ئه‌ڤرۆ ، زنار تۆڤی:

قووناغا ده‌زگریێ‌، قووناغه‌كا هه‌ره‌ گرنگ و هه‌ستیاره‌ دناڤبه‌را كور و كچان دا بتایبه‌ت د ڤێ‌ قووناغا ژیانێ‌ دا، هه‌ردو دێ‌ شاره‌زایی سالوخه‌تێن ئێكدو بن، لێ‌ مخابن هه‌تا نوكه‌ وه‌كو پێدڤی گرنگی ب ڤێ‌ قووناغێ‌ نه‌هاتیه‌ دان، له‌وما پشتی پێكئینانا ژیانا هه‌ڤژینیێ‌، گه‌له‌ك ئاریشه‌ دناڤبه‌را ژن و مێران دا په‌یدا دبن و دگه‌هنه‌ قووناغا ژێكجۆدابوونێ‌، یان ژی هه‌بوونا ئاریشێن به‌رده‌وام دناڤبه‌را وان ژن و مێران دا.

د. كه‌ریم شه‌ریف قه‌ره‌چه‌تانی، مامۆستایێ‌ زانكۆیا سلێمانیێ‌ و و بسپۆرێ‌ ده‌روونی، د دیداره‌كێ‌ دا بۆ ئه‌ڤرۆ دیار كر، قووناغا ده‌زگریێ‌ گه‌له‌ك یا گرنگه‌ د ژیانا كور و كچان دا، هه‌رچه‌نده‌ هه‌تا نوكه‌ د جڤاكی دا، وه‌كو پێدڤی گرنگی ب ڤێ‌ قووناغێ‌ نه‌هاتیه‌ دان و گه‌له‌ك ژ ژنان تووشی ژێكجۆدابوونێ‌ بووینه‌ و گه‌له‌ك ژ وان ژنان دایه‌ دیار كرن كو هه‌ڤژینێن وان ل گه‌ل وان د خراب بووینه‌، گۆتنێن كرێت گۆتینه‌ وان و ئه‌و ئێشاندینه‌ و توندۆتیژی ل هه‌مبه‌ری وان ب كارئینایه‌.

قه‌ره‌چه‌تانی د به‌رده‌وامیا ئاخفتنێن خوه‌دا گۆت: (ئه‌ڤه‌ ژ وێ‌ چه‌ندێ‌ په‌یدا بوویه‌، كو د قووناغا ده‌زگریێ‌ دا وه‌كو پێدڤی ئه‌و د ئێكدۆ نه‌گه‌هشتینه‌، هه‌روه‌سا به‌ری ژن ئینانێ‌، قووناغا ده‌زگریێ‌ هاتیه‌ دانان، داكو ئه‌و كور و ئه‌و كچه‌ شاره‌زایی ئێكدو ببن و كار و ره‌فتارێن ئێكدو بزانن، له‌وما یا گرنگه‌ كچ له‌زاتیێ‌ د شووكرنێ‌ دا نه‌كه‌ن و كور ژی له‌زاتیێ‌ د ژن ئینانێ‌ دا نه‌كه‌ن و دیسان نه‌هێلن كه‌سێ‌ سیێ‌ بهێته‌ د ژیانا وان دا باشتره‌، ئه‌و ب خوه‌ ئاریشێن خوه‌ چاره‌سه‌ر بكه‌ن و نه‌هێلن كه‌س مایتێكرنێ‌ د ژیانا وان دا بكه‌ت).

بسپۆرێ‌ ده‌روونی ئه‌و چه‌نده‌ ژی دا زانین كو دناڤا مرۆڤان دا چه‌ند كه‌سایه‌تی هه‌نه‌، ژ وان ژی هنده‌ك كه‌سایه‌تی هه‌نه‌، ب ئێشاندنێ‌ و شكاندنا مرۆڤان بێهنا وان دهێت و پێ‌ كه‌یف خۆش دبن، هنده‌ك كه‌س هه‌نه‌ خه‌مۆكینه‌، به‌رده‌وام خه‌م و ژان د ژیانا وان دا هه‌نه‌، هه‌روه‌سا هنده‌ك كه‌س هه‌نه‌ دو دلن و هنده‌ك ژی هه‌نه‌ دلێ‌ وان یێ‌ پیسه‌، مرۆڤ چو ژ وان نزانیت، له‌وما یا گرنگه‌ د ده‌مێ‌ ده‌زگریێ‌ دا ئه‌ڤ تشته‌ بهێنه‌ زانین و گۆت: (هه‌رچه‌نده‌ چو كه‌س د قووناغا ده‌زگریێ‌ دا 100% هه‌موو ساخله‌ت و كار و ره‌فتارێن ئێكدو نزانن، به‌لێ‌ دێ‌ هنده‌ك تشت ژێ‌ دیار بن، وه‌كو دل پیسی و هنده‌ك ره‌فتارێن دیتر یێن كرێت).

ماموستایێ‌ زانكویێ‌ ئاماژه‌ بڤێ‌ چه‌ندێ‌ ژی كر كو هه‌كه‌ ئه‌ڤ چه‌نده‌ ل ده‌ف ئێك ژ وان هه‌ردویان دیار بوو، ل وی ده‌می دشێن هه‌لویستی وه‌ربگرن، كا دێ‌ ل گه‌ل ئێكدو به‌ردوام بن، یان نه‌؟، هه‌موو ره‌فتار بۆ وان هه‌ردویان دێ‌ دیار بن، كو ئه‌و كه‌سێ‌ وان هه‌لبژارتی كۆمه‌كا سالۆخه‌تان تێدا هه‌یه‌ و ل گه‌ل ئێك ناگۆنجن و گۆت: (له‌وما هه‌كه‌ د قووناغا ده‌زگریێ‌ دا ژێكجۆدا ببن باشتره‌ ژ هندێ‌ پشتی شووكرنێ‌ و هه‌بوونا زارۆیان ژێكڤه‌ ببن).

دیدار، نیوار محه‌مه‌دسه‌لیم:

د. زۆزان كۆچه‌ر، به‌ربژارا پارتی دیموكراتی كوردستان ل بازنێ‌ زاخۆ – سێمێل، د دیداره‌كێ‌ دا بۆ رۆژناما ئه‌ڤرۆ به‌حس ل كار و پرۆژێن خوه‌ یێن داهاتی دكه‌ت هه‌كه‌ هات و باوه‌ری پێ‌ هاته‌ دان و دده‌ته‌ زانین كو دێ‌ به‌رنامێ‌ وێ‌ ژی د چارچۆڤێ‌ به‌رنامێ‌ پارتی دیموكراتی كوردستان دا بیت و دێ‌ ده‌ستكه‌فتێن هه‌رێما كوردستانێ‌ ل به‌غدا زامن كه‌ین. ئاشكه‌را ژی كر كو ل دووڤ تایبه‌تمه‌ندیا خوه‌ دێ‌ كار كه‌ت پتر خزمه‌تا هه‌رێما كوردستانێ‌ بكه‌ت و گۆتژی: “چوونا مه‌ بۆ به‌غدا سنوری نینن هندی یا گرنگه‌ ژ به‌ر كو رۆژ بۆ رۆژێ‌ مافێن كوردان زێده‌تر ل به‌غدا یێن دهێنه‌ بن پێ كرن”.

ئه‌ڤرۆ: زۆزان كۆچه‌ر كی یه‌؟

زۆرزان كۆچه‌ر: ئه‌ز زۆزان عه‌لی سالح پیرۆ كۆچه‌ر به‌ربژێرا ژماره‌ 25 ل سه‌ر لیستا پارتی دیموكراتی كوردستان ل بازنێ‌ زاخۆ – سێمێل. ده‌رچوونا كولیژا چاندنێ‌ مه‌ پشكا بیستانكاری.

ئه‌ڤرۆ: مه‌ره‌م ژ چوونا ته‌ بۆ به‌غدا چیه‌؟

زۆزان كۆچه‌ر: مه‌ره‌م ژ چوونا من بۆ به‌غدا ئه‌وه‌ كو ببمه‌ نوونه‌را راسته‌قینه‌ یا ده‌نگده‌رێ‌ به‌رێز یێ‌ بازانی دو (زاخۆ – سێمێل). هه‌ر كه‌سه‌كی یان كه‌سه‌كێ‌ هنده‌ك شیانێن باش و جودا یێن ل ده‌ف هه‌یی، ئه‌ز خوه‌ دبینم كه‌سه‌ك خودان شیان و ب گۆره‌یی وان شیانێن من هه‌یین دخوازم زێده‌تر خزمه‌تا كوردستان و كوردستانیان و عیراقێ‌ ژی ب گشتی بكه‌م ب تایبه‌ت ب گۆره‌یی تایبه‌تمه‌ندیا خوه‌.

ئه‌ڤرۆ: به‌رنامێ‌ ته‌ بۆ جڤاتا نوونه‌ران چیه‌؟

زۆزان كۆچه‌ر: دێ‌ هه‌موو بزاڤا كه‌م ژ بوو زامنكرنا هه‌موو ده‌ستكه‌فتێن هه‌رێما كوردستانێ‌. ب تایبه‌ت ئه‌و بابه‌تێن سه‌ره‌كی كو ل دووڤ تایبه‌تمه‌ندیا خوه‌ خوه‌شكرنا ره‌وشا جۆتیاران و رێكخوشكرن ل هه‌مبه‌ر پارێ‌ گه‌نمێ‌ جۆتیاران و ره‌وشا چاندنێ‌. دێ‌ بزاڤێ‌ كه‌م ب هه‌موو رێیان كو ب باشترین ره‌نگ مفا ژ ده‌ڤه‌را مه‌ بهێته‌ وه‌رگرتن بۆ مه‌ره‌مێن چاندنێ‌ و پرۆژێن مه‌زن یێن چاندنێ‌ ل وێ‌ ده‌ڤه‌رێ‌ بهێنه‌ دانان ب تایبه‌ت ده‌ڤه‌ره‌كا زه‌نگینه‌ ب به‌رهه‌مێن چاندنێ‌ ب تایبه‌ت ژی گه‌نمی.

ئه‌ڤرۆ: د چارچۆڤێ‌ به‌رنامێ‌ پارتی دا دێ‌ گرنگیێ‌ ب كیژ بابه‌تان ده‌یی؟

پارتی دیموكراتی كوردستان پارته‌كا رێكخستی و خودان شیان و كار و به‌رنامێن گه‌له‌ك ژێ‌ هاتیه‌ و كه‌سانێن گه‌له‌ك شاره‌زا و بسپۆر ئه‌و به‌رنامه‌ یێن دانایین كو هه‌ر كه‌سه‌كی یان كه‌سه‌كێ‌ ل دووڤ تایبه‌تمه‌ندیا وان ب گونجیت، ژ به‌ر كو تایبه‌تمه‌ندیا من ژی زێده‌تر چاندنه‌، هه‌ر تشتێ‌ گرێدایی وارێ‌ چاندنێ‌ و به‌رهه‌مێ‌ جۆتیاران بیت د ناڤ به‌رنامه‌ی دا بێ‌ دودلی دێ‌ ئه‌نجام ده‌م، ب تایبه‌ت دروستكرنا ژینگه‌هه‌كا گۆنجای بۆ جۆتیاران و گرنگیدان ب به‌رهه‌مێن وان و ڤه‌دیتنا بازاری بۆ به‌رهه‌مێن وان، هه‌ر دیسان ژی كار ژ بۆ وێ‌ چه‌ندێ‌ كه‌ین ب رێیا ده‌سته‌لاتێن فیدرال رێ‌ ب هه‌رێما كوردستانێ‌ بهێته‌ دان هنده‌ك سكرێن مه‌زن بۆ راگرتنا ئاڤێ‌ ل ده‌ڤه‌رێ بهێنه‌ دروستكرن دا بۆ مه‌ره‌مێن چاندنێ‌ ژی مفا ژێ‌ بهێته‌ وه‌رگرتن.

ئه‌ڤرۆ: بۆچی گرنگه‌ بچینه‌ به‌غدا؟

زۆزان كۆچه‌ر: گرنگیا چوونا مه‌ بۆ به‌غدا سنور نینن ژ به‌ر كو هه‌موو بزاڤ دهێنه‌ كرن كو ئه‌ركێن تاكێ‌ كوردستانیان بهێنه‌ بن پێ‌ كرن، له‌ورا زۆر یا گرنگه‌ ئه‌م ئێك ده‌ست و ئێك هه‌لویست بین ژ بوو پارێزڤانیا ماف و ئه‌ركێن وه‌لاتیێن هه‌رێما كوردستانێ‌. ب هه‌بوونا كوردان ل به‌غدا هنده‌ك ژ مافێن وان یێن دهێنه‌ بن پێ‌ كرن و دستوور ب دروستی ناهێنه‌ بجهئینان كو پترانیا ئه‌و ماددێن گرێدایی كوردستانیان و هه‌رێما كوردستانێ‌ دهێنه‌ بن پێ‌ كرن و سه‌روه‌رێ‌ وان ژی ماددێ‌ 140 یێ‌ دستووری، ئه‌ڤجا چوونا مه‌ بۆ به‌غدا دێ‌ بیته‌ رێگر كو ئه‌و ب حه‌زا دلێ‌ خوه‌ ڤان ماددان بن پێ‌ نه‌كه‌ن و چو پێ‌ نه‌ڤێت ژی هندی ب هێزتر بچینه‌ به‌غدا دێ‌ زێده‌تر شێین وان مافان پارێزین.

ئه‌ڤرۆ: چه‌ند یا گرنگه‌ ل به‌غدا د ئێكگرتی بین؟

زۆزان كۆچه‌ر: هێز یا د ئێكگرتنێ‌ و بێ‌ ئێكگرتن ژی چو هێز نینن. زۆر یا گرنگه‌ ئه‌م خودان بڕیاره‌كا ب هێز و كارا بین دا كو بشێین ئه‌و مافێن مه‌ یێن دهێنه‌ بن پێكرن ب ده‌ست ڤه‌ بهێن. باشترین نموونا ئێكگرتنێ‌ ژی ئه‌وه‌ هه‌كه‌ هزر ل كوردستان و عیراقێ‌ ل سه‌ر ده‌مێ‌ هه‌ڤپه‌مانیا كوردستانی و نها، ل وی ده‌می ب ده‌ست ڤه‌ ئینانا مافان گه‌له‌ك ژ نها باشتر بوو و نوكه‌ ژی ئێك بگرین دێ‌ باشتر بین، هندی زووتره‌ ژی باشتره‌، چو جار بۆ ئێكگرتنێ‌ گرنگ نینه‌. هه‌كه‌ ل هه‌رێما كوردستانێ‌ مه‌ چه‌ند هه‌ڤڕكی و لێك تێنه‌گه‌هشتن ژی هه‌بیت، به‌لێ‌ دڤێت چاوان بیت ل به‌غدا خودان ئێك بڕیار و ئێك بۆچوون بین.

ئه‌ڤرۆ: تو دبینی پارتی دێ‌ شێت سه‌نگا خوه‌ پارێزیت؟

زۆزان كۆچه‌ر: به‌لێ‌ یا روون و ئاشكه‌رایه‌ پارتی یا بێ‌ هه‌ڤڕكه‌ و دێ‌ هه‌ر مینیت پارتیا ئێكێ‌ ژ به‌ر كو سه‌ركرداتیا پارتی ب رێڤه‌ دبت خودان ئه‌زموونێن هه‌ره‌ دژواره‌ و ب درێژاهیا مێژوویێ‌ پارتی خوین بۆ ڤێ‌ ئاخێ‌ رێژتیه‌ و یا به‌رده‌وامه‌ ژی ل سه‌ر قوربانی دانێ‌ د پێخمه‌ت ئاڤه‌دانكرن و خوه‌شگوزه‌رانی و ئه‌من و ئاسایشێ‌، ژ به‌ر هندێ‌ ژی دێ‌ گه‌له‌ك یا به‌رئاقل بیت خه‌لك ژی ل سه‌ر ڤان كار و ره‌فتارێن پارتی، ب ده‌نگێ‌ خوه‌ پاداشت بكه‌ت.

ئه‌ڤرۆ: ئه‌و چ تشته‌ ل ده‌ف پارتی هه‌یی، خه‌لك پێڤه‌ هاتیه‌ گرێدان؟

زۆزان كۆچه‌ر: دلسۆزی و خوه‌گوری كرن دو ژ سیفاتێن هه‌ره‌ گرنگێن پارتی نه‌ كو خه‌لك پێڤه‌ هاتیه‌ گرێدان، یان ژ وان ژی گرنگتر هه‌بوونا كه‌سه‌كێ‌ خودان كارێزما یێ‌ وه‌كو سه‌رۆك بارزانی كو جیهان هه‌موو سه‌رسامی شاره‌زایی و ژیهاتیا وی یه‌. سه‌رۆك بارزانی ب تنێ‌ به‌سه‌ كو خه‌لك ب پارتی ڤه‌ بهێته‌ گرێدان، شانازیه‌ بۆ مرۆڤی ل بن بڕیار و راسپاردێن جه‌نابێ‌ وی كار بكه‌ت. دیسا پارتی دیموكراتی كوردستان ب رێیا هه‌ردو پۆستێن سه‌رۆكاتیا هه‌رێمێ‌ و سه‌رۆك وه‌زیران شیایه‌ خزمه‌ته‌كا باش پێش كێشی وه‌لاتیێن هه‌رێما كوردستانێ‌ بكه‌ت كو ناڤه‌راست و باشووری عیراقێ‌ حه‌سیدیێ‌ پێ‌ دبه‌ن. چو پێ‌ نه‌ڤێت هه‌كه‌ ئه‌م ڤه‌گه‌رینه‌ به‌ری سه‌رهلدانێ‌ و یان ژی ل ڤێ‌ دووماهیێ‌ ژی شه‌رێ‌ داعش دێ‌ هه‌ر پارتی ل پێشیێ بینی.

ئه‌ڤرۆ: پێشبینیێن ته‌ بۆ عیراقا داهاتی چنه‌؟

زۆزان كۆچه‌ر: پێشبینی كرن بۆ ره‌وشا عیراقێ‌ ب ڤی ره‌نگێ‌ ئالۆز هه‌تا راده‌كی یا ب زه‌حمه‌ته‌ و ب تایبه‌ت ئه‌ڤ شێوازێ‌ نوو یێ‌ هه‌لبژارتنان ژی دێ‌ كارتێكرنا خوه‌ هه‌بیت و دێ‌ ده‌لیڤا هه‌ڤپه‌یمانیێن مه‌زن ل عیراقێ‌ ب هێزتر لێ‌ كه‌ت و دێ‌ بیته‌ ئه‌گه‌ر هنده‌ك لایه‌ن زێده‌تر تاكڕه‌ویێ‌ بكه‌ن.

ل ڤێره‌ دو بژارده‌ ل به‌ر ده‌سته‌لاتا سیاسی یا عیراقێ‌ نه‌، یان دێ‌ عیراقێ‌ به‌ر ب تێكدان و نه‌خۆشیێ‌ و ئالوزیێن زێده‌تر به‌ن ب رێیا حوكمێ‌ شیعی یێ‌ تاكڕه‌وی، یان ژی دێ‌ دستووری كه‌نه‌ بنیاتێ‌ عیراقه‌كا نوو و روحا پێكڤه‌كاركرنێ‌ و چو پێ‌ نه‌ڤێت ژی ئه‌ڤه‌ دێ‌ عیراقێ‌ و عیراقیان به‌ر ب كنارێن ئارامیێ‌ به‌ت.

ئه‌ڤرۆ: باشترین چاره‌سه‌ری بۆ ره‌وشا نها چیه‌؟

زۆزان كۆچه‌ر: هه‌لبژارتن بهێنه‌ كرن، جڤاتا نوونه‌ران خوه‌ رێك بێخیت و حوكمه‌ته‌كا ب هێز و خودان ده‌سته‌لات بهێته‌ هه‌لبژارتن دێ‌ بیته‌ ئه‌گه‌ر جاره‌كا دی عیراق خوه‌ ل سه‌ر پیێن خوه‌ بگریت و ده‌ست ب هنده‌ك پرۆژێن خزمه‌تگۆزاری یێن ده‌ستپێكی بهێته‌ كرن وه‌كو قووناغا ئێكێ‌ وه‌كو پرۆژێن ئاڤ و كاره‌ب و جاددان ل عیراقێ‌ هه‌موویێ‌.

ئه‌ڤرۆ: ل دووماهیێ‌ ته‌ چو هه‌یه‌ بێژی؟

داخوازێ‌ ژی وه‌لاتیێن خوه‌شتڤی دكه‌م كو هه‌موو به‌ر ب سندوقێن ده‌نگدانێ‌ بچن و 10/10 بكه‌نه‌ كه‌رنه‌ڤاله‌كا جه‌ماوه‌ری یا مه‌زن ژ بوو سه‌رخستنا لیستا پارتی دیموكراتی كوردستان چونكو یا پشت راستم یا ل پێش چاڤێن خه‌لكێ‌ هێژا كو دوهی ب چه‌كێ‌ خوه‌ و ئه‌ڤرۆ ب ئاڤه‌دانیێ‌ و سوبه‌هی ژی ب پێشڤه‌چوونێ‌ هه‌ر پارتی یه‌. داخوازا سه‌ركه‌فتنێ‌ ژی بۆ هه‌موو به‌ربژێرێن پارتی دیموكراتی كوردستان دكه‌م د هه‌لبژارتنێن داهاتی دا.