دهۆك، شاكر ئه‌تروشی:
سترانبێژێ مللی ئیسماعیل عودیشۆ، كو ب (بابێ شێرۆی) یێ به‌رنیاسه، د دیداره‌كێ دا بۆ رۆژناما ئه‌ڤرۆ دیاركر كو نوكه ئه‌و دژیێ (74) سالیێ دا یه و ئه‌ڤه پتری شێست سالایه سترانێن فولكلۆری دبێژیت و گه‌له‌ك گه‌نجێن نوكه ل به‌ره ده‌ستێ وی فێری سترانگۆتنێ بووینه.
ئیسماعیل، گۆت: ئه‌ز هه‌موو جۆرێن سترانان ئه‌ڤینی و نه‌ته‌وی و سیاسی دبێژم، به‌ری من برایێ من (تۆما) سترانبێژ بوو، من گه‌له‌ك ستران ژوی وه‌رگرتینه، و ل شێست سالێن بۆری من ستران ل گه‌ل گه‌له‌ك سترانبێژان ژی گۆتینه، ژوانا سترانبێژا ناڤدارا عه‌ره‌ب (سه‌میرا ته‌وفیق) كو مه ئاهه‌نگه‌ك ل به‌سرا پێكڤه هه‌بوو، ل وی ده‌می ئه‌ز ب ناڤێ سترانبێژێن كورد دوێ ئاهه‌نگێ دا پشكدار بووم، یێن كورد ژی من ل گه‌ل پتریا وان گۆتینه، ژوانا (قه‌رپال، له‌زگین سه‌یدۆ، خدر فه‌قیر، حه‌سه‌ن عه‌لی خه‌نجه‌ر، سه‌عید گاباری، خه‌لیل باكۆزی، حسێن ئۆمه‌ری) و گه‌له‌كێن دی، و هه‌تا نوكه ئه‌ز یێ به‌رده‌وامم و سوپاس بۆ خودێ ره‌وشا منا ساخله‌میێ یا باشه و هه‌تا نوكه ژی هنده‌ك جاران دچمه دیوانان سترانان دبێژم، لێ نه وه‌كو به‌رێ یه، ئه‌و ژی ژبه‌ر ره‌وشا كۆرۆنایێ یه.
ئیسماعیل عودیشۆ یوخه‌نا، بابێ دو شه‌هیدانه، ل سه‌ر ده‌مێ رژێما ژنافچووی بۆ ده‌مێ سێ سالان هاتبوو زیندانكرن، ب گۆتنا وی، وی مامه‌لێن خوه بۆ وه‌رگرتنا مووچێ زیندانیێن سیاسی چێكرینه، لێ هه‌تا نوكه ناڤێ وی نه‌هاتیه و مووچه‌ی وه‌رناگریت.
نيشاندان