دیدار، نیوار محه‌مه‌دسه‌لیم:
د. ڤیان سه‌بری، به‌ربژارا پارتی یا ژماره‌ 21 ل بازنێ‌ ئاكرێ‌ د دیداره‌كێ‌ دا بۆ رۆژناما ئه‌ڤرۆ به‌حس ل به‌رنامێ‌ خوه‌ بۆ چوونا ناڤا جڤاتا نوونه‌رێن عیراقێ‌ دكه‌ت و دده‌ته‌ زانین كو دێ‌ به‌رنامێ‌ وێ‌ د چارچۆڤێ‌ به‌رنامێ‌ پارتی دا بیت بۆ ب هێزكرنا قه‌وارێ‌ هه‌رێما كوردستانێ‌ و پاراسنا وێ‌ ژ هه‌ر مه‌ترسیه‌كێ‌ و خویا دكه‌ت كو ئه‌و دێ‌ ل سه‌ر سێكته‌رێ‌ ده‌رمانان كار كه‌ت ب تایبه‌ت به‌هرا هه‌رێما كوردستانێ‌ و ده‌ڤه‌را ئاكرێ‌ كو ب ره‌نگه‌كێ‌ عادیلانه‌ ناگه‌هنه‌ وان ده‌ڤه‌ران و دبێژیت: چوونا كه‌سه‌كا خودان سه‌ربۆر و زمانه‌كێ‌ عه‌ره‌بی یێ‌ باش دێ‌ به‌ره‌ڤانه‌كا باش بیت ژ مافێن وه‌لاتیێن هه‌رێما كوردستانێ‌.
ئه‌ڤرۆ: د. ڤیان سه‌بری كی یه‌؟
د. ڤیان سه‌بری: ژ دایكبوویا به‌غدا مه‌ ژ ماله‌كا كورد په‌روه‌ر، مامه‌كێ‌ من هه‌ڤالێ بارزانیێ‌ نه‌مر یوو، ل گه‌ل چوویه‌ رۆسیا و مامه‌ك ژی شه‌هید بوویه‌ و بابێ‌ من ژی زیندانیێ‌ سیاسی یه‌. هه‌لگرا باوه‌رناما دبلومێ‌ مه‌ ب نه‌خۆشیێن ژن و زارۆبوونێ‌. من دكتورا ژی ب ساخله‌میا جڤاكی هه‌یه‌. ل كونگرێ‌ سیێ‌ ئه‌نداما یه‌ده‌ك یا سه‌ركرداتیا پارتی بووم. ل خولا بوری یا جڤاتا نوونه‌ران ئه‌ندام بوویمه‌ و سه‌رۆكا فراكسیۆنا پارتی دیموكراتی كوردستان بوویمه‌.
ئه‌ڤرۆ: مه‌ره‌م ژ چوونا به‌غدا ته‌ بۆ چیه‌؟
د. ڤیان سه‌بری: ل دووڤ چارچۆڤێ‌ به‌رنامێ‌ پارتی دیموكراتی كوردستان وه‌كو سه‌ركرده‌كا پارتی و ژنه‌كا خودان ئه‌زموون و خودان شیان و زمانێ‌ عه‌ره‌بی باش، به‌ره‌ڤانیێ‌ ژ مافێن دستووری و یێن قانوونی یێن خه‌لكێ‌ كوردستانێ‌ بكه‌م. سۆپاسیا سه‌رۆك مه‌سعود بارزانی دكه‌م كو ئه‌و باوه‌ریه‌ دایه‌ من دووباره‌ خوه‌ بۆ جڤاتا نوونه‌ران به‌ربژار بكه‌م.
به‌رنامێ‌ من دێ‌ د چارچۆڤێ‌ پارتی دیموكراتی كوردستان دابیت وه‌كو نوشداره‌ك كار بكه‌م ل سه‌ر سێكته‌رێ‌ ده‌رمانان كو ده‌وله‌تا فیدرال ژماره‌كا كێم یا ده‌رمانان بۆ هه‌رێمێ‌ ره‌وانه‌ دكه‌ت ب تایبه‌ت ده‌ڤه‌را ئاكرێ‌ و شێخان ژی كو دكه‌ڤیته‌ به‌ر ماددێ‌ 140 و گه‌له‌ك ده‌ڤه‌رێن به‌رده‌ره‌ش ژی ب هه‌مان ره‌نگ كو پێدڤیه‌ خزمه‌تا وان بكه‌ین. دیسا دێ‌ ل سه‌ر ئامیرێن نوشداری ژی كار كه‌ین.
دیسا دێ‌ كار كه‌ین كو پێگه‌هێ‌ هه‌رێما كوردستانێ‌ ل به‌غدا ب هێز بكه‌ین، دێ‌ كار ل سه‌ر دارێتنا وان قانوونان كه‌ین یێن د به‌رژه‌وه‌ندا هه‌رێما كوردستانێ‌ دا و مافێن وێ‌ تێدا دهێنه‌ پاراستن وه‌كو بابه‌تێ‌ نه‌فت و گازێ‌ كو ده‌سته‌یه‌ك هه‌بیت بۆ داهاتێن فیدرالی و بابه‌تێ‌ سه‌رژمێریێ‌ و ماددێ‌ 140 كار كه‌ین.
ئه‌ڤرۆ: د ناڤ به‌رنامێ‌ پارتی دا دێ‌ گرنگیێ‌ ب چو ته‌وه‌ر ده‌ی؟
د. ڤیان سه‌بری: پارتی دیموكراتی كوردستان ئێك ژ حزبێن هه‌ره‌ ره‌سه‌ن یێن ئیراقێ یه‌ و هه‌ر ژ ده‌ستپێكا دامه‌زراندنا خوه‌، وه‌كو به‌رده‌وام یا رژد بوو ل سه‌ر كێشێن دیموكراسیێ ل ئیراقێ و گرێدانا وێ ب خه‌باتا خوه‌ یا نه‌ته‌وی یا ره‌وا ڤه‌، هه‌روه‌سا به‌رده‌وام و نوكه‌ ژی كاراكته‌ره‌كێ گرنگه‌ د پرسێن نیشتمانی یێن ئیراقیان دا، دێ‌ كار كه‌ین دا كو ئاشتی و ئاسایش و ئه‌من ل عیراقێ‌ به‌رقه‌را بیت.
هه‌ر د چارچۆڤێ‌ به‌رنامێ‌ پارتی دا، دێ‌ كار بۆ وێ‌ چه‌ندێ‌ كه‌ین ده‌زگه‌هێن فیدرال كارا ببن و به‌هرا هه‌رێما كوردستانێ‌ د بوودجێ‌ دا ئێكلا ببیت و دستوور چاره‌سه‌ریا هه‌موو كێشێن سیاسی بیت و كار ل سه‌ر بجهئینانا ماددێ‌ 140 یێ‌ دستووری بهێته‌ كرن.
دێ‌ كار كه‌ین د پیناڤی به‌رفره‌هكرنا تێگه‌هێ ده‌وله‌تا مه‌ده‌نی و دیموكراسی و فیدرالی دێ پشكداریێ كه‌ین ل سه‌ر بنه‌مایێ به‌لاڤكرنه‌كا دادپه‌روه‌رانه‌ یا ده‌ستهه‌لاتێ و سامانی، هه‌روه‌سا ده‌سته‌به‌ركرنا ده‌لیڤان ب یه‌كسانی بۆ هه‌موویان و ئاڤه‌دانكرنا ده‌وله‌تا ده‌زگه‌هان و قانوونێ و پێگیریكرن ب دستووری.
هه‌روه‌سا فره‌جۆركرنا ئابووریا وێ و دابینكرنا ده‌لیڤێن كاری و باشتكرنا بواری كارگێری و ب هێزكرنا داموده‌زگه‌هێن ده‌وله‌تێ. ژبلی وێ چه‌ندێ داخواز دكه‌ت ئاواره‌ ب كه‌رامه‌ت ڤه‌ بزڤرنه‌ ده‌ڤه‌رێن خوه‌ یێن ره‌سه‌ن.
بۆ ل به‌رچاڤ وه‌رگرتنا پرۆسا هه‌لبژارتنان ئه‌م داخواز دكه‌ین ئه‌و پرۆسا گرنگ یا دادپه‌روه‌رانه‌ و زه‌لال بیت و ل ژێر چاڤدێریا رێكخراوا نه‌ته‌وێن ئێكگرتی دا بیت.
ئه‌ڤرۆ: چه‌ند یا گرنگه‌ ئه‌ڤرۆ بچینه‌ به‌غدا؟
د. ڤیان سه‌بری: ب هه‌بوونا كوردان ل به‌غدا و پشكداریكرن د دارێژتنا بڕیاران دا، ئه‌ركێ‌ نه‌حه‌زان د دژاتیكرنا كورد و كوردستانیان دا ب زه‌حمه‌تر دكه‌ڤیت، پشكدارینه‌كرن ل به‌غدا ئانكو دانا ده‌لیڤێ‌ ب نه‌حه‌زێن كوردستانیان كو ب كه‌یفا خوه‌ ره‌فتارێ‌ ل گه‌ل مه‌ بكه‌ن. د هه‌مان ده‌م دا هه‌كه‌ ب هێز ژی نه‌چین هه‌موو ده‌لیڤێ‌ بۆ وان خوه‌ش دكه‌ین كو ب كه‌یفا خوه‌ دژاتیا قه‌وارێ‌ هه‌رێما كوردستانێ‌ بكه‌ن. گه‌له‌ك یا گرنگه‌ بچنه‌ به‌غدا و به‌ره‌ڤانیێ‌ ژ وان بابه‌تێن گرنگ یێن د به‌رژه‌وه‌ندیا هه‌رێما كوردستانێ‌ دا بكه‌ین ب تایبه‌ت پرۆژێ‌ قانوونا نه‌فت و گازێ‌ و دادگه‌ها فیدرال و به‌هرا هه‌رێمێ‌ ژ بوودجێ‌ و سه‌رژمێریا گشتی و گه‌له‌ك پرسێن دی یێن چاره‌نڤیس ساز. چوونا پارتی ب هێز بۆ به‌غدا دێ‌ قه‌وارێ‌ هه‌رێما كوردستانێ‌ ب هێز راگریت
ئه‌ڤرۆ: پارتی دشێت سه‌نگا خوه‌ ب پارێزیت؟
د. ڤیان سه‌بری: پارتی پارتیا 75 سالێن خوه‌ نه‌چه‌ماندنێ‌ و سه‌رۆك بارزانی یه‌. پارتیا ئێكێ‌ یه‌ ل هه‌رێما كوردستانێ‌ و كه‌ڤنترینه‌ ل عیراقێ‌ كو كار بۆ مافێن كوردستانیان كار كریه‌ بۆ ئاینده‌یی و وه‌لاته‌كێ‌ ئارامتر و خوش گوزه‌رانیێ‌. پارتیه‌كه‌ دیموكرات كریه‌ بنیاتێ‌ خوه‌ و داعش به‌زاندی یه‌ و خودان شه‌هید و جه‌ماوه‌ره‌. پارتی ژ بۆ ب ده‌ستڤه‌ئینانا مافان هاتیه‌ دامه‌زراندن و خه‌لك ل هه‌موو عیراقێ‌ گه‌له‌ك ب ئاشكه‌رایی ژی ڤێ‌ چه‌ندێ‌ دزانن كو هندی پارتی هه‌بیت دێ‌ رۆژ بۆ رۆژێ‌ ب هێزتر به‌ره‌ڤانیێ‌ ژ قه‌وارێ‌ هه‌رێما كوردستانێ‌ و وه‌لاتیێن وێ‌ و ئه‌من و ئاسایشا وێ‌ كه‌ت. خه‌لك ژی ڤێ‌ چه‌ندێ‌ گه‌له‌ك ب باشی دزانیت ژ به‌ر هندێ‌ ژی ل ده‌مێ‌ هه‌لبژارتنان دێ‌ هه‌لبژارتنا وان یا ئێكانه‌ بیت، بێی كو بیر ل چو تشته‌كێ‌ دی بكه‌ن. خه‌لك دزانیت ئه‌ڤ پارتیه‌ خودان رابه‌ر و سه‌روه‌ره‌.
ئه‌ڤرۆ: ل دووماهیێ‌ ته‌ چو هه‌یه‌ بێژی؟
د. ڤیان سه‌بری: ده‌نگدان مافه‌كێ‌ شه‌رعی یێ‌ وه‌لاتیانه‌. ده‌نگدان ب هێز راگرتنا ئیرادا ملله‌تی و نه‌هێلانا دكتاتوری و بن ده‌ستیێ‌ یه‌، بلا ئه‌ڤ ده‌لیڤه‌ ژ ده‌ستێ‌ هه‌وه‌ نه‌چیت و ل ده‌ما دچنه‌ هه‌لبژارتنان ژی خوه‌ ب هێزتر بێخن و پێگه‌هێ‌ خوه‌ ب هێزتر لێ‌ كه‌ن و خودان بڕیار بن و ده‌نگێ‌ خوه‌ بده‌نه‌ به‌ربژارێن پارتی دیموكراتی كوردستان چونكو ئه‌و ب تنێ‌ دێ‌ هه‌وه‌ ب هێز ئێخیت. ل ده‌ستپێك و دووماهیا ب تنێ‌ پارتی و سه‌رۆك بارزانی نه‌ داكوكیه‌ر ژ مافێن هه‌وه‌ یێن ره‌وا.

دیدار، نیوار محه‌مه‌دسه‌لیم:
خالد رێكانی به‌ربژارێ‌ پارتی یێ‌ ژماره‌ 27 ل بازنێ‌ دهۆك – ئامێدی د دیداره‌كێ‌ دا بۆ رۆژناما ئه‌ڤرۆ به‌حس ل كار و پلانێن خوه‌ بۆ به‌غدا دكه‌ت و دده‌زانین كو ئه‌و دێ‌ ب گۆره‌یی بسپۆری و شاره‌زاییا خوه‌ بزاڤێ‌ ل وارێن هنارتنا به‌هرا هه‌رێمێ‌ یا ده‌رمانان و بابه‌تێن قانوونی دكه‌ت كو نها هه‌موو ئه‌و ماددێن دستووری یێن د به‌رژه‌وه‌ندا كوردان دا هاتینه‌ ده‌كرن، هاتینه‌ پشت گوه هاڤێتن و كار پێ‌ ناهێته‌ كرن.
خویا ژی كر كو ل ده‌ما دچنه‌ به‌غدا ژی دێ‌ ل دووڤ گۆتنا سه‌رۆك بارزانی بن ده‌ما دبێژیت: كێم باخڤن و گه‌له‌ك كار بكه‌ن.
ئه‌ڤرۆ: خالد رێكانی كی یه‌؟
خالد رێكانی: ئه‌ز خالد سه‌لیم ئه‌مین رێكانی ل سالا 1970ێ‌ ل ده‌ڤه‌را نێروه‌ و رێكان ژ خێزانه‌كا دیندار و هه‌ژار و كوردپه‌روه‌ر ژدایكبوویمه‌، قوتابیێ‌ دكتورایێ‌ مه‌ ب قانوونا گشتی، كوره‌ شه‌هیدم و نه‌ه شه‌هید من د بنه‌مالێ دا هه‌نه‌. ل چه‌ندین جهان وه‌كو به‌رپرسێ‌ بنگه‌هێ‌ ساخله‌میا من كار كریه‌.
ل سالا 2018-2019 بوویمه‌ هاریكارێ‌ رێڤه‌به‌رێ‌ نه‌خۆشخانا ئازادی بۆ كارۆبارێن كارمه‌ندێن ساخله‌می و هه‌تا نوكه‌ یێ‌ به‌رده‌وامم، د شه‌رێ‌ ئازادیا عیراقێ‌ دا ئه‌ندامێ‌ ژۆرا ساخله‌میێ‌ بۆ كاروبارێن پێشمه‌رگه‌یێن قاره‌مان بووم.
د گونگرێ‌ مه‌زوپوتامیادا ب چاڤدێریا سه‌رۆك بارزانی رۆله‌كێ‌ به‌رچاڤ من هه‌بوو، د ریفراندوما كوردستانێ‌ دا، سه‌رپه‌رشتێ‌ تیمێن گه‌روك بووم بۆ چاڤدێریا بانگه‌شێ‌ و ئه‌نجامدانا هه‌لبژارتنا، د شه‌رێ‌ داعش دا من رۆله‌كێ‌ به‌رچاڤ هه‌بوویه‌ وه‌ك نۆشداره‌كێ‌ خۆبه‌خش د گه‌ل تیمێن پێشمه‌رگێن قاره‌مان، د گه‌ل رێكخراوێن بیانی پشكدار بوویمه‌ د كونفرانس و وورك شوپان دا، ژلایێ‌ رێكخراوێن وه‌لاتێن (ئیمارات، ئیتالیا، بریتانیا، ئیمارات) ڤه‌ هاتیمه‌ خه‌لاتكرن، نوكه‌ ژی كاندیدێ‌ ژماره‌ (27)م یێ‌ پارتی دیموكراتی كوردستان بۆ هه‌لبژارتنێن پێشوه‌ختێن جڤاتا نوونه‌رێن عیراقێ‌ ل سنورێ‌ بازنه‌یا دهۆك – ئامێدی.

ئه‌ڤرۆ: مه‌ره‌م ژ چونا به‌غدا چیه‌؟
د. خالد رێكانی: د قووناغێن بوری دا ب چه‌ندین رێكا من خزمه‌تا خه‌لكێ‌ مه‌ یێ‌ خوشتڤی كریه‌ ل ده‌ڤه‌رێن جودا من به‌رپرسیاره‌تیا چه‌ندین كارا وه‌رگرتیه‌ و سوپاس بۆ خودێ‌ من شیایه‌ ب باشترین شێوه‌ ئه‌ركێ‌ خوه‌ جێ به‌جێ‌ بكه‌م، د قووناغێن داهاتی دا ل دووڤ بسپۆریا من د قانوونێ‌ دا ب رێكێن دستووری و قانوونی داخوازا مافێن ره‌وایێن هه‌رێما كوردستانێ‌ بكه‌م ل جڤاتا نوونه‌رێن عیراقێ‌، چونكو جڤاتا نوونه‌ران جهێ‌ ده‌رخستنا قانوونایه‌، هه‌روه‌سا من زێده‌تر ژ 30 سالێن خزمه‌تێ‌ د كه‌رتێ‌ ساخله‌میێ‌ دا هه‌نه‌ و باش دزانم چ دادیه‌ك به‌رامبه‌ر مافێن هه‌رێما كوردستانێ‌ دهێته‌ كرن ژ رێژا هه‌رێمێ‌ ژ ده‌رمان و پێدڤیێن نۆشداری و هه‌تا نوكه‌ نیڤا مافێن مه‌ ل دووڤ دستووری ناهێنه‌ ره‌وانه‌كرن، دێ‌ هه‌موو بزاڤان كه‌م ب رێكێن قانوونی مافێن ملله‌تێ‌ مه‌ ب ده‌ستڤه‌ بینم.

ئه‌ڤرۆ: به‌رنامێ ته‌ چیه‌ ئه‌گه‌ر هات و خه‌لكی باوه‌ری دا ته‌؟
د. خالد رێكانی: د به‌رنامه‌یێ‌ من دایه‌ ل گور بسپۆریا خوه‌ دێ‌ كار ل سه‌ر وان خالێن دستووری كه‌م یێن هه‌تا نوكه‌ نه‌هاتینه‌ جێ به‌جێكرن و ل دووڤ دستووری به‌هرا هه‌رێما كوردستانێ‌ ناهێته‌ ره‌وانه‌كرن، هه‌تا نوكه‌ حوكمه‌تا عیراقێ‌ پێگیر نه‌بوویه‌ ب وان قانوونا یێن مافێن ملله‌تێ‌ كورد تێدا هاتینه‌ دیاركرن، هه‌روه‌سا ل دووڤ به‌رنامه‌یێن پارتی دێ‌ گرنگیێ‌ ب وان خالا ده‌م ئه‌وێن د به‌رژوه‌ندیا ملله‌تێ‌ كورد دا، چونكو هه‌تا نوكه‌ پارتی هه‌لویستێ‌ وێ‌ یێ‌ كو دیاره‌ هه‌رده‌م گرنگی دایه‌ ب خوشگوزه‌رانیا خه‌لكی و چ جارا ده‌ست ژ وان رێكا به‌رنه‌دایه‌ و به‌رناده‌ت ژی هه‌تا ب هه‌می مافێن خو دگه‌هین. ژ ده‌ستپێكا دامه‌زراندنا پارتی دیموكراتی كوردستان ژلایێ‌ بارزانیێ‌ نه‌مر ڤه‌ گرنگی دا ب ده‌ست ڤه‌ ئینانا مافێن گه‌لی كورد، و هه‌تا نوكه‌ ژی پارتی ب سه‌رۆكاتیا سه‌رۆك بارزانی درێژه‌ پێده‌رێ‌ رێباز و هزرێن بارزانیێ‌ نه‌مره‌ و چ جارا ده‌ستا ژ وان رێكا به‌رناده‌ت و دێ‌ یا به‌رده‌وام بیت ل سه‌ر داخازی و بده‌ستڤه‌ ئینانا مافێن ملله‌تێ‌ كورد.

ئه‌ڤرۆ: چه‌ند یا گرنگه‌ ئه‌ڤرۆ بچینه‌ به‌غدا ؟
د. خالد رێكانی: ئه‌م وه‌ك به‌شه‌ك ژ عێراقێ‌ پێدڤیه‌ ل گور هژمارا ده‌نگده‌رێن خوه‌ مه‌ نوونه‌رێن خوه‌ ل جڤاتا نوونه‌ران هه‌بن، چونكو جڤاتا نوونه‌ران جهێ‌ ده‌رخستنا قانوونایه‌ و ئه‌و قانوونێن ژ جڤاتا نوونه‌ران ده‌ردكه‌ڤن راسته‌وخۆ گرێدای ژیانا رۆژانه‌ یا هه‌موو خه‌لكێ‌ عیراقێ‌ یه‌. ب هه‌موو رێكا عیراقێ‌ دڤێت مافێن ملله‌تێ‌ كورد ب گوره‌ی دستووری ره‌وانه‌ نه‌كه‌ن، ئه‌گه‌ر نمومه‌نه‌كێ‌ بینن ل گور سه‌ربورا من زێده‌تر ژ سیهـ سالایه‌ د ناڤ كه‌رتێ‌ ساخله‌میێ‌ دا كاردكه‌م ل ده‌ڤه‌رێن جودا و د قووناغێن جودا دا دزانم چ كێماسی دكه‌رتێ‌ ساخله‌میێ‌ دا هه‌نه‌ و هه‌تا نوكه‌ ل گور دستووری عیراق كێمتر ژ 50% یا به‌هرا هه‌رێمێ‌ ژ ده‌رمان و پێدڤیێن نۆشداری بۆ هه‌رێما كوردستانێ‌ ره‌وانه‌ دكه‌ت و یێن دی هه‌رێما كوردستانێ‌ ب رێكا رێكخراوێن بیانی و حكومه‌تا هه‌رێما كوردستانێ‌ دابین دكه‌ت، پێدڤیه‌ بهێز بچینه‌ به‌غدا و ڤان مافا ب رێكێن یاسایی بو هه‌رێما كوردستانێ‌ ڤه‌گه‌رینن.

ئه‌ڤرۆ: ئه‌و چ تشته‌ ل ده‌ڤ پارتی هه‌ی خه‌لك باوه‌ریێ‌ دده‌تێ‌ ؟
د. خالد رێكانی: ده‌مێ‌ كه‌سه‌ك هه‌بیت هه‌موو ژیانا خوه‌ بده‌ته‌ خزمه‌تكرنا مرۆڤی یا بزه‌حمه‌ته‌ مرۆڤ ئینكارا خزمه‌تێن وی بكه‌ت، ب درێژیا ژیێ‌ خوه‌ پارتی گرنگی دایه‌ خزمه‌تا خه‌لكی و د چ قووناغا دا خه‌لكێ‌ خوه‌ نه‌هێلایه‌ ب تنێ‌، پارتی بوویه‌ داخاوازا وێ‌ چه‌ندێ‌ كری و عیراق نه‌چار كری دانپێدانێ‌ ب مافێن كوردا بكه‌ت، پارتی بوو ئاڤه‌دانكه‌را هه‌رێما كوردستانێ‌ و حوكمه‌تا كوردی و په‌له‌مانێ‌ خوه‌ هه‌بیت، پارتی بۆ ئه‌فسانه‌یا مه‌زنترین رێكخراوا تیرورستی یا داعش شكاندی، پارتی بوویه‌ ریفراندوم ئه‌نجام دایی و بۆ هه‌موو جیهانێ‌ دیار كری كو ملله‌تێ‌ كورد دڤێت وه‌لاتێ‌ خوه‌ هه‌بیت، پارتی ئه‌گه‌رێ‌ هه‌بوون و مانا هه‌رێما كوردستانێ‌ یه‌، ئه‌ڤ ئارامی و پێشكه‌فتنا ئه‌ڤرۆ ل هه‌رێما كوردستانێ‌ رۆژ ب رۆژ زێده‌تر لێ‌ بهێت و چ دوژمن زیانێ‌ نه‌گه‌هیننێ‌، ده‌مێ‌ خه‌لك ڤان هه‌موو تشتا دبینن بێ‌ دودلی دێ‌ ده‌نگ ب پارتی ده‌ن و قوناغ قوناغ دێ‌ پێگه‌هـ و كورسیێن پارتی زێده‌تر لێ‌ هێن.

ئه‌ڤرۆ: پێشبینیێن ته‌ بۆ عیراقا داهاتی چنه‌؟
د. خالد رێكانی: ژ ده‌ستپێكا دروستبوونا عیراقا نوو به‌رده‌وام حوكمه‌تێن وێ‌ گوهۆڕین تێدا دیارن و نوكه‌ ناڤمالا شیعی ژی وه‌ك جاران نه‌مایه‌ و بوویه‌ چه‌ندلا و هه‌ر لایه‌ك خوه‌ ب خودان ددانیت و داخوازیێن مه‌زن دكه‌ن د حوكمه‌تێن نوو دا، عیراق یا به‌ر ب گوهۆڕینێن نوو دچیت ره‌نگه‌ ل داهاتی هنده‌ك لایه‌نێن دی ده‌ربكه‌ڤن، له‌ورا پێدڤیه‌ ئه‌م وه‌ك پارتێن كوردی خوه‌ بۆ قووناغێن داهاتی ئاماده‌ بكه‌ین، ب چ ره‌نگا ده‌سبه‌رداری مافێن خوه‌ یێن قانوونی و دارایی نه‌بین، چونكو هه‌موو حوكمه‌تێن ل دووڤ ئێك یێن عیراقێ‌ ئێك هزر دكه‌ن كا چه‌وا دێ‌ زیانێ‌ ب هه‌رێما كوردستانێ‌ گه‌هینن و چاڤ ب پێشكه‌فتنێن هه‌رێما كوردستانێ‌ نا رابن و ئه‌گه‌ر بشێن دێ‌ هه‌موو مافێن مه‌ بن پێ‌ كه‌ن، لێ‌ ب هه‌بوونا پارتی و سه‌رۆك بارزانی چ جارا نه‌شێن بگه‌هنه‌ ئه‌وا ئه‌و هزر دكه‌ن و هه‌رێما كوردستانێ‌ دێ‌ به‌رده‌وام بیت ل سه‌ر پێشكه‌فتنێن خوه‌ یێن به‌رده‌وام.

ئه‌ڤرۆ: باشترین چاره‌سه‌ری بۆ ره‌وشا نها یا عیراقێ‌ هه‌ی چیه‌؟
د. خالد رێكانی: چاره‌سه‌ری بۆ هه‌موو كێشه‌یێن نوكه‌ ل عیراقێ‌ هه‌ین دزڤرنه‌ ڤه‌ بۆ دستوورێ‌ عیرقێ‌، چونكو دستوور ژ لایێ‌ هه‌موو پێكهاتێن عیراقێ‌ ڤه‌ هاتیه‌ دانان و مافێن هه‌موو لایه‌ن و پێكهاته‌یان هاتیه‌ دیاركرن و خه‌لكی ب خوه‌ ژی راسته‌وخۆ بڕیار ل سه‌ر دستووری دایه‌، بۆ ڤێ چه‌ندێ‌ ژی پێدڤیه‌ هه‌موو لایه‌نێن سیاسی پێداچوونێ‌ د خوه‌ دا بكه‌ن پێگریێ‌ ب دستووری بكه‌ن بۆ گه‌هشتنا ڤێ چه‌ندێ‌ ژی پێدڤیه‌ جڤاكێ‌ نێڤده‌وله‌تی و رێكخراوێن بیانی ژی پشته‌ڤان بن، هه‌تا بشێن كێشه‌بێن عیراقێ‌ هه‌ر چنه‌بیت كێم بكه‌ن، ئه‌گه‌ر نه‌هێه‌ن چاره‌سه‌ركرن به‌رهه‌م دێ‌ ئه‌ڤه‌ بیت یا نوكه‌ ل عیراقێ‌ دیار رۆژ ب رۆژ خه‌لك تووشی نه‌خوشیێن دژوارتر یێن سیاسی و ئه‌منی و دارایی دبیت، و هه‌ر خه‌لك زه‌ره‌رمه‌ندێ‌ سه‌ره‌كی یه‌ دده‌ست گه‌نده‌لكاران دا.

ئه‌ڤرۆ: ل دووماهیێ‌ ته‌دڤێت چ بێژی؟
د. خالد رێكانی: ل دووماهیی داخوازێ‌ ژ هه‌موو خه‌لكێ‌ خوه‌ یێ‌ خوه‌شتڤی دكه‌م ل رۆژا ده‌نگدانێ‌ هه‌موو پێكڤه‌ بچنه‌ سه‌ر سندوقێن ده‌نگدانێ‌، چونكو وه‌ك سه‌رۆك بارزانی گۆتی ئه‌ڤ هه‌لبژارتنه‌ د چاره‌نڤیس سازن، گوهداریا وان لایه‌نا نه‌كه‌ن یێن دبێژن بچن یان نه‌ چن چ گوهۆڕین نینن، گرنگه‌ هه‌موو خه‌لكێ‌ مه‌ بچیته‌ ده‌نگ دانێ‌ و ده‌نگ ب كاندیدێن پارتی دیموكراتی كوردستان بده‌ن، چونكو هندی پارتی یا بهێز بیت لایه‌نێ‌ كوردی دێ‌ یێ‌ بهێز بیت ویێ‌ پاراستی بیت، سوزێ‌ دده‌م ل دووڤ گۆتنا سه‌رۆك بارزانی بم، ده‌ما كه‌رم كری و گۆتیه‌ مه‌، هه‌رنه‌ به‌غدا كێم باخڤن و گه‌له‌ك كار بكه‌ن.