ئەڤرۆ، ئەسعەد رێکانی:

ئەکتەر (بەدرخان رێکانی) د دیدارەکێ دا بۆ رۆژناما ئەڤرۆ گۆت: پشتی سەرھەلدانێ من حەزەکا زۆر بۆ ئەکتەریێ ھەبوو، پشتی دەلیڤە ھاتی من پشکداری د چەندین شانۆگەری و کورتە فلمان دا کر، پاشی ل سالا ١٩٩٦ ئەز چوومە دبۆارێ درامایێ دا و ئێکەم پشکداری من د فلمێ ھەڤال دا کر ل دھوکێ و ھەتا نوکە من پشکداری د ٣٠ فلم ودراما وز نجیرە وشانۆگەریان دا کریە و خۆشترین بەرھەم ل دەف من فلمێ دایک بوو دەمێ مە سالا ٢٠٠٤  چێکری و ئەز خوشیێ ژ درامایێ دبینم و مە ل بەرە د ئەڤ سالە پشکداری درامایەکا نوو بین و درامایێن باش پشتەڤانیەکا باش و ب ھێز پێ دڤێت.

ناڤھاتی گۆت: دراما کارەکێ پیرۆزە ژبەرکو خۆشی ونە خۆشیێن خەلکی دگەھینیت، ھەروەسا رێنیشاندەرەکە بۆ راستڤەکرنا کارێن خراب، زێدەباری کو رەوشەنبیریەکا گشتی یە ژھەموو لایەکێ ڤە بۆ جڤاکی.

ئەڤرۆ، رەمەزان ھەرنی:

شانۆڤان و شێوەکار چۆڤین تاھیر، د دیدارەکێ دا بۆ رۆژناما ئەڤرۆ گۆت: دەمەکە من چو کارێن نوو ئەنجام نەداینە، بتنێ ل بۆارێ شێوەکاری من ھندەک کار ئەنجام داینە و ئەگەرێ بێدەنگیا من ئەوە من دڤێت درەنگتر دەرکەڤم بەلێ دەمێ دەردکەڤم کارەک بیت ل ئاست ڤیانا بینەری بیت ھەتا کو دەقەکێ باش نەھێتە بەردەرستێ پشکداریێ د چو شانۆگۆریان دا ناکەم .

ناڤھاتیێ گۆت: من پتر ل بۆارێ شانۆیێ کارکریە و خوە پتر د شێوەکاریێ دا دبینم لەورا پتر گرنگیێ ددەمە  شێوەکاری، نوکە بتنێ ل سەر داخوازا خەلکی وێنان دروست دکەم و ئەڤێ چەندێ زۆر دەمێ من گرتیە و گەلەک داخوازی بۆمن ھاتینە کۆ وێنان بۆ چێکەم.

ئەڤرۆ، زنار تۆڤی:

دەرھێنەر(تەنیا کەریم) کو نوکە ل باژێرێ ھەولێرێ دژیت و کارێ دەرھێنانێ بۆ چەندین فلمان کرییە، دووماھی فلمێ وی یێ سینەمایی (کچا کا فرۆش) بوویە و چەندین خەلات ب وی فلمی وەرگرتینە، د دیدارەکێ دا بۆ رۆژناما ئەڤرۆ دیارکر کو قەیرانا دارایی و ڤایرۆسێ کۆرۆنایێ ھەموو کارێن وان راوەستاندینە، ھەرچەندە وی چەندین کار و پرۆژێن نوو یێن سینەمایی ل بەر دەست ھەنە، لێ ژبەر نەبوونا مەزاختنێن دارایی دەست ب وان پرۆژێن خوە نەکریە و ل بەر نینە د ئەڤ سالە ژی دا ھندەک ژ وان کاران بەرھەم بینیت.

ناڤھاتی گۆت: وی دو فلمێن سینەمایی پێشکێشی وەزارەتا رەوشنبیری کربوون، لێ ژ بەر قەیرانا دارایی چ بۆدجە بۆ نەھاتنە تەرخانکرن، ھەروەسا وی دڤیا فلمێ سینەمایی (بەرب ئۆرشەلیم) چێکەت، ئەڤ فلمە بۆ چار زامانا ھاتبوو وەرگێران، لێ ئەو ژی ژبەر نەبوونا بۆدجێ نەھاتە چێکرن.

ل دووماھیێ گۆت: ئەز گەلەک حەز ژ کارێ سینەمایێ دکەم، لێ ژبەر نەبوونا وی کاری من دەست ب کارێ شێوەکاریێ یە، ئەڤ ژی ژبۆ پەیداکرنا پارپێ ژیانێ یە و ھەکە رەوش باش بیت دێ جارەکادی دەست ب کارێن سینەمایی کەم.