ئەڤرۆ:

د. رۆژ نوری شاوەیس ل ٧ کانوونا ئێکێ ١٩٤٧ ل سلێمانیێ ژ دایکبوویە، کورێ ئەندازیار نوری شاوەیس (١٩٢٢- ١٩٨٣)، ئەندامێ مەکتەبا سیاسی یا پارتی دیموکراتی کوردستان وپارتی دیموکراتی گەلێ کوردستان بوو، و دەیکا وی ناھیدە سەلام ئەحمەد (١٩٢٢- ٢٠٠٥) یا ناڤدار ب ناھیدە شێخ سەلام ئەنداما کۆمیتا ناڤەندی یا پارتی دیموکراتی کوردستان و برایێ بروسک نوری شاوەیس ئەندامێ کۆمیتا ناڤەندی یا پارتی دیموکراتی گەلێ کوردستان و پارتی دیموکراتی کوردستان.

– ل ١٠ ئەیلوولا ١٩٥٩ وەکو مێھڤان و ل گەل دەیکا خوە کو نوونەرا کۆنگرێ ئێکێ یێ ئێکەتیا مامۆستایێن کورد (کۆنگرێ شەقلاوە) پشکداری کۆنگرەی بوو.

– ل ١٩٦٢ پەیوەندی ب رێزێن پێشمەرگەی کر.

– ل ١٩٦٦ ل کۆلیژا ئەندازیاری ل زانکۆیا مووسل ھاتیە وەرگرتن.

– ل ١٩٧٠ پەیوەندی ب رێزێن کۆمەلا خویندکارێن کورد ل ئورۆپا کریە.

– ل ١٩٧١ بەکالوریوس ل کۆلیژا ئەندازیاری ل زانکۆیا مووسل وەرگرتیە، پاشی ماستەر و دکتۆرا ب ئەندازیاریا کارەبێ ل ئەلمانیا وەرگرتیە.

– ل ١٩٧١ ئەندامێ لقێ شەشێ پارتی دیموکراتی کوردستان ل ئورۆپا بوو.

– ل ١٦ ھەتا ١٩ ئاب ١٩٧٣ پشکداری د کۆنگرێ ١٦ یێ کۆمەلا خویندکارێن کورد ل ئورۆپا ل باژێرێ بەرلینێ کریە.

–  ل ١٩٧٥ سکرتێرێ خۆلا ١٧ یا کۆمەلا خویندکارێن کورد ل ئورۆپا بوو ھەتا سالا ١٩٨٢ د ڤی پۆستی دا مابوو.

– ل ١٩٧٩ ئەندامێ لژنا سەرپەرشتکارا کۆنگرێ نەھێ یێ پارتی دیموکراتی کوردستان بوو.

– ل ١٩٧٩ ل کۆنگرێ نەھێ یێ پارتی وەکو ئەندامێ کۆمیتا ناڤەندی ھاتە ھەلبژارتن.

–  ل ١٩٧٩ بۆ جارا دویێ پەیوەندی ب ھێزا پێشمەرگەی کر و ل سالا ١٩٨٠ پشکداری د شەرێ حاجی ئومەران دا کر دژی لەشکرێ عیراقێ.

– ل دەستپێکا ھەیڤا ئەلوولا ١٩٨٠ فەرمانداریا ھێزەکا پێشمەرگێ پارتی بەر ب دەڤەرا بادینان دکەت.

– ل ١٩٨١ مامۆستایێ خۆلا پرۆگرام و پەیرەوێ ناڤخوەیێ پارتی دیموکراتی کوردستان بوو ل خۆلا حەفتێ یا پەیمانگەھا کادرێن پارتی ل گوندێ راژان ل رۆژھەلاتا کوردستانێ.

– ل سالا ١٩٨٣ د ئێکەمین کۆمبوونا کۆمیتا ناڤەندی دا وەکو ئەندامێ مەکتەبا سیاسی یا پارتی ھاتە ھەلبژارتن.

– ل ١٧ تەمووزا ١٩٨٥ وەکو بەرپرسێ پشکا رێکخستنا پارتی ھاتە دەستنیشانکرن.

– ل ٣٠ تشرینا دوویێ ١٩٨٥ ھەتا ٣ نیسانا ١٩٨٦ مامۆستایێ وانەیا پرۆگرام و پەیرەوێ ناڤخوەیی پارتی و رێکخستنێ بوو ل خۆلا ھەشتێ یا پەیمانگەھا کادرێن پارتی ل گوندێ راژان ل رۆژھەلاتا کوردستانێ.

– ل ١٩٨٧ وەکو بەرپرسێ لقێ ئێک یێ پارتی ھاتە دەستنیشانکرن.

– ل ١٣ ئەیلوولا ١٩٨٧ فەرمانداریا داستانا کانی ماسی ل پارێزگەھا دھۆکێ دژی لەشکرێ عیراقێ کر.

– ل ١٩٨٧ فەرمانداریا داستانا دێرالۆکێ ل سنوورێ پارێزگەھا دھۆکێ دژی لەشکرێ عیراقێ دا کر.

– ل ٢٧ نیسانا ١٩٨٧ پلاندارێژەرێ گرتنا فرۆکخانا لەشکری یا بامەرنێ ل سنوورێ پارێزگەھا دھۆکێ بوو.

– ل ١٩٨٨ ئێک ژ فەرماندێن داستانا خواکورکی ل سنوورێ پارێزگەھا ھەولێرێ بوو دژی لەشکرێ عیراقێ.

– ل ١٩٨٩ ژ لایێ نوونەرێن کۆنگرێ دەھێ یێ پارتی دیموکراتی کوردستان وەکو ئەندامێ کۆمیتا ناڤەندی یا پارتی ھاتە ھەلبژارتن.

– ل ١٩٨٩ د ئێکەمین کۆمبوونا کۆمیتا ناڤەندی دا وەکو ئەندامێ مەکتەبا سیاسی یا پارتی ھاتە ھەلبژارتن.

– ل رۆژێن ٢٠ ھەتا ٢٢ خزیرانا ١٩٨٩ ل گەل سەرۆک مەسعود بارزانی، سەرۆکێ شاندێ بەرەیێ کوردستانێ، پشکداری د کۆنگرێ ١٨ یێ سۆشیالیستا نێڤدەولەتی دا ل باژێرێ ستوکھۆلمێ ل سوید کر.

– ل ١٩٩١ پشکداری د سەرھلدانا گەلێ کورد ل باشوورێ کوردستانێ کر.

– ل دەستپێکا سالا ١٩٩٢ ب نوونەراتیا پارتی دیموکراتی کوردستان پشکداری د کۆمبونا بەرەیێ کوردستان یدا کر ب مەرەما دامەزراندنا لژنا بلند یا سەرپەرشتیا ھەلبژارتنێن جڤاتا نیشتمانی یا کوردستانی کر.

– ل ٧ نیسانا ١٩٩٢ ب نوونەراتیا پارتی دیموکراتی کوردستان پشکداری د کۆمبوونا بەرفرھە یا بەرەیێ کوردستانێ ل پیرمام کر ب مەرەما بەرھەڤی بۆ پرۆسا ھەلبژارتنێن جڤاتا نیشتمانی یا کوردستانێ.

– ل ٤ خزیرانا ١٩٩٢ ژلایێ دەنگدەرێن ھەرێما کوردستانێ وەکو ئەندامێ خۆلا ئێکێ یا جڤاتا نیشتمانی یا کوردستانی ل سەر لیستا پارتی ھاتە ھەلبژارتن.

– ل ٤ تەمووزا ١٩٩٢ بوویە جێگرێ سەرۆکێ جڤاتا وەزیرێن کوردستانێ (کابینا ئێکێ).

– ل ١٩٩٢ ب وەکالەت وەزیرێ ناڤخوەیێ حوکمەتا ھەرێما کوردستانێ بوو (کابینا ئێکێ).

– ل ٢٥ نیسانا ١٩٩٣ جێگرێ سەرۆکێ جڤاتا وەزیرێن ھەرێما کوردستانێ (کابینا دوویێ) بوو.

– ل ٢٠ ئاب ١٩٩٢ ل ھەولێرێ وەکو جێگرێ سەرۆکێ جڤاتا وەزیرێن ھەرێما کوردستانێ پشکداری د ڤەکرنا کۆنگرێ ئێکێ یێ حزبا ئێکگرتنا کوردستانێ دا کر.

– ل ١٩٩٣ وەکو خودان ئیمتیازێ رۆژناما (کوردستان نیوز) مۆلەتا فەرمی ژ وەزارەتا رەوشەنبیری یا حوکمەتا ھەرێما کوردستانێ وەرگرت.

– ل ١٩٩٣ ژلایێ نوونەرێن کۆنگرێ ١١ وەکو ئەندامێ کۆمیتا ناڤەندی یا پارای دیموکراتی کوردستان ھاتە ھەلبژارتن.

– ل ١٩٩٣ د کۆمبوونا ئێکێ یا کۆمیتا ناڤەندی دا وەکو ئەندامێ مەکتەبا سیاسی یا پارتی ھاتە ھەلبژارتن.

– ل رۆژا ٦ تشرینا ئێکێ ١٩٩٣ ل خالا پاشماخ یا سنووری ل سلێمانیێ وەکو جێگرێ سەرۆکێ جڤاتا وەزیرێن ھەرێمێ (کابینا ئێکێ) پێشوازی ل روفاتێن مەلا مستەفا بارزانی (١٩٠٣ – ١٩٧٩) و ئیدریس بارزانی (١٩٤٤ – ١٩٨٧) کر.

– ل ٤ گۆلانا ١٩٩٤ ل کۆمبوونا ھەڤپشک یا پارتی و ئێکەتی ئیمزا ل سەر ئاگربەست و ئاساییکرنا رەوشا باشوورێ کوردستانێ کریە.

– ل ١٩٩٤ فەرماندێ فەرماندەیا فەلەک ( فەرماندەیا لەشکرێ کوردستانێ) بوو.

– ل ٢٦ ئەیلوولا ١٩٩٦ وەکو سەرۆکێ جڤاتا وەزیرێن ھەرێما کوردستانێ (کابینا سیێ) ھاتیە ھەلبژارتن.

– ل ١٩٩٧ پشکداری د کۆنگرێ ئەنقەرە و پاریس بۆ ئاشتیێ ل گەل ئێکەتیێ دا کریە.

– ل ٢٩ – ٣١ تشرینا ئێکێ ١٩٩٩ دگەل شاندەکێ پارتی دیموکراتی کوردستان پشکداری د کۆنگرێ نیویۆرک  یا بەرھنگاریا عیراقی دژی حزبا بەعس دا کر.

– ل ١٩٩٩ ژلایێ نوونەرێن کۆنگرێ ١٢ یێ پارتی دیموکراتی کوردستان وەکو ئەندامێ کۆیتا ناڤەندی ھاتە ھەلبژارتن.

– ل ١٩٩٩ د ئێکەمین کۆمبوونا کۆمیتا ناڤەندی یا نوو یا پارتی دا وەکو ئەندامێ مەکتەبا سیاسی ھاتە ھەلبژارتن.

–  ل ٢٤ تشرینا دوویێ ١٩٩٩ دەست ژ کارکێشانا خوە ژ پۆستێ سەرۆکێ جڤاتا وەزیرێن ھەرێما کوردستانێ رادەستێ جڤاتا نیشتمانی یا کوردستانی کر و ب پتریا دەنگان ھاتە قەبوولکرن.

– ل رۆژا ٢٢ کانوونا دوویێ ١٩٩٩ ژلایێ ئەندامێن جڤاتا نیشتمانی یا کوردستانی وەکو سەرۆکێ جڤاتا نیشتمانی یا کوردستانی (خۆلا ئێکێ) ھاتە ھەلبژارتن.

– ل ئاب ٢٠٠٠ سەرپەرشتێ کۆنفرانسێن ناڤخوەیی یێن لژنێن لقێ شەشێ پارتی ل باژێرێ فرانکفۆرت ل ئەلمانیا بوو.

– ل ٢٠٠٣ جێگرێ سەرۆک مەسعود بارزانی بوو د جڤاتا حوکمرانیا بەروەخت دا ل عیراقێ.

– ل تشرینا ئێکێ ٢٠٠٣ ژلایێ جڤاتا حوکمرانیا عیراقێ وەکو ئەندامێ لژنا کۆنگرێ دستوورێ عیراقێ ھاتە دەستنیشانکرن.

– ل ١٥ ئەیارا ٢٠٠٤ نوونەرێ کۆنگرێ سەروەری و دیموکراسی ل ھەولێرێ بوو کو ٦٠٠ نوونەری تێدا پشکدار بوون.

– ل ٢٠٠٤ بەربژارێ پارتی دیموکراتی کوردستان بوو بۆ لیستا ھەڤپەیمانیا کوردستانی بۆ پرۆسا ھەلبژارتنێن جڤاتا نیشتمانی یا عیراقی.

– ل ١ خزیرانا ٢٠٠٤ بۆ جێگرێ سەرۆک گۆمارا عیراقێ ل سەردەمێ سەرۆک کۆمار غازی عەجیل ئەلیاوەر.

– ل ھەلبژارتنێن ٣٠ کانوونا دوویێ ٢٠٠٥ دا ل سەر لیستا ھەڤپەیمانیا کوردستانی وەکو ئەندامێ جڤاتا نیشتمانی یا عیراقی ھاتە ھەلبژارتن.

– ل ٧ نیسانا ٢٠٠٥ ب فەرمانەکا کۆماری وەکو جێگرێ سەرۆک کۆماری ھاتە خانەنشینکرن.

– ل ٢٨ نیسانا ٢٠٠٥ وەکو جێگرێ سەرۆکێ جڤاتا وەزیرێن عیراقا فیدرال بوو (کابینا د. ئیبراھیم جەعفەری) ھاتە دیارکرن.ل ٣ ئەیارا ٢٠٠٥ ل جڤاتا نیشتمانی یا عیراقی وەکو جێگرێ سەرۆک وەزیرێن عیراقێ سویندار قانوونێ خواند.

– ل ٢١ ئەیارا ٢٠٠٦ وەکو جێگرێ سەرۆکێ جڤاتا وەزیرێن عیراقێ ھاتە خانەنشینکرن.

– ل ٢٠٠٧ بوویە ئەندامێ جڤاتا ئاسایشا نیشتمانی.

– ل ٢٠٠٩ وەکو جێگرێ سەرۆکێ جڤاتا وەزیرێن عیراقا فیدرال ھاتە ھەلبژارتن.

– ل ١٦ کانوونا ئێکێ ٢٠١٠ ژلایێ ١٥٠٠ نوونەرێن کۆنگرەی ب ١١٢٨ دەنگان ل رێزبەندا پێنجێ وەکو ئەندامێ جڤاتا سەرکردایەتیا پارتی دیموکراتی کوردستان (کۆنگریًَ ١٣) ھاتە ھەلبژارتن.

– ل ١٨ کانوونا دوویێ ٢٠١٠ ب فەرمانەکا کۆماری وەکو جێگرێ سەرۆکێ جڤاتا وەزیرێن عیراقێ ل کابینا نوری مالکی ھاتە ھەلبژارتن.

– ل ٣٠ کانوونا ئێکێ ٢٠١٠ ب فەرمانەکا کۆماری ل کابینا نوری مالکی وەکو وەزیرێ بازرگانی ب وەکالەت ھاتە دیارکرن.

– ل ١٨ کانوونا دوویێ ٢٠١٠ ژ بەر خەبات و بەرخودانا وی ل شۆرەشێن ئەیلوول و گۆلانێ و قۆناغا سەرھلدانێ ژلایێ سەرۆک مەسعود بارزانی ڤە میدالیا بارزانیێ نەمر ل کۆنگرێ ١٣ یێ پارتی پێ ھاتە بەخشین.

– ل سالا ٢٠١١ د ئێکەمین کۆمبوونا جڤاتا سەرکردایەتیا پارتی دا وەکو ئەندامێ مەکتەبا سیاسی ھاتە ھەلبژارتن.

– ل ١٧ ئاب ٢٠١٤ فەرماندێ بەرەیێ خازری بوو ل سنوورێ پارێزگەھا نەینەوا ل شەرێ دژی تیرۆرستێن داعشێ بوو.

– زمانێن کوردی، عەرەبی، ئەلمانی، فارسی و ئینگلیزی دزانین.

– ل ١٥ شوباتا ٢٠٢١ د ژیێ ٧٤ سالیێ دا ژ ئەگەرێ نەخوەشیێ ل نەخوەشخانەکا ھەولێرێ وەغەرکر.