ئەڤرۆ نیوز،عەلی حاجی :

ئەندامەکێ جڤاتا پارێزگەها دهۆکێ بۆ ئەڤرۆ نیوز دیار کر وەکو ئەندامێن جڤاتا پارێزگەهێ ل زاخۆ کار بۆ دانانا هێلا ١٢٢ ل زاخۆ دهێتە کرن ژبەر کو ئەو هێلە بتنێ ل باژێرێ دهۆکێ هەیە و ل قەزایێن دیتر نینە.
زێدەتر دێوالی محسن گۆت : مە ژ نێزیک ڤە ژی سەرەدانا رێڤەبەریا ساخلەمیا زاخۆ ژی کری یە و وان ژی ژلایێ خوە ڤە دیار کری یە کو ژ روویێ ترۆمبێلان ڤە وان چو ئاریشەیەک نینە بتنێ وان ئاریشەیا کێمیا کارمەندان هەیە بۆ دانانا وێ هێلێ ژی پێدڤی ب هندەک کارمەندان هەیە ٢٤ دەمژمێران د کاری دا بن،مە پێشنیارەک ئاراستەی رێڤەبەریا گشتی یا ساخلەمیێ ل پارێزگەها دهۆکێ کری یە دا کو شەش هەتا هەشت کارمەندان هەر چو نەبیت ب گرێبەست دانان داکو بشێن وێ هێلێ بێخینە د کاری دا ژبەر کو باژێرێ زاخۆ ب سێ سنوران ڤە گرێدایە و پێدڤی یەکا مەزنە زاخۆ ئەو هێلە هەبیت،هەر دیسان هەکە کارمەند هاتنە تەرخان کرن دێ سێ تیمەان دانین کو ئێک دێ دناڤ باژێرێ زاخۆ دا بیت و تیمەکا دیتر دێ ل سنورێ ناحیا رزگاری بیت و تیمەکا دیتر بۆ ناحیێن باتیفا و دەرکارێ بیت.

ئەڤرۆ نیوز،عەلی حاجی :

قایمقامێ زاخۆ د داخویانیەکێ دا بۆ ئەڤرۆ نیوز دیار کر ماوەیێ سێ رۆژایە دەست ب بەلاڤ کرنا پارەیێ زیان ڤێکەڤتیان ل زاخۆ هاتیە کرن و بریارە د ماوەیێ رۆژەکێ هەتا دو رۆژان ب دوماهی بهێت.
زێدەتر بوتان محسن گوت : رۆژانە ئەو پارەیێ بۆ زیان ڤێکەڤتیێن لەهیێن زاخۆ دهێنە دابەش کرن ب تایبەتی ئەو مالێن توشی زیانێن مەزن بووین و هەتا نوکە ژی ژمارەیەکا باش یا هاریکاریان هاتینە بەلاڤ کرن،ئەو پارەیێ بۆ زاخۆ و دهۆکێ هاتیە دەست نیشان کرن ژ هەمی قەزایێن دیتر زێدەتر ژبەر کو ژ هەمی دەڤەران زێدەتر زیان بەر ب خەلکێ زاخۆ کەڤت بوو،ئەو لژنا هاتیە پێک ئینان ژی رێژەیەکا ژ وی پارەیی هاتیە کێم کرن ل هەمی دەڤەران ژبەر کو هەمی دەمان د دەرخستەیان دا رێژەیەک ژ پارەی زێدەتر دهێتە تومار کرن،نوکە دا لژنەیەکا دیتر دەست ب تومار کرنا زیانێن خودانێن دکانان دکەن ژبەر کو ئەو پارێ نوکە دهێنە بەلاڤ کرن بۆ زیان ڤێکەڤتیێن مالانە و ئەو هاریکاری ژی بۆ مالێن وان ب خوە دهێنە رەوانە کرن بێ کو بهێنە قایمقامیا زاخۆ.
و گوت ژی : نوکە دا ئەم مژوولی رێ پێدانا ڤەکرنا بانکێن ئەهلی و نڤێسینگەهێن پارە گهورانە ل زاخۆ ژبەر کو ل دوید نووترین بریار ژی دێ د حەفتیەکێ دا دو روژ بح وان هێنە دەست نیشان کرن و هەر دیسان دەمژمێرێن وان یێ کاری ژی و زێدەباری وێ چەندێ ڤەگوهاستنا پارەیی ژ دەڤەرەکێ بۆ دەڤەرەکا دیتر دناڤ پارێزگەهێ دا رێک دێ پێ هێتە دان ل دویف وان روژێن بۆ وان هاتینە دەست نیشان کرن.