سه‌لمان شێخ مه‌می
شه‌كر ژ لێڤێن ته‌یه
یان لێڤێن ته شه‌كرن
كابێژه من…؟
ته جوانی ژ گولا گرتیه
یان خودێ
گول ژ جوانیا ته چێكرن
گه‌ر شرینی ژ لێڤێن ته نه‌با
دا چ تام ل شه‌كرێ هه‌بیت
گه‌ر جوانی ل دێمێ ته نه‌با
دا چ جوانی ل گولا هه‌بیت
تو دزانی
تو ب شرینی و جوانیا خوه
چاوا دلێ من، دسوژی
دێنێ ته ژ هه‌میا دچیتن
سحرا ب جوانیا خو ل من دكه
كابێژه من
دێ سه‌را چ من كوژی
7/7 /2021
به‌هزاد به‌هرام
ئه‌زم باز ئه‌زم ئه‌لهۆ ب ئێك و ئێك و ته‌نهو
به‌رز و بلند و لێهو ب شه‌ر و جه‌نگ و ژێهۆ
ئه‌زم رۆژ ئه‌زم ماهۆ ب گه‌ش و گه‌رم و هاهۆ
ب سه و فێنك و باهۆ ب شه‌وق و رۆن و شاهۆ
ئه‌زم تاڤ ئه‌زم ساهی ب گول و كه‌ن و شاهی
وار و ده‌شت و ئاڤاهی هه‌م باغ و شریناهی
ئه‌زم كورد ئه‌زم كه‌هی ب نان و گه‌نم و جه‌هی
ب باران و به‌فر و له‌هی ب هێز و سه‌هم و گه‌هی
ئه‌زم زه‌ر ئه‌ز سپه‌هی ب سۆر و ب كه‌سكاهی
خوینا شه‌هیدان شه‌هی ب نیشان ل سه‌ر مه‌هی
ئه‌زم پارت ئه‌ز سبه‌هی خه‌باتا ئه‌ڤرۆ و دوهی
پڕ شاگرد و فێرگه‌هی ژبۆی گه‌ل و ئێلاهی
زاخۆ،عه‌لی حاجی:
ئامینا عه‌بدولقادر، شێوه‌كاره‌كا كچه ل باژێرێ دهوكێ، د دیداره‌كێ دا بۆ رۆژناما ئه‌ڤرو دیاركر كو پێشانگه‌هێن نه‌ته‌وی جوداهیا خوه ل گه‌ل پێشانگه‌هێن دی هه‌یه و ڤه‌كرنا پێشانگه‌ها وێ یا نه‌هێ تایبه‌تمه‌ندی و جوداهیا خوه ل گه‌ل پێشانگه‌هێن وێ یێ دی هه‌یه
زێده‌تر گۆت: ب هه‌لكه‌فتا 16ی ته‌باخێ، ئه‌ڤرۆ دێ نه‌هه‌مین پێشانگه‌ها خوه یا تایبه‌ت ڤه‌كه‌ت كو تێدا 16 وێنه هێنه نیشادان، ده‌ستنیشانكرنا 16 كه‌ڤالان د وێ پێشانگه‌هێ گرێدایه ب 16ی ته‌باخێ ڤه، ئه‌و بابه‌تێن هاتینه هه‌لبژارتن كو وێنه‌كێ تایبه‌ت ب سه‌رۆك بارزانی ڤه هاتیه چێكرن، دیسان پرانیا وێنێن دی ب ئێش و ئازار و سه‌ركه‌فتنێن ملله‌تێ كورد ڤه دگرێداینه، زێده‌باری وێ چه‌ندێ ژی مه هێزێن پێشمه‌رگه‌ی ژبیر نه‌كرینه و چه‌ند كه‌ڤاله‌ك دێ هێنه نیشادان و من هه‌ولدایه ژی هنده‌ك ژ كارێن خوه یێن هونه‌ری تێكه‌لی ڤێ پێشانگه‌ها تایبه‌ت بكه‌م، ئه‌ڤ پێشانگه‌هه ب پشته‌ڤانیا لقێ ئێكێ پارتی دیموكراتی كوردستان دێ هێته ڤه‌كرن و پێشانگه‌هێ تایبه‌تمه‌ندیه‌كا تایبه‌ت بۆ من هه‌یه ژبه‌ركو هه‌لكه‌فتێن نه‌ته‌وه‌ی ده‌رگه‌هه‌كێ باشه مرۆڤ شیانێن خوه زێده‌تر نیشا بده‌ت و خه‌لكه‌كێ زێده‌تر ژی پشكداری پێشانگه‌هێ دبیت.
دهۆك، له‌زگین جوقی:
كچه‌كا كوردا ئێزدی كو به‌ری نوكه د به‌ریكانا شاهجوانا عیراقی دا پلا سێیێ وه‌رگرت بوو، نوكه خزمه‌تا تووشبوویێن كۆرۆنایێ ل نه‌خۆشخانا كۆرۆنایێ ل پارێزگه‌ها دهۆكێ دكه‌ت.
گولیستان گرۆ، ئه‌و كچه بۆ ئه‌ڤرۆ گۆت: نوكه وه‌كو كارمه‌ند ل كه‌رتێ ساخله‌میێ دناڤ نه‌خۆشخانا كۆرۆنایێ دا خزمه‌تا تووشبوویان دكه‌م، و باوه‌ری ب خوه بوون هه‌موو تشته ئه‌ز ب خوه په‌رستارم من پشكداری د به‌ریكانا شاهجوانا عیراقی دا كربوو بوومه یاسێیێ ل سه‌ر ئاستێ عیراقێ و شاهجوانا ئێكی ل سه‌ر ئاستێ هه‌رێما كوردستانێ و من دڤیت دناڤ نه‌خۆشخانێ دا خزمه‌تا ملله‌تێ خوه بكه‌م و دخوازم خه‌لكێ مه هه‌موو ڤاكسینێ وه‌ربگرن داكو ژ ڤێ نه‌خۆشیێ بهێنه پاراستن، هه‌روه‌سا د پرۆژێ من دایه پشته‌ڤانیا كچ و ژن وزارۆكیێن رزگاربوویێن ده‌ستێ تیرۆرستێن داعش بكه‌م.
دهۆك، زنار تۆڤی:
ده‌رهێنه‌ر محه‌مه‌د ژۆری، د دیداره‌كێ دا بۆ رۆژناما ئه‌ڤرۆ گۆت: پشتی ئه‌م ل گه‌ل سترانبێژێ تورك مسته‌فا جه‌جه‌لی روونشتین و گۆهداریا ده‌نگێ ژینێ ئه‌تروشی كری، وی پێ باشبوو سترانه‌كا دویت ل گه‌ل ژینێ بێژیت چنكو ده‌نگێ وێ گه‌له‌ك ب دلێ وی بوو، له‌وما ژینێ ژی سترانه‌كا دویت ب زمانێ توركی ل گه‌ل مسته‌فای گۆتیه و ئه‌ڤه ئێكه‌م سترانا دویته ژینێ دبێژیت، په‌یڤ و ئاوازێن وێ سترانێ یێن هونه‌رمه‌ندێ تورك بیلال سۆنسێزینه، كارێ ده‌رهێنانا ڤێ كلیپێ محه‌مه‌دی ژۆری پێ رابوویه ل ئیسته‌مبۆلێ هاتیه وێنه‌كرن.
ناڤهاتی گۆت: به‌رهه‌مئینانا كلیپێ ژ لایێ شارك سته‌یج ڤه بۆ هاتییه كرن، زوون سكیۆرتی سپۆنسه‌ریا ڤێ كلیپێ كریه ل دووماهیا ڤێ هه‌یڤێ دێ به‌لاڤ بیت، پشتی ڤێ كلیپێ مسته‌فا جه‌جه‌لی ژی دێ سترانه‌كێ ب زمانێ كوردی ب شێوێ دویت ل گه‌ل ژینێ بێژیت.
دهۆك، هه‌رهین محه‌مه‌د:
ده‌رهێنه‌ر(هه‌ژار مه‌جید) د دیداره‌كێ دا بۆ رۆژناما ئه‌ڤرۆ دیاركر كو نوكه ئه‌و مژوولی چێكرنا دو كلیپایه، یا ئێكێ بۆ سترانبێژ رێكێش سه‌یرانی، یا دویێ بۆ سترانبێژ دلشاد زاخۆیی و ل به‌ره ل نێزیك بهێنه به‌لاڤكرن.
هه‌ژاری گۆت: چ خۆزی دلێ من دا نین كو من دڤێت بۆ سترانبێژه‌كی كلپه‌كێ چێكه‌م، چونكو من ل گه‌ل هونه‌رمه‌نده‌كێ گه‌له‌ك به‌رنیاس كاركریه، ئه‌و ژی هونه‌رمه‌ند ئیبراهیم تاتلیس، له‌ورا ئێدی من چ خۆزی نین كو بێژم خۆزی من ل گه‌ل فلان هونه‌رمه‌ندی كاركرب، بۆ زانین من بۆ گه‌له‌ك سترانبێژان ل زاخۆ كاركریه، ژوانا (عه‌بدولقه‌هار زاخۆیی و برایێ وی ئیسلام و حاجی زاخۆیی و گه‌له‌كێن دی، و ئه‌ز نه یێ به‌رهه‌ڤم كاره‌كی بكه‌م هه‌تا خوه بینمه پێش، یان بۆ به‌رژه‌وه‌ندێن خوه یێن تایبه‌ت و هه‌موو ده‌مان دبێژم ئه‌ڤ تشتێ ل ده‌ف من هه‌ی راده‌یه‌كه بۆ من و هێشتا بۆ من زوویه كاره‌كێ سینه‌مایی، یان كورته فلمه‌كی بكه‌م و، هه‌روه‌سا نه یێ به‌رهه‌ڤم ریكلامێ بكه‌م.
ئه‌ڤرۆ:
سه‌رۆك بارزانی د دیداره‌كێ دا ل گه‌ل (فالح فه‌یاز) سه‌رۆكێ ده‌سته‌یا حه‌شدا شه‌عبی ره‌وشا ئیراقێ و ده‌ڤه‌رێ و دووماهی پێشهاتێن ئه‌منی هاتنه به‌حسكرن.
هه‌ر د وێ دیدارێ دا دانوستاندن ل سه‌ر ره‌وشا سیاسی یا ئیراقێ و ده‌ڤه‌رێ و دووماهی پێشهاتێن ئه‌منی و هه‌روه‌سا گه‌ف و لڤینێن تیرۆرستێن داعشێ ژی هاتنه كرن.
د دیدارا سه‌رۆك بارزانی و سه‌رۆكێ ده‌سته‌یا حه‌شدا شه‌عبی و ل پێناڤی پاراستنا ته‌ناهیێ و سه‌قامگیریێ، دووپاتی ل هه‌ماهه‌نگیێ د ناڤبه‌را هێزێن پێشمه‌رگێ كوردستانێ و هێزێن ئیراقێ هاته كرن.
ئه‌ڤرۆ:
ل دووڤ رێككه‌فتنا د ناڤبه‌را هه‌رێما كوردستانێ و حوكمه‌تا ئیراقێ داه اتیه ئیمزاكرن، هنارتنا 200 ملیار دیناران هه‌یڤانه بۆ هه‌رێما كوردستانێ هه‌تا بجهئینانا قانوونا بودجا گشتی یا ئیراقێ بۆ سالا 2021، دێ به‌رده‌وام بیت، بریارده‌رێ لژنا دارایی ل جڤاتا نوونه‌رێن ئیراقێ ژی رادگه‌هینیت، مه پێزانین یێن هه‌ین ل ده‌مه‌كێ نێزیك مادێ 11 ژ قانوونا بودجا گشتی یا ئیراقێ دێ هێته بجهئینان.
ئه‌حمه‌د سه‌فار، بریارده‌رێ لژنا دارایی ل جڤاتا نوونه‌رێن ئیراقێ ژ فراكسیۆنا پارتی دیموكراتی كوردستان گۆت” هنارتنا 200 ملیار دیناران هه‌یڤانه ژ لایێ به‌غدا ڤه ب گۆره‌ی رێككه‌فتنا د ناڤبه‌را هه‌ردو سه‌رۆك وه‌زیرێن هه‌رێما كوردستانێ و ئیراقێ یه، ئه‌و رێككه‌فتن هه‌تا وی ده‌می دێ هێته بجهئینان، كو قانوونا بودجا گشتی یا ئیراقێ بۆ سالا 2021 دكه‌ڤیته دوارێ بجهئینانێ دا، ب تایبه‌تی مادا (11) یا وێ قانوونێ”.
سه‌فاری گۆت ژی” د نوكه دا كار ل سه‌ر هوورده‌كاریان دهێته كرن بۆ بجهئینانا مادێ (11) ژ قانوونا بودجا گشتی یا ئیراقێ بۆ سالا 2021، كو یا تایبه‌ته ب هه‌رێما كوردستانێ ڤه، ئه‌گه‌ر بهێت و ئه‌و ماده هاته بجهئینان، دێ شایستێن دارایی یێن هه‌رێما كوردستانێ ب گۆره‌ی رێككه‌فتنێ و قانوونا بودجه‌ی هێته هنارتن، هه‌كه پشكا هه‌رێما كوردستانێ زێده‌تر ژوان 200 ملیارێن به‌غدا هه‌یڤانه دهنێریت، دێ هێته زێده‌كرن، هه‌كه كێمتر بیت ژی، دێ ب گۆره‌ی مافێ هه‌رێما كوردستانێ پاره‌ی هنێرن”.
ئاماژه‌كر” ئه‌و كێشێن نوكه د ناڤبه‌را هه‌رێمێ و به‌غدا هه‌ین ل دۆر داهاتێن نه په‌ترۆلی نه، ئانكو هیچ كێشه‌ك ل سه‌ر داهاتێ په‌ترۆلێ نینه، ل دووڤ پێزانینێن من بزاڤه‌كا مه‌زن یا هه‌ی كو د ده‌مه‌كێ نێزیك دا هه‌ردولا بگه‌هنه ئه‌نجامه‌كی و ئه‌و مادا قانوونا بودجه‌ی كو یا تایبه‌ته ب هه‌رێما كوردستانێ ڤه، بهێته بجهئینان”.
ئه‌ڤرۆ:
به‌ربژارێ هژمار 30 یێ پارتی دیموكراتی كوردستان ل بازنێ ئێك یێ كه‌ركووكێ بۆ هه‌لبژارتنێن جڤاتا نوونه‌رێن ئیراقێ، شاخه‌وان عه‌بدوللا، ئاشكراكر، ل ناڤ كه‌ركووكێ دێ ده‌ست ب هه‌وا هه‌لبژارتنان كه‌ین و دێ ل ناڤ خه‌لكێ خوه بین، بۆ وێ مه‌ره‌مێ ژی، وه‌كو ده‌ستپێك دێ دو باره‌گایان ل ناڤ كه‌ركووكێ ڤه‌كه‌ین.
شاخه‌وان عه‌بدوللا زێده‌تر گۆت” ئه‌ز وه‌كو به‌ربژارێ پارتی دیموكراتی كوردستانێ دێ زڤرم بۆ كه‌ركووكَ و ل وێرێ دێ ده‌ست ب هه‌وا هه‌لبژارتنان كه‌م و د نوكه دا یێ به‌رهه‌ڤیان بۆ زڤرینا خوه دكه‌م و ل ده‌ستپێكێ بۆ هه‌وا هه‌لبژارتنان ل ناڤ كه‌ركووكێ دێ دو باره‌گایان ڤه‌كه‌ین و دێ مه باره‌گا ل ده‌رڤه‌ی باژێرێ كه‌ركووكێ ژی هه‌بیت بۆ وێ چه‌ندێ ل وێرێ ژی ده‌ست ب هه‌وا هه‌لبژارتنان بكه‌ین”.
وی به‌ربژارێ پارتی به‌حس ل وێ ئێكێ ژی كر” زڤرینا مه ل سه‌ر داخوازا سه‌ركردایه‌تیا پارتی دیموكراتی كوردستانه و جارێ ئه‌م دێ زڤرین و حزب ژی یا د دانوستاندنان داب ۆ زڤرینێ، به‌لێ هه‌لبژارتن یێن نێزیك بووین، له‌وما ل ده‌ستپێكێ ئه‌م دێ زڤرین”.
گۆت ژی” ئه‌و باره‌گایێن دێ هێنه ڤه‌كرن بۆ به‌ربژار و كادر و ئه‌ندامێن پارتی یه و ئه‌م دخوازین ل كه‌ركووكێ هه‌وا هه‌لبژارتنان ئه‌نجام بده‌ین و ل ناڤ خه‌لكێ خوه بین و ل ده‌مه‌كێ گه‌له‌ك نێزیك ژی دا دێ ده‌ست ب زڤرینێ كه‌ین”.
ئه‌ڤرۆ:
ده‌زگه‌هێن راگه‌هاندنا جیهانێ دیار دكه‌ن كو د ره‌وشا نها دا پتر ژ ٧٠% ئاخا ئه‌فغانستانێ ژ ئالیێ رێكخراوا تالیبانێ ڤه هاتیه كۆنترۆل كرن و تالیبانێ دڤێت د ناڤ حه‌فتیه‌كێ دا پایته‌ختێ ئه‌فغانستانێ ژی كۆنترۆل بكه‌ت، هه‌روه‌سا پرانیا چه‌كێن پێشكه‌فتی یێن ئه‌مریكی كه‌فتینه ده‌ستێ تالیبانێ و ژ به‌ر هندێ ژی نها له‌شكرێ ئه‌فغانستانێ نه‌شێن شه‌رێ تالیبانێ بكه‌ن.
په‌یڤدارێ رێكخراوا تالیبانێ راگه‌هاند كو ئه‌و دشێن هه‌تا حه‌فتیه‌كا دی هه‌موو ئه‌فغانستانێ بكه‌نه ژێر كۆنترۆلا خوه و وان دڤێت حوكمه‌ته‌كا ئیسلامی ل ئه‌فغانستانێ راگه‌هینن و هه‌روه‌سا وان دڤێت په‌یوه‌ندیێن خوه ل گه‌ل ئه‌مریكا ژی باش بكه‌ن.
زه‌بیحوللا موجاهید په‌یڤدارێ تالیبانێ ئه‌و یه‌ك ژی دیار كر كو ئه‌مریكا گه‌هشته ڤێ باوه‌ریێ كو بێی تالیبانێ پرسێن ل ئه‌فغانستانێ ناهێنه چاره‌سه‌ر كرن و ژ به‌ر هندێ ژی وان ده‌ست ب قۆناغه‌كا نوو ل گه‌ل مه كرن و گۆت: (مه دڤێت حوكمه‌ته‌كا ئیسلامی ل ئه‌فغانستانێ ئاڤا بكه‌ین، بێگومان گه‌له‌ك تشت هه‌نه دڤێت بهێنه گوهۆرین لێ جارێ مه دڤێت هه‌موو ئاخا ئه‌فغانستانێ كۆنترۆل بكه‌ین).
ل ئالیێ دی ئه‌شره‌ف غه‌نی سه‌رۆك كۆمارێ ئه‌فغانستانێ راگه‌هاند كو ئه‌فغانستان تووشی كاره‌ساته‌كا گه‌له‌ك مه‌زن هاتیه، تالیبانێ دڤێت وه‌لاتێ مه ب ته‌مامی وێران بكه‌ت، مخابن وه‌لاتێن جیهانێ ل هه‌مبه‌ر ره‌وشا نها ل ئه‌فغانستانێ بێده‌نگن و گۆت: (داخواز ژ جڤاكێ نێڤده‌وله‌تی دكه‌م كو ل هه‌مبه‌ر ره‌وشا نها ل ئه‌فغانستانێ بێده‌نگ نه‌بن و هاریكاریا خه‌لك و ده‌وله‌تا ئه‌فغانستانێ بكه‌ن، چونكو هه‌كه ئه‌فغانستان بكه‌ڤیته ژێر كۆنترۆلا تالیبانێ ئه‌و یه‌ك دێ مه‌ترسیه‌كا خوه یا گه‌له‌ك مه‌زن بۆ هه‌موو جیهانێ هه‌بیت).
چاڤدێرێن سیاسی ژی دیار دكه‌ن كو تالیبانێ ده‌ست ب كاره‌ساتێن مه‌زن ل ئه‌فغانستانێ كریه و رۆژانه زۆرداریێ ل خه‌لكی دكه‌ن، ئه‌مریكا و جڤاكێ نێڤده‌وله‌تی ژی ل هه‌مبه‌ر ره‌وشا نها ل ئه‌فغانستانێ بێده‌نگن.
بۆریس جۆنسۆن سه‌رۆك وه‌زیرێن بریتانیا ژی راگه‌هاند كو ئه‌و ب چو ره‌نگه‌كێ ده‌ستێوه‌ردانێ د كاروبارێ ناڤخوه‌یی یێ ئه‌فغانستانێ دا ناكه‌ن و هێزێن سه‌ربازی ژی ره‌وانه‌ی وی وه‌لاتی ناكه‌ن و هه‌روه‌سا سه‌رۆكێ ئه‌مریكا جۆ بایدن ژی راگه‌هاند كو دڤێت له‌شكرێ ئه‌فغانستانێ شه‌ری بكه‌ت و وه‌لاتێ خوه ل هه‌مبه‌ر تالیبانێ بپارێزیت.
نيشاندان