NO IORG
Authors Posts by naci bedel

naci bedel

15011 POSTS 0 COMMENTS

68

ئەڤرۆ، ھەرھین محەمەد:

سترانبێژێ گەنج فەرھان ئۆرمیە، د دیدارەکێ دا بۆ رۆژناما ئەڤرۆ گۆت: سترانبێژێن تورک ھەبووینە داخوازا سترانا دوقۆلی ژمن کریە و ھەکە دەنگێ مە ل گەلک دگونجای بن ب ئانەھیا خودێ دێ سترانا دوقۆلی ژی چێکەم و یێ ئاما دەمە، بەلێ من داخواز ژ چو سترانبێژان نەکریە بۆ سترانا دوقۆلی و یێن داخواز ژمن کری من رەت نەکریە.

ل دۆر نووترین کارێ خوە ییێ ھونەری ژی گۆت: دەمەکە مژوولی کلیپەکێ مە ب ناڤێ (نەچە ژخەونامن) کو ژ پەیڤێن ئاکام محەمەدی و ئاواز یا وی بخوە یە و میکس و ماستریک مشتەبا لۆتفی و وێنەگر عەلی کرال و ژڤانە ل نێزیک بھێتە بەلاڤکرن.

ل دووماھیێ گۆت: کلیپێن من دکێمن، چونکو نوکە ل ئیرانێ دژیم و نەوەکو کوردستانێ یە و ل ئیرانی نینە کو ستران و بەرنامێن خوە لێ بەلاڤ بکەین، لەورا کلیپان کێم چێدکەم و پتر دچمە دەواتان و ھونەرێ خوە نیشا خەلکی بدەم و من پتر حەزژێکەرێن خوە دبیاڤێ دەواتان دا ھەیە.

 

182

ئەڤرۆ، بارزان مزوری:

خانما شێوەکار فاتم وەعەد، د دیدارەکێ دا بۆ رۆژناما ئەڤرۆ دیارکر کو ژبەر کاودانێن شەڕی ل سالا ٢٠١٤ ئەو ژباژێری مووسل دەرکەفتینە و ئاوارەی قەزا بەردەرەش بووینە و نوکە وەک ماموستایا ھونەری ل ئێک ژ قوتابخانێن وێ دەڤەرێ کارێ خوە دکەت.

ناڤھاتیێ گۆت: ھەر چەندە ئەز دەرچوویا پشکا شانۆیێ مە، لێ گەلەک حەز ژ کارێ شێوەکاری و ھندەک کارێن دی یێن دەستی دکەم و نوکە نێزیکی٩٠% ژوان کەلوپەلێن د ناڤ مالێ دا من ب دەستپێن خوە چێکرینە، ژوانا چێکرنا چەندین کەڤالێن شێوەکاری کو بابەتێن ھەموویان گرێدای رەوشا ژنان و ئەو ئێش و ئازارێن ب سەرێ وان ھاتین گرێداینە،  بۆ زانین ئەڤە پتری شەش سالایە کارێ شێوەکاری دکەم و ھەموو ژۆرێن ناڤ  مالا خوە من ب کەڤالان خەملاندینە و ھەکە خانویەکێ نوو ئاڤا کەم، وەک دیزاین من ھزرێن باش بۆ ھەنە و سوپاسیا ھەڤژینێ خوە و ھەموو مالباتا خوە دکەم کو ھەردەم ھاریکار و پشتەڤانێن کارێن منن..

149

ئەڤرۆ، زنار تۆڤی:

موسەدەق تۆڤی، سەرپەرشتێ پرۆژێ چاپکرنا پرتووکان ل ناڤەندا خانی یا رەوشەنبیری و راگەھاندنێ، بۆ رۆژناما ئەڤرۆ دیارکر کو ناڤەندا خانی یا رەوشەنبیری و راگەھاندنێ دەست ب پرۆژەکێ نوو بۆ چاپکرنا پرتووکان کرییە، ل ژێر ناڤێ (وەشانێن ناڤەندا خانی یا رەوشەنبیری و راگەھاندنێ) د قوناغا ئێکێ یا ڤی پرۆژەی دا  دەە پرتووک ھاتینە بەرھەڤکرن بۆ چاپکرنێ، ل چەند رۆژێن بۆری ئەو پرتووک ھاتینە رەوانەکرن بۆ چاپێ و ل دەمەکێ نێزیک دێ کەڤنە بەر دەستێ خواندەڤانان، ئەو دەە پرتووکە تێکەلن ژ بەرھەمێن نڤیسەرێن کەڤن و نوو و گەنج، بابەتێن وان پرتووکان ژی پێک دھێن ژ رۆمانان و دیرۆکێ و بابەتێن جڤاکی و ڤەکۆلینێن دیرۆکی و رەوشەنبیری، ئەڤ پرۆژە یێ ڤەکرییە، بۆ ھەر بەرھەمەکێ رەوشەنبیری.

تۆڤی گۆت: ئەڤ پرۆژە دێ یێ بەردەوام بیت، لەوما ئەم داخوازێ ژ ھەر نڤیسەرەکێ دکەین و یێ بڤێت پشکداریێ د ڤی پرۆژەی دا بکەت، بلا پرتووکا خوە بگەھینیتە مە، ئەم ژی دێ پرتووکان بۆ وان نڤیسەران چاپ کەین..

19

ئەڤرۆ، شاکر ئەتروشی:

سترانبێژ خەلیل ئیبراھیم ئیسماعیل، کو ب (خەلیل شنگاری) دھێتە نیاسین، د دیدارەکێ دا بۆ رۆژناما ئەڤرۆ دیارکر کو ئەو ژدایکبوویێ باژێرکێ شنگارێ یە، بەلێ ژبەر کاودانێن سیاسی دژیەکێ بچووکدا ژ شنگارێ دەرکەفتینە و چووینە باژێرێ مووسل بنەجە بووینە، ل ناڤەراستنا سالێن ھەشتێیان حەزا سترانگۆتنێ ل دەف پەیدا بوویە و ل دەستپێکێ ل ئاھەنگ ز شەھیانان سترانێن ھونەرمەندێ نەمر سەعید گاباری دگۆتن، پشتی دەمەکی سترانێن ھونەرمەند محەمەد شێخۆی و سەعید یوسف ژی دگۆتن، پاشان وی ب خوە ژی ھندەک ستران بۆ خوە چێکرن و ھەتا نوکە یێ بەردەوامە.

خەلیل کو ئەڤە دەمەکە وەک ئاوارە ل کەمپا کەبەرتو دژیت، ھێشتا گۆت: جھێ داخێ یە ھەتا نوکە ل وەلاتێ مە ھونەرمەند نەشێن ب دروستی ب داھاتێ ھونەری بژین، لەورا ئەم ژی وەکو ھەر سترانبێژەکی دچووینە دەوات و ئاھەنگێن تایبەت و ئەو پارێ بوومە ژوێرێ دھات مە دکرە دو پشک، یا ئێکێ مە خێزانا خوە پێ ب خودان دکر، پشکا دویێ ژی مە ھونەرێ خوە پیً ب رێڤەدبر، ئانکو بۆ مەزاختیێن کلیپ و ئەلبۆمێن سترانان دچوو، لێ مخابن پشتی ھاتنا پەژیکا کۆرۆنایێ ئەو ژی نەما و نوکە گەلەک کێم دچمە دەواتان.

ل دووماھیێ گۆت: دژیانا خوە یا ھونەری دا من ستران ل گەل گەلەک ھونەرمەند و دەنگبێژێن مە یێن کورد گۆتینە، ژوانا سەعید گاباری و حەسەن عەلی خەنجەر و خدر فەقیر و لازگین سەیدۆ و خەلەف شنگاری و چێلی و گەلەکێن دی و ل ھژمارەکا زۆرا بەرنامە و شەڤبێری و روونشتنێن فولکلۆری فولکلۆری پشکداربوویمە، و دبەرنامێ من دایە د ئەڤ سالەدا کلیپەکا نوو چێکەم، لێ ھەکە پشتەڤانی ھەبییت دێ شیێن بەرھەمێن زێدەتر چێکەین.

ئەڤرۆ رۆژا ئێک شەمبی ٣١/١/٢٠٢١ د.عەلی تەتەر پارێزگارێ دهۆکێ پێشوازی ل نۆشدارێ بەرنیاس د.جەگەر جاسم مامۆستایێ زانکۆیا کۆلورادو یا ئەمریکی کر.
دروونشتنەکێ دا بەحسێ دووماهی پێشڤەچوونێن زانستی ل دۆر نەخۆشیا کۆڤید ١٩ یا ژ ئەنجامێ ڤایرۆسێ کۆرنایێ بەلاڤ دبیت هاتەکرن و هەروەسا چەند بابەتێن دیێن گرێدایی زانستێ نۆشداریی دان و ستاندن ل دۆر کر..
ژ هەژی گۆتنێ یە “د.جەگەر جاسم” نۆکە پرۆفیسورێ هاریکارە ل زانکۆیا کۆلورادو، و هەلگرێ باوەرناما ماستەرێ یە دبیاڤێ پەتازانی یێ دا و دوو بورد دبیاڤێن ئێشێن هناڤان و بوردا ئێشێن خۆینێ ژ زانکۆیا “جونز هوپگنز” وەرگرتیە و نۆشدارەکێ چالاکە د هشیاریا جڤاکی دا ل دۆر بابەتێن ساخلەمیێ.

ئەڤرۆ:

شیرەتکارێ سەرۆکێ حوکمەتا ھەرێما کوردستانێ بۆ کاروبارێن ئێزدیان، شێخ شامۆ، راگەھاند، ئێزدی نازڤرن بن دەستێ ھێزێن نە شەرعی ل شنگالێ و دیارکر کو نوکە لایەنێن نە شەرعی شنگال کریە سەربازگە و پرۆسا تەشەیوعێ تێدا یا بەردەوامە”.

شێخ شامۆی ل دۆر رەوشا شنگالێ، گۆت” رەوشا شنگالێ گەلەک یا خرابە، ھندەک داخۆیانیێن بەرپرسێن حەشدا شەعبی دبینین کو تێدا دبێژن دێ کۆمەلگەھێن ئاکنجیبوونێ بۆ حەشدێ ل ھەموو باژێر و باژێرکان دروست کەین، ئەڤ چەندە ژی کارەکێ مەترسیدارە و نوکە پرۆسا تەشەیوعکرنا شنگالێ یا بەردەوامە”.

سەبارەت رێککەفتنا شنگالێ و رەوشا شنگالێ کو د نوکە مەترسیدار بوویە پشتی رێککەفتنێ، گۆت” ل دەستپێکێ دلخوەش بووین کو نەتەوێن ئێکگرتی و وەلاتێن جیھانێ پشتەڤانیا خوە بۆ رێککەفتنا شنگالێ دیارکر، ژ وێ چەندێ دترسیاین ھندەک وەلات ئەجیندایێن تایبەت یێن خوە ل شنگالێ ئەنجام بدەن، کو ئەنجام ژی دان و ھەتا نوکە ژی رێ نادەن ئەو رێککەفتنە بکەڤیتە د بوارێ بجھئینانێ دا و رەوشا شنگالێ پشتی وێ رێککەفتنێ یا خرابتر بووی و حەشدا شەعبی یا دژوارتر بووی و پەکەکە ژی یا ب ھێزتر بووی و پرۆسا ب شیعەکرنا شنگالێ ژی سەرھلدا”.

ل دۆر وێ چەندێ کو خەلکێ شنگالێ ژیانا کەمپان ھەلبژارتیە، بەلێ ھێزێن نە شەرعی ل شنگالێ دبێژن بارێ ئەمنی ل شنگالێ یێ باش و جێگیرە، شێخ شامۆ دبێژیت” ھەکە بارێ ئەمنی یێ باش بیت، بۆچی ھەموو خەلکێ ژیان ل کەمپان ھەلبژارتینە؟ نزا وان ھێزان رۆژەکێ پرسیار ژ خوە کریە بۆچی خەلک نازڤریت بۆ جھێن خوە ل شنگالێ؟  ئەرێ ئەگەر چیە؟ دڤێت ئەو ھێز بزانن   کو ئەگەر ھەر ئەو ب خوەنە، خەلکی گەرم و سەرما یێن ھاڤین و زڤستانان یێن ھەلبژارتین ، بەلێ بن دەستیا وان ھێزان قەبوول ناکەن، چونکی دزانن ئەو د شەرعی نینن و بۆ بەرژەوەندیا خوە ل شنگالێ نە”.

سەبارەت داخۆیانیێن فەرماندێن لەشکرێ عیراقی کو دبێژن مە ھێزێن نە شەرعی یێن دەرکرین ژ شنگالێ، د دەمەکی دا پەکەکێ یا خوە ب ھێزتر کری، شێخ شامۆی گۆت” ھەموو ئەو داخۆیانیێن وان داین کو پەکەکێ و حەشدێ جھێن خوە یێن چۆلکرین د راست نینن، تنێ جلکێن خوە یێن گوھۆرین، ئێک چەکدارێ پەکەکێ ژی ژ شنگالێ دەرنەکەفتیە و نوکە ژی ھەبوونا وان مەترسیە ل سەر ئێزدیان”.

شیرەتکارێ سەرۆکێ حوکمەتا ھەرێمیً بۆ کاروبارێن ئێزدیان سەبارەت وێ چەندی ئایا فرەبازنەییا ھەلبژارتنان بۆ ئێزدیان مەترسی نینە؟ یان ژی دێ وەکو ھەمان سیناریۆیا ھەلبژارتنێن بۆری دەنگێن ئێزدیان ژناڤچن؟ گۆت” ھەکە جێگیربوون و سەقامگیری ل دەڤەرێن مادێ ١٤٠  و دەڤەرێن ئێزدی نشین ھاتبا بەرقەرارکرن، دا شێوازێ فرەبازنەیی بۆمە باش بیت، ھەکە جاران دەنگێن ئێزدیان ل شتگالێ ژناڤ چوبان، نوکە وەسا نەدبوو، چونکی تنێ سێ کورسیێن پەرلەمانی بۆ شنگالێ یێن ھاتینە دانان و ئەڤە یا ھاتیە جێگیرکرن، ئانکو سێ کورسی مسۆگەرن بۆ شنگالیان، ئەڤ شێوازێ فرەبازنەیی بۆ پێکھاتان یێ باشە، بەلێ د ڤێ بێ سەروبەریا نوکە ل شنگالێ ھەی کو ب دیتنا مە یا داگیر کریە، دێ سەختەکاری ھێتە ئەنجامدان”.

ھەولێر، قائید میرۆ

 

لایەنێن سیاسی پڕۆژە بۆ سیستەمێ لامەرکەزی بەرھەڤکرینە و بڕیارە کار بۆ بجھئینانا سیستەمێ لامەرکەزی بھێتەکرن ل ھەرێما کوردستانێ، سەرۆکێ فڕاکسیۆنا پارتی ل جڤاتا پارێزگەھا دھۆکێ ژی راگەھاند ، پارتی دگەل سیستەمێ لامەرکەزیا ئیداری و کارگێڕی یە ھەکە وەکی خوە بھێتە بجھئینان ھەروەسا دبێژیت، پارێزگەھا دھۆکێ دێ یا مفادار بیت ژ ڤی سیستەمی.

ھشیار فەریق، سەرۆکێ فڕاکسیۆنا پارتی دیموکراتی کوردستان ل جڤاتا پارێزگەھا دھۆکێ بۆ رۆژناما ئەڤرۆ گۆت” ئەم وەکی فڕاکسیۆنا پارتی ل جڤاتا پارێزگەھا دھۆکێ دگەل سیستەمێ لامەرکەزی نە، چونکە پارتی ژی دگەل سیستەمێ لا مەرکەزی یە ل ھەرێما کوردستانێ ئەوژی بۆ دابەزاندنا دەستھەلاتان ژبۆی پارێزگەھان، چونکە ھەکە دەستھەلات ب پارێزگا و یەکەیێن ئیداری بھێتەدان، بێگومان دێ وەلاتی زووتر شێت پەیاما خوە گەھینیت و ئاریشەیا خوە چارەسەر بکەت”.

ھشیاری زێدەتر گۆت” ئەم ب مەرجەکی ل گەل سیستەمێ لامەرکەزیا کارگێری و دارایی نە، کو ئەو سیستەمێ لا مەرکەزی وەکی خوە بھێتە چەسپاندن، نەکو ببیتە ئەگەرەک بۆ جوداکرنا ھەرێما کوردستانێ و چو زیان ژی بۆ پێگەھێ ھەرێما کوردستانێ نەبن، لەوڕا ژی د خۆلا دوویێ یا جڤاتا پارێزگەھێن ھەرێما کوردستانێ دا قانوونا ھژمار سێ یا جڤاتا پارێزگەھان یا سالا ٢٠٠٩ێ دەستپێکەک بوویە بۆ لامەرکەزیێ، ئەم ھەموو ببینە خودانێ ڤی پرۆژەی نەکو تنێ پارێزگەھەکێ ڤەگریت و ڤێ پارێزگەھێ ژ ھەرێما کوردستانێ ڤەقەتینیت، ھەکە پڕۆژێ لامەرکەزی ب شێوەیەکێ باش بکەڤیتە د بیاڤێ بجھئینانێ دا، چو گومان تێدانینە دێ ئێکسانیەکا جڤاکی ژی پەیدابیت”.

سەرۆکێ فڕاکسیۆنا پارتی ل جڤاتا پارێزگەھا دھۆکێ ئاماژەکر”ھەکە  پڕۆژێ سیستەمێ لامەرکەزی سەربگریت، پارێزگەھا دھۆکێ دێ مفادارترین پارێزگەھا ھەرێما کوردستانێ بیت،     ژ بەر کو ژ ھەموو لایەنان ڤە ئەم گەلەک د مەغدوورین، بەلێ ئەم دگەل بکارئینانا درووشمێن سیاسی و موزایەدێ نینین بۆ سیستەمێ لامەرکەزی، ئانکو ئەم دگەل لێدانا پێگەھێ ھەرێما کوردستانێ نینین بناڤێ چ سیستەم و پرۆژەیان، بەلکو ئەم دگەل نیەتەکا پاقژین بۆ زێدەتر خزمەتکرنا خەلکێ خوە”.

ھشیار فەریق دیارکر”پێدڤیە لیژنێن قانوونی ل جڤاتێن پارێزگەھان ل ھەرێما کوردستانێ و کەسێن شارەزا کار بۆ بەرھەڤکرنا پڕۆژە قانوونەکێ بکەن و کۆنفرانسەک بھێتە گرێدان، ھەتا ھەموو پشکداریێ بکەن و پڕۆژەیەکێ ئێکگرتی و سەردەمیانە بھێتە بەرھەڤکرن، پڕۆژە تنێ یێ سلێمانیێ نینە، ھەر ژدەستپێکا ڤێ خۆلا جڤاتێن پارێزگەھان داخواز ھاتیەکرن بۆ لامەرکەزیا ئیداری وەکی من ئاماژە ب وێ چەندێ کری ئەم وەکو پارێزگەھا دھۆکێ دێ ژ ھەموو پارێزگەھان مفادارتربین”.

ب، سەرجان مەحمود:

سەعادەدین تانتان وەزیرێ ناڤخوە یێ بەرێ یێ تورکیا د داخۆیانیەکێ دا راگەھاند کو مخابن د رێڤەبەریا وەلات دا ڤالاتی ھەیە و دەستھەلات نەشێت وەزیر و کادرێن خوە کۆنترۆل بکەت و گۆت: (ل ھەر وەلاتەکێ جیھانێ دەمێ د سیستەمێ رێڤەبرنێ دا ڤالاتی ھەبیت ھەر بەرپرسەک ب سەرێ خوە بزاڤان بکەت چو سەرمایەدارێن بیانی یان ناڤخوەیی ل وی وەلاتی کار ناکەن و سەرمایێ خوە ناکەنە ژێر مەترسیێ و ئەڤرۆ ل تورکیا ژی ب رەنگەکێ بەرچاڤ دەستھەلات نەشێت وەلاتی برێڤە ببەت و حوکمەت نەشێت ل سەر وەزیرێن خوە زال بیت و بۆ ڤێ چەندێ ھەر کەسەک وەکو خوە کار دکەت و ئەو یەک ژی زیانەکا مەزن دگەھینتە ھەموو تورکیا).

ناڤھاتی ھەروەسا راگەھاند ژی دەستھەلاتا ئاکپارتێ کو ئەڤ ۱۸ سالن تورکیا برێڤە دبەت ناسناما سازیێن دەولەتێ بەرزە کریە و ژ بەر ڤێ ژی د وارێن ئێمناھیێ، دادوەریێ و ئابووریێ دا تووشی قەیرانەکا مەزن ھاتیە و گۆت: (دەستھەلاتا نھا سیستەمێ دەولەتێ ژی تێک دایە و ھەر کەسێ کو ب دلێ ئەردۆگانی و ئاکپارتیێ نەبیت نەشێت د رێڤەبرنا وەلاتی دا خوەدان رۆل بیت، بێگومان ئەو یەک ژی دێ مەترسیەکا خوە یا گەلەک مەزن بۆ پاشەرۆژا وەلاتی ھەبیت، ژ بەر ھندێ ژی گەلەک کەسێن زانا و تێگەھشتی نەچار مان ژ تورکیا بچن).

ئەڤرۆ، ھۆشەنگ تاجر:

ماموستایەکێ زانکۆیێ راگەھاند کو رژێما ئیرانێ دەست ب ھەوەکا گرتنا چالاکڤانێن کورد کریە و د ماوەیێ دو حەفتیێن  بۆری دا پتر ژ حەفتێ چالاکڤانێن کورد ل ئیرانێ و رۆژھەلاتێ کوردستانێ ھاتینە دەستەسەر کرن و ئەو یەک ژی پێشھاتەکا مەترسیدارە و دڤێت خوەدان ھەلویست بین.

حسام دەستپیش ماموستایێ زانکۆیێ بۆ ئەڤرۆ دیار کر کو یا نھا ل رۆژھەلاتێ کوردستانێ روو ددەت پێشھاتەکا گەلەک مەترسیدارە، رژێما ئیرانێ دڤێت کوردان چاڤترسی بکەت و ئیرادا وان نەھێلیت، ژ بەر ھندێ ژی وەکو ھەوەکا نوو دەست ب گرتنا چالاکڤانێن کورد کریە، د ماوەیێ دو حەفتیێن بۆری دا ٧٤ چالاکڤانێن کورد ل رۆژھەلاتێ کوردستانێ و ئیرانێ ھاتینە دەستەسەر کرن و گۆت: (بەری نھا د بەرنامەکا تەلەفزیونا ئیرانێ دا سڤکاتی ب زمان و کەلتورێ کوردان ھاتە کرن، پرانیا چالاکڤانێن کورد ژی نەرازیبوونا خوە دیار کرن و نھا ژی رژێما ئیرانێ دەست ب ھەوەکا نوو بۆ گرتنا چالاکڤان و چاڤدێرێن سیاسی ل رۆژھەلاتێ کوردستانێ کریە، چارەنڤیسێ گەلەک گرتیان ژی دیار نینە، یا نھا ل رۆژھەلات روو ددەت بۆ چاڤترساندن و ژناڤبرنا ئیرادا گەلێ کوردە، چونکو بۆ ھەر کەسەکێ ئاشکرایە ھەر گوھۆرینەک ل رۆژھەلاتا ناڤین روو بدەت کارتێکرنا خوە ل رۆژھەلاتێ کوردستانێ دکەت و رژێما ئیرانێ ژی دڤێت کوردان بێ ئیرادە بکەت و رەوشا نھا ژی راستیا ڤی بابەتی نیشا ددەت).

ناڤھاتی دیار ژی کر کو وان دەست ب کەمپینەکا بەرفرەە ل ئورۆپا کرینە و دخوازن رایا گشتی یا جیھانێ ژ رەوشا نھا ل رۆژھەلاتێ کوردستانێ ئاگەھدار بکەن، بێگومان دڤێت چالاکڤانێن کورد ل ئورۆپا و وەلاتێن دی یێن جیھانێ ب ھەموو رێیان نەرازیبوونا خوە ل ھەمبەر گرتنا چالاکڤانێن کورد ل رۆژھەلاتێ کوردستانێ و ئیرانێ دیار بکەن و رایا گشتی ژ رەوشا نھا ئاگەھدار بکەن، ھەر تاکێ کورد ل ئورۆپا دشێت ب سەرێ خوە کەمپینەکێ برێڤە ببەت، دڤێت ل ھەمبەر رەوشا نھا بێدەنگ نەبین و پشتەڤانیێ ل برایێن خوە و خێزانێن وان ل رۆژھەلاتێ کوردستانێ بکەین و وان ب تنێ نەھێلین.

ل ئالیێ دی رێکخراوا مافێن مرۆڤی یا رۆژھەلاتێ کوردستانێ ژی دوھی د راپۆرتەکێ دا راگەھاند کو د ماوەیێ دو حەفتیێن بۆری دا ٧٤ چالاکڤانێن کورد ل باژێرێن جودا جودا یێن رۆژھەلاتێ کوردستانێ ھاتینە گرتن و ب تنێ ٥ کەس ژ وان ب کەفالەت ھاتینە ئازادکرن و ھەوا گرتنا لاوێن کورد ل ھەموو باژێرێن رۆژھەلاتێ کوردستانێ بەردەوامە، ئەو یەک ژی پێشھاتەکا گەلەک مەترسیدارە و دشێت کارتێکرنەکا خوە یا گەلەک خراب ھەبیت، ژ بەر ھندێ ژی دڤێت دەستھەلاتا ئیرانێ دەستان ژ گرتن و سێدارەدانا لاوێن کورد بەردەت و رێزێ ل ماف و ھەبوونا کوردان ل ئیرانێ بگریت.

ئەو یەک د دەمەکێ دایە کو چەند رۆژان بەری نھا رژێما ئیرانێ فلمەک بەلاڤکر و تێدا سڤکاتی ب سەرۆک بارزانی و پێشمەرگێن کوردستانێ ھاتیە کرن و ل ھەمبەر دا کوردێن ھەر چار پارچێن کوردستانێ ب رەنگێن جودا جودا نەرازیبوونا خوە ل ھەمبەر دەستھەلاتا ئیرانێ دیار کرن و راگەھاندن کو سەرۆک بارزانی رێبەرێ بزاڤا ئازادیخوازیا گەلێ کوردە و سەرۆک بارزانی ئەڤرۆکە د دلێ ھەموو کوردان دا جھێ خوە گرتیە و ب فلمەکێ کەس نەشێت رۆلێ سەرۆک بارزانی د شەرێ ل دژی داعشێ کێم بکەت، چونکو سەرۆک بارزانی و پێشمەرگێن کوردستانێ رۆلەکێ سەرەکی د لاوازکرنا داعشێ دا گێران و داعش ژ کوردستانێ دەرخستن و دربێن کوژەک ل داعشێ دان.

دیدار، نیوار محەمەد سەلیم:

ئیحسان ئامێدی سەرۆکێ ناڤەندا خانی یا رەوشەنبیری و راگەھاندنێ د دیدارەکێ دا بۆ رۆژناما ئەڤرۆ راگەھاند کو ئەڤ رەنگە کارێن ئیران ئەنجام ددەت نابنە ئەگەرێ کێمکرنا رۆلێ سەرۆک بارزانی و چو ژ شکۆ و مەزناھیا وی نائیننە خوار و جیھان و ھەڤپەیمانیا ل دژی داعش دیدەڤانن ل سەر رۆلێ وی یێ مەزن د رزگارکرنا ھەرێما کوردستانێ و تێکدانا ئەفسانەیا داعش دا.

ئەڤرۆ: بۆچی ئیرانێ ماوە ماوە ھێرشان بکەتە سەر سەرۆک بارزانی یان تۆمەت و بەھانەیێن بەتال ددەتە پال؟

ئەڤرۆ: ئیران ئێک ژ دەولەتێن کەڤنێن دەڤەرێ بوویە و ھەر ژ کەڤن دا، پارچەکا ئەردێ کوردستانێ داگیرکریە و ھەردەم سیاسەتا وێ ئەو بوویە کو کوردان پشکەک ژ خەلکێ خوە بزانن و کوردستانێ ژی پشکەک ژ وەلاتێ خوە بزانن ژ بەر ھندێ ژی ھەموو رەنگێن شەری ل دژی کوردان ئەنجام داینە. ب ھەر رەنگەکێ ھەبیت ب تنێ کورد پێ ب ئێشن و لاواز بن. ھەکە ھندەک جاران ل ھندەک جھان ژی حوکمەتا ئیرانێ پشتەڤانیا کوردان کربیت نە ژ بەر کوردان بوویە، بەلکو مەرەم پێ ھەبووینە و ژ پێخەمەت وێ چەندێ بوویە ل گەل وان لایەنێن ئیرانێ ئاریشە ل گەل ھەین بووینە دا کو ل گەل ئیرانێ ل دژی دوژمنێن وێ ب راوەستن. سیاسەتا سەرانێن ئیرانێ لێدانا ھێمایێن کوردایە یان ژی ئەو کەسێن بەرەڤانیێ ژ مافێن کوردان دکەت.

ئەڤ کورتە فلمە ژی یێ کو ل ڤێ دووماھیێ چێکری، سڤککرنەکە ب کوردان و ھێمایێن کوردان و مللەتێ کورد و د راستی دا مەزنکرنەکە بۆ ڤی ھێمایێ کوردان کو یێ ئامادەیە د پێناڤی پاراستنا کوردان دا خوە پێدڤی ڤی لایەنی و ڤی لایەنی بکەت ب مەرەما رزگارکرنا مللەتێ کورد. ئەوان ھزر کر یێ ڤی ھێمایێ مەزن یێ کوردان کێم دکەن، لێ د راستی دا نیشا دا کو ئەڤ خەمخورێ مللەتێ کورد یێ ئامادەیە ھەر تشتەکی بکەت د پێناڤی رزگارکرنا مللەتێ کورد دا. بۆ وی بەرژەوەندا مللەتێ کورد ژ ھەر لایەنەک و تشتەکێ دی گرنگترە.

ئیرانێ ھەردەم ڤیایە خەلکی بێشینیت و بێخیتە بن رکێفا خوە و ھەر چو نەبیت ھندەک جاران یاریان ب ھەستێ خەلکێ مە بکەت، ئەڤی کورتە فلمی نەرازیبوون یا ل سەر ئاستێ ھەر کوردەکی کریە یێ پیچەکا ھزرا نەتەوی ل دەف ھەبیت گەلەک تورە کریە و ل دەف مە کوردان ھێمایەکێ نەتەوی یە.

 

ئەڤرۆ: رۆلێ پێشمەرگە، ھەڤپەیمان، ئیرانێ چ بوویە د شەرێ دژی داعش دا؟

ئیسحان ئامێدی: د وێ ھێرشا ھۆڤانەیا سەر ھەرێما کوردستانێ دا، کوردان پێشبینیا شەرەکێ ژ وی رەنگی نەدکر، ژ بەر ھندێ تشتەکێ ژ نشکەکێ ڤە بوو، ژ بەر ھندێ ب ساناھی گەلەک دەڤەر ھاتنە ژ دەست دان، بەلێ ھەر زوو ب ھیمەتا سەرۆک بارزانی ھەر وەکو پێشمەرگەک د بەرەیێن شەری دا و ھەر ژی وەکو سەرۆکێ دبلۆماسی یێ مللەتێ کورد شیا سێ سەرکەفتنێن گرنگ د مەیدانا شەری دا ب دەست خوە ڤە بینیت؛ ئێک: سەرۆک بارزانی ب خوە د مەیدانا شەری دا بوو چ وەکو سەرکردە و چ ژی وەکو پێشمەرگە. دو: دبلۆماسیەتا وی و راکێشانا ھەڤپەیمانیا نێڤدەولەتی بۆ ھاریکاریکرنا پێشمەرگەی د شکاندنا داعش دا. سێ: راکرنا مۆرالا وەلاتیان کو دەما دیتی سەرۆک بارزانی ب خوە یێ ل پێشیا شەری، مورالا وان بلند دبوو، ئێدی خەلکەکێ خوەبەخش ژی قەستا بەروکێن شەری کر. ئەڤ ھۆکارە ھەموو ئەگەر بوون کو پێشمەرگە ب سەرۆکاتیا سەرۆک بارزانی و ب پشتەڤانیا ھەڤپەیمانیا نێڤدەولەتی سەرکەفتنێ تۆمار بکەت و ھەیبەتا داعش تێک بشکێنیت. ئیرانێ پشکداری یا د شەرێ داعش دا کری، بەلێ پشکداریەکا گەلەک و گەلەک کێم بوویە، ھەر ناھێتە ھژمارتن ژی، بەلێ ب پشتەڤانیا ب وەلاتێن ھەڤپەیمان ب سەرپەرشتیا ئەمریکا پێشمەرگە شیا ئەزموونا داعش ژ ناڤ ببەت. ب ھزاران پێشمەرگە بۆ ماوێ چار سالان و ب درێژاھیا ھزار و پێنجی کیلۆمەتران د سەنگەران دا بووینە. ئەو سەنگەرێ لەشکرێ ئیرانی ب چەند چەکدارێن کێم پشکداری تێدا کری، چەند کێلۆمەترێن کێم بووینە و ب چو رەنگان ل گەل پێشمەرگەی ناھێتە ھەڤبەر کرن، ھەر شەرمە بۆ وەلاتەکێ وەکو ئیرانێ بێژیت مە شەر یێ کری د پاراستنا ھەرێما کوردستانێ ل دژی داعش دا. بەلێ ئەو دشێن بێژین ب ئامادەبوون و سەرپەرشتیا سەرکردێ وان قاسم سلێمانی ئەوان یا ھێرشی سەر ھەرێما کوردستانێ کری و کەرکووک و شنگال یێن داگیر کری، ئەو ھێزا وان یا ھاتی پێ کوردستانێ داگیر بکەن سەدجارکی ھندی وێ ھێزێ بوو ئەوا ھاتی بەرەڤانیێ پێ ژ کوردستانێ بکەن.

 

ئەڤرۆ: وەلاتێ ئیرانێ ھەر ناڤبەر ناڤبەر رەنگە کارەکێ وەسان دکەت دڤێت وی رۆلێ مەزن یێ تێکشکاندنا ئەفسانا داعش بۆ خوە ب ھێلیت، بۆچی وەزارەتا رەوشەنبیری و لایەنێن شولەژێ کارەکێ ب رێک و پێک ئەنجام نادەن کو راستیا ڤی بابەتی نیشا ھەموو جیھانێ بدەن؟

ئیسحان ئامێدی: ئەم دشێین بێژین ب رەنگەکێ گشتی وەکو ھەرێم و وەکو دامودەزگەھێن رەوشەنبیری و راگەھاندنێ د کێم تەرخەم بووین بەرامبەر رۆلێ ڤی سەرکردەیێ مەزن د چاوانیا پاراستن و بەرسینگگرتن و رزگارکرنا ھەرێما کوردستان و تێکشکاندنا ئەزموونا داعش دا. د سەر ھندێ مە کۆمەکا مەزن یا فلمێن دێکیۆمێنتی و لڤین و پلانێن جەنابێ سەرۆک بارزانی یێن ھەین و دیسا ھاتنا شاندێن بیانی بۆ ھەرێما کوردستانێ و لایێ سەرۆک بارزانی وەکو سەرۆکێ فرەنسا کو ئەندامێ جڤاتا ئاسایشا نێڤدەولەتی ھاتیە ھەرێما کوردستانێ و ل گەل سەرۆکێ ھەرێما کوردستانێ دانوستاندن ئەنجام داینە و پێکڤە چووینە سەنگەران دا ژ نێزیک ھایداری رەوشا شەرێ ل دژی داعش ببن و ھەردیسا سەرۆک وەزیرێن نھا یێ بریتانیا کو ل وی دەمی وەزیرێ دەولەتێ بوو و سەرەدانا سەرۆک بارزانی کریە و پێکڤە چووینە سەنگەران. ئیران نەشێت ب فلمەکێ کێم یێ چەند دەقیقە شکۆ و مەزناھیا سەرۆک و بارزانی و پێشمەرگەی کێم بکەت، ھەڤدژی ڤێ چەندێ خەمخوریا سەرۆک بارزانی و پێشمەرگەی نیشان ددەت ل سەر پاراستنا بەرژەوەندیا کوردستانێ.

 

ئەڤرۆ: ئەم وەکو کورد ل ھەمبەر ڤان رەنگە ھێرشان چاوان رەفتارێ بکەین؟

ئیسحان ئامێدی: ھندەک تشت یێن ھەین گرێدایی رەوشتێن مرۆڤانە، دەما کو خەلک بێ رەوشتیەکێ نیشان بدەت نابیت مرۆڤ ژی وەکو وان خوە کێم و نزم بکەت، دڤێت ب ژیرانە سەرەدەریێ بکەین، ئەوان دڤیا سڤکیێ ب ھێمایێن مە بکەن. پێدڤیە نیشا بدەین کا ئەم کی نە و ئەو فلمێن دێکیۆمێنتی یێ ل بەر دەستێ مە ھەین ئەو سەرکردێن مە یێن ل دەمێ کاری بەری شەھید ببن و ھەبوونا ئەو قەھرەمانێن مە ھەین و ھەبوونا سەرۆکی ل بەرۆکێن شەری و ھەروەسا پەیوەندیا وی ل گەل جیھانێ و چێکرن و ئینانا ھەڤپەیمانیا نێڤدەولەتی ل دژی داعش ئەڤە ھەموو ب خوە بەرسڤێن ئارامن ئەم نیشا جیھانێ ھەموویێ بدەین و بکەینە فلمێن ب رێک و پێک و وەرگێرینە سەر زمانێن جیھانی ئەڤە ب خوە دێ بنە بەرسڤ و نیشان دەت کو سەرۆک دلسۆزێ دۆزا خوە بوویە و پێشمەرگەی قەھرەمانیێن مەزن تۆمار کرینە.

 

ئەڤرۆ: بۆچی د ڤێ رەوشا ئابووری یا خرابا دەڤەر تێدا دبۆریت، ئیران خوە ب کارەکێ وەسان ڤە مژیل دکەت؟

ئیحسان ئامێدی: کۆمەکا فاکتەران ھەنە کو د ناخێ خوە دا پێ دئێشیت کو دبیتە ئەگەر ئیران ڤان رەنگە کاران بکەت؛ ژ وان پێگەھێ سەرۆکێ یە ل سەر ئاستێ رۆژھەلاتا ناڤەراست و ئەو سەروەریا سەرکەفتنا گەلێ کوردستانێ بۆ جیھانێ و قارەمانێ وێ یێ مەیدانی سەرۆک بارزانی بوویە. سەرۆک بارزانی ھەبوونا خۆ ل سەر ئاستێ ھەموو جیھانێ ھەیە و دەرکەفتن و سەرکەفتنا دۆستێ سەرۆک بارزانی جۆ بایدن وەکو سەرۆکێ مەزنترین وەلاتێ جیھانێ کو وی ب خوە گۆتیە سەرۆک بارزانی ئەز و تو پێکڤە دێ سەربەخۆیا کوردستانێ بینین. ژ بەر ڤان ئەگەران ئیران گەلەک پێ دئێشیت ژ بەر ھندێ ژی دڤێت ھەر ناڤبەر ناڤبەر ھندەک کارێن ژ ڤی رەنگی ئەنجام بدەت و ئیرانێ ب خوە ب خوە ژی ھندەک ئاریشە د ناڤ خوە دا ھەنە نە خەلکێ وێ باوەری پێ دھێت و نە ئەمانەت ھەیە و رەوشا وێ یا ئابووری ژی یا خرابە. یا مایتێکرنێ د چەندین وەلاتان دا دکەت و ملیاران دۆلاران د مەزێخیت و خەلکێ وێ یێ بریسی یە، ئیرانێ ئاریشە و ھەڤرکی ل گەل پتریا وەلاتێن جیھانێ ھەنە، دا کو خەلکی مژیل کەت ھندەک جاران ڤان رەنگە کاران دکەت. رەوشا ئیرانێ یا خرابە و بەر ب خراببوونێ ڤە دچیت.

 

ئەڤرۆ: تو نابینی کو دەمێ ئیرانێ ئەو پشتەڤانیا کێم یا ھەرێمێ کری ژی، ب تنێ ڤیایە بەرژەوەندیێن خوە ب پارێزیت نە کوردان؟

ئیحسان ئامێدی: ئیران تشتەکی بۆ ئێکی ناکەت، ھەکە بەرژەوەندیێن وێ یێن تایفەگەری یان یێن ئابووری تێدا نەبن، ئیران نەھاتیە کوردان ب پارێزیت وەکو مە گۆتی ل چەند کیلۆمەترێن کێم ب ھاریکاریەکا گەلەک کێم ل دژی داعش راوەستیایە. مە دەستخۆشی ل سەر وی کاری ل وان کریە، بەلێ ھەژی ھندێ نینە کو ئیران بێژیت مە کارەکێ کری. شەرەکێ چار سالی ب درێژاھیا ھزار و ٥٠ کیلۆمەتران، ١٠٠ ھزار پێشمەرگە بەردەوام ل سەنگەران، ١٧٥٠ شەھید و ١١ ھزار بریندار، ب ٥٠ چەکدار و ١٠٠ گولەیێن ھاونی دێ چ کەن؟ ھەلبەت د ھاوکێشێن لەشکری دا چو رامانێن خوە نینن.

ئەوا ھاوکێشا شەری گوھۆڕی و داعش شکاندی ئەفسانا پێشمەرگەی بوو ب سەرۆکاتیا سەرۆک بارزانی و ل عەسمانان ژی ھێزێن ھەڤپەیمانان. ھەڤکاریا ھەردو لایەنان بوویە ئەگەرێ سەرکەفتنێ و رۆلێ ئیرانێ ب تنێ یێ خرابکرنێ بوویە، ڤیایە دەستێوەردانێ د رەوشێ دا بکەت. بەلێ ئەو تشتێ ئەو بۆ ھاتین و وان ڤیایی ب دەست ڤە بھێت ب دەست ڤە نەچوو. باشترین گرۆڤە ژی ل سەر گۆتنێن مە ئەوە کو ھەڤپەیمانیا نێڤدەولەتی ئەوا ژ ٦٠ دەولەتێن جیھانی بۆ ژناڤبرنا داعش ھاتیە پێک ئینان قەبوول نەکر ئیران ببیتە پشکەک ژ وێ ھەڤپەیمانیێ. رۆلێ ئیرانێ د ھاوکێشا ل دژی داعش و تێکشکاندنا داعش (چنە) بوویە.

 

ئەڤرۆ: گەلەک مالپەرێن ئەلکترۆنی یێن ئەنترنێتێ ل ھەرێما کوردستانێ ئەڤ فلمە بۆ ھێرشکرنا سەر سەرۆک بارزانی ب دەلیڤە دیت و ئەڤ ڤیدیۆیە سپۆنسەر کر ب تایبەت ئەو میدیایێن خوە ب و بێ لایەن دبینن؟

ئیحسان ئامێدی: یا ئێکێ، فلم دەولەتەکا داگیرکەرا کوردستانێ ل دژی کوردستانێ یێ چێکری، ھەر کوردەک پێدڤیە دژی رەوفتارێن دەولەتێن داگیرکەرێن کوردستانێ ب راوەستن، ژ بەر ھندێ ئەو مالپەرێن ل پەیجێن خوە یێن تۆرێن جڤاکی سپۆنسەریا ڤی کورتە فلمی دکەن و بەلاڤ دکەن، خزمەتا دوژمنێن کوردستانێ یە. ئەڤە تشتەکە دژی بەرژەوەندا نەتەوی یە. ئەڤە دکەڤنە د خانا دوژمن و غائینان دا.

یا دویێ ژی ھەکە ھەر کوردەکێ تەماشەی فلمی کربیت ب تنێ وژدانا وی ب لڤلڤیت دێ بینیت سڤکاتی پێکرنە ب نەتەوەکی، بەلێ ھەکە ژ لایەکێ دژی ڤە تەماشەی ڤی فلمی بکەین دێ بینین کو سومبۆلەکێ نەتەوی کو سەرۆک بارزانی یە چەندێ ب لەزە کارەکێ ب لەز بھێتە کرن ھەرێم بھێتە پاراستن، ئەڤە ژی مەزاناتیا سەرۆکی دیار دکەت. یێ لەزێ دکەت و خزمەتێ دکەت و خوە پێدڤی ئیران، ئەمریکا، ئورۆپا دکەت سەرۆک بارزانی یە و ئەڤە ژی مەزناتیەکا گەلەک مەزنە بۆ جەنابێ سەرۆکێ کو ئەوا وی کری بۆ خاترا کورد و کوردستانێ بوو.

د ھەر کارەکێ لەشکری ژی دا، سەرەدەری ل گەل ئەنجامی دھێتە کرن، د ئەنجام ژی دا ھەرێما کوردستانێ ھاتە پاراستن، داعش شکەستن و بارزانی و پێشمەرگەی سەرکەفتن ئینا.

 

ئەڤرۆ: تو نابینی ئەڤە دێ کارتێکرنێ ل پەیوەندیێن ھەرێما کوردستانێ و ئیرانێ کەن ھەکە خوە د ئاستەکێ لاواز ژی دابن؟

ئیحسان ئامێدی: چو پێ نەڤێت ھەکە لایەنەک ھەبیت سکڤاتیێ ب پیرۆزیێن لایەنێ دی بکەت یان بۆ نەخۆش کەت دێ بیتە ئەگەر لایەنێ دژی کارڤەدانێن خوە ھەبن، ژ بەر ھندێ ژی کرێتە بۆ دو وەلاتێن ھەڤسۆ کارەکێ ژ ڤی رەنگی بکەت ب تایبەت بۆ دەولەتەکا مەزن یا وەکو ئیرانێ کو ھەڤرکیا ئەمریکا دکەت خوە بینیتە رێزا ھەرێما کوردستانێ و کارەکێ ژ وی رەنگی کو ب ٥٠ کەسان بۆ دەمەکێ کێم ل رووبەرەکێ کێم بەرەڤانی کریە، د ئێک ھێرشا ئەسمانی یا ئسرائیل دا بەری چەند رۆژان زێدەتری ٥٠ چەکدارێن ئیرانێ ھاتنە کوشتن بێ کو وان چو کارڤەدان ھەبن، مەزنترین سەرکردێ وێ یێ لەشکری قاسم سلێمانی ل نیڤا بەغدا ھاتە کوشتن ئیران نەشیا چو بکەت، وەکو کارڤەدان ھندەک مووشەک ل دەوروبەرێن بەردەرەش دان یا ژ وان ڤە ئەمریکا یا ل وێری.

 

ئەڤرۆ: ھەکە تە ل دووماھیێ تشتەک ھەبیت بێژی؟

ئیحسان ئامێدی: گەلێ مە و پێشمەرگەی ب سەرۆکاتیا سەرۆک بارزانی چەندین سالان خزمەت یا کری بۆ پاراستنا ئەزموونا ھەرێما کوردستانێ. فلمەک یا راپۆرتەک یان گۆتنەک نەشێت سڤکاتیێ ب وێ قوربانیدانا گەلێ کوردستانێ و ھێمایێ وێ بکەت. پێشمەرگە ژی سمبۆل و ھیمایێ گەلێ مەیە و شیایە ھەرێما کوردستانێ ب پارێزیت و ل قووناغێن بھێت ژی خەلکێ مە دێ ل ژێر ئالایێ سەرۆک بارزانی بەردەوامیێ ب خەباتا خوە دەت ژ پێخەمەت پاراستنا ھەرێما کوردستانێ دەڤەرێن مایین ژی دێ ھێنە رزگار کرن و سەرشوری ژی بۆ دەولەتا ئیرانێ و رژێما یا کو ڤان کارێن چەپەل دکەت و بۆ دیڤەلانکێن وێ یێن کو پشتەڤانیا ڤان کاران دکەن.

website security
WP Facebook Auto Publish Powered By : XYZScripts.com