ئه‌ڤرۆ،
كورێ پارێزگه‌ها دهۆكێ و یاریزانێ هه‌لبژارتیێ ئیراقێ بۆ یاریێن گوره‌پانێ ل سه‌ر ئاستێ خودان پێدڤیێن تایبه‌ت كوڤان حه‌سه‌ن ئه‌گه‌رێن ژ ده‌ستدانا ناسناڤێ خوه یێ جیهانی دیاركر پشتی ل رێزا شه‌شێ هاتی بۆ هاڤێتنا رومی ب 37م و 19سم ژ چارچووڤێ قاره‌مانیا پارائۆلۆمپیادا تۆكیۆ 2020 ئه‌وا ل به‌ری حه‌فتیه‌كێ وه‌لاتێ چاپانێ هاتبوو كرن.
د دیداره‌كێدا كۆڤان حه‌سه‌ن ئه‌گه‌رێن ژ ده‌ستدانا ناسناڤێ خوه بۆ رۆژناما ئه‌ڤرۆ دیاركر كو سه‌رباری گه‌شبینیا وی بۆ ب ده‌ستڤه ئینانا ئێك ژ میدالیێن ئێكێ لێ ئه‌و ئاسته‌نگێن كه‌فتینه د رێكا وی دا بوونه رێگر و نه‌شیا بگه‌هیته ئارمانجا خوه كو ناسناڤێ پارائۆلۆمپیادا به‌رازیل 2016ێ پارێزت و گوت: ئه‌گه‌رێن نه پاراستنا میدالیا زێری ڤه‌دگه‌ریێت بۆ تۆشبوونا من ب ڤایروسێ كورونایێ د ده‌مه‌كێ نه گۆنجایی دا كو به‌رهه‌ڤیێن من بۆ قاره‌مانیا جیهانی د هاتنه كرن و هه‌روه‌سان ژ ده‌ستدانا بابێ خوه ئه‌وێ چوویه به‌ردلۆڤانیا خودێ كو كارتیكرنه‌كا مه‌زن ل سه‌ر ئاستێ من كر سه‌رباری من هه‌موو بزاڤكرن باشترین شێوه به‌رهه‌ڤبم و پشكداری كه‌مپێن نافخۆ و ده‌رڤه‌یی و وه‌لاتی ژی بووم لێ ئه‌ڤان هه‌ردو خالان ل سه‌ر جه‌سته و ده‌رونێ من زالبوون.
هه‌روه‌سا ناڤهاتی گوت: ژبه‌ركو یاریزانێ كورد یێ ئێكانه دناڤ پێكهاتیێ هه‌لبژارتیێ ئیراقێ دا بووم وه‌كو نوونه‌رێ كوردستانێ یێ رژدبووم پشكداریا پارائۆلۆمپیادا تۆكیۆ بكه‌م و ده‌ستكه‌فتێن خوه زێده بكه‌م پشتی زێده‌تری 120 میدالیێن ره‌نگین د قاره‌مانیێن نێڤده‌وله‌تی، ئه‌ره‌بی و جیهانی دا بده‌ستڤه ئینایی ژوانا ده‌ستكه‌فتا مه‌زن ل ئۆلۆمپیادا ریۆ دی جانیرۆ یا 2016ێ به‌رازیل كو شیابووم میدالیا زێری بۆ هاڤێتنا رۆمی ب ده‌ستڤه‌بینم ب دووراتیا 41م و 82سم رۆمێ خوه پاڤێژم و یێ ئێكێ بهێم و هه‌روه‌سان میدالیێن زێری و زیڤی د قاره‌مانیێن نێڤده‌وله‌تی ل لندن، چیك، قه‌ته‌ر و ئیماراتێ د ناڤ ده‌ستكه‌فتێن من یێن جیهانی دانه كۆمكرینه ئه‌ڤچه‌نده ژی دیرووكه بۆ من كه‌سایه‌تی و كوردستانێ ژی.
نيشاندان