لەزگینێ چالی

٢٣- پشتی «سەرسنك»ێ دبێ بێھنۆك ئانكۆ فاریزەیەك ھەبت، ژبەر كۆ پارچەیەكا دی ژ ھەڤۆكێ دەست پێ دكت: … سەرسنك، ل ڕۆژا …
٢٤- رۆژا ب «ر»ێ یا قەلەو دەست پێ دبت: ڕۆژا.
٢٥- ھەر وەكی ھات گۆتن، دبێ د ناڤبەرا دوكڤانكان و پەیڤا د ناڤ وان دا چ ڤالاھی نەبن، ئانكۆ ( دوشەمبی ) شاشە و (دوشەمبی) ڕاستە.
٢٦- «دوشەمبی» د ڕەوشا موزافون ئیلەیھی ئانكۆ پالڤدانێ دا یە و پەیڤا «ڕۆژ»ێ ل وێ ھاتیە ئیزافەكرن، لەوما دبێ بھێت تەواندن و ببت «ڕۆژا دوشەمبیێ».
٢٧- دیار دبت كۆ كەسێ ئەڤ ئاگەھداری نڤیسیە د تشتەكێ دی دا ژی شاشە. وی ل دەستپێكێ «2» د پەیڤا «دوبارە»یێ دا ب دو واوان نڤیسیبوو (دووبارە)، لێ د پەیڤا «دوشەمبی»ـیێ دا ب واوەكێ نڤیسیە (و یا درست ئەوە كۆ «2» ب واوەكا ب تەنێ بھێت نڤیسین).
٢٨- پشتی پەیڤا «دوشەمبی»ـیێ ژی دبێ بێھنۆك ئانكۆ فاریزەیەك ھەبت، ژبەر كۆ «ڕێكەفتی ھندە» پارچەیەكا دی یا ھەڤۆكێ یە كۆ ژبۆ زەلالكرنێ ھاتیە دا مرۆڤ بزانت كا بەھسا كی دوشەنبیێ دھێت كرن. د ڤێ ڕەوشێ دا، ئان دبێ ڕێكەفتا وێ دوشەنبیێ د ناڤبەرا دو كڤانكان دا بنڤیسین، ئان ژی ئەگەر مە ل بەر بت وێ وەكی پارچەیەكا سەرەكی یا ھەڤۆكێ بنڤیسین، ھنگی دبێ بێھنۆكەك ھەبت دا مرۆڤ بزانت كۆ پارچەیەكا دی یا ھەڤۆكێ یە.
٢٩- دیسا، د پارھەڤۆك ئانكۆ ڕستەیا «ڕێكەفتی 24/6/2024»ێ دا ئەو ھەژمار پارچەیا سەرەكی یا ڕستەیێ نە و نابت بكەڤن ناڤبەرا دو كڤانكان.
٣٠- ئەگەر مە ڤییا وان ھەژماران وەكی پارچەیەكا نەسەرەكی و ب تەنێ ژبۆ زەلالكرنێ بنڤیسین، ھنگی پێدڤی ب نڤیسینا بێھنۆكێ و پەیڤا «ڕێكەفتی»ـیێ ناكت و مرۆڤ ھەما دكارت درست پشتی پەیڤا «دوشەمبی»ـیێ د ناڤبەرا دو كڤانكان دا ھەژمارێ بنڤیست، ھۆسا: ل ڕۆژا دوشەنبیێ (24/6/2024).
٣١- پشتی «24/6/2024»ێ ژی دبێ بێھنۆكەك ئانكۆ فاریزەیەك ھەبت: … 24/6/2024، ل كۆچكا …
٣٢- پەیڤا «كوچك» ژی شاش ھاتیە نڤیسین. ل ڤێدەرێ واوا «كوچك»ێ واوەكا قەلەوە. مە د كوردیێ دا ئەڤ سێ پەیڤ ھەنە: 1. كوچك (ب واوا كورت) ب مەعنایا كوچكێ ئاگری. د كۆكا خوە دا «كوچك» بەرە، بەرێن وەسا مەزن كۆ پڕانی یا جاران ل دۆرا ئاگری دھاتن ڕێزكرن، و پاشی ھێدی-ھێدی ناڤێ ئاگردانی ب خوە ژی بوو كوچك. 2. كۆچك (ب واوا قەلەو) دیوەخان، جھێ ڕوونشتنا میر و ماقۆلان. ب سۆرانی دبت «كۆشك». 3. كووچك (ب واوا درێژ) ب مەعنایا زارۆكێ سەیان ئانكۆ سەگان ئان سەیێن بچووك. لێ ل ھندەك دەڤەران پەیڤا كووچكێ ھەما بوویە ناڤێ سەیان ب گشتی.
٣٣- ڕێڤەبەری دبێ ب «ر»ێ یا قەلەو دەست پێ بكت.
٣٤- پشتی «ڕێڤەبەریێ» دبێ بێھنۆك ئانكۆ فاریزەیەك ھەبت: … ڕێڤەبەریێ، نێزیك پانزینخانا …
٣٥- «پانزینخانا» شاشە، دبێ بھێت نڤیسین «پانزینخانەیا/پانزینخانە یا». د ئاخڤتنا ڕۆژانە دا ئەڤ كورتكرن ھەیە، لێ د نڤیسینێن فەرمی دا دبێ زمانەكێ فەرمی بھێت بكارئینان. «كتێبخانا گشتی» ژی وەسا یە؛ درستا وێ «كتێبخانەیا گشتی» یە.
٣٦- «پانزینخانەیا كارزان» شاشە. ژبەر كۆ پەیڤا «پانزینخانە»یێ ب سەر پەیڤا «كارزان»ێ ڤە ھاتیە ئیزافەكرن، «پانزینخانە» ئامرازێ ئیزافەكرنێ، ئانكۆ «یا»یێ وەردگرت و دبت «پانزینخانەیا» و «كارزان» ژی دبێ ببت «كارزانێ». مخابن كۆ ئەڤ شاشی ل دھۆكێ گەلەك مشە یە: زانكۆیا دھۆك، ڕادیۆیا دھۆك، … د ڕێزمانا كوردیێ دا، پەیڤا كۆ پەیڤەكا دی ب سەر دا دھێت ئیزافەكرن دبێ بھێت تەواندن ئانكۆ چەماندن. ڤێجا، گەلەك ئاوایێن ئیزافەیێ ھەنە، ئێك ژ وان ملكیەتە، ژبەر كۆ جارەكێ من ل سەر «زانكۆیا دھۆك»ێ ڕەخنە ل سەیدایەكێ زانینگەھێ گرتن و وی گۆت كۆ «زانكۆیا دھۆك» نە یا باژارێ دھۆكێ یە، ب تەنێ ناڤێ وێ «دھۆك»ـە (وەكی كۆ ھوون دكارن ل ڤێدەرێ ژی ببێژن ب تەنێ ناڤێ پانزینخانەیێ «كارزان»ـە و پانزینخانە ب خوە نە یا كارزانی یە، یا بابێ وی یە، یا ئەحمەدی یە). چ تشتەك ناھێتە گوھارتن، قانوون و بنەما قانوون و بنەمایەكا ڕێزمانی یە. ما دەما خەلكێ دھۆكێ دبێژن «ھەرێما كوردستانێ» ما مەقسەدا وان ئەوە كۆ تشتەك ھەیە ب ناڤێ «ھەرێم»ێ و پاشی ژی تشتەك ھەیە ب ناڤێ «كوردستان»ێ و ڤێجا پاشی ئەڤ ھەرێم یا وێ كوردستانێ یە، ژبەر ھندێ دبێژن «ھەرێما كوردستانێ»، ئان ژی مەرەما وان ئەوە كۆ ھەما كورت و كورمانجی ناڤێ وێ ھەرێمێ كوردستانە؟؟؟؟ چما خەلكێ دھۆكێ ھێشتا دبێژن «ھەرێما كوردستانێ» و (ھندەك ژ وان) عەجێب دبینن كۆ ببێژن «زانكۆیا دھۆكێ»؟ ب من بەرسڤ ئەشكرا یە. ناڤێ «ھەرێما كوردستانێ» یێ ھنگی یە كۆ ھێشتا دھۆكیان ب ئاقلێ خوە یێ كوردەواری ھزر دكر، لێ «زانكۆیا دھۆك» یا ھنگی یە كۆ ب ئاقلەكێ عەرەبی ھزر دكر. ئەگەر ناڤێ زانكۆیێ دھۆك بت ئان یا باژارێ دھۆكێ بت ھەر فەرق ناكت، د گۆتنێ دا ھەر دبێ بھێت گۆتن «زانكۆیا دھۆكێ». مەعنایا «ھەرێما كوردستانێ» نە ئەوە كۆ ھەرێمەك ھەیە كۆ خودانا وێ «كوردستان»ـە؛ ھەما ناڤێ ھەرێمێ كوردستانە، لێ دیسا ژی مە گۆتیە «ھەرێما كوردستانێ» و مە نەگۆتیە «ھەرێما كوردستان». ھەر ب وی ڕەنگی ژی، زانكۆیا دھۆكێ نە شەرتە كۆ یا كەسەكێ ئان تشتەكێ ب ناڤێ «دھۆك»ێ بت، ھەتا ئەم ببێژین «زانكۆیا دھۆكێ». ھەما ناڤێ وێ ب تەنێ ژی «دھۆك» بت، دبێ ئەم ببێژین «زانكۆیا دھۆكێ» (بئینە بەرچاڤێن خوە «ھەرێما كوردستانێ»). پانزینخانە ژی وەسا یە، ناڤێ وێ «كارزان» بت، دبێ بھێت گۆتن «پانزینخانەیا كارزانێ». ب چ ڕەنگەكی «پانزینخانەیا كارزان» نابت كوردی. ئەگەر ببێژین ب تەنێ ناڤێ پانزینخانەیێ «كارزان»ـە و خودانێ وێ بابێ وی یێ ئەحمەدە ژی، ھەر دبێ بھێت گۆتن «پانزینخانەیا كارزانێ»، ژبەر كۆ ڕاستە «كارزان» ناڤەكە ژبۆ مێران دھێت بكارئینان، لێ «پانزینخانە» ب خوە مێ یە. ئەگەر ناڤێ پانزینخانەیێ ب خوە نە «كارزان» بت و ب تەنێ خودانێ وێ كەسەك بت ب ناڤێ «كارزان»ی، ھنگی ژی دبێ بھێت گۆتن «پانزینخانەیا كارزانی». ل ڤێدرێ ئەز بەھسا كوردیەكا پیڤانكی و ستاندارد دكم، ژبەر كۆ ل گەلەك دەڤەرێن كوردستانێ ئەڤ تەواندنا ناڤێن نێر نەمایە.
٣٧- پشتی «پانزینخانەیا كارزانێ» دبێ نوقتە ئانكۆ خالەك ھەبت، وەكی نیشانا خلاسبوونا ھەڤۆكەكێ. د وێ ھەڤۆكێ دا بەھس ھات كرن كۆ ڕێڤەبەری یا وەرزشێ ل دھۆكێ دخوازت چ بكت و كەنگی بكت و ل كیدەرێ ژی بكت. ئێدی نھا دێ بەھسا وێ بھێت كرن كۆ ئالی یێن كۆ دخوازن وان یاریگەھان كرێ بكن چ بكن.
٣٨- فاریزە ئانكۆ بێھنۆكا پشتی «كارزان»ێ زێدە یە، ئێك، یا دویێ ژی ئەوە كۆ د ناڤبەرا بێھنۆك (فاریزە «،»)، نوقتە (خال «.»)، دو خالێن ل سەر ئێك (:)، بێھنۆكا ل سەر خالێ (؛)، نیشانێن پرسیارێ (؟) و عەجێبمانێ (!) و پەیڤێن بەری وان دا نابت چ ڤالاھی ھەبن. ژبەر كۆ ئەگەر د دەما ڕاچاندنا بەرپەڕان دا جھـ نەما، ئەو نیشان نەچن دێڕەكا دی ئان بەرپەڕەكێ دی و ھێتیم و سێوی نەمینن.
٣٩- ھەتا ڤێدەرێ ھەڤۆك ئان جوملەیەكا ئاگەھداریێ دقەدت ئانكۆ خلاس دبت، لێ چ نیشان ژبۆ خلاسبوونا ھەڤۆكێ نەھاتیە دیاركرن ھیچ، مرۆڤ دكارت ببێژت كۆ ڕێزبەندی یا پەیڤان نە ل گۆرەیێ ھەڤۆكسازی یا زمانێ كوردی یە. ھەڤۆك ب كوردیەكا باشتر وەھا دھێت نڤیسین:
دووبارە، ڕێڤەبەری یا وەرزشێ ل دھۆكێ ڕادگەھینیت كۆ دێ ل ڕۆژا دوشەنبیێ، ڕێكەفتی 24/6/2024ێ، ل كۆچكا ڕێڤەبەریێ، نێزیك پانزینخانەیا كارزانێ، رابیت ب سەرئێكزێدەكرنا ب كرێدانا یاریگەھێن وەرزشی یێن 11-یاریزانی ل گردەسین و سەرسنكێ.
٤٠- ھەڤۆك د بن باندۆرا زمانێ عەرەبی دا ھاتیە نڤیسین و گەلەك باشتر بوو كۆ ل شوونا «دێ ڕابیت ب سەرئێكزێدەكرنا ب كرێدانا …» ھاتبا نڤیسین «دێ یاریگەھێن وەرزشی یێن یازدەھـ-یاریزانی ل گردەسین و سەرسنكێ ب سەرئێكزێدەكرنێ ب كرێ بدت».
٤١- «ھەر كەس» دو پەیڤن، ب شاشی وەكی ئێك پەیڤ ھاتیە نڤیسین.
٤٢- ئارەزوو دبێ ب دو واوان بھێت نڤیسین.
٤٣- «شیان و ئارەزوو» بوون دو تشت، ھنگی دبێ بھێت گۆتن «ھەبن»، ئانكۆ ل ڤێدەرێ «ھەبیتن» شاشە.
٤٤- پەیڤا «ڕێڤەبەری»ـیێ بۆ سەر پەیڤا «ناڤبری»ـیێ ڤە ھاتیە ئیزافەكرن، لەوما ئامرازێ پالڤدان و ئیزافەیێ (ـا) ل دووماھی یا وێ ھاتیە، لێ ژبەر كۆ «ڕێڤەبەری» ب خوە ب «ی»ـیێ خلاس دبت، دبێ یایەكا دی ژی ژبۆ ئیزافەكرنێ بھێت زێدەكرن: «ڕێڤەبەرییا/ڕێڤەبەری یا».
٤٥- «بو» شاشە، «بۆ» درستە، ب واوا قەلەو.
٤٦- ل ڤێدەرێ مەرج ناھێن وەرگرتن، مەرج دھێن زانین: «ژبۆ زانینان مەرجان» گەلەك باشترە ژ «وەرگرتنا مەرجان».
٤٧- «مەرجێن گرێبەستێ» گەلەك درستە. ژ ئالی یێ ڕێزمانی ڤە ئەو ژی ھەر وەكی «ڕێڤەبەری یا ەرزشێ» یە. مەرج یێن گرێبەستێ نە، ڕێڤەبەری ژی یا وەرزشێ یە. لێ «وەرزش» نەھاتیە تەواندن و «گرێبەست» ھاتیە تەواندن. ھەردو دبێ بھێن تەواندن.
٤٨- دیسا، ڕۆژ ب «ر»ێ یا قەلەو دەست پێ دكت.
٤٩- ئاوایێ ڕێزكرنا پەیڤێن ھەڤۆكێ نە ھەژی یێ نڤیسینەكا فەرمی ژ دەزگەھەكا فەرمی یا حوكمەتێ یە. باشتر بوو كۆ پەیڤێن ھەڤۆكێ ل گۆرەیێ ھەڤۆكسازی یا كوردیێ ھۆسا ھاتبان ڕێزكرن:
ھەر ئالی یێ شیان و ئارەزوو ھەبن بلا ھەر ژ ڕۆژا بەلاڤكرنا ڤێ ئاگەھداریێ ژ بۆ وەرگرتنا مەرجێن گرێبەستێ سەرەدانا رێڤەبەری یا ناڤبری بكەت.
٥٠- پشتی «… ڤێ ئاگەھداریێ» دبێ نوقتە ئانكۆ خالەك بھێت دانان، ژبۆ دیاركرنا خلاسبوونا ھەڤۆكەكا دی.
٥١- «بۆ زانین» شاشە، ژبەر كۆ «بۆ» ژی وەكی «ل»، «ژ»، «د»، … ژ ئامرازێن تەواندن، ئانكۆ وەكی د عەرەبیێ دا دبێژن، «جەررە» نە. لەوما دبێ «بۆ زانینێ» بھێت نڤیسین. «بو زانین» شاشە.
٥٢- بۆ زانینا ھەوە، ھەر د دێڕا بەری ڤێ دا «بۆ» ب واوا كورت ھاتبوو نڤیسین (كۆ شاشە)، لێ د ڤێ دێڕێ دا و دو دێڕێن پشتی وێ دا ژی دو جارێن دی «بۆ» ھاتیە و ھەر سێ جاران ژی درست و ب واوا قەلەو ھاتنە نڤیسین. تشت ھۆسا ب خوەشی ب ڕێ ڤە ناچن و دیسا د ھەڤۆكا دووماھیێ دا «بو»ـیەكا دی ب واوا كورت سەرێ خوە ھل ددت ڤە.
٥٣- پشتی «بۆ زانینێ» دبێ بێھنۆك ئانكۆ فاریزەیەك ھەبت، ژبەر كۆ پارچەیەكا نوو ژ ھەڤۆكێ دەست پێ دكت.
٥٤- «ماوێ» شاشە، ژبەر كۆ پەیڤ ب خوە «ماوە» یە و ژبەر ئامرازێ تەواندنێ ئانكۆ «جەررە»یێ (بۆ) ھاتیە تەواندن؛ لەوما دبێ ل شوونا «ماوێ» بھێت نڤیسین «ماوەیێ» (چاوا كۆ دبێ ل شوونا كتێبخانێ ژی بھێت نڤیسین كتێبخانەیێ).
٥٥- «2» نابت بكەڤت ناڤبەرا دو كڤانكان دا، ئەو زانیارەكا ئانكۆ مەعلوومەیەكا سەرەكی یا ھەڤۆكێ یە.
٥٦- «سالا» شاشە، درستا وێ د زمانێ فەرمی یێ نڤیسینێ دا «سالان»ـە. كورد ل شوونا «كوردان گۆت، مرۆڤان دیت، دژمنان كوشت»ێ دبێژن «كوردا گۆت، مرۆڤا دیت، دژمنا كوشت» ژی، لێ ھەر وەسا كورد ل شوونا «ئەز دبێژم، من گۆت»ێ دبێژن: «ئە دبێم، م گۆ» ژی. لێ یا ڕاست ئەوە كۆ د نڤیسینێن فەرمی دا وەسا كورتكری نەھێن نڤیسین.
٥٧- دیسا، «سەرئێكزێدەكرن» دبێ ب سەر ھەڤ ڤە، وەكی ئێك پەیڤ بھێت نڤیسین.
٥٨- ژبەر باندۆرا زمانێن سەردەست یێن وەكی تركی و عەرەبیێ، ھندەك كورد ھێدی-ھێدی راوەیا بلانی یا لێكەر ئانكۆ كاران دھاڤێژن. دا ئەز روھنتر بكم كا چ دبێژم. ئەم كورد دبێژین «ئەگەر تو بچی سەیرانێ، ئەز ژی دێ ھێم». لێ ئەگەر عەرەبەك فێری كوردیێ بووبت، ئان كوردەك ل بەغدایێ دگەل عەرەبان مەزن بووبت، بخوازت ھەر ڤی تشتی ببێژت، دبێژت، «ئەگەر تو دچی سەیرانێ، ئەز ژی دێ ھێم». ھوون پێ حەسیان؟ ئەرێ! دەما مەرجەك، شەرتەك، نەدیاریەك، داخوازەك د ھەڤۆكێ دا ھەبت، كار ئانكۆ فعل ب ئاوایێ بلانی دھێت، ئانكۆ وەكی ڤێ نموونەیا مە، دھێت گۆتن «بچی» ل شوونا «دچی». د ڤێ ئاگەھداریێ دا ژی ئەگەرەك ھەیە، «ئەو كەسێ سەرئێكزێدەكرن بۆ بكەڤیت» درستتر و كوردیترە. ژبەر كۆ ھێشتا ژبۆ چ كەسەكی نەكەڤتیە، و مەرجەك دھێت دانان كۆ ھەر كەسێ بۆ وی «بكەڤیت» دێ پارەیێ تێچوون ئانكۆ مەسرەفا ئاگەھداریێ د ڕۆژنامەیێ دا ژی بدت.
٥٩- ئەڤ جۆرەیێ «ئەداكرن»ێ د كوردیێ دا ژبۆ من غەریبە. كوردی یا وێ یا ڕاست و درستتر ئەوە كۆ دێ «مەزاختی یێن ئاگەھداریێ كەڤن سەر ملێن وی».
٦٠- پشتی «ئەداكەت»ێ دبێ خال ئانكۆ نوقتەیەك ھەبت، ژبەر كۆ ھەڤۆكەكا نوو دەست پێ دكت.
٦١- دیسا، «بو» شاشە، «بۆ» درستە، ب واوا قەلەو.
٦٢- «زێدەتر پێزانینان» نە كوردی یە. كوردی یا وێ «پێزانینێن زێدەتر»ـە.
٦٣- پشتی «بۆ پێزانینێن زێدەتر»ێ دبێ بێھنۆكەك ھەبت، ژبەر كۆ پارچەیەكا دی یا ھەڤۆكێ دەست پێ دكت.
٦٤- «ژمارا» شاشە. پەیڤا ڕەسەن «ژمارە» یە، لەوما د دەما ھاتنا ئامرازێ زێدەكرن ئانكۆ ئیزافەیێ دا دبێ بھێت نڤیسین «ژمارەیا».
٦٥- تەلەفۆن پەیڤەكا ئەوڕۆپایی یە. ھەر دەڤەرەكا كوردستانێ دبت كۆ ب ئاوایەكێ جدا ئەو پەیڤ ژ سەردەستان وەرگرتبت. من ئەڤ ھەمی ژ كوردان بھیستنە: تەلەفۆن، تێلەفۆن، تێلێفۆن، تیلیفۆن، تەلفۆن، تلفۆن، … لێ من ژ چ كوردەكی نەبھیستیە كۆ ببێژت «تلەفون». ئانكۆ، كورت و كورمانجی، واوا «تەلەفۆن»ێ دبێ ھەر واوەكا قەلەو بت.
٦٦- پشتی «بكەن»ـا دووماھیێ ژی، ھەر چ نەبت ژبەر خلاسبوونا ئاگەھداریێ دبێ خالەك ھاتبا دانان.
ھندەك تێبینی یێن دی ژی من ھەنە، كۆ دبت نە شاشی یێن شاشی بن، لێ دیسا جھێ گەنگەشەیێ نە:
٦٧- «ھەركەس» د ڤێ ئاگەھداری یا فەرمی دا پچەكێ نەفەرمی یە. ژبەر كۆ ممكنە كەسەك نەخوازت وان یاریگەھان كرێ بكت، كۆمپانیایەك ئان ڕێكخستنەك بخوازت وی كاری بكت. لەوما باشتر دبوو كۆ ھاتبا گۆتن «ھەر ئالی یێ شیان و ئارەزوو ھەبن، بلا سەرەدانا ڕێڤەبەری یا ناڤبری بكەن».
٦٨- ل سەر پەیڤا «شەمبی»ـیێ ژی مرۆڤ دكارت گەنگەشەیەكا بچووك بكت. لێ، ممكنە كۆ ڕەھا پەیڤێ «شەنبی» بت. چاوا كۆ ئەم «بەرانبەر»ێ ژی دكن «بەرامبەر/بەرمبەر» وەسا ژی ممكنە كۆ «شەنبی» بووبت «شەمبی». ئێدی ھندەكان كورتتر ژی كریە و كریە: شەممی، شەمی، شەم (ئێكشەم، دوشەم، …)
٦٩- ئەز نزانم كا گردەسین ڕاستە ئان گردەسێن. لێ ب زارۆكینی یا خوە من ژ مەزنان ھەر «گرەسێن» بھیستیە.
٧٠- ئەز نزانم كا سەرسنك ڕاستە ئان سەرسنگ.
٧١- فعل ئانكۆ كارێ دەما نەبھوری د زمانێ كوردی دا ب چەند ئاوایان دھێت گۆتن. ژبۆ میناكێ ڕادگەھینینتن، ڕادگەھینیت، ڕادگەھینت، ڕادگەھینێ، ڕادگەھینە. ئەڤ ھەمی ژی ڕاستن، لێ ممكنە مرۆڤ بكارت گەنگەشەیەكێ بكت كا كی ژ ڤان ئاوایان وەكی ئاوایێ سەردەست ئانكۆ پیڤانكی بھێت بكارئینان.
ئەز دفكرم كۆ ھەكەر ڤێ ڕێڤەبەریێ كتێبەكا وەرزشی چاپ كربا دا چەند شاشی تێدا ھەبن. لێ دیسا سپاسی یا وان دكم كۆ ب خێرا ڤێ نڤیسینا وان یا تژی شاشی و ژبەر ڤێ بێڕێزیكرنا وان یا ئەشكرا بەرانبەر زمانێ كوردی ئەز شییام ڤێ خزمەتێ بكم و ژبۆ وان و ژبۆ خەمخوەرێن دی ڤان تێبینی یێن خوە بنڤیسم. بلا ئەم پچەكێ ڕێزێ ل خوە و زمانێ خوە بگرین. باوەر بكن بێ زمانێ خوە ئەم ھەر نامینین ژی.