ئه‌ڤرۆ، هه‌هین محه‌مه‌د:

سترانبێژێ‌ مللی دلۆڤان گۆلی، د دیداره‌كێ‌ دا بۆ رۆژناما ئه‌ڤرۆ گۆت: من ژیانا خوه‌ هه‌موو دایه‌ سترانگۆتنێ‌، به‌لێ‌ سترانێ‌ چ ژیان نه‌ دایه‌ من و سترانا فولكلۆری ژ هه‌موو جۆرێن دی یێن سترانان ب زه‌حمه‌ت تره‌ و یا بناغه‌یه‌ نه‌وه‌كو سترانه‌كا هه‌فچه‌رخه‌ یا چێكریه‌ و كه‌س نه‌ شێت سترانا فولكلۆری بكه‌ته‌ یا خوه‌ و ل سه‌ر مرۆڤی ماله‌ و دی َگازندا وێ‌ بۆ مرۆڤی هێت، له‌ورا بۆ ڤێ‌ چه‌ندێ‌ زانایی و هشیاری پێدڤێت، و د سالا بۆری دا من دو به‌رهه‌م به‌لاڤ كربوون، ئێك ژوان یێ‌ مه‌والان بوو یێ‌ دی یێ‌ ده‌واتان بوو.

دلۆڤانی گۆت: هه‌موو جۆرێن سترانا من گۆتینه‌ و من چێكرینه‌ ژی، به‌لێ‌ گه‌له‌ك حه‌زژ سترانێن ئه‌ڤینی دكه‌م ب تایبه‌ت وان سترانێن داستان هه‌ین وه‌كو سترانا رزگۆ و گه‌له‌كێن دی و ئه‌ڤێن نه‌ گه‌هشتینه‌ مرادا خوه‌ دشێم هه‌تا بیست سترانێن فولكلۆری بێژم بێ‌ وه‌ستیان گوهدارێ‌ سترانا فولكلۆری به‌ر ب زێده‌بوونێ‌ یه‌ چونكو ته‌كنه‌لوژیا پێشكه‌فتیه‌ و هه‌رسترانه‌كا گۆهداران دڤێت دشێن ب ده‌ست خوه‌ ڤه‌ بینت، به‌لێ‌ لاوازكرنا سترانا فولكلۆری ژی گه‌له‌ك به‌ر ب زێده‌بوونێ‌ یه‌.

دهۆك، شاكر ئه‌تروشی:

زه‌ینه‌ب حه‌سه‌ن، په‌یامنێرا كه‌نالێ‌ دهۆك تیڤی، د دیداره‌كێ‌ دا بۆ رۆژناما ئه‌ڤرۆ دیاركر، ئه‌و ده‌رچوویا پشكا زمانێ‌ كوردی یه‌ ل كولیژا زانستێن مرۆڤایه‌تی/ زانكۆیا دهۆك، و ده‌مێ‌ قوتابی ل قوناغا ئاماده‌ی حه‌زا كاركرنێ‌ دبۆارێ‌ راگه‌هاندنێ‌ دا بۆ په‌یدابوویه‌، لێ‌ پشتی زانكۆ ب دووماهی ئینای ل سالا 2017 ژنوو ده‌لیڤه‌ بۆ هات و ل رادیۆیا زانكۆ ده‌سنپێكریه‌ و بۆ ده‌مێ‌ دوسالان بوویه‌ بێژه‌را ده‌نگوباسان، هه‌روه‌سا پێشكێشكارا به‌رنامێن پێل و ئێڤارا زانكۆ، دووڤد هاتیه‌ دهۆك تیڤی و نوكه‌ په‌یامنێرا وی كه‌نالی یه‌.

زه‌ینه‌بێ‌ گۆت: به‌ری راگه‌هاندنێ‌ من كارێ‌ دۆبلاژێ‌ ژی كریه‌، لێ‌ نه‌ به‌س بۆ كارێ‌ راگه‌هاندنێ‌، به‌لكو بۆ هه‌موو كاران پشته‌ڤانیا خێزانێ‌ بۆ مرۆڤی گه‌له‌كا گرنگه‌، و دكارێ‌ راگه‌هاندنێ‌ دا گوهۆرینا ده‌زگه‌هێن كاری تشته‌كێ‌ ئاسایی یه‌، به‌لكو یا گرنگ ئه‌وه‌ ل هه‌رجهه‌كێ‌ بیت ب دلسۆزی كاربكه‌ت و یێ‌ به‌رده‌وام بیت.

ل دووماهیێ‌ گۆت: هه‌تا نوكه‌ من هزر دچێكرنا ریكلامان دا نه‌كریه‌، لێ‌ دبیت ل پاشه‌رۆژێ‌ هه‌كه‌ به‌رهه‌مه‌كێ‌ باش بیت و جهێ‌ باوه‌ریێ‌ بیت، هه‌روه‌سا دخزمه‌تا خه‌لكی دا بیت ریكلامێ‌ بۆ بكه‌م، و ژبلی راگه‌هاندنێ‌ من حه‌زا هه‌سپ سواری و چاڤدانا گولان و گه‌شتێن چیاڤانی و كاركرنێ‌ ل گه‌ل رێكخراوێن خێرخواز هه‌یه‌ و هه‌كه‌ كاودان د هاریكاربوون هیڤیا من ئه‌وه‌ ئه‌نجام بده‌م.

دهۆك، شاكر ئه‌تروشی:

وێنه‌گرێ‌ دێرین (ره‌مزی ئاكره‌یی) د دیداره‌كا تایبه‌ت دا بۆ رۆژناما ئه‌ڤرۆ گۆت: ل سالا 1970 حه‌زا وێنه‌گرتنێ‌ ل ده‌ف من په‌یدابوو، له‌ورا هه‌ر دوێ‌ سالێ‌ دا من كامیره‌كا ئه‌لمانی ب دو دینار و نیڤان بۆ خوه‌ كری و هێدی هێدی ل مال خوه‌ فێری گرتنا وێنان كر، بۆ زانین ل وی ده‌می وێنه‌ د ره‌ش و سپی بوون، فلمێن وان من ب هه‌شت ده‌رهه‌مان ل دوكانا سۆلتانێ‌ دكرین، هه‌ر فلمه‌ك دوازده‌ وێنه‌ بوو، من ژی هه‌ر وێنه‌ك ب نیڤ دیناری بۆ خه‌لكی دگرتن، بۆ زانین ل وی ده‌می خه‌لكی به‌س ل رۆژێن جه‌ژنێ‌ هنده‌ك جاران ژی ل هه‌لكه‌فتان دگرتن و كه‌سێن وێنه‌ بۆ دهاتنه‌ گرتن پرانیا وان زه‌لام و زارۆ بوون، كته‌كا گه‌له‌ك كێم ژی كچ یان ژن بوون.

ره‌مزی گۆت: ل وی ده‌می ئه‌ز وێنه‌گره‌كێ‌ گه‌رۆك بووم و ل ناڤ بازارێ‌ ئاكرێ‌ دهاتم و دچووم وێنه‌ بۆ خه‌لكی دگرتن، چنكو من چو جه یان دوكانێن تایبه‌ت نه‌بوون لێ‌ روونم، هه‌روه‌سا هه‌ر كه‌سه‌كێ‌ من وێنه‌ بۆ گرتبان پشتی دو رۆژان من بۆ دئینان چنكو هه‌ر من ب خوه‌ ئه‌و وێنه‌ ل مال بۆ دشووشتن و كه‌ره‌سته‌ و ده‌رمانێن وێنه‌شووشتنێ‌ ژ مووسل دئینان، هه‌تا سالا 1980 من دوكانه‌ك گرت و كره‌ وێنه‌گریا سه‌ربه‌ستی و ئه‌ز كه‌سێ‌ ئێكێ‌ بووم ستۆدیۆیا ره‌نگاو ره‌نگ ل كوردستانێ‌ ڤه‌كری، كو ئه‌و ژی هه‌ر ل ئاكرێ‌ بوو، و به‌ری من ب ساله‌كێ‌ ل وێنه‌شۆیا (الخلیج) ل به‌غدا هاتبوو ڤه‌كرن، من دڤێت بێژم د ماوێ‌ بیست سالێن كاركرنێ‌ دا من وێنێن گه‌له‌ك هونه‌رمه‌ند و ره‌وشه‌نبیر و كه‌سایه‌تیێن ناڤدارێن كورد گرتینه‌ كو هه‌تا نوكه‌ ژی ئه‌و وێنه‌ دبژاره‌نه‌ و ل ده‌ف من دپاراستینه‌، ژوانا ل سالا 1983 هونه‌رمه‌ندێ‌ جانه‌مه‌رگ ئه‌یاز یوسف هاته‌ وێنه‌گریا من، ده‌مێ‌ هاتی ب جلكێن سه‌ربازی بوو، چنكو ئه‌فسه‌ر بوو ل گه‌ل سه‌ربازێ‌ عیراقێ‌، ل دووف داخوازا وی ئه‌ز چوومه‌ مال من جلكێن خوه‌ یێن كوردی ئینان و ئه‌ڤ وێنه‌ بۆ گرتن، هه‌روه‌سا وێنه‌كێ‌ دی یێ‌ من گرتی و ئه‌ز گه‌له‌ك حه‌ز ژێ‌ دكه‌م وێنێ‌ هه‌لبه‌ستڤانێ‌ خودێ‌ ژێ‌ رازی سه‌لمان شووشی بوو، كو ل سالا 1981 من بۆ گرتبوو، و هه‌ر ل وێ‌ سالێ‌ وه‌غه‌ركر.

ل دووماهیێ‌ گۆت: هه‌تا سالا 1990 وه‌ك وێنه‌گر یێ‌ به‌رده‌وام بووم، لێ‌ پشتی سه‌رهلدانێ‌  من كارێ‌ خوه‌ گوهارتن و نوكه‌ خودانا چاپخانا دهۆك و پتر ژ بیست سالانه‌ ب مالڤه‌ ل دهۆكێ‌ دژیم و كوڕێ‌ من عه‌زیز وه‌ك وێنه‌گر جهێ‌ من گرتیه‌.