له‌زگین جوقی
وه‌كیلێ میرێ ئێزدیان راگه‌هاند، هه‌تا 500 ره‌ڤاندیێن ئێزدی هیشتا نه‌هاتینه رزگاركرن كو گه‌له‌ك ژ وان دناڤ خێزانێن داعش دا ل كه‌مپا (هولێ) لوه‌لاتی سووریێ ماینه نۆكه ژی خێزانێن داعش ژ وێ كه‌مپێ بۆ كه‌مپه‌كا ل باشوورێ مووسلێ دهێنه زڤراندن، خه‌لكێ مه یێ ئێزدی ب تایبه‌تی ژی خه‌لك شنگالێ، ژبه‌ر ڤی كاری، باوه‌ری ب حوكمه‌تا عێراقی نه‌مایه.
جه‌هوه‌ر عه‌لی به‌گ، وه‌كیلێ میرێ ئێزدیان بۆ كاروبارێن په‌ێوه‌ندیان گۆت” ئێزدی چاڤه‌رێ بوون كچ وژن وزارۆكێن ئێزدیان یێن د ناڤ كه‌مپا (هولێ) دا كو دبن زۆرداریا خێزانێن داعش دا نه، بهێنه رزگاركرن كو هه‌تا 500 كه‌سێن ره‌ڤاندیێن ئێزدی دناڤ خێزانێن داعش دا ل وێ كه‌مپێ ل وه‌لاتێ سووریێ هه‌نه، مخابن حوكمه‌تا عێراقی چ پێنگاڤ بۆ رزگاركرنا وان نه‌هاڤێتینه ول شوونا ره‌ڤاندیێن ئێزدی رزگار بكه‌ت، خێزانێن داعش ژ كه‌مپا (هولێ) بۆ كه‌مپا (جدعه) ل باشوورێ مووسلێ ڤه‌گوهاستن، ڤێ چه‌ندێ ژی ئێزدی گه‌له‌ك دلگران كرینه، چونكو هێشتا خه‌لكێ مه دبن زۆرداریا خێزانێن داعش دا ماینه ونه‌هاتینه رزگاركرن”.
جه‌هوه‌ری گۆت ژی”ئه‌م ب توندی زڤرینا خێزانێن داعش ژ سووریێ بۆ مووسلێ ره‌ت دكه‌ین و شه‌رمه‌زار دكه‌ین ونابیت داعش وپاشیمایێن داعش بهێنه زڤراندن ونه‌هێنه دادگه‌هكرن، ژ به‌ر كو هێشتا هزاره‌ها ره‌ڤاندیێن ئێزدی دناڤ خێزانێن داعش دا ماینه ونه‌هاتینه رزگاركرن”.
ژلایێ خوه‌ڤه، بیریڤان سه‌لیم شه‌مۆ، جێگرا سه‌رۆكێ جڤاتا پارێزگه‌ها دهۆكێ دیاركر” حوكمه‌تا عێراقی خوه ب به‌رپرس نابینیت بۆ پاراستنا ژیانا خه‌لكێ شنگالێ ول شوونا حوكمه‌تا عێراقی رێگریێ ل زڤرینا خێزانێن داعش بكه‌ت، مخابن پشته‌ڤانیێ ل زڤرینا وان دكه‌ت و ئه‌ڤه مه‌ترسیێ ل سه‌ر خه‌لكێ شنگالێ دروست دكه‌ت”.
جێگرا سه‌رۆكێ جڤاتا پارێزگه‌ها دهۆكێ راگه‌زێده‌تر گۆت” ئێزدی دو دل بووینه بۆ زڤرینا شنگالێ ژبه‌ر زڤرینا خێزانێن داعش، چونكه خه‌لكێ مه یێ ئێزدی گه‌له‌ك سته‌م وزۆرداری یێن ل سه‌ر ده‌ستێن تیرۆرستێن داعشێ دیتین وزڤرینا خێزانێن داعش دێ بیته ئه‌گه‌ر دووباره داعش كارێن خوه یێن تیرۆرستێ ئه‌نجام بده‌ت، چونكه هیشتا مه‌ترسیا داعشێ یا به‌رده‌وامه “.
خویاكر” زڤرینا خێزانێن داعش هانده‌ره‌كه كو جاره‌كا دی تیرۆرستێن داعشێ ده‌ست بكارێن خوه یێن هوڤانه بكه‌ن وئه‌ڤه مه‌ترسیه‌كا مه‌زن ل سه‌ر خه‌لكێ شنگالێ دروست دكه‌ت، ئه‌ز د وێ باوه‌ریێ دامه ژی ژبه‌ر زڤرینا خێزانێن داعش، ئاوارێن شنگالێ نه‌شێن ڤه‌گه‌رنه سه‌ر جهێن خوه”.
ئاشكه‌را كر”دگه‌ل زڤرینا خێزانێن داعش جاره‌كادی برینێن خه‌لكێ شنگالێ نوو بوونه ڤه وترس دناڤ خه‌لكێ مه دا چێبوویه”.
نيشاندان