ئامێدیێ، ئەسعەد رێکانی:

سەرپەرشتیارەکێ خانەنشیکری بەحسێ دەستپێکا خۆە یا دامەزراندنێ  ورەوشا خواندنا ل سەر وی دەمی دکەت و پشتی ٤٢ سالێن خزمەتا پەروەردەی دھێتە خانەنشیکرن ونوکە ل ناحیا سەرسنکێ ئاکنجی یە ومژوولێ ژیانا خوە یا ئاسایی یە.

زیاد سەلمان بامەرنی، سەرپەرشتیارێ خانەنشینکری یێ پەروەردا قەزا ئامێدیێ بو بەرپەرێ پەروەردە وزانکۆ دیارکرکو ل سالا ٢٠٠٢ێ بوویە سەرپەرشتیارێ گشتی ل یەکا سەرپەرشتیا پەروەردێ ل پارێزگەھا دھوکێ وپشتی پەروەردا قەزا ئامێدیێ ل سالا ٢٠٠٣ێ ھاتیە ڤەکرن  ھاتیە ڤەگوھاستن ودانان وەک بەرپرسێ کەرتێ سەرپەرشتیا پەروەردا ئامێدیێ وپشتی ل سالا ٢٠٠٧ێ بوویە یەکا سەرپەرشتیاری بوویە سەرپەرشتێ ئێکێ ھەتا سالا ٢٠١٣ێ وپشتی ھنگی ل دووڤ حەزا خوە ھاتیە ڤەگوھاستن بۆ سەرپەرشتیارێ کارگێری وتا ١/٧/٢٠١٨ێ ھاتیە خانەنشینکرن یێ بەردەوام بوو ل سەر کاروخزمەتا پەروەردەی.

ناڤھاتی گۆت: ئەز ل سالا ١٩٦١ێ چویمە قوتابخانێ ومن پولا ئێکێ سەرەتایی ل قوتابخانا بامەرنێ دەستپێکر ول سالا ١٩٧٦ێ خانا ماموستایان(دارالمعلمین) ل دھوکێ ب دوماھی ئینایە وپشتی دەرچووین ھەر دوێ سالێ دا ھاتمە دامەزراندن  ول ١٨/٩/١٩٧٦ێ ل قوتابخانا شێلادزێ ل گوندێ شێلادزا کەڤن من دەست ب کارێ خۆە کر و قوتابخانا شێلادزێ ل سالا ١٩٧٥ێ ھاتبوو ڤەکرن وخانیەک بۆ ھاتبوو دابینکرن کو ژ دوو ژوورا پێکدھات ژورەک بو کارگێریێ بو وژوورا دژی بو پولێ بوو کو قوتابخانامە ژپوولا ئێکێ ودووێ پێکدھات ودورێن ٣٠ قوتابیان مە ھەبوون وپولا ئێکێ دانێ سپێدێ دەوام دکر وپولا دووێ ژی پشتتی ینیڤرو دەوام دکر سەرارەی ڤێ چەندێ ژی قوتابیان زور حەزا خواندنێ ھەبوو وھەروەسا ئاستێ قوتابیان ورەوشا خواندنێ ل سەر وی دەمی زۆر یابلند بو وقوتابی ژی دسەرکەفتی بوون ژبەرکو قوتابخانەیێن بەرێ دناڤ کومەلگەھێ دا گەلەک سەنگ وبەھایێ خوە ھەبوووجڤاکی ژی ب چاڤ ورێزەکا مەزن وبلند بەرێ خوە دا خواندنێ وتایبەت ماموستایی گەلەگ جھێ خوە دناڤ خەلکی دا ھەبوو ورێزەکا مەزن لێ دھاتە گرتن وپەیوەندیێن ب ھێز دناڤبەرا قوتابخانێ ومالێن قوتابیان دا ھەبوو وھەروەسا ماموستای ژی زۆر خوە ماندی دکر دا بشێت وان زانست وپێزانینان ب گەھینتە قوتابیان

ماموستا زیاد سەلمان ئەوچەندە ژی  گوت : پشتی مە سالەکێ دەوام دوی خانیڤە کری ل سالا ١٩٧٧ێ ئاڤاھیەک بۆ قوتابخانا مە ھاتە چێکرن ل جھێ نوکە کو قوتابخا شێلادزێ یا کچان دەوامێ تێدا دکەن  کو ژ چوار ژورێن خواندنێ  پێکدھات و ھەر دوێ سالێ دا دو ماموستایێن دی ژی ھاتنە قوتابخانا مە و ئەم بووینە چوار ماموستا ل گەل رێڤەبەرێ قوتابخانێ  پاشێ ل سالا ١٩٧٨ێ شێلادزێ بۆ کومەلگەە ژبەر کو خەلکێ گوندا تەرحیل کرن و ل کومەلگەھا ئاکنجی کرن و د وێ سالێ دا بۆ نە دو قوتابخانە شێلادزێ کوران وکچان و من چار سالا دەوام ل شێلادزێ کر پاشێ ل سالا ١٩٨٠ێ ھاتمە ڤەگوھاستن بۆ قوتابخانا گوندێ سکرینێ یا سەر ب قەزا ئامێدیێ ڤە.

ئەڤرۆ، سالار محەمەد دۆسکی:

سەرپەرشتیارێن پەروەردێ ل وێ باوەرێ نە کو کێمبوونا قوتابیان ل پولان دا، ژبلی مفایێ ساخلەمی مفایێ زانستی ژی ھەبوویە و زێدەتر قوتابی دشێن گەنگەشێ ل گەل مامۆستا بکەن و مفای وەربگرن.

سەگڤان حەسەن عەلی، رێڤەبەرێ سەرپەرشتیاری ل پارێزگەھا دھۆکێ بۆ  بەرپەرێ پەروەردە و زانکۆ  ل رۆژناما ئەڤرۆ گۆت: کێمبوونا قوتابیان ل پولان دا کو ژ ١٥ بۆ ٢٠ قوتابیان ئانکو ھەر قوتابیەکی خولەکەک ھەیە ل گەل مامۆستا باخڤیت و مامۆستا ژی دێت زێدەتر گەنگەشێ ل گەل قوتابیان بکەت، لێ ژ نەبوونا میلاکی و کێمبوونا ئاڤاھیان نەشێین بەرەوام بین ل سەر ڤی کاری و ژبەر پەژیکا کورونایێ مە ھەژمارا قوتابیان و رۆژێن حەفتیێ کێمکریە و ھەکە بیتە دەواما ئاسایی نەشێن بڤی رەنگی بەردەوام بین.

ھەکە ھەژمارا قوتابیان کێمبوو  مامۆستا دشێت وانەکا نموونەی بێژیت و ئەڤە پیڤەرەک لدووف خواستا مەیە و ئەم گەلەک حەز دکەین ھەمی پولێن مە بڤی رەنگی بن لێ ئەڤە یا بزحمەتە، لدوف ستاندارێن جیھانی ھەتا ٢٥ قوتابیان ژی ل پولان دا ھەبن، لێ وەلاتێن جیھانێ ئاڤاھی ھەنە و قوتابی کێم و ل کوردستانێ ئاڤاھی کێم و قوتابی زێدەنە.

ســـەگڤانی گۆت: ھەکە ھەر پولەکێ ١٥ بۆ ٢٠ قوتابیان تێدا بن ھەتا ١٥ ھزار میلاکی مە دڤێت و ٧٠% ئاڤاھی دڤێت بھێنە زێدەکرن، بەھرێن مامۆستا زێدەنەبووینە چنکو شێوازێ دەوامێ بوو شەش رۆژان بوو نوکە بوویە ١٢ دوازدە رۆژان،  خشتێ نوکە یێ دوزادە رۆژان بەرامبەری شەش رۆژێن بەری نوکە بووینە.

ھەمان سەرپەرشتیارێ پەروەردێ ئەو ژی گۆت: ھەمی رێڤەبەرێن قوتابخانا ھاتینە ئاگەھدارکرن کو دەواما مامۆستا بگەفیتە چار رۆژان دا و چەند شیان ھەین و مامۆستایێ ئازادە ھەکە وانە ھەبیت بھێتە قوتابخانێ و ھەکە وانە نەبیت نەھێتە قوتابخانێ و بتنێ لدەمێن وانێن خوە بھێت، قوتابخانێن نە حوکمی سیستەمێن خوە ھەنە.

ھەڤدەم میسەر محەمەد ئەسعەد، سەرپەرشتیارێ پەروەردێ ل پەروەردا دھۆک یا رۆژئاڤا بۆ بەرپەرێ پەروەردە و زانکۆ گۆت: کێمبوونا قوتابیان ل پولان دا گەلەک باشترە ژ گەلەک قوتابیان و پتر کاریگەریا خوە ھەیە  و پەیاما مامۆستا وی زێدەتر دگەھیتە قوتابیان ب دو جوران وەک زانست وەک ساخلەی ژی گەلەک باشە.

ھەمان سەرپەرشتێ پەروەردێ ل گۆتژی: گرنگە بۆ ڤێ قوناغێ پرۆگرامێن خواندنێ ھاتبانە کێمکرن،  گرنگە پلان بۆ وانێن خواندنێ ھەیڤانە بھێتەدنان و ژلایێ سەرپەرشتیار و کەسانێن بسپور ڤە بھێتە بەرھەفکرن، چنکو پلانا خوە دروست بکەت و انا خوە بگەھینت دێ باشتر وانە گەھیتە قوتابیان و مامۆستا پلان ھەبیت نەیا خرابە.

میسەر لدور راکرنا وانێن وەرزش و سرۆدێ ژی ل قوتابخانان، گۆت: وانێن ھونەر و وەرزش و سرودێ گرنگە ل قوتابخانا بھێنە گۆتن و نابیت بھێنە پشست گوە ھاڤێتن یان ل جھێ وا وانێن کوردی و زانستی بھێنە گۆتن چنکو ئەف وانە جھێن بھێنڤەدانێ نە بۆ قوتابیان  و نابیت ژێ بھێنە وەرگرتن، ژ روویێ پەروەردێ ڤە دڤێت مامۆستا بەردەوام گوھورینێ بکەت و خوە پێش بێخیت و گرنگە ل وانا ئێکێ مامۆستایێ کوردی وەرزشەکێ ب قوتابیان بکەت.

ل دور ڤەکرنا باغچێن زارۆیان ژی، سەرپەرشتیار سەگڤان گۆت: ھەتا نوکە چ بریار ل سەر ڤەکرنا باغچێن زارۆیان نینە، حەفتیانە سەنگا بارێ ساخلەمی دھێتەکرن و ھەتا نوکە بارێ ساخلەمیێ یێ جێگیرە و چ مەترسی ل سەر گرتنا قوتابخانان نینە.