بارزان، ره‌مه‌زان زه‌كه‌ریا:
هونه‌رمه‌ندێ شێوه‌كار(سابر ئالكه‌یی) ددیداره‌كێ دا بۆ رۆژناما ئه‌ڤرۆ گۆت: ئه‌ڤه ده‌مه‌كه درێژه كارێ شێوه‌كاری دكه‌م و هێشتا ل قوناغا بنه‌ره‌تی بووم ده‌مێ ب پێنڤیسی رساسی من ل سه‌ر ده‌فته‌رێن قوتابیان وێنه چێدكرن، پاشی من كارێن خوه به‌رفره‌هتر لێ كرن هه‌تا كو شیام ب ته‌مامی خوه دناڤ كه‌ڤالێن شێوه‌كاریێ دا ببینم .
زێده‌تر گۆت: ل ده‌مێ بۆری ل سه‌ر ئاستێ كوردستانێ من چه‌ندین پێشانگه‌هێن شێوه‌كاری ڤه‌كرینه، نوكه ژی به‌رده‌وام كه‌ڤالان چێدكه‌م، به‌لێ مخابن هێشتا ل كوردستانێ فرۆتنا كه‌ڤالان گه‌له‌كا كێمه، له‌ورا شێوه‌كار نه‌چار دبیت پتر ب رێیا سۆشیال میدیایێ كه‌ڤالێن خوه نیشا بده‌ت، له‌ورا پێدڤیه پتر گرنگی ب هونه‌رێ شێوه‌كاری بهێته دان، ژبه‌ركو هه‌كه گرنگی پێ بهێته دان دێ بازارێ فرۆتنا كه‌ڤالان گه‌رمتر لێ هێت و ل وی ده‌می شێوه‌كار دێ پتر یێ رژد بیت ل سه‌ر كارێ خوه، به‌لێ مخابن هه‌تا نوكه شێوه‌كاران نه‌شیاینه مفای ژ فرۆتنا كه‌ڤالان ببینن.
ل دووماهیێ گۆت: یا ئاشكرایه كو ده‌ڤه‌را بارزان پتر ژ چه‌رخه‌كی یه نموونه‌یا ژینگه‌هـ پارێزیێ یه، له‌ورا ژی سروشت كریه بناغه‌یێ كارێ خوه یێ شێوه‌كاری و من دڤێت ب رێیا كه‌ڤالێن خوه پتر ژینگه‌هـ پارێزیێ به‌لاڤ بكه‌م.
نيشاندان