نه‌خۆشخانێ ناكه‌ن و ره‌وشا وان گه‌له‌ك مه‌ترسیدار دبیت ژنوو ژمال دهێنه نه‌خۆشخانێ، یا پێدڤیه هه‌ر كه‌سه‌كێ ئه‌نجامێ پشكنینا وی ده‌ربكه‌ڤیت پوزه‌تیف، سه‌ره‌دانا نوشداری بكه‌ت كو شیره‌تكاریا نه‌خۆشحانێ 24 ده‌مژمێران یا ڤه‌كریه ب تنێ ئه‌و نه‌خۆشێن نیشانێن دژوار هه‌بن یانژی هه‌لگرێن نه‌خۆشێن دومدرێژ دبن پێدڤی ب چاره‌سه‌ریێ دبن ب تایبه‌تی ژی هه‌كه ئوكسجینی َوان كێم ببیت”.
زێده‌ترگۆت: تووشبوویێ كۆرۆنایێ هه‌بوویه هه‌تا سێ هه‌یڤان مایه دچاڤدێریا چر دا ل نه‌خۆشخانێ و تووشبووی ژی هه‌بوویه دو حه‌فتیان مایه ل ژێر چاره‌سه‌ریێ، ل سه‌ر ره‌وشا نه‌خۆشی دمینیت چه‌ند مه‌ترسی ل سه‌ر هه‌بیت ئه‌و نه‌خۆش پتر دناڤ نه‌خۆشخانێ دا دمینت، هه‌تا ره‌وشا وی باش دبیت و گۆت: هه‌تا نوكه ل دهۆكێ مه نه‌دیتیه چو نه‌خۆش هاتینه ده‌ڤ مه هنده‌ك نیشانێن دی ژبلی یێن كۆرۆنایێ ل ده‌ڤ هه‌بن ب تایبه‌تی ژی وه‌كو ئومیكرونێ ئه‌ڤ هێشتا په‌یدانه‌بوویه.
د.هه‌كار مسته‌فا دیاركر، ل دهۆكێ ئاماده‌كاریێن باش هاتینه‌كرن بۆ به‌رهنگاریا ئومیكرونی، هه‌كه هات په‌یدابیت، به‌لێ هه‌تا نوكه په‌یدانه‌بوویه ل سه‌ر ئاستێ پارێزگه‌ها دهۆكێ هه‌ر چه‌نده ل ده‌وله‌تان به‌لاڤبوویه و مه‌ترسییا وێ هه‌یه، له‌ورا ژی ساخله‌میا پارێزگه‌ها دهۆكێ هه‌موو ئاماده‌كاری كرینه.
د. هه‌كار مسته‌فا، ته‌كه‌ز كركو ئه‌و كه‌سێن تووشی كۆرۆنایێ دبن هه‌تا شه‌ش هه‌یڤان هنده‌ك ژێ دمینن هه‌تا وه‌كو جاران ڤه‌دگه‌ریت، چونكو سه‌رباركێن كۆرۆنایێ دباش نینن و هنده‌ك ژبه‌ر وان سه‌رباركان تووشی نه‌خۆشیا شه‌كرێ و نه‌خۆشێن دلی و روماتیزمێ و جه‌لتا مێشكی و نه‌خۆشێن كۆما ده‌مارا و ره‌هێن خوینێ بووینه، له‌ورا ژی ئه‌م ئاموژگاریان ل خه‌لكێ خوه دكیه‌ن پشتی ژ كۆرۆنایێ ژی چاره‌سه‌ردبن قه‌ستا نوشدارێن خوه بكه‌ن.
نيشاندان