ب، سەرجان مەحمود:

جۆ بایدن سەرۆکێ ئەمریکا ل گەل سەرۆک وەزیر و سەرۆک کۆمارێن وەلاتێن ئەندام د ئێکەتیا ئورۆپا دا ب رێیا ڤیدیۆ کۆنفرانسەکێ ئاخڤی و راگەھاند کو بۆ وان بەرفەرەھبوون و ب ھێزبوونا ھەڤپەیمانیا ئەتلانتیک (ناتۆ) گەلەک گرنگە و ئەو دخوازن ھەردەم د چارچۆڤێ ھەماھەنگی و بەرژەوەندیێن ھەڤپشک دا دیالۆگێن خوە ل گەل ئورۆپا  پێشڤە ببەن و گۆت: (بۆ جیھانێ و تایبەت بۆ ئورۆپا ئارامی و ئێمناھی بەری ھەر تشتەکێ یە و دڤێت ل رۆژھەلاتێ دەریا سپی ژی د چارچۆڤێ یاسایێن نێڤدەولەتی دا کار بۆ ئارامیا وێ دەڤەرێ بھێتە کرن و ئەم د ڤێ مژارێ دا پشتەڤانێ یونان و ئێکەتیا ئورۆپا نە).

جۆ بایدن ھەروەسا راگەھاند ژی کو د رۆژەڤا وان دا بنپێکرنێن مافێن مرۆڤی ل روسیا و چینێ ھەیە و دڤێت د ڤێ مژارێ دا ھەلویستەکی یەکگرتی ھەبیت و گۆت: (مخابن بزاڤێن روسیا و چینێ یێن بۆ تێکدانا ئارامی و ئێمناھیا جیھانێ د بەردەوامن و ب ھەموو رەنگەکێ مافێن مرۆڤی بنپێ دکەن و گەلەک ئاشکرایە کو مەترسیەکا مەزن ل سەر ھەموو جیھانێ دروست دکەن).

بایدن د پشکەکا دی یا ئاخڤتنا خوە دا سەبارەت ب ڤایرۆسێ کۆرۆنا، رەوشا وزێ ل جیھانێ و رەوشا تورکیا و پەیوەندیێن وێ ل گەل روسیا راوەستیا و راگەھاند پەیوەندیێن تورکیا و روسیا د وارێن سەربازی و سیاسی دا نە د بەرژەوەندیا ئورۆپا، ئەمریکا و ناتۆ دانە و گۆت: (تشتێ ئەم دبینین پەیوەندیێن ھەردو ئالیان جھێ مەترسیێ یە و دڤێت ھەر وەلاتەکێ ئەندامێ ناتۆ د چارچۆڤێ سنورێن ناتۆ دا کار بکەت).

سەرۆکێ ئەمریکا ھەروەسا ب ھەلکەفتا رۆژا رزگاربوونا یونانێ ل گەل سەرۆک وەزیرێن یونانێ ژی ئاخڤی و دوسەد سالیا رزگاربوونا یونانێ پیرۆز کر و راگەھاند کو ئەو پشتەڤانیا یونانێ دکەن و رۆلێ یونانێ د پاراستنا ئارامیا دەریا سپی دا رۆلەکا سەرەکیە و گۆت: (یونان ئەندامەکا چالاک و گرنگ یێ ناتۆ یە و ئەم رۆلێ وێ د پاراستنا ئارامیا دەریا سپی دا باش دبینین و ئامادەینە د ھەر واری دا ل گەل یونانێ پێکڤە کار بکەین و پشتەڤانیا وێ دکەین).

ئەڤرۆ:

دەزگەھێن راگەھاندنا تورکیا دیار دکەن کو پشتی کۆنگرێ ئاکپارتیێ نھا ئەردۆگان کار بۆ گوھۆرینا کابینا حوکمەتێ دکەت و ئەردۆگانی دڤێت ھندەک وەزیرێن نھا ژ کاری دوور بکەت و ب جھێ وان کەسێن نێزیکی خوە بکەتە وەزیر و دھێتە چاڤەرێکرن زاڤایێ ئەردۆگانی جارەکا دی ببیتە وەزیر.

رۆژناما جمھوڕیەت یا تورکیا دوھی د راپۆرتەکێ دا دیار کر کو ئەردۆگانێ سەرۆک کۆمارێ تورکیا دڤێت ھەموو کابینا حوکمەتێ ب گوھۆریت و نھا کار ل سەر ھندەک ناڤێن نوو بۆ وەرگرتنا پۆستێن وەزارەتان دکەت، ئەردۆگانی دڤێت کەسێن نێزیکی خوە بکەتە وەزیر دا بشێت د چەند سالێن داھاتی دا کابینەکا ب ھێز و دوور ژ ئاریشان ئاڤا بکەت و ژ بەر ھندێ ژی ئەردۆگانی دڤێت بینالی یلدرم سەرۆک وەزیرێن بەرێ بکەتە وەزیر، ھەروەسا ئەردۆگانی دڤێت بەرات ئالبایراک زاڤایێ خوە کو بەری نھا ژی وەزیرێ ئابووریێ بوو لێ ژ کاری ھاتە دوورخستن جارەکا دی بکەتە وەزیر.

ھەمان رۆژنامێ ئەو یەک ژی دیار کریە کو ئەردۆگانی دڤێت ھندەک کەسێن کو بەری نھا ژ بەر ھندەک گوھۆرینان ژێ نەرازی بوون ژی د کابینا نوو دا جە بدەتە وان دا رێ ژ زێدەبوونا ئاریشێن ناڤخوەیی د ناڤ ئاکپارتیێ دا بگریت، لێ ھەتا نھا ب تەمامی دیار نەبوویە کا دێ مەولوود چاڤوش ئوگلۆ وەزیرێ دەرڤە یێ تورکیا د پۆستێ خوە دا مینیت یان دێ ژ کاری ھێتە دوورخستن، چونکو دەمەکە ل تورکیا گەلەک رەخنە ل وەزیرێ دەرڤە یێ تورکیا دھێنە گرتن و ئەو یەک ژی بوویە جھێ دلگرانیا ئەردۆگانی.

رۆژناما مللیەت ژی ئاماژە ب ھندێ کریە کو ئەردۆگانی دڤێت ھندەک گوھۆرینان بکەت دا بشێت بەرنامێ خوە یێ بۆ چەند سالێن داھاتی ب رەنگەکێ باش برێڤە ببەت، لێ ژ بەر قەیرانا دارایی و ئاریشێن دی یێن ناڤخوەیی ئەو یەک ب ساناھی نابیت و ب گوھۆرینا ھندەک کەسان گەلەک تشت ل تورکیا ناھێنە گوھۆرین، چونکو کەسێن نوو ژی دڤێت تنێ فەرمانێن ئەردۆگانی بجە بینن و نەشێن چو تشتێ نوو بکەن و ئەو یەک ژی نیشا ددەت کو دڤێت جڤاکێ تورکیا چاڤەرێی چو گوھۆرینێن مەزن نەبن، چونکو ئەردۆگانی دڤێت ھەتا دەمێ ھەلبژارتنان رەوشا ھەی د بەرژەوەندیا خوە و پارتا خوە دا بکار بینیت.

ل دۆر کابینا نوو یا حوکمەتێ کەمال کلچدار ئوگلۆ سەرۆکێ گشتی یێ پارتا کۆماریا گەل ژی راگەھاند کو ئەردۆگانی تورکیا تووشی قەیرانەکا مەزن کریە و گوھۆرینا کابینا نوو یا حوکمەتێ چو کارتێکرنەکا باش ل رەوشا تورکیا ناکەت، چونکو کەسێن نوو ژی دێ ھەر وەکو فەرمانبەرێن ئەردۆگانی کار کەن و ئەو نەشێن ل دژی ئەردۆگانی چو تشتەکێ بکەن، ژ بەر ھندێ ژی چو گوھۆرینەکا وەسا دروست نابیت، چونکو ھەتا ئەردۆگان ل سەر کار بیت دێ رەوشا نھا وەکو خوە بەردەوام بیت و گۆت: (وەکو پارتا کۆماری مە دڤێت د ھەلبژارتنێن داھاتی دا ئەردۆگانی ژ کار دوور بکەین، چونکو ب دوورخستنا ئەردۆگانی و ئاکپارتیێ ژ دەستھەلاتێ دێ رەوشا تورکیا باش بیت، ھەتا ئەردۆگان وەکو سەرۆک کۆمار ل سەر کار بیت دێ رەوش ھەر یا ئالۆز بیت، چونکو ئەردۆگانی تورکیا تووشی گەلەک قەیرانێن مەزن کریە و رێ نادەت ھێزێن دیموکرات و ئازادیخوازێن تورکیا بۆ باشکرنا رەوشا تورکیا کار بکەن، ب ھزاران زانایێن تورکیا د زیندانان دانە و یێ دژبەریا ئەردۆگانی بکەت تووشی سزایێ زیندانێ دبیت، ژ بەر ھندێ ئەم دبێژین ھەتا ئەردۆگان ل سەر دەستھەلاتێ بیت چو گوھۆرین روو نادەن).