ئه‌ڤرۆ نیوز:
لگۆری دوماهی ئامار ل هه‌موو جیهانێ ل سه‌ر ڤایرۆسێ كورونایێ، توشبوویێن كورونایێ ژ 9 ملیۆن كه‌سان ده‌رباز بوو.
ئامارێن سه‌ر ڤایرۆسێ كورونایی ئاماژه‌یێ ب ئه‌وێ چه‌ندێ دده‌ن، كۆ ل هه‌موو جیهانێ توشبوویێن كورونایێ گه‌هشته 9 ملیۆن و 52 هزار و 9سه‌د و 58 كه‌سان، ژ ئه‌ڤێ ژماره‌یێ ژی 4 ملیۆن و 842 هزار و 306 كه‌س ساخ بووینه، ل گه‌ل ئه‌ڤێ چه‌ندێ ژی 370 هزار و 844 توشبویان ژی گیانێ خوه ژ ده‌ست دایه.
ئەڤرۆ نیوز،عەلی حاجی :
رێڤەبەرێ ناحیا باتیفا د داخویانیەکێ دا بۆ ئەڤرۆ نیوز دیار کر گوندێ کەشانێ یێ سەر ب ناحیا باتیفا ڤە بەریا دەمەکی بۆ ئێکەم جار هاتە چوول کرن و چ کەس د وی گوندی دا نەمایە.
زێدەتر دلشێر عەبدولسەتار گۆت: ل شەڤا دەرباز بوویی یا رۆژا ئێک شەمبی نێزیکی ٩ خێزانان گوندێ کەشانێ بجهـ هێلان ژ ئەگەرێ شەرێ بەردەوامێ دناڤبەرا پەکەکێ و سوپایێ تورکیا دا و بەردەوامیا توپبارانا وی گوندی ژلایێ سوپایێ تورکیا ڤە، ئەڤرۆ رۆژا دوو شەمبێ ژ نەچاری شەش خێزانان دناڤ وی گوندی ژی دا ماین ب ئێکجاری گوندێ کەشانێ بجهـ هێلان و نوکە دا چ کەسەک د وی گوندی دا نەمایە و ب ئێکجاری هاتە چوول کرن و بجهـ هێلان و گوندی ژی د دەمەکێ دایە کو بەردەوام دەوروبەر و هەتا ناڤ گوندی ب خوە ژی دا د هاتە توپباران کرن و د ماوەیێ دەست ب کاربونا من دا وەکو رێڤەبەرێ ناحیێ بۆ ئێکەم جارە ئەڤ گوندە ب ئێکجاری دهێتە چوول کرن.
ناڤبری گوت ژی : ب چوول کرنا گۆندی ژی دێ زیانێن ماددی بەر ب جۆتیارێن وی گۆندی کەڤیت ژبەرکو کارێ جۆتیاریێ ل وی گۆندی ب رێژەیەکا زێدە دهاتە کرن.
ب گورەی پێزانینێن ب دەست ئەڤرۆ نیوز کەڤتین ل سنورێ ناحیێن باتیفا و دەرکارێ نێزیکی ١٠٠ گۆندان هەتا نوکە ژ ئەگەرێ هەبوونا هێزێن پەکەکێ و سوپایێ تورکیا هاتینە چول کرن و دهێتە چاڤەرێکرن هندەک گوندێن دیتر ژی بهێنە چوول کرن.
ئه‌ڤرۆ نیوز، نه‌وزاد هلۆرى:
پشتى لێگه‌ریانێن به‌رده‌وام بو حاله‌تێن كۆرۆنایێ، ئه‌ڤرۆ ل گوندێ مێرۆز یا سه‌ر ب ده‌ڤه‌را بارزان حاله‌ته‌كێ نوو یێ كۆرۆنایێ هاته ده‌ستنیشانكرن، بڤێ یه‌كێ هژمارا حاله‌تێن كۆرۆنایێ ل ده‌ڤه‌را بارزان گه‌هشته سێ كه‌سان.
دكتور هه‌وار عه‌بدوللا، رێڤه‌به‌رێ نه‌خۆشخانا گشتى یا بلێ بۆ ئه‌ڤرۆ نیوز گۆت: (دبه‌رده‌وامیا گه‌ریان و دوڤچوون ل سه‌ر حاله‌تێن كۆرۆنایێ، ئه‌ڤرۆ حاله‌ته‌كێ نوو یێ كۆرۆنایێ ل گوندێ مێرۆز یا سه‌ر ب ده‌ڤه‌را بارزان هاته توماركرن كو ئه‌و ژى پێشمه‌رگه‌یه‌كه و خه‌لكێ پیرمامه و ل میرۆز ده‌وامێ دكه‌ت).
زێده‌تر گۆت: (داكو گیانێ وه‌لاتیان پاراستى بیت و زێده‌تر خه‌لكێ ده‌ڤه‌رێ توشى ڤایرۆسا كۆرۆنایێ نه‌بیت، گوندێ مێرۆز ب تمامى هاته كه‌ره‌نتینكرن بۆ ده‌ما 14 رۆژان، پاشان تیمێن مه دێ ژ نێزیك سه‌ره‌دانێ بۆ كه‌ن داكو ئه‌و كه‌سانێن به‌ركه‌فتى بهێنه پشكنین كرن و پاراستى بن ژ كۆرۆنایێ). ب گوره‌ى ئاخفتنێن ناڤبرى، ئه‌ڤه دبیته حاله‌تێ سێیێ یێ كۆرۆنایێ كو ل ده‌ڤه‌را بارزان دهێته توماركرن.
پێشتر ژى چوار گوندێن ده‌ڤه‌را بارزان ژ به‌ر توماركرنا دوو حاله‌تێن كۆرۆنایێ هاتبونه كه‌ره‌نتین كرن كو ئه‌و ژى هه‌ر ئێك ژ گوندێن هه‌سنان، رێشه، هوستان و كوركێ بوون.
ئه‌ڤرۆ نیوز:
ب ئارمانجا ژناڤبرنا چه‌كدارێن داعشێ ل ده‌ڤه‌رێن سه‌لاحه‌دین تا دیالا و سامه‌را و كه‌ركوك، ئوپراسیونا هه‌ڤپشكا عیراقێ و قوناغا سیێ كۆ ب ئوپراسیونا قاره‌مانێن عیراقێ ده‌ستپێكر.
عه‌مید یه‌حیا رسول په‌یڤدارێ گشتی یێ هێزێن چه‌كدارێن عیراقێ راگه‌هاند ب فه‌رمانا مسته‌فا كازمی فه‌رمانده‌یی گشتی یێ هێزێن چه‌كدارێن عیراقی ب سه‌رپه‌رشتیا فه‌رمانده‌یێ ئوپراسیونێن هه‌ڤپشك سپێده‌هیا ئه‌ڤرۆ 22/6/2020 بۆ پاقژكرنا ده‌ڤه‌رین پارێزگه‌ها سه‌لاحه‌دین و توخیبێ وێ ل گه‌ل فه‌رمانده‌یێن ئوپراسیونا دیالا و سامه‌را و كه‌ركوكی ل سێ ئالیان ڤه قوناغا سێ یا ئوپراسیونا قاره‌مانێن عیراقێ ده‌ستپیكر.
په‌یڤدارێ گشتی یێ هیزێن چه‌كدارێن عیراقێ ئه‌و چه‌نده ژی راگه‌هاند ئه‌و سێ قولێن هاتیه ده‌ست نیشانكرن بۆ هێرشبرنێ كۆ قولێ ئێكێ ژلایێ هێزێن وه‌زاره‌تا به‌ره‌ڤانیێ یه و قولێ دوێ ژلایێ هێزێن سه‌ر ب وه‌زاره‌تا ناڤخو و قولێ سیێ ژلایێ هێزێن سه‌ر ب حشدا شه‌عبی ڤه هه‌ر سی قول پێكڤه بۆ ژناڤبرنا داعشێ ده‌ست ب ئوپراسیونێ كرینه.
ناڤبری ئه‌و چه‌نده ژی دیاركر ئارمانج ژ ئه‌ڤێ ئوپراسیونێ ژناڤبرنا پاشمایێن چه‌كدارێن داعشێ و ژناڤبرنا ڤه‌شارگه‌ه و رامالینا پاشمایێن شه‌ری و چه‌سپاندنا ئه‌من و ئاسایشێ یه ل ده‌ڤه‌رێ.
ئه‌ڤرۆ نیوز:
سه‌رۆكێ جڤاتا نوونه‌رێن عیراقێ راگه‌هاند تانوكه 20 ئه‌ندامێن جڤاتا نوونه‌رێن عیراقێ توشی ڤایرۆسێ كورونایێ بوون و ساخله‌میا هنده‌ك ژ وان باش نینه.
محه‌مه‌د حه‌لبوسی سه‌رۆكێ جڤاتا نوونه‌رێن عیراقێ راگه‌هاند پێنج ئه‌ندامێن جڤاتا نوونه‌ران وان بخو گوتیه من ئه‌مێن تووشی ڤایرۆسێ كورونایێ بووین، به‌لێ لگۆری زانیاریان 20 ئه‌ندامیێن جڤاتێ و 28 كارمه‌ندێن جڤاتا نوونه‌ران توشی كورونایی بووینه، ژ به‌ر ئه‌ڤێ چه‌ندێ زۆر زه‌حمه‌ته كۆمبوون بهێته‌كرن.
وه‌زره‌تا ساخله‌میا عیراقێ رۆژا ئێك شه‌مبێ گیان ژ ده‌ستدانا 87 كه‌سان راگه‌هاند بڤێ ژی ته‌ڤایا ئه‌وین ب ڤایرۆسێ كوروناێ گیانێ خو ژ ده‌ست داین گه‌هشته هزار و 100 كه‌سان.
ئه‌ڤرۆ نیوز:
هونه‌رمه‌ند عه‌تا چاوشین ب ئه‌گه‌رێ توشبوونا وی ب ڤایرۆسێ كورونایی گیانێ خو ژ ده‌ست دا.
سپێده‌هیا ئه‌ڤرۆ عه‌تا چاوشین هونه‌رمه‌ندێ ناڤدار ب ئه‌گه‌رێ ڤایرۆسێ كورونایێ ل نه‌خوشخانه‌یێ گیانێ خو ژ ده‌ست دا.
هونه‌رمه‌ند هه‌تا چاوشین ل هه‌فتیین بوری توشی ڤایرۆسێ كورونایی بوو ب ئه‌گه‌ری خرابیا ره‌وشا ساخله‌میا وی ئامیرێ هه‌ناسه‌دانا ده‌ستكرد ژی بۆ دانابوو به‌لێ ئه‌ڤرۆ گیانێ خو ژ ده‌ست دا.
ئه‌ڤرۆ نیوز:
سه‌رۆكێ ده‌ستیه‌یا ئامارێ ل وه‌زاره‌تا پلان دانانا حكومه‌تا هه‌رێما كوردستانێ راگه‌هاند ئیسال نه‌شیێن پرۆسه‌یا سه‌رژمێریا وه‌لاتیان ئه‌نجام بده‌ین و دو هه‌وێن دبیاڤێ هه‌ژاریێ و بیكاریێ ژی دێ ئه‌نجام بده‌ین.
سیروان محه‌مه‌د سه‌رۆكێ ده‌سته‌یا ئامار ل وه‌زاره‌تا پلان دانانا حكومه‌تنا هه‌رێما كوردستانێ راگه‌هاند: بریار بوو ل هه‌یڤا تشرینا دوێ یا ئیسال پرۆسه‌یا سه‌رژمێریا وه‌لاتیێن عیراقی و هه‌رێما كوردستانێ بهێته ئه‌نجام دان، به‌لێ ب ئه‌گه‌رێ دابین نه‌كرنا بودجه و پێدڤی و ئه‌و كاودانێن سیاسی و ئه‌منی و ساخله‌میێن عیراقێ هاتنه پێش بریار هاته دان پرۆسه بهێته پاش خستن.
سه‌رۆكێ ده‌سته‌یا ئامار ل وه‌زاره‌تا پلان دانانا حكومه‌تنا هه‌رێما كوردستانێ ئه‌و چه‌نده ژی راگه‌هاند دوور ژ ئه‌ڤێ چه‌ندێ مه وه‌ك هه‌رێما كوردستانێ ره‌خنه ل سه‌ر شێوازێ سه‌رژمێریكرنێ هه‌بوون، تایبه‌ت ل ده‌ڤه‌رێن كوردستانی ده‌رڤه‌ی هه‌رێمێ، له‌ورا سالا بهێت كو دێ هێته‌كرن دڤێت هه‌موو ئه‌و گرفت بهێنه چاره‌كرن، پاشی پرسه‌یا سه‌رژمێریكرنێ بهێته‌كرن.
ناڤبری ئه‌و چه‌نده ژی دازانین نوكه مژیلی رێپیڤه‌كێ نه دبیاڤێ هه‌ژاری و بێكاریێ كو پشت به‌ستنێ ب موچه‌یێ فه‌رمانبه‌ران ل كه‌رتێ حكومه‌تی و تایبه‌ت بهایێ كه‌ل و په‌لان و پاشی رێژه هێته راگه‌هاندن ژبوی ل ده‌مێ پێدڤی و چاره‌كرنێ پشت به‌ستن ل سه‌ر بهێته‌كرن.
ئه‌ڤرۆ نیوز،عه‌لی حاجی :
جۆتیاره‌كێ چاندنا برنجی ل زاخۆ بۆ ئه‌ڤرۆ نیوز دیار كر هه‌كه بازرگان خوه ل كرینا برنجی بكه‌نه خودان دێ بینه خودانێ باشترین برنجی ل سه‌ر ئاستێ عێراقێ، نه‌بوونا پشته‌ڤانیا كه‌رتێ تایبه‌ت نه‌چار كرینه بتنێ بۆ كه‌سێن نێزیكی خوه برنجی بتنێ بچینین .
زێده‌تر هندرین موسته‌فا گۆت: د ئه‌ڤ ساله دا بتنێ ل سه‌ر دوو دونه‌مێن ئه‌ردی من برنج چاندی یه به‌لێ هه‌كه بازرگانه‌ك خوه ل مه بكه‌ته خودان و برنجی بكریت دێ شێن باشترین برنج به‌رهه‌م بینن كو زێده‌باری هه‌بوونا رێژه‌یه‌كا زۆر یا بازرگانان و چو كه‌س خوه ل كرینا برنجی ناكه‌ته خودان ئه‌و ژی به‌ر وێ چه‌ندێ یه كو قازانجا برنجی یا كێمه و هه‌كه بازرگان خوه لێ بكه‌نه خودان دێ ب رێژه‌یه‌كا زێده‌تر خه‌لك برنجی چینیت و دێ كارێن باشتر هێنه كرن، به‌لێ هه‌ر دیسان ژی پێدڤی یه حكومه‌ت ب خوه ژی هاریكار بیت ب تایبه‌تی ژی د دابین كرنا كاره‌بێ دا .
ناڤبری گۆت ژی : د سالانێن بوری دا دبیت مه ئاڤه‌كا زێده‌تر مه‌زاخت بیت به‌لێ د ئه‌ڤ ساله دا مه ته‌كنیكه‌كا دیتر ب كارئینایه بۆ ئاڤدانا برنجی كو ئاڤێ ب شێوه‌یه‌كێ كێمتر خه‌رج بكه‌ت و ئه‌ڤه ژی دێ بیته رێیه‌كا ساناهیتر بۆ ئاڤدانا برنجی و ئه‌ڤ چه‌نده ژی من پشت به‌ستن دانایه سه‌ر شیانێن خوه و بو سالێن بهێت دێ رێژه‌یا چاندنا برنجی زێده‌تر لێكه‌م .
ئه‌ڤرۆ نیوز:
لگۆری دوماهی ئامارێن ڤایرۆسێ كورونایێ ل سه‌ر ئاستێ جیهانێ، ئه‌ڤرۆ ژماره‌یا توشبوویێن ڤایرۆسێ كورونایێ ل به‌رازیل ژ ملیۆنه‌ك توشبوویان ده‌رباز بوو.
لگۆری ئه‌وان ئامارێن جیهانی ل سه‌ر ڤایرۆسێ كورونایێ به‌رده‌وام دهێنه به‌لاڤكرن، ئه‌ڤرۆ ل به‌رازیلێ ملیۆنه‌ك و 70 هزار و 139 كه‌س توشبوویێن كورونایێ بوون و ژ وێ رێژێ ژی 50 هزار و 58 توشبوویان گیانێ خو ژ ده‌ست دایه.
به‌رازیل پشتی ئه‌مریكا دهێت و ب پله‌یا دوێ ب توشبوویێن كورونایی دهێته هژمارتن.
ئه‌ڤرۆ نیوز:
وه‌زیرا كارۆبارێن جڤاكی یا حكومه‌تا هه‌رێما كوردستانێ راگه‌هاند سوبه‌هی دێ هه‌رسێ سه‌رۆكاتیێن هه‌رێما كوردستانێ كۆم بن و بریارا دوماهیێ ل سه‌ر موچه‌ی و ده‌رماله‌یان ده‌ن.
كویستان محه‌مه‌د وه‌زیرا كارۆبارێن جڤاكی یا حكومه‌تا هه‌رێما كوردستانێ راگه‌هاند پشتی دئه‌وێ كۆمبوونا رۆژا شه‌مبیێ دا وه‌زیرێن حكومه‌تێ بووچوونێن جودا ل سه‌ر ده‌ستكاریكرنا موچه و ده‌رماله‌یان هه‌بوون، ئه‌ڤرۆ ئێك شه‌مبی جڤاتا وه‌زیران برێكا ڤیدیو كۆنفرانس كۆم دبن و پرسا موچه‌یی ئێخنه به‌ر دانوستاندنان، به‌لێ د كۆمبوونا ئه‌ڤرۆ ژی دا پرسا موچه و ده‌رماله‌یان بریارا دوماهێ ل سه‌ر ناهێته دان.
وه‌زیرا كارۆبارێن جڤاكی یا حكومه‌تا هه‌ریما كوردستانێ ئه‌و چه‌نده ژی راگه‌هاند بریاره سوبه‌هی هه‌ر سێ سه‌رۆكاتیێن هه‌رێما كوردستانێ كۆمبن و بریارا دوماهێ ل ده‌ر موچه و ده‌رماله‌یان بده‌ن.
نيشاندان